От Иоанна 15

Иисус Лозапик

1«Хўаңа лозапигӯңа, Атака̄ пӣтысиӷаҳтыңӯқ. 2Қамахлъюки аваянка пӣтыстиңигалңӯт икуӷақӣ. Қамахлъюки аваят пӣтыстикаюгыт кыпуӷвикақӣ пӣтыстиӷатаӷӣсқылъюки. 3Лъпыси укмаңиӷўа̄ӷлюси аюқуси акузитытхун акузиткыхкамкун лъпысинун. 4Хўаңамнитыкыстаҳтык хўаңа лъпысинитылъымтун. Аваяра̄ӷинақ пӣтыстина̄нӷитуқ ўыткуқун лозамыскуми. Таўатытуси лъңинаҳпыси пӣтыстина̄нӷитуси ўыткуқун хўаңамнитыкыстақуфси.

5Хўаңа лозаңӯңа, лъпыси авая̄гуси. Кина алңунак пӣтысқуҳлъягьяҳқа̄гуқ хўаңамнитыкыстақуми, хўаңа лъңани. Иўырңа хўаңаңунаси сяна̄нӷитуси. 6Кина алңунак хўаңамнинъыӷилъкуми аваястун аюқуқ ыхлъюни палиқақ. Таўатылңӯт аваят қырңуҳлъюки паныҳтақӣт. 7Хўаңамнитыкыстақуфси, акузитынка лъпысинитыстыкуфсики а̄плъыҳа̄си сямың алңунак пиюкыхкаҳпысиның ынка̄м алъхыӷулъықуси. 8Атака̄ усюқылъыңылъықуқ пӣтысқуҳлъякуфси, лӣгикыслъықусилъю хўаңамнун малихся̄ҳсяҳтыкнъилюси. 9Пиниқамси катам Атам пиниқылъҳатун хўаңа. Пиниқылъымнитыкыстаҳтык. 10Қа̄ткыхкуфсики қылӷусянка пиниқылъымнитыкыстаҳлъықуси таўатыҳпигақ Атама пиниқылъҳанитылъымтун қа̄ткутылъымкун қылӷуся̄нун.

11Уңипа̄тамси тама̄кын қуямалъқа лъпысинитысқылъюку, қуямалъыҳси ӣӷўӣсқылъюку. 12Унаңӯқ қылӷусяқа̄ лъпысинун: пиниқутулъюси хўаңа пиниқылъымтун лъпыси. 13Югым туқуматкыхкумики илякумта̄ни пиниқылъҳа а̄ңыпихтуқ. Кина алъя пиниқылъҳитуқ та̄мың а̄ңатаӷалӷӣмың. 14Илякумта̄қаҳпысиңа, қылӷутканка қа̄ткыхкуфсики. 15Хўакын кынлыклъюку қыпҳаҳтыңулюси атиӷна̄нӷитамси, қаюҳлъяк қыпҳаҳтым налъюка̄ умӣлыни ся̄қутаңа. Иўырңа ма̄тын атиӷамси илякумта̄ӷмың, қаюҳлъяк лӣтыстыкыхка лъпысинун қамахлъюку нагаткақа Атамның. 16Лъпыси накмикумаңитаҳпысиңа, хўаңа накмикыхкақамси, қыпҳақалитамсилъю. Ынка̄м аӷуляқлъюси пӣтысқуҳтык, пӣтысқулъыҳси нагныӷасқысюўақа. Таўатын пикуфси Атам тӯнылъықӣси сямың алңунак а̄птыкуфси Атымкун. 17Уна қылӷусяқақа, пиниқутулъюси».

Иисусым Кылыңася̄қаңи Малихся̄ҳтыни

18«Нунам юган угумикыхкаңиси, нықамиклъюку хўаңа сивуклъюңа угумикыхкақа̄тңа. 19Нунам пиксяқумиси, юган пиниқнаяӷӣси пиниқутутылъыӷмыгыстун. Иўырңа хўаңа накмикыхкақамси хўакын нунамың ынка̄м нунам пикынӷитӣси. Тама̄кын апалъюқлъюку нунам юган угумикӣси. 20Нықамиклъюку а̄пқақа лъпысинун: Қыпҳаҳта а̄ңатаӷанӷитуқ умӣлыгминың. Амью̄ткумакумыхтыңъа лъпысилъю амью̄ткылъықӣси. Қа̄ткумакумыхтыки апыҳтӯсянка, лъпысилъю апыҳтӯсяси қа̄ткылъықӣт. 21Таўатын пилъықӣси хўаңа апалъюқлъюңа қаюҳлъяк налъюка̄т Каяхтистыка. 22Тагилюңа алыҳқӯмаңисяқумки лӣнъаянӷитут сыӷлыҳқылъиҳтың. Иўырңа хўа̄ анагнӣлъқавигӣтӣ сыӷлыҳқылъыӷмыхның. 23Китум угумикыхкумиңа, угумика̄лъю Атака̄. 24Акулңитни алъя̄ҳлъюхўаҳтӣӷа̄тақа̄гуңа китум алңунак пиңигалъкаңаның. Ысҳапакақыӷңа̄ӷмыхтыки алъя̄ҳлъюхўаҳтилъҳынка паниның ухпықылъҳита̄тңа, угумикӣнкуң Атакулъҳӣгни ынка̄м сыӷлыҳқыстыңӯт нанқихтылъыңьяҳқат. 25Таўатын пилъыӷмыхтыхун апыӷӣқақа̄т Акузитыт Игақыхкат хўатын пилъҳат: “Угумика̄тңа апалъюңуна̄н”.

26Каютык каяхлъықахка лъпысинун, Атамың пиңӯк. Таӷныӷа̄гук апыҳтуӷияҳқак Кияӷныӷым ипапилъҳаның. Тагикуми уңипақылъықа̄ңа. 27Лъпысилъю уңипақылъықаҳпысиңа югнун, қаюҳлъяк хўаңамнитка̄лӷӣси қыпҳаӷьюхўа̄лъҳаның има».

Currently Selected:

От Иоанна 15: ess2

Highlight

Copy