От Иоанна 10
10
Пынъӣӷнӣҳталъю, Пынъӣӷилъю
1Иисусым пикӣ: «Ипа уңипа̄тамси, ю̄к нагун алңунак маюӷлюни пынъӣлӷутамун ӣтқуми амигунӷилңуҳқун, тыглыгнӣҳтыңӯқлъю, ўаяҳтыңӯқлъю. 2Ю̄к итылӷӣ амихкун пынъӣӷнӣҳтыңӯқ, ынка̄м 3кылыңакистым амигмылңӯм қылъпыӷутақа̄. Пынъӣӷыт нагақуныӷмыхтыху мыңа такўа̄қа̄т. Та̄м пынъӣӷнӣҳтым лъми катам пынъӣни а̄тҳитхун туқлъюҳтыӷлюки а̄нутақӣ. 4Лъңан катам пынъӣӷи қамахлъютың а̄нлыӷа̄нъыӷата, пынъӣӷнӣҳта сивуңитни иглыҳтақуқ ынка̄м пынъӣӷыт малихлъыӷа̄тақа̄т, қаюҳлъяк мыңа лӣсимакыхкаңат. 5Малихна̄нӷита̄т кина налъюкыхкаҳтың йыӷлыги қимагӯсяҳқа̄гут, қаюҳлъяк налъюкыхкаңат мыңа». 6Та̄хун уңипаӷа̄ткун Иисусым уңипа̄ткӣ та̄кут Фарисеит, иўырңа лӣгикумаңилъкаңат сямың писӣтаңа.
Пинилӷӣ Пынъӣӷнӣҳта
7Ынка̄м Иисусым пиля̄тақӣ: «Ипа уңипа̄тамси, хўаңа амигӯңа пынъӣӷнун. 8Қамахлъютың югыт сивумни тагикат тыглыгнӣҳтыңӯтлъю ўаяҳтыңӯтлъю ынка̄м пынъӣӷыт нагасимаңитӣт та̄кут. 9Хўаңа амигӯңа, кина алңунак ӣтқуми хўаңамкун югулилъыңьяҳқа̄гуқ. Ынка̄м ӣтҳақлъюни, а̄нақлъюни, на̄лъкутақлъюнилъю ныӷьяҳқамың пилъықуқ. 10Тыглыгнӣҳта та̄ўаңинақ тыглыгьяқаюгӯқ, юхтаӷьяқаюгӯқ, на̄фқӣяқаюгӯқ, иўырңа хўаңа тагика̄гуңа югыт уңувалъыңысқылъюки уңувалъыпигмың.
11Хўаңа пинилӷӣңӯңа пынъӣӷнӣҳта. Пинилӷӣм пынъӣӷнӣҳтым туқуматкысяҳқақӣ пынъӣни. 12Акилыҳтуқаюк пынъӣӷнӣҳтыңунӷитуқ ынка̄м пынъӣӷыт лъңан пикынӷитӣ. Та̄м қыпҳаҳтым ысҳақумигу ама̄ тагилӷӣ, қимагьяҳқа̄гуқ пынъӣӷыт унилъюки. Та̄на ама̄ пынъӣҳтыкан қамахлъютың пынъӣӷыт миңилъықут. 13Ю̄к акилыҳтуқаюк қимагьяҳқа̄гуқ, қаюҳлъяк тымңи қыпҳаҳтыңулӷӣ ынка̄м лыган ўа̄кна̄нӷитӣ пынъӣӷыт. 14-15Хўаңа пинилӷӣңӯңа пынъӣӷнӣҳта. Атам лӣсимакылъҳатун хўаңа, хўаңалъю лӣсимакылъымтун Ата, таўатыҳпигақ лӣсимаканка пынъӣӷынка, пынъӣӷма лӣсимака̄тңа. Туқуматкылъықанка пынъӣӷынка. 16Пынъӣҳтӯңа пынъӣлӷутамынъыӷилңуӷмың. Лъңитлъю тагисяҳқапыста̄қанка, нагалъықа̄т мыка ынка̄м пынъӣӷынка ата̄систун лъӣҳлъықут, ата̄сиқ пынъӣӷнӣҳтыклъюку.
17Атам пиниқа̄ңа қаюҳлъяк уңувалъқа тӯньюкыстаӷлюку аюқақа выҳнықихналюку. 18Китум алңунак иқинъа̄нӷита̄ уңувалъқа, қаюҳлъяк хўаңамның катам тӯньюглюку аюқақа. Тӯнилъыҳқалгӯңа уңувалъымның, выҳтилъыҳқалгӯңа уңувалъымның. Таўатын Атама қылъқақа̄ңа».
