От Иоанна 5

На̄лъҳутилъық На̄йваӷа̄ӷми

1Та̄м киңуңаның Иисус, Иерусалимыткақ Иудеит нықынӷаҳқылъҳитнун. 2Та̄ўаңуқ Иерусалимыми, Овечьи Воротам туңаңани на̄йваӷа̄қ талъиматның колоннадалык, Еврейистун атилъҳа Вифезда. 3Угляпихлъыҳӣ қинуюк иңаӷмытулъҳӣ колоннадани, ая̄кат, пиюгигалңӯт, унӣқат. (Пагуӷругуҳныҳсиӷақыхкаңат мық атыӷьюхўа̄ӷналютың. 4Иляңани аӷныӷым, яқулга Атанӷым атыныӷмини на̄йваӷа̄ӷмун пагуӷругуҳтыстақыхкаңа мық. Ынка̄м кина атыӷьюхўа̄лӷӣ мыӷмун на̄лъҳутақылӷӣ сямың алңунак ақниӷныӷминың.)

5Та̄ўаңуқ ю̄к қинуюгңалӷӣ ю̄к ата̄сиқ қуля сипнықлъю ку пиңаюның иңлюлык аюмиқулъыӷни. 6Иисусым ысҳақа̄. Лӣсимакыхка̄ қавңарухлъяк има қинуюкақ ынка̄м а̄птыка̄: «На̄лъҳусюхсӣн?» 7Қинуюлӷӣм кӣмсиқа̄: «Югунӣқ, мық пагуӷругуҳныӷани каюткаҳқӣтақуңа. Атыӷнақуткақсяҳтуңа има китум иңьяӷаҳтақа̄ңа». 8Иисусым пика̄: «Ныкыви, алъиӷан тугулюку пиюги». 9Таўаниңинақ ю̄к на̄лъҳулъюни, алъиӷани тугулюку пиюкақ. Субботаңулӷӣ таўани аӷныӷми.

10Тама̄кын апалъюқлъюку Иудеит иглыӷутистыңита пика̄т на̄лъҳуткақ ю̄к: «Аӷныӷми Субботаңӯқ, Лӣлиҳтӯсямнъи алъиӷан иглыӷусяҳқақынӷисяӷан Субботами». 11Пикӣ: «Югым на̄лъҳутистыма пӣңа: “Алъиӷан тугулюку пиюги”». 12А̄птыка̄т: «Китум на̄лъҳулъютын алъиӷан тугулюку пиюгысқатын?» 13Иўырңа югым налъюкыхка̄ на̄лъҳутистыни кинаңутаңа, қаюҳлъяк угля̄пихлъыӷӣ ю̄к таўанлыңуқ, Иисусылъю ысҳаҳтыңъунани иқитка̄лӷӣ.

14Аӷныӷми та̄кўани Храмыми, Иисусым налъяқа̄ та̄на ю̄к на̄лъҳуткани, пика̄: «Уюқ, на̄лъҳусима̄тын. Сыӷлыҳқынъанӣ лю̄рақ сяңўа̄ сыӷлыӷатаӷалӷӣ икфиқуткынъаюкавгу сыӷлыҳқумаңинақувык». 15Та̄хкын югым уңипа̄сяҳтуқӣ Иудеит иглыӷутистыңит Иисусыңунилюку на̄лъҳутистыни. 16Та̄хкын кынляңа Иудеит иглыӷутистыңита сыӷлытун пиягутка̄т Иисус, Субботами на̄лъҳутилъҳаның апалъюқлъюку. 17Иўырңа Иисусым пикӣ: «Атака̄ қӯнпың қыпҳа̄гуқ, хўаңалъю қыпҳаӷьяҳқа̄гуңа». 18Ынка̄м Иудеит иглыӷутистыңита ўатақа̄ӷақ туқусюка̄т. Пикат: «Иисусым Субботам Лӣлиҳтӯся̄ на̄фқинаҳпына̄н пика̄гуқлъю Кияӷнық Атакнилюку. Таўатын акузилъыӷмикун Кияӷныҳтуңўа̄қ аюқнилюни пӣқуқ».

Иисусым Аҳтуӷьяҳқа̄нӷилъҳа

19Иўырңа Иисусым пикӣ: «Ипа пӣмси, Иӷнық лъңинаӷми сяяҳқа̄нӷитуқ, Атаминың ысҳапакаҳӣнани пӣқа̄. Атами пилъҳатун пӣқуқ. 20Атам пиниқа̄ Иӷныни, ынка̄м кылгувикақа̄ сямың тамаҳа̄ның сялъыӷминың. Иўырңа та̄куның а̄ңатаӷалӷӣның кылгувиксяҳқақа̄ сяӷӣӷаюгысқылъюси. 21Атам уңуваҳтыслъюки туқукат уңувалъылитақӣ, ынка̄м таўатыҳпигақ Иӷнық уңувалъылитикаюгӯқ пиюкыхкаминун. 22Ата нанқихтиңигатуқ китумың алңунак. Иўырңа аҳтуӷьяҳқа̄нӷилъылиткақа̄ Иӷныни қамахлъюку нанқихтилъық лъңанун писқылъюку. 23Кияӷныӷым таўатын пикақа̄ Иӷныни тамаҳа̄нун қӯлвӣсқылъюку катам таўатын қӯлвалъҳистун Ата. Китум та̄м қӯлвӣгалъкумигу Иӷнық қӯлвӣгата̄ Ата каяхтикақ Иӷныӷмың.

