От Луки 20

Иглыӷутистыт А̄пқуӷа̄қаңат Иисус

1Ата̄сими аӷныӷми, Храмыми, Иисус апыҳтуӷималюку югнун, уңипақималюкулъю Пинилӷӣның Уңипаның, первосвященнигытлъю, апыҳтуӷикаюгытлъю Лӣлиҳтӯсяның, сӣванлъықулъютың такука̄т. 2Пика̄т: «Уңипа̄тикут китум қылыҳтатын таўатын писқылъютын, налиӷмың китум қылылъҳакун таўатын пиңузин?»

3Кӣмсиқӣ: «Хўаңалъю а̄птаҳлъямси. Уңипа̄таҳтыңъа, 4Иоанным крестиӷаӷилъҳа Кияӷныӷмың пиңўа̄, налиӷмың югның?»

5Лъмыхның акузимӷуткылъюку, пикат: «Сямың пинақыста? Кӣмсиқумтыху Кияӷныӷмың пиңунилюку, хўатын пилъықӣлъю: “Сяңанми ухпықынӷитыстыху Иоанн?” 6Иўырңа: “Югның пиңуникумтыху”, қамахлъютың югыт милюҳпага̄таҳлъықӣлъю, қаюҳлъяк ухпықңукаңат Иоанн ӯкналиқистыңунилюку». 7Ынка̄м кӣмсиқа̄т налъюкнилюку накын пиңутаңа.

8Иисусым пикӣ: «Хўаңалъю уңипа̄нъа̄нӷитамси китумың қылылъыңыхка̄тка тама̄вык пикамнун».

Иисусым Уңипаӷа̄ткыхкаңи Сыӷлыӷыт Афлъыңакистыңи Пӣтысиӷаӷвигым

9Та̄хкын Иисусым югыт уңипаӷа̄ткӣ: «Ю̄к пӣтысиӷаӷвигмини виноградымың пӣтысиӷа̄малӷӣ. Навӷилъюку афлъыңакистынун та̄хкын иляңанун нунам аӷуляқлъюни мулю̄ҳлъякақ. 10Виноградыт сяӷнаяҳқа̄ҳсята, қыпҳаҳта кывгақыхка̄ афлъыңакистынун ныңини ақфасқылъюки. Иўырңа афлъыңакистыт қывӯтӣӷлюку аӷуляқыстыка̄т аваңуна̄н. 11Иляңа қыпҳаҳта кывгақыхка̄, лъңалъю қывутӣӷлюку, кайңуся̄клъюку аӷуляқыстыка̄т аваңуна̄н. 12Ынка̄м пиңайӣтаңат қыпҳаҳта кывгақыхка̄, та̄на кӣтиқулюку ыслъятмун милю̄тка̄т. 13Та̄хкын виноградым пӣтысиӷаӷвиган юга пикақ: “Сянақсиңа? Кывӷақнақақа хўаңа катам пиниқыхкақа иӷнықа, лю̄рақ сӣвакнаюкатху”. 14Иўырңа афлъыңакистыт ысҳаӷьямыхтыху пикат: “Уна пагитияҳқа̄гуқ хўакын пӣтысиӷаӷвигмың, туқутылътыху ынка̄м пӣтысиӷаӷвик хўаңкута пилӣлъықаҳпут”. 15А̄ныслъюку пӣтысиӷаӷвигмың туқутка̄т». Та̄хкын Иисусым а̄птыкӣ: «Пӣтысиӷаӷвилгым сялъықакиңам та̄кут афлъыңакистыт? 16Тагилюни туқуқуҳлъықӣ, ынка̄м пӣтысиӷаӷвини тӯнылъықа̄ иляңитнун». Нагасямыхтыху таўатын пилӷӣ, пика̄т: «Кияӷныӷым таўатылъюку апыӷӣҳтысныӷилъигу!» 17Иўырңа ысҳа̄макңўа̄ӷлюки а̄птыкӣ: «Уна Акузин Игақыхкақ сямың писӣўа?

“Уйӷак мыңтыӷаңлъяҳтыт иҳсякыхка̄т,

мыгнуналъыҳпига̄ҳтыка̄гуқ уйӷак”.

18Тамаҳаӷми иқулӷӣ та̄хун уйӷахкун кагимьяҳқа̄гуқ. Иўырңа уйӷагым улъыӷвикыхкумигу кина кагимқылъықа̄ пагуляңулюку».

А̄пқуӷа̄лъық Налогмың

19Апыҳтуӷикаюгытлъю Лӣлиҳтӯсяның, первосвященнигытлъю лӣгикыхка̄т Иисусымун лъмың акузиткыңъунилютың уңипаӷа̄тмикун. Ынка̄м таўаниңинақ тугуюка̄т иўырңа аликыхкӣт югыт сыӷлылӣҳқӣнаюката. 20Ынка̄м ӣскуҳтыңъўа̄қа̄т Иисус қаюҳлъяк тӯньюкаңат Римым правителыңанун, лъңанун нанқихтысқылъюку. Тама̄кын апалъюқлъюку каяхтыкӣт рӣрңистыт нагатысқылъюку Иисус. Ипапиҳқысиӷўа̄ӷлюки анахутыснақуткысқылъюку Иисус акузилъҳакун. 21Та̄кут рӣрңистыт пика̄т: «Апыҳтуӷиста, хўаңкута лӣсимакамкын акузилъыҳтынлъю, апыҳтуӷилъыҳтынлъю ипаңӯт. Атуныңўа̄қ пикаюгӯтын югнун, апыҳтуӷақатынлъю ипалъыӷмың Кияӷныӷым пиюкылъҳаның аюқылӷӣмың. 22Уңипа̄таҳтикут, Кияӷныӷым Лӣлиҳтӯся̄ни ылъқуӷутңа̄ лъивикилъыҳқаҳпут налогмың Кесарымун? Лъивикилъта̄а налиӷмың пинӷитылъта?»