19Алъямың Иудеит а̄ҳтӣра̄ӷуткат, Иисусым акузитаңи апалъюқлъюки. 20Угляпихлъыҳӣт пикат: «Та̄на ю̄к туӷныӷа̄м итыӷлюку налъюңуҳтыстыкақа̄, сяңанңам нагатақыстыху?» 21Иўырңа иляңи пикат: «Ю̄к туӷныӷа̄м налъюңуҳтыстыка̄ таўатын акузина̄нӷитуқ. Туӷныӷа̄м ысҳаҳтысягулъықагӯ ая̄кақ?»
Иудеит Иҳсякыхкаңат Иисус
22Уксю̄лӷӣ, Иерусалимыми Иудеит нықынӷаҳқылӷӣт нықамикналюку Посвящатлъҳа Храмым. 23Иисус иглыҳтыңъулӷӣ Соломоным притворыңан, туңаңани Храмым. 24Иудеит увитаңиӷлюку пика̄т: «Натын тахка̄н кукшиқуткыснақсин хўаңкунъун? Христосыңукувык уңипа̄тңўа̄ҳқут».
25Иисусым кӣмсиқӣ: «Уңипа̄тңўа̄қақамси иўырңа ухпықигатаҳпысиңа. Алъя̄ҳлъюхўаҳтӣқуңа Атама А̄тҳакун лӣгикысқылъюңа кинаңутка. 26Иўырңа лъпыси ухпыӷигатуси қаюҳлъяк пынъӣқынӷилъкымси. 27Лӣсимаканка пынъӣӷынка, нагалъюку мыка малихтақа̄тңа. 28Тӯнанка кынлыңилңуӷмың уңувалъыӷмың, ынка̄м туқуна̄нӷитңўа̄ҳтут. Китум алңунак акуқаӷна̄нӷитӣ ӣхымның. 29Атама тагивақақӣ пынъӣӷынка. А̄ңыҳлъяхтуқ китумың алңунак, ынка̄м китум алңунак акуқаӷна̄нӷитӣ Атама ӣханың. 30Атакулъҳӣгни ата̄систун аюқукуң».
31Та̄хкын Иудеит тугуля̄лъя̄тақат уйӷагмың туқунъалюку Иисус. 32Иўырңа Иисусым пикӣ: «Ысҳапагаҳпысиңа угляпихлъыҳӣ аныӷныҳқилъық апыӷӣӷақа Атама аҳтуӷьяҳқа̄нӷилъҳакун. Налӣтнун та̄кут аныӷныҳқилъыӷма милюҳпага̄таӷьюгыстыңъа?» 33Иудеит кӣмсиқа̄т: «Туқунъақынӷитамкын аныӷныҳқилъҳын апалъюқлъюку, та̄ўаңинақ акузилъҳын апалъюқаҳпут. Тымңи югӯтын. Кияӷныӷмун сыӷлыҳқыҳлъяка̄гутын Кияӷныҳтун аюқнилютын пӣқңавык!» 34Иисусым пикӣ: «Лӣлиҳтӯсяҳпысини игақңа̄қ Кияӷныӷым пилъҳа хўатын: “Лъпыси кияӷныӷӯси”. 35Лӣсимакапут Акузитыт Игақыхкат алъяңуҳсяҳқа̄нӷитут. Акузитни Игақыхкани Кияӷныӷым кияӷныӷунимакаки 36сяңамаңам сыӷлыҳқыҳлъягуманистыңъа Кияӷныӷмун? Апалъюқыстыхӯ Кияӷныӷмун Иӷнықнилъқа? Атам накмикыхкақа̄ңа, каяхтыкақа̄ңа нунамун. 37Атуқынӷилъкумкун Атама пӣқыхкаңа, ынңа̄талъ ухпықынӷинъакыфсиңа, 38иўырңа атуқақақа Атама пӣқыхкаңа. Ухпықынӷитыӷңа̄ҳпысиңа хўаңа, ухпықитыки қыпҳақанка ынка̄м лӣлъықаҳси, лӣгикылъықаҳси Ата хўаңамнитутаңа, хўаңа лъңани». 39Та̄хкын Иудеит тугунақлъя̄таӷьяӷа̄т, иўырңа Иисус анакақ лъңитның.
40Та̄хкын Иисусым аӷвиӷлюкык Кӣўык Иорданымың а̄тқылӷӣк аглянқихтыкақ Иоанным крестиӷивиксюхўа̄лъҳанун, ынка̄м тама̄нтыкақ. 41Угляпихлъыҳӣ ю̄к тагиляӷа̄ткақ лъңанун, пикат: «Иоанн алъя̄ҳлъюхўаҳтимаңитуқ, иўырңа Иоанным апылъҳа ӯмың югмың қамахлъюни ипаңӯқ». 42Таўани угляпихлъыҳӣм ухпықыхка̄ Иисус.
Currently Selected:
От Иоанна 10: ess2
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