24Ипа пӣмси, китум нагаскумики акузитынка, ухпықыхкумигулъю каяхтистыка, кынлыңилңуӷмың уңувалъылгӯқ. Нанқихтылъыңна̄нӷитуқ аӷью̄ӷьяҳқа̄люни қаюҳлъяк туқумың уңувалъыӷмун лъӣқа̄гуқ. 25Ипа пӣмси, пилъыҳқақ ука тагиңӯқ, хўа̄ ка̄сима̄қ, туқукат нагақуҳлъықа̄т мыңа Иӷныӷан Кияӷныӷым. Тама̄кут нагақӯлъҳӣт уңувалъықут, 26қаюҳлъяк Ата уңувалъҳӯқ, ынка̄м уңувалъық лъңаның пиңӯқ. Таўатыҳпигақ Иӷныӷа уңувалъҳӯқ, қаюҳлъяк Атам таўатытыстыкаңа. 27Аҳтуӷьяҳқа̄нӷилъылиткақа̄лъю Иӷныни нанқихтилъыӷмун қаюҳлъяк Иӷнықыхкаңа Югым.

28Сяӷӣӷаягутыхпына̄н уна: пилъыҳқақ тагиңӯқ қамахлъютың туқукат лъивыӷмылңӯт нагақуӷлюку мыңа, 29а̄нлыӷа̄сяҳқа̄гут лъивыӷмыхның. Тама̄кут пинитун пикат уңуваҳтысяҳқа̄гут уңувалъыӷмун. Иўырңа тама̄кут сыӷлытун пикат уңуваҳтысяҳқа̄гут нанқихтылъыӷмун аӷью̄ӷьяҳқа̄лютың».

А̄пҳистыңи Иисусым

30«Нанқихсигатақа кина алңунак сивуклъюку а̄птылъңуна̄н Ата. Ынка̄м нанқихтӣқуңа лъңан писқылъҳинаҳа̄тун. Нанқихтилъқа ылъқуӷутңа̄қ, қаюҳлъяк нанқихтӣқуңа Атам каяхтикам хўаңамның пиюкылъҳатун. Хўаңа пиюкылъымтун пиңигатуңа.

31А̄пқума хўаңамның, югыт ухпықна̄нӷитӣт акузитынка, ўыткуқун китум алъя а̄пқаңаңа. 32Иўырңа китум а̄пҳақа̄ңа таўатын, лӣсимаканка а̄пқӣ ипаңӯт қаюҳлъяк а̄пҳистыка Атакақа. 33Лъпыси югыт каяхтыкақаси Иоаннымун, апылъҳи хўаңамның ипаңӯт. 34Югыт апынӷисяӷңа̄ӷмыхтыңъа, иўырңа таўатын пӣңа лъпыси югулилъыңысқылъюси. 35Иоанн кынылӷутастун кумаңаяҳтуқлъю, кӯкхутңаяҳтуқлъю. Акузитаңи ниӷугыстун аюқсяҳтут ынка̄м лъпыси натыңӣҳақ акузитаңакун қуястысюка̄гуси. 36Иоанным акузитаңан лӣтыстыкақа̄ңа югнун. Иўырңа ўатақа̄ӷақ Иоанным акузитаңаның қыпҳалъыӷма лӣтыстаӷаӷа̄ңа югнун. Қыпҳаӷанка Атама писқыхкӣ ынка̄м қыпҳалъыӷма лӣтыста̄ югнун Атамнун каяхтыкақнилюңа. 37Каяхтикам хўаңамның, Атам лъминың катам а̄пҳўа̄ ипапиҳқылъық хўаңамның аюқылӷӣ. Нагақӣгатңўа̄ӷаҳси мыңа, ысҳӣгатңўа̄ӷаҳси натытуляңа, 38тугуклъӣгатасилъю акузитаңи, қаюҳлъяк ухпықигатаҳси Атам каяхтыка̄. 39Иваӷивикақаси Акузитыт Игақыхкат, қаюҳлъяк сюмыҳпысини кынлыңилңуӷмың уңувалъыңвикналюки пӣқаси. Та̄куста ата̄сит Акузитыт Игақыхкат а̄пҳилӷӣт хўаңамның. 40Нақам хўаңамнун тагиюгигатуси уңувалъылитысқылъюси.

41Югнун усюқысюнӷитуңа. 42Лӣсимакамси лъпыси, пиниқылъҳитуси илюхпысини Кияӷныӷмун. 43Атама каяхтыкақа̄ңа акузистыңулюңа лъңанун, иўырңа лъпыси тугуклъӣгатаҳпысиңа. Нақам кина тагилюни лъңанун катам акузилӷӣ тугуклъиӷақлъюку. 44Натынңам ухпықылъықыстыху тагитка̄қа Кияӷныӷмың усюқысюгукуфси иляхпысинун, нақам та̄наңинаҳа̄м Кияӷныӷым усюқылъыҳқа̄ авылӷаӷлюку? 45Сюмыҳтаӷаҳпынаси апыҳлъықнилюку анахутылъыҳси Атамун. Моисейеңӯқ а̄пҳияҳқақ анахутылъыҳпысиның қайўа сиӷимаксяӷңа̄ҳпысигу югулисқылъюси. 46Моисей ипа ухпықумакуфсигу ухпықнаяӷаҳпысиңа қаюҳлъяк игақыхкақа̄ңа игатхун. 47Ынка̄м Моисейем игақыхкӣ ухпықигалъкуфсики, натынңам ухпықылъықыстыки акузитынка?»

Currently Selected:

От Иоанна 5: ess2

Highlight

Copy