От Матфея 11

Иоанным Крестителым Малихся̄ҳтыни Иисусымун Пистыкаңи

1Иисусым қуля ма̄лӷук сӣпнықлъюку малихся̄ҳтыни апыӷӣӷьямики апыҳтуӷаныӷмың, тама̄кын аӷуляқыхкақ иляңитнун нунаӷнун апыҳтуӷиналюнилъю, уңипақиналюнилъю.

2Анусимиңлъяӷвигмылъюни Иоанным Крестителым нагақуӷлюку Христос ся̄қутаңа, иляңи малихся̄ҳтыни каяхтыкӣ Иисусымун. 3А̄птыка̄т Иисус: «Лъпыңўа̄ тагинақника̄т, налиӷмың кина тагияҳқа̄ўа̄?» 4Иисусым кӣмсиқӣ: «Уңипа̄сяҳтуҳтыху Иоанн нагаткаҳпысиныңлъю, ысҳақаҳпысиныңлъю: 5аяка̄ялӷӣт ысҳаӷьягутут, пиюгигасялӷӣт пиюгьягутут, проказалгуялӷӣт на̄лъҳутут, тӯслъяӷьялӷӣт нагақӯсягутут, туқука̄ялӷӣт уңуваҳтут, аклъюмалӷӣнунлъю Пинилӷӣт Уңипат уңипақут. 6Кина алңунак ухпықинанинӷилъкуми хўаңамның қуястыка̄гуқ!»

Иисусым А̄пқаңа Иоанн Югнун

7Ага Иоанным малихся̄ҳтыңи аӷуляқсята, Иисусым акузиткыхка̄ Иоанн юлӷутнун: «Килга̄нун пӣқңафси, сяңўа̄ ысҳаӷьяҳтуӷыстыху? Выга̄қ ануқым уфсюгускаңа̄? 8Сяқустыгми? Ысҳаӷналюкӯ а̄ткақыхтақ ю̄к? Тама̄кын а̄ткақылӷӣт кияҳтақут умӣлгыт мыңтыӷӣтни! 9Сяңўа̄ми ысҳаӷьяҳтуӷыстыху? Ӯкналиқиста̄? А̄а, уңипа̄тамси, ысҳақаҳси Иоанн ӯкналиқистыңина̄нӷитуқ. Мыгнунаӷатаӷаҳтуқ 10қаюҳлъяк лъңаңӯқ Акузитыт Игақыхкат а̄пқа̄т хўатын:

“Кияӷнық пӣқ, Сивухпыни каяхлъықақа уңипаҳтыка,

ята̄ҳқысяҳтӣсқылъюку тӯмкаҳқан”.

11Ипа уңипа̄тамси, Иоанн Крестителым мыгнуналъыҳпига̄гуқ югның алъхықаӷьяхаӷның. Иўырңа кина алңунак укалиҳпигақ Атаныҳпагулъҳани Қилягым Иоаннымың мыгнунаӷатаӷаҳтуқ. 12Иоанн Крестителым уңипақиюха̄лъҳаның хўавымун кынляңа, сю̄хлъюгыт ўаяӷнақуткақа̄т Атаныҳпагулъҳа Қилягым. 13Қамахлъютың ӯкналиқистытлъю, Моисейемлъю Лӣлиҳтӯсӣта ӯкналиқуткыңъўа̄т Атаныҳпагулъҳа Қилягым кынляңа Иоанным тагилъҳанун. 14Иоанныңӯқ ӯкналиқистыт ӯкналиқуткыхка̄т тагинақнилъыӷмыхтыхун Илия. Ухпықсюкуфсигу ӯкналиқылъық, Иоанн Илияңӯқ. 15Сигутылгӯси, нагатык!

16Ма̄тын кияҳлъыҳӣт югыт сямун успунъақсиңи? Таӷнуҳа̄ӷыстун аюқут ақумӯлъютың акилъпыгаӷвигни, наӷа̄лгутмыхнун акилӷӯлъҳӣт хўатын:

17“Қалӷиҳта̄тамси, тукалыганӷитуси!

Қийиқутукут, қийиқынӷитуси!”

