От Луки 16

Иисусым Уңипаӷа̄ткыхкаңа Ата̄сӣӷныӷилңуқ Умӣлгутилӷӣ

1Та̄хкын Иисусым уңипаӷа̄ткӣ малихся̄ҳтыни: «Та̄ўаңуқ аклъюңилңуқ ю̄к қыпҳаҳтылгуфтуқ, умӣлгутистыңлъяқа̄ сяӷьяминун. Ата̄сими аӷныӷми китум уңипа̄симакаңа аклъюңилңуқ ю̄к умӣлгутистыңлъяқа̄нун сякусӣқнилюки сяӷьяңи. 2Ынка̄м тахсиӷлюку пика̄: “Сяманилютын нагақуӷақсикын? Умӣлгутинаниӷнақутын сяӷьямнун. Ынка̄ңам хўаңамнун тагитики игаҳтын; ювӷӣӷнақанка”. 3Та̄на ю̄к сюмыҳтаӷақақ: “Умӣлыгма та̄қыста̄ңа қыпҳақамның. Сянақсиңаңам? Кая̄тыпихтуңа ля̄гмун, кайңуюгақуңалъю туңсиӷнӣлъыҳқамның. 4Қыпҳақӣӷускума паниның югнун тугуклъиҳтысюхтуңа лъңитнун”. Ынка̄м таўатын пикақ. 5Тахсиқлъиқӣ ата̄сикаҳтӣта асыңылгыт умӣлыгминун. Сивулиқ а̄птыка̄: “Натын аңка̄н асиңылгузин умилымнун?” 6Кӣмсиқа̄: “ю̄к талъиматңӯт ақимлыӷутаҳлъягыт маслиным мысӣӷаның ималгыт”. Та̄хкын пика̄: “Тугулюку асыңыхпык ига̄, ақумқаҳлъютын игақигу ю̄к ма̄лӷук қуля сӣпнықлъюку”. 7Та̄хкын иляңа а̄птыка̄: “Лъпык натын аңка̄н асиңылгузин?” Кӣмсиқа̄: “ю̄к талъимат мераңӯт пшеницат” Та̄м югым пика̄: “Тугулюку асыңыхпык ига̄, игақигу ю̄к стамат”. 8Умӣлган усюқыхка̄ ата̄сӣӷныӷилңуқ қыпҳаҳтыни пыҳқиниқылъҳаның. Ипаңӯқ ӯм нунам юги илямыхның акилъпыганыӷмыхни, тукфиҳтуныӷмыхни, пыҳқиниқатаӷаӷақут ниӷугмылңуӷның югның. 9Уңипа̄тамси, нунамылңуқ аклъюңиси каюсӣтусиқитыху югнун илякумта̄ңлъя̄сӣлюку лъпысинун. Та̄хкын туқукуфси аклъюңиси унилъықаси, ынка̄м упуӷатылъыңылъықуси кынлыңилңуӷнун ныкаҳқанун. 10Кина алңунак ата̄сӣӷмыскуми сяяҳқасқуҳаӷминун, ата̄сӣӷмылъықуқлъю сяяҳқалӷутминун. Кина алңунак ипапиҳқигалъкуми сяяҳқасқуҳаӷминун, ипапиҳқынъа̄нӷитуқлъю сяяҳқалӷутминун. 11Ата̄сӣӷмысимаңилъкуфси атуқақңафсики аклъюңит нунамылңӯт, китумңам ныӷьюкулъықаки лъпысинун аклъюңипӣгыт? 12Ынка̄м ата̄сӣӷмысимаңилъкуфси килъю пиңитнун, китумңам тӯнылъықӣси лъпыси пихпысиның? 13Қыпҳаҳтым қыпҳа̄нъа̄нӷита̄к ма̄лӷук умӣлгык. Ма̄лӷугыгның умӣлылгукуми угумикылъықа̄ а̄лъҳа, пиниқылъықа̄ иляңа, налиӷмың қа̄ткылъықа̄ а̄лъҳа, сӣвакна̄нӷита̄ иляңа. Пиниқна̄нӷитахси қырңа̄хкынка Кияӷныӷылъю, манимлъю».

Иисус Апыҳтуӷилӷӣ Иляңаныңлъю Сялъыӷның

14Фарисеит маниюныҳпалъю̄т нагасямыхтыху тама̄на қамахлъюку, лыгасӣӷўа̄ткыхка̄т Иисус. 15Иўырңа Иисусым пикӣ: «Лъпыси пиниҳсюгниңлъяӷақуси югыт ысҳа̄манӷитни, иўырңа Кияӷныӷым лӣсимакӣси ипа натытулыси илюхпысигун. Сяңўа̄т югыт мыгнукыхкӣт сятңунӷитут Кияӷныӷым ысҳа̄манӷани.

