एहुना 10
10
सरवाहा अरू आँयगरिकुःआ भेड़ाकू
1दो ईसू कतातेरा, “अपे ईंगपे अयूम! भेड़ाकूराः गुदड़ीराः दुवारते मेरेय बोलता, मनदो एटाः अगीतेय देग बोलता हाँयग होड़, इनिग होड़ अरू लुड़ी होड़ इदानिया। 2मनदो दुवारतेय बोलता हाँयग होड़, अनँयग भेड़ाकूरीग सरवाहा हवे। 3हाँय बोल लगा हना गुदड़ीरीग अगुरादार दुवारे गीगगोडता। हाँय आँयगरिकुःआ भेड़ाकू मेमेडटोंगराः ञाव गोः घड़ीने राःकूता। हँकुःआ भेड़ाकू हाँयराः अरोकू अयूमता अरू हाँय हँकू ससराव लगा बहरीय गोःयाकूता। 4हाँय हँकू बहरी उडुंगकेडकूखन हँकू मड़ंग मड़ंगे सेनता। अरू भेड़ाकू हाँयराः अरोकू सुदीयता, हनालगा हँकू हाँय देह दूरकू सेनता। 5मनदो हँकू अनसिनहार होड़राः देह दूर मेरकू सेनता। हँकू हाँयराः अरो मेरकू अरखाःता। हनालगा हँकू हाँय अतेकू ञीर जुवाःता।” 6ईसू हंडाकू दोहोना हँकुःआ होड़कू एचेरे नाःआ अउल-तउल कहड़ीय कतातेरा। मनदो हँकू हाँयराः कताकूनराः मतलोब मेरकू बुझाव अवेगान।
7हनालगा ईसू हँकू एचेरे अरूय कताया, “अपे ईंगपे अयूम! भेड़ाकू बोल लगा दुवार ईंग हवे। 8ईंग अते मड़ंगकू वेजेडा, हँकुःआ होड़कू इनिग होड़कू अरू लुलुड़ी होड़कू दोहोना।#एज 34:1-24 हनालगा ईंगरिकुःआ भेड़ाकू हँकूराः अरो मेरकू अयूमगाड। 9भेड़ाकूराः गुदड़ीराः दुवार इनिंग हवे अरू तोनोंगीग ईंगते हंडाय बोलता, हाँय बनसाव जुवाःताय। हाँय बेगर बोरते बोल उडुंगगुः घड़ीने सराःता। 10इनिग होड़ इनिगगे लगा, अरू ञेड एएंडा लगा अरू लाय एएंडा लगाय वेगता। मनदो हँकू जीव पवाः लगायिंग वेगकिया अरू मुरुक बडे बगराकू पवाः।
11नपाय सरवाहा ईंग हवे। नपाय सरवाहा आँयगरिकुःआ भेड़ाकू लगा गुजुः लगा हों सपड़ावतो दोहोनता। 12मंजूरीया होड़ सरवाहा मेरेय दोहोनता सहे भेड़ाकूरीग मालिक हों मेरेय दोहोनता। हनालगा रमू बुःआ वेगतोय ञेलेयतान दो, हाँय भेड़ाकूय ञीर एंडा अटूकूता। हनमेला रमू बुःआ भेड़ाकू साबकेडखने रिती-छितीगोडकूता। 13हाँय मंजूरी होड़े दोहोनता, हनालगा हाँय ञीर एंडा अटूकूता अरू भेड़ाकू मेरेय ओंगोलकूता।
14नपाय सरवाहा ईंग हवे। ईंग ईंगरिकुःआ भेड़ाकूयिंग सुदीता अरू ईंगरिकुःआ भेड़ाकू ईंगकू सुदीता। 15अरू ईंग ईंगरिकुःआ भेड़ाकू लगा ईंगराः जीविंग एमेगोडता। ईंगरीग अपांग ईंगे सुदीता, हनन इया ईंग हों ईंगरीग अपांगिंग सुदीता। 16नाःआ गुदड़ीरे कोवाकुःआ ईंगरिकुःआ एटाः एटाः भेड़ाकू#10:16 एटाः एटाः भेड़ाकूराः मतलोब नाःआ हवे, बेगर एहूदाकू अते ईसू मसी एचेरेकू बिसवासगेयता हँकुःआ होड़कू बदीरे ईसू कतायतना। हों इदानकुःआ। हँकू हों ईंगराः गुदड़ीरे अअगू इदा अरू हँकू हों ईंगराः अरोकू अयूमता। हनते जमाकू मिनीटोंग खुड़हारेकू दोहोनता अरू हँकूरीग मिनीटोंग सरवाहाय दोहोनता। 17ईंग गुजुः लगा ईंगराः जीविंग एमेगोडता अरू हनते अरूयिंग जियाव रिमुःता। हनालगा ईंग अपांग ईंगे दुलारता। 18तोनोंगीग ईंगराः जीव ईंग अते ओरोय गोः अवेतेरा, मनदो ईंग इनिंग ओंगोलतेयिंग एमेगोडता। ईंगराः जीव एएमे लगा अरू अरूयिंग गोः कुदाय लगा हों हातपात इदा। नाःआ हुकुम ईंग अपांग भगवान अगीतेयिंग पवावकिया।”
19नाःआ कता अयूमतेडखन एहूदाकू अरूकू हिगार हटिंगयान। 20हँकू अते मुरुक बगरा होड़कू कताया, “नाँय एचेरे भूत इदा अरू नाँय बउड़ाहा इदानिया। नाँयराः कता चिला लगाबू अयुमे?”
21मनदो एटाः होड़कू कताया, “भूत इदा हना इया नाँयग होड़राः बड़रा कोवानेःआ। तोनोंयग भूत अंधा होड़े एचे ञेल अवेयता जा?”
एहूदाकू मेरकू बिसