Marco 1

Juan chi Porochoaparipa jarateada

Mateo 3:1-12; Luca 3:1-9; 3:15-17; Juan 1:19-28

1-2Nãɨ chi pedea pia Tachi Ak'õre Warra Jesucristo k'orea bɨdapɨ. Naena chi Tachi Ak'õre pari pedeaparí Isaíapa nãɨya bɨsima:

«Chi mɨ pari pedeaparí pɨ naa peeipɨ, pɨ pae o jarimẽrá.#Malak'ia 3:1.

3Ẽpẽra ĩjũa pania newẽa bɨde jĩk'ua pedea bɨma:

“O jarit'ɨ Tachi Chipari pia chemẽrá.

O ichi pae jĩp'a jarit'ɨ”».#Isaía 40:3.

4Mãɨya Juan chi Porochoaparí ĩjũa pania newẽa bɨde ẽpẽerã́ jaratea beesima ãchia nemietá oopataɨ itu bɨdak'ari Tachi Ak'õremá chedamẽrá. Ichia jarasima mãɨya oosidara Tachi Ak'õrepa ãchi nemietá oodada k'ɨ̃risia atuait'a. Maapae porochoadai p'anɨane apachima. 5Mãɨne ẽpẽerã Jerusalenepemarã mãɨnepa ãarea Judea tuadepemarã Juanmá wãpachidama. Ãchia nemietá oodada ichi k'ĩrari jaradak'ari ãchi Jordán tode porochoapachima.

6Juan neet'á camello k'ara k'ada jɨ̃pachima. Ichi k'ɨrrɨde jɨ̃parí ãnimara e ooda jɨ̃pachima.#1:6 Ichi k'ɨrrɨde jɨ̃parí ãnimara e ooda jɨ̃pachima. Juan chi Porochoaparipa neet'á jɨ̃pachima chi Tachi Ak'õre pari pedeaparí Elía jɨ̃pachi jĩra. Sisi k'opachima mãɨnepa mẽapema jɨrrɨjõ jõpachima. 7Mãɨne nãɨya jarateapachima: «Mɨ k'aadea aba cheipɨ. Ichi mɨ k'aepẽra atepe bɨma. Mãɨpuru mɨ sĩraporode k'obeek'ari, ichia jĩrune jɨ̃ bɨ ẽrai k'orea mɨ mãɨ pae pida pia bɨwẽma. 8Piarã mɨa mãra paniapa porochoasima maamina ichia Tachi Ak'õre Jaoredepa porochoaipɨ».

Juanpa Jesú porochoada

Mateo 3:13-17; Luca 3:21-22

9Mãɨ ewaride Jesú Nazaré p'uuru Galilea ĩjũane bɨdepa Juan bɨmá wãsima. Mãma cheside Juanpa Jordán tode ichi porochoasima. 10Jesú toedaɨpa ochiaside pajã ewa nɨbɨt'a unusima. Mãɨne Tachi Ak'õre Jaore p'aloma jĩra ichi ɨ̃rɨ cheru unusima. 11Tachi Ak'õrepa pajãnepa edá nãɨya pedeasima: «Pɨ mɨ Warra chi k'ɨ̃ria bɨpɨ. Pɨ k'orea mɨ sõ arapá bɨma».#Isaía 42:1.

Tiorepa Jesua nemietá mĩesa oopiyá bada

Mateo 4:1-11; Luca 4:1-13

12Mãɨne Tachi Ak'õre Jaorepa Jesú ĩjũa pania newẽa bɨdea wãpisima. 13Mãma ewari k'ak'o cuarenta tiorepa ichiá mĩesa jarasima nemietá oomẽrá. Mãma ãnimara mietá t'ãena basima mãɨnepa Tachi Ak'õrepa ɨt'aripa peedaɨrãpa ichi k'aripa p'anasima.

Jesupa jaratea beeda

Mateo 4:12-17; Luca 4:14-15

14Juan chi Porochoaparí eda jɨ̃a nɨbɨdak'ari Jesú Galilea tuadea wãk'ari chi pedea pia Tachi Ak'õre k'orea jarateapachima.#1:14 Pedea pia Tachi Ak'õre k'orea. Griego pedeade chi eda waapẽarã k'art'ade bɨ bɨma: Chi pedea pia Tachi Ak'õrepa ichidirã ichi juade ua bɨ k'orea. 15Nãɨya jarapachima: «Chi ewari ará pasima. Tãaraawẽa bɨde Tachi Ak'õrepa ichidirã ichi juade ua baipɨ.#Daniel 2:44. Mãrapa nemietá oopataɨ itu bɨdak'ari mãɨ pedea pia ĩjãat'ɨ».

Jesupa to bat'apataɨrã t'ɨ̃na

Mateo 4:18-22; Luca 5:1-11

16Jesú Galilea senia ik'idá wãrune Simón mãɨnepa chi ũpẽa André unusima. Mãɨrã to bat'apataɨrã pasi pẽra, to bat'amaa p'anasidama. 17Mãɨya p'anɨne Jesupa ãchiá jarasima:

—Mɨ ome chet'ɨ. Mãrapa to bat'apata jĩra mɨa mãrá jarateaipɨ ẽpẽerã mɨmá enemeenamẽrá.

18Ara mãɨne t'ɨri ameenak'ari Jesú ome wãsidama.

19Mãmãɨpa naa wãsidaɨde, Jesupa Santiago mãɨnepa chi ũpẽa Juan unusima. Ãchi Zebedeo warrarã pasima. P'ãp'orrode t'ɨri k'õa bet'a wãamaa p'anasidama. 20Mãɨne Jesupa ãchi sida t'ɨ̃sima ichi ome wãnamẽrá. Ara mãɨne Santiago mãɨnepa Juanpa ãchi ak'õre Zebedeo mãɨnepa chi ichi pae mimiapataɨrã p'ãp'orrode ameenak'ari Jesú ome wãsidama.

Jesupa jaore mietá ãyá jeret'aada

Luca 4:31-37

21Ãchi Capernaum p'uurudea wãsidama. Maapae mimianak'apɨ́ ewaride Jesú judiorã ará pedeapataɨ tedea wãk'ari Tachi Ak'õre pedea jaratea beesima. 22Jaratea bɨde jõmãɨrãpa k'awa k'ɨ̃risiadaé pasima. Chi Moisepa bɨda jarateapataɨrã jĩra jarateak'a pasima. Mãɨpari minachia k'awa bɨdepa pia jaratea basima. 23Mãɨya p'anɨne, mãɨ judiorã ará pedeapataɨ tede, ẽpẽra jaore mietá pará bɨ nãɨya jĩk'ua pedeasima:

24—¡Jesú Nazaredepema! ¿K'ãre k'orea tai waa oo bɨma? ¿Tai k'enane chesik'ãra?#1:24 ¿Tai k'enane chesik'ãra? Jesupa ãchi peaiwẽ pasima, mãɨpari ãchi ɨtɨai pasima, ewaricha mĩanamẽrá. Mɨa k'awa bɨma pɨ k'ait'a: ¡Pɨ Tachi Ak'õrepa peedapɨ!

25Jesupa chi jaore mietá nãɨya ɨtɨasima:

—¡K'ĩup'ease! Jãɨ k'ak'uadepema ãyá wãse.

26Ara mãɨne chi jaore mietapa chi ẽpẽra wawapik'ari, ya minachia biak'ari ãyá wãsima. 27Mãɨpuru ãareaɨrãpa k'awa k'ɨ̃risiadaé pasima. Ara ãchi paara idi para beesima: «¿Nãɨ k'ãrema? Jesupa jaratea bɨ mãɨ chiwidipɨ, ichi juade ãarea uru bɨdepa pia jarateapari pẽra. Chi jaore mietaarã pida ichia jararut'a ũripatama».

28Mãɨ k'orea jõma Galilea tuade tãaraawẽa bɨde Jesú t'ɨ̃ p'oa nɨbeesima.

