मूक चेलाकू 18

पउलूस कुरिंती सहररे

1हना तयोमरे पउलूस एतेनस सहर अते कुरिंती सहर अगी तोराय। 2दो हाँय हंडा पुंतूस छतररीग अकिला ञावीग एहूदा होड़ सुदाय जुमावनेना। हाँय आँयग अइमी पिरिसकी सुदा इटली देसराः रूमी सहर अतेय वेजेडा। कइसर मरंग राजा कलाउदियूस जमा एहूदाकू रूमी सहर अड़ाःकेडखन ञीर लगाय कतावातेडकुःआ। हनालगा हँकिन रूमी सहर अड़ाःतेडखन कुरिंती सहररेकिन सेनेडा। 3हँकिनराः पेनेसा कुंबा तुला लगा दोहोना, अरू हना बुता पउलूस होंय एचेया। हनालगा पउलूस हँकिन सुदाय दोहोना अरू हना बुताकू बुताःआ। 4जनामा लोड़ोनराः दिनरे पउलूस अरजी ओड़ाःरे सेनेवाडखन एहूदाकू अरू बेगर एहूदाकू सुदाय कता होड़ेंगा अरू हँकू एचे बिसवासकू लगाय कुरनिसगेःआ।

5मकिदुनिया राइज अते सिलास अरू तिमुतियूस वेजेडा दो पउलूस कुंबा तुला बुता अड़ाःतेडखन सरवने परसारगोड ञवना। हाँय एहूदाकू एचेरे ईसू, मसी हवे माःआने कतागोड ञवना। 6मनदो एहूदाकू हाँय मुरुककू घंटावतिडिया, अरू ओपताय घड़ीनकू कतावाया दो, पउलूस आँयगराः सोनहे मीटोंग चिनहा इया हँकूराः बदीरेय कोटातेडखने कताया, “भगवान अपेय डंडियाता हनाराः जिमेवारी अँननपेराः होयाःता। नुँहू वरीते ईंग बेगर एहूदाकू एचेरे भगवानराः नपाय सरवनिंग कता उदुःता।”

7हनते पउलूस अरजी ओड़ाः अते तीतियूस एसतूस ञावीग बेगर एहूदा होड़राः ओड़ाः तोराय। हाँयराः ओड़ाः अरजी ओड़ाः कुटीरे दोहोना अरू हाँय बेगर एहूदा होड़े दोहोना हों भगवान जाग घड़ीने सेवाःआ। 8अरजी ओड़ाःरीग हातपात होड़ किरिसपूस आँयग ओड़ाःरिकुःआ जमा होड़कू सुदा परबू ईसू एचेरेकू बिसवासतेरा। कुरिंतीरिकुःआ मुरुक बगरा होड़कू, पउलूसराः परसारकू अयूमतेरा हँकुःआ होड़कू हों परबू ईसू एचेरे बिसवासतेडखन बतिसमाकू गोःतेरा।

9मी रइत परबू ईसू पउलूस एचेरे मीटोंग दरसनरेय कतातेरा, “ईंग आम सुदा इदानिंगा अरू तोनोंगीग आम ओरोकू हनी अवेतेडमेःआ। ईंगरिकुःआ चेलाकू बड़ाँः लगा मुरुक होड़कू नाःआ सहररे इदानकुःआ। 10हनालगा आम अहम बोर, कलेकाल अलोम दोहोन मनदो होड़कू एचेरे ईंग बदीरेम कता उदुःगे।” 11दो पउलूस हना सहररे मी बरिस छो महिना वरीय दोहोना अरू भगवानराः सरवने कता उदुःतेरा।

12गलियो, अकाया छतररीग मरंग हातपात होड़े बड़ाँवनेन मेला, एहूदाकू पउलूस बदीरे मिनीनेनखन हाँय कोट कछेरीरेकू अगूतिरिया। 13हँकू हाँय बदीतेडखनकू कतातेरा, “नाँयग होड़ नाःआ सहररिकुःआ होड़कू अलेराः नियम इया कोवान, मनदो एटाः इया भगवान जाग लगाय चेडलेतना।”