23Иўырңа Иисусым лӣсимакыхкаңи пыҳқиниқылъҳит ынка̄м пикӣ: 24«Кылгувикитыңъа монетамың. Китум хина̄лъю, а̄тҳалъю монетамыта?»

Кӣмсиқа̄т: «Кесарым».

25Пикӣ: «Тӯнитыки Кесарымун тама̄кут Кесарым пиңи, ынка̄м тӯнитыки Кияӷныӷмун тама̄кут Кияӷныӷым пиңи».

26Ынка̄м рӣрңистыт Иисус акузилъҳакун анахутыстыпагниңитка̄т югыт сивуңитни. Сяӷӣӷаягулъюки кӣмсӣтаңи, қалъыгнаниқат.

А̄пқуӷа̄лъық Туқукат Уңуваҳтылъҳитның

27Та̄хкын иляңи Саддукеит тагикат Иисусымун. Лъңита ухпықңукаңит туқукат уңуваӷьяҳқа̄нӷинъилюки. 28Пика̄т: «Апыҳтуӷиста, Лӣлиҳтӯсямнъи Моисейем игақыхкақа̄ хўатын, югым аңлыгутаңа нулиҳтуӷлюни туқумакан авақутихпынани, аңлыгутаңан тугуяҳқақа̄ нулиҳқысяқаңа авақутинъалюку аңлыгутни туқукақ. 29Та̄ўаңуқ ма̄ӷраӷвинлык югыт аңлыгуткулъҳӣт. Нуйыклъиқ нулиҳтуӷлюни туқукақ авақутихпынани. 30Тӯңлиҳа̄н тугулюку угиңиӷақ, лъңалъю туқукақ. 31Пиңайӣтаңиталъю тугулюку, лъңалъю туқукақ. Қынўат қамахлъютың ма̄ӷраӷвинлыгьягыт аңлыгуткулъҳӣт туқуляӷа̄ткат авақутихпынатың. 32Киңулӣлюни аӷнақ туқукақ. 33Қамахлъютыңқун ма̄ӷраӷвинлыгьягыт нулиҳулюку тугукақыхкаңат. Ынка̄ңам китум нулиҳқылъықагу аӷнақ туқукат уңуваҳтӯската?»

34Иисусым пикӣ: «Кияҳта̄лъыӷми ма̄тын югыт нулиҳтуӷақут, аӷнат а̄ңггутақӣт. 35Иўырңа тама̄кут Кияӷныӷым итагнақыхкӣ туқулъыӷмың уңуваҳтӯсяҳқа̄гут, кияҳлъықутлъю нутаӷами нунами, тугутунъа̄нӷитут. 36Таўани уңувалъыӷми яқулгыстун аюқсяҳқа̄гут туқуна̄нӷитут. Авақутақӣ Кияӷныӷым, қаюҳлъяк туқулъыӷмың уңуваҳтыка̄гут. 37Хўатыҳлъюўа̄қ Моисейем ипапиҳқыхкақӣ туқукат уңуваҳсяҳқа̄нилюки. Игатхун игақақңамигу уқфилъыгақ кумаӷуӷңалӷӣ хўатын пика̄гуқ, Атанық “Кияӷнықа̄ Авраамым, Кияӷнықа̄ Исаакым, Кияӷнықа̄ Иаковым”. 38Лъңа Кияӷнықа̄т уңувалӷӣт, қаюҳлъяк лъңани қамахлъютың паниның уңувалӷӣңӯт. Лъңа Кияӷнықынӷита̄т туқукат».

39Иляңита апыҳтуӷикаюгыт Лӣлиҳтӯсяның пика̄т: «Апыҳтуӷиста, кӣмсиӷля̄тақўа̄тын». 40Та̄хкын тытугьягутка̄т а̄пқуӷа̄ныӷмың.

А̄пқуӷа̄лъық Христосымың

41Та̄хкын Иисусым а̄птыкӣ: «Сяңанми югыт Христос иӷнықнӣқатху Давидымун? 42Ига̄ни Псалмым Давид пика̄лӷӣ:

“Атанӷым Кияӷныӷым пикақа̄ Атанқа,

Ақуми аӷынқигнымкун,

43кынляңа аңуяхтын асиңӣтылъымнун итыгаҳпык”.

44Давидым туқлъюқа̄ “Атаныӷмың” ынка̄м натынми иӷнықылъықагу?»

Иисусым Кылыңася̄ӷускаңи Апыҳтуӷикаюгыт Лӣлиҳтӯсяның

45Югыт лъңанун нагатусималюки, Иисусым малихся̄ҳтыни пикӣ: 46«Кылыңалюси апыҳтуӷикаюгның Лӣлиҳтӯсяның. Иглыҳсюныҳтӯт а̄лъютың акуҳтуқамың аткуя̄ӷмың, акилъпыгаӷвигнилъю қуякысюгақут а̄ңўа̄ӷуҳтыка̄лютың. Синагоганилъю нықынӷаҳқылӷӣнилъю ақумьюныҳтӯт а̄ңўа̄ӷуҳтыкат ақумутӣтхун. 47Ысҳаӷля̄тақулюки угиңиӷат мыңтыӷӣӷақӣт. Та̄хкын пиниӷнилютың писқылъютың та̄клъюку юӷаӷақут. Тама̄кын апалъюқлъюку аӷью̄лъыңыҳлъягьяҳқа̄гут!»

Currently Selected:

От Луки 20: ess2

Highlight

Copy