18Иоанн тагӣқңами постақуқ, мыӷигатуқлъю виномың, ынка̄м югыт хўатын пика̄гут: “Туӷныӷалгӯқ”. 19Иӷныӷа Югым тагӣқңами, ныӷылгусиӷақӣ, мыӷылгусиӷақӣлъю югыт, ынка̄м югыт хўатын пика̄гут: “Ю̄кқун та̄на ысҳақаҳтыху! Ныӷытупихтуқ, мыӷытупихтуқ, илякумта̄қа̄тлъю налогмың қырңуҳтистыңита, сыӷлыҳқыстытлъю!” Нақамлъю Кияӷныӷым пыҳқинылъҳа ипапиҳқыңъа̄қ сялъҳакун».

Иисусым Аӷью̄қаңи Авутыҳқылъҳилңӯт Югыт

20Иисусым алъюлъюки алъя̄ҳлъюхўаҳтилъыни атуқыхкақӣ Хоразиными, Вифсаидами ынкам Капернаумымилъю. Иўырңа югит авутыҳқылъютың та̄қылъҳилңӯт сыӷлыҳқынъыӷмың ынка̄м Иисусым аӷью̄ӷмикӣ. 21Пикӣ: «Сыӷлыӷўа̄ӷунақңӯси, Хоразиныӷмӣни! Сыӷлыӷўа̄ӷунақңӯси, Вифсаидаӷмӣни! Лъпысини алъя̄ҳлъюўаҳтилъыҳлъягыт апыӷӣқат пика̄яқата Тирымилъю, Сидонымилъю, ныӷипихлъютың югит авутыҳқылъютың сыӷлыҳқынъаниӷнаяҳтут. Тама̄кын апалъюқлъюку сювиналӷӣмың қӣпаӷаҳқамың а̄лъютың ақумнаяҳтут панытылъыҳтыхун. 22Ипа уңипа̄тамси, Нанқихтилъҳым Аӷныӷани Тирыӷмӣтлъю, Сидоныӷмӣтлъю аӷьюлъыҳқыста̄ҳа̄яҳқа̄гут лъпысиның! 23Ынка̄м лъпыси, Капернаумыӷмӣни! Қайўа аңлистыҳлъягьяӷңа̄ҳпыси лъпысиның катам рыпалъ сюмыҳпысини усюқылъыңылъықнилъюси қилягми, йыӷлыги укихлъықӣси геенамун. Алъя̄ҳлъюхўаҳтилъыҳлъягыт пика̄яқата Содомыми, паниның аӷныӷми хўани ныкывӷанаяҳтуқ! 24Иўырңа уңипа̄тамси Нанқихтилъҳым Аӷныӷани Кияӷныӷым наңлъыкатаӷаӷьяҳқақӣ Содомыӷмӣт пакихулъюки лъпысиның!»

Хўаңамнун Тагилюси Мыӷна̄литык

25Та̄хкын Иисус пикақ: «Ка̄й Ата, Атанқа̄тын қилягымлъю, нунамлъю! Игамсиқаюгвикамкын қаюҳлъяк лӣтка̄нӷилңуӷнун лӣтыстыкақан ипапиҳқылъық ӣқан лӣтканыңлъю, пыҳқиныӷныңлъю. 26А̄а, Ата̄й, ыфқуқылъыҳпытун пика̄гутын.

27Атама тагивақақа̄ сяңўа̄ қамахтыңъўа̄ӷлюку. Китум алңунак налъюка̄ Иӷнық, иўырңақун Атам. Китум алңунак налъюка̄ Ата, иўырңақун Иӷныӷым, ынка̄м Иӷныӷым накмикыхкаминун лӣтыслъықа̄ Ата.

28Тагитык хўаңамнун қамахлъюси уӷлыӷилӷӣни, уқихтуқамыңлъю акмалыхлъягни, мыӷна̄лислъықамси. 29Ӣсқаӷмӣтахка а̄лъюкык лӣтивикитыңъа, қаюҳлъяк якумаңинъыӷитуңа, илюка қусывыгңа̄қ. Ынка̄м мыӷна̄лилъықуси уңувасиҳпысинун. 30Ӣсқаӷмӣтахка пияқнӣтук, акмакалъю уқыңыста̄ҳа̄гуқ».

Currently Selected:

От Матфея 11: ess2

Highlight

Copy