14पउलूस तोनोंग इया कता लगाय ओंगलेःआ दो, हाँयग गलियो एहूदाकू एचेरेय कताया, “अपे ईंग एचेरे नाँयग होड़राः तोनोंग मरंग कसूर सहे गारबारपे कताय दो, ईंग अपेराः कता अयूम लगायिंग दोहोनता। 15मनदो अपे तोनोंग तोनोंग लबदकून, ञावकून अरू अपे एहूदाकूराः नियम बदीरेपे कतायतना दो, अपे अँननपे अपे नाःआ कतापे फड़ियावगे। नाःआ इयाःआ कता फड़ियावगे लगा ईंग ओरोयिंग दोहोनेना।” 16हनते हाँय हँकुःआ जमा होड़कू कोट कछेरी ओड़ाः अतेय एचे उडुंगगोतेडकू। 17हनते बेगर एहूदाकू अरजी ओड़ाःरीग हातपात होड़ सोसतिनूस साबतेडखन कोट कछेरी ओड़ाः मड़ंगरे हाँयकू ञेडतेरा। हनारे हों गलियो हँकुःआ होड़कू मेरेय रोंकावगाडकू।

सिरिया देस अगी पउलूसराः कुदा वेग

18मुरुक दिन वरी पउलूस कुरिंतीरेय दोहोना। हनते हाँय पिरिसकी अरू अकिला सुदा सिरिया देस अगी जहाजरे तोराकू। पउलूस भगवान एचेरे किरिया कसटे जोमतेरा। हनालगा हँकू सेन अते मड़ंग पउलूस एहूदाकूराः रिती-बिधी इया किंकिरिया सहररे आँयगराः ऊबे एचे ईरगोतेड। 19हँकू इपीसी सहररेकू सोदोरनेन अरू हाँय पिरिसकी अरू अकिला हंडाय अटूतेडकिना। अरू हाँय अनँयग आँयगते अरजी ओड़ाःरेय सेनेडा अरू एहूदाकू सुदाय कता होड़ेंगा। 20हँकुःआ होड़कू अँकू सुदा अरू तोनोंग दिन वरीय दोहोन लगाकू कतावाया दो, हाँय मेरेय दोहोगान। 21मनदो हाँय सेन मेला हँकू एचेरे नाःआ इयाय कतातेरा, “भगवानराः ओंगोल इदान दोयिंग कुदा वेगता।” हनते हाँय इपीसी सहर अते जहाजते तोराय। 22हाँय कइसरिया सहररेय सोदोरनेन दो हाँय एरुसलेम सहरराः कलसियारिकुःआ होड़कू सुदा जुमावनेनखने सलामतेडकुःआ। हनते हाँय अंतकिया अगी तोराय।

23पउलूस अंतकिया सहररे तोनोंग बेला वरीय दोहोना। हनते हाँय अंतकिया अते गलातिया छतर अरू पिरगिया छतररेय सेना अरू जनामा बिसवासी होड़कू बिसवासरेय एचे बड़ियाड़गोतेडकू।

इपीसी सहररे अपोलोस

24हना वरीते अपोलोस ञावीग मी होड़ एहूदा होड़ इपीसी सहररेय वेजेडा। हाँय मिसिरी देसराः सिकंदर सहररीग होड़े दोहोना। हाँय नपाय चेडतो होड़े दोहोना अरू भगवानराः सरवन बदीरे कनहूनदारे दोहोना। 25परबूराः दूर बदीरे तोनोंगीग हाँये चेडा, अरू हाँय अनँयग जीवरे बहालयानखन ईसू बदीरे मिनी जीव अरू सतायतेय चेडकुःआ। हनारे हों हाँय एहुनाराः बतिसमा बदीरे एकलाय सुसुदीःआ। 26हाँय बेगर बोरते अरजी ओड़ाःरेय कतागोड ञवना। दो हाँयराः बदीरे पिरिसकी अरू अकिला अयूमतेरा दो हँकिन हाँय अँकिन ओड़ाःरेकिन राःतिरिया अरू भगवानराः दूर अनउर नपायतेकिन कता उदुःवातेडिया।

27अपोलोस अकाया छतर सेन लगाय ओंगलेःआ दो इपीसी सहररिकुःआ बिसवासी होड़कू हाँयकू कता बहालगोतेडीग अरू अकायारिकुःआ बिसवासी होड़कू हाँयकू नेत-नेवारगेय लगा चिठीकू ओजाः इदीतेरा। हाँय हंडाय सोदोरनेना दो भगवानराः मयातेकू बिसवासतेरा हँकुःआ अकाया छतररिकुःआ बिसवासी होड़कू लगा मुरुक संघरा होयानेना। 28हाँय एहूदाकू सुदा भगवानराः कागद अतेकू कता होड़ेंगा अरू हना कागद अते ईसू, मसी हवे माःआने उदुःवातेडकुःआ।

Currently Selected:

मूक चेलाकू 18: kfp

Highlight

Copy