Jesupa Simón Pedro p'ak'õre jɨpa beepida

Mateo 8:14-17; Luca 4:38-41

29Mãɨne chi judiorã ará pedeapataɨ tedepa wãnak'ari Simón tedea wãsidama Jesú, Santiago mãɨnepa Juan. Simón ũpẽa André sida mãma basima. 30Mãɨne Jesua jarasidama Simón p'ak'õre k'ɨamiapa k'ɨdade bɨt'a. 31Orrobarik'ari, juade jitak'ari p'irabaripisima. Ara mãɨne k'ɨamia tuusima. Maapae Simón p'ak'õrepa ãchiá nek'opisima.

32K'iuk'ari ẽpẽerãpa k'ak'ua piawẽa be mãɨnepa jaore mietá pará be Jesumá ateewãsidama. 33Chi p'uurudepemarã ãarea chi eda wãpataɨk'á minachia nɨbasima. 34Jesupa chi wawaria k'ak'ua piawẽa beada minachia jɨpak'oasima. Mãɨnepa ichiaba chi jaore mietá minachia ãyá jeret'aak'oasima. Chi jaore mietaarãpa ichi k'awa p'anasi pẽra Jesupa ãchiá pedeapik'a pasima.

Galileade jaratea nipada

Luca 4:42-44

35Teamasieda wapida p'ãrio nɨbɨeda Jesú p'irabarik'ari, mẽa ẽpẽra newẽmá wãk'ari, mãma ɨt'aa chiidi beesima. 36Mãɨne Simón mãɨnepa chi ichi ome p'anɨrãpa ichi jɨrɨde wãsidama. 37Ichi unusidaɨde jarasidama:

—Ãareaɨrãpa pɨ jɨrɨ p'anɨma.

38Mãɨne Jesupa jarasima:

—Nãmapema wãtɨma waapẽarã p'uuru ara k'ait'a bedea mɨa jãma p'ue jarateai bɨ pẽra. Mɨ mãɨ k'orea chesima.

39Mãɨya Galilea tuade ãarea p'ɨrrɨasima. Judiorã ará pedeapataɨ techa jarateapachima. Ichi wãrumá jaore mietá ãyá jerek'oapachima.

Jesupa aida pará bɨ jɨpa beepida

Mateo 8:1-4; Luca 5:12-16

40Mãɨya bɨde ẽpẽra aida pará bɨ#1:40 Jesú ewaride piarã chi aida sãmaasã́ basit'a tachia mãɨ k'awadawẽa p'anɨma. Maamina judiorãmaarã aba Tachi Ak'õrepuru p'ue jɨpa beepii basima. Número 12:9-12; 2 Reye 5:7. Mãɨ awara, abaɨpa jãɨ aida jitasira awara bade wãi basima. Levítico 13:45-46. Jesumá orrobarik'ari, sĩraporode k'obeek'ari nãɨya chichupuria idisima:

—Pɨa k'ɨ̃ria bɨpɨra, mɨ p'ue jɨpai bɨma.

41Jesupa sõchupuriada pẽra ichi jua ɨ̃rɨ bɨrude nãɨya jarasima:

—Mãɨya oo k'ɨ̃ria bɨma. ¡Jɨpa beese!

42Ara mãɨne chi ẽpẽra aida pará bada wẽpasima. Jɨpa beesima. 43Mãɨne Jesupa ichiá pia wãpade aside, nãɨya ɨbɨa pedeasima:

44—Pɨ jɨpa beeda mi ãpia pida abaɨa jararãse. Mãɨpari p'aaremá wãse pɨ jɨpa beesit'a unumẽrá. Maapae Tachi Ak'õre k'ĩrari pia beei k'orea Moisepa jarada jĩra ne tease.#Levítico 14:1-32. Mãɨya ẽpẽerãpa k'awadaipɨ pɨ piarã jɨpa beesit'a.

45Maamina ãareaɨrã́ ichi jɨpa beeda mẽrawẽa nepɨrɨ beesima. Mãɨ k'orea Jesú mi ãpia pida p'uurude waapẽarã p'uuru bemaapida wãiwẽa basima. Mãɨpari p'uuru awara nipapachima ẽpẽerã beadak'amá. Maamina ẽpẽerã p'uuruchadepemarã ichimá wãpachidama.

Currently Selected:

Marco 1: tdc

Highlight

Copy