16Кияӷныӷым югнун тӯныхкақӣ Лӣлиҳтӯсятлъю, ӯкналиқистытлъю игақыхкӣт атуқысқылъюки кынляңа Иоанным Крестителым тагилъҳанун. Та̄м киңуңаның Пинилӷӣт Уңипат Атаныҳпагулъҳаның Кияӷныӷым аюқылӷӣт уңипақиңӯт. Ынка̄м қамахлъютың югыт қывӯтыпихлъютың итыӷнақуткыҳлъяка̄т. 17Иўырңа пияқнаӷатаӷаҳтуқ иқитылъыҳқа̄ ата̄сиқ тагнықшаҳақ Лӣлиҳтӯсяның, қилягылъю, нунамлъю авӣӷутылъыҳқахкының.

18Китум алңунак пыхлъюку нулӣни, алъяның нулиҳтуқуми гылӷаӷнӣҳлъықуқ. Китумлъю алңунак тугукумигу пыхтыкақ аӷнақ гылӷаӷнӣҳлъықуқ».

Аклъюңилңуқлъю, Ю̄к Лазарылъю

19Та̄хкын Иисусым пикӣ: «Та̄ўаңуқ аклъюңилңуқ ю̄к пилюгугңалӷӣ акитупихлъыҳӣның а̄тканың. Аҳутаңа тамаҳа̄н нықым акитулъҳина̄ның ныӷақылӷӣ сӣптӣҳлъягақлъюни. 20-21Та̄ўалъюңуқ аклъюмалӷӣ ю̄к а̄тҳа Лазарь. Аҳутаңа тамаҳа̄н тагитақыхкаңат аклъюңилңӯм мыңтыӷа̄нун лъӣқлъюку ыслъяклъиӷныӷакун амихлъяган. Китумун ныӷыстысюпихтақсялӷӣ ифкаҳқылъыӷмың асиңанилңуӷмың қаюӷвикган аклъюңилңӯм. Увиңа алъқўа̄ӷңалӷӣ укиқылъыӷмың ынка̄м қикмит тагилютың алюңрақақыхкаңит. 22Тахталми аклъюмалӷӣ ю̄к туқукақ, ынка̄м яқулгыт агля̄тка̄т Авраамым ная̄нун. Аклъюңилңуқлъю ю̄к туқуян лъӣфқа̄т. 23Адыми аклъюңилңуқ ю̄к икфиқыҳлъягуфтуқ. Қӯлмун ысҳаӷьялӷӣми, уяваҳпанлъюкык ысҳақакык Авраамылъю, Лазарылъю ся̄қўлиқулъютык. 24Ынка̄м аклъюңилңуқ ю̄к акилӷӯкақ: “Ата̄й, Авраам, наңлъыгьягутықыҳтиңа! Каяхтигу Лазарь, иӷныӷўа̄ни ныплъюку мыӷмун улюка ныңлыкыхсяҳтуқаӷлигу, қаюҳлъяк кынӷым икфиқыстыҳлъягўа̄ңа!” 25Иўырңа Авраамым пика̄: “Иӷнымни, нықамикан нунами кияхта̄ҳулютын пинилӷӣмың пилгука̄лӷӣтын, Лазарь пилгумалюку сыӷлыӷмың. Иўырңа ма̄тын итагнаӷилъыңума̄қ, лъпык икфиқыҳлъягумалютын. 26Та̄м ся̄ӷўакун, акулымнъитуқ а̄ңыпихлъыҳӣ аӷвиӷьяҳлъяк. Ынка̄м укыхкын кина аӷвиҳпагниңитуқ лъпысинун, та̄хкын кина аӷвиҳпагниңитуқ хўаңкунъун”. 27Аклъюңилңӯм югым пика̄: “Нақам Ата̄й, туңсиӷвикаҳлъякын, Лазарь каяхтаҳтигу атама мыңтыӷа̄нун, 28қаюҳлъяк талъиматның аңлыгутылгӯңа. Кылыңася̄ӷьяҳтуӷлики лю̄рақ тагинаюката хўавык икфиқфихлъягмун!” 29Иўырңа Авраамым пика̄: “Игақуқӣт Моисейемлъю, ӯкналиқистытлъю лъңитнитут, лӣтивикнакаңит”. 30Аклъюңилңӯм югым пика̄: “Нака̄н, ата̄й Авраам! Итупилъ китум туқумаслъӣӷның такуяқумики, авутыҳқылъютың сыӷлыҳқынъаниӷнаяҳтут”. 31Иўырңа Авраамым пика̄: “Лӣтфикумаңилъкумыхтыки игақуқӣт Моисейемлъю, ӯкналиқистытлъю, талўа ухпыҳтысна̄нӷитӣ туқумаслъӣӷым уңуваӷлюни уңипа̄скумики”».

Currently Selected:

От Луки 16: ess2

Highlight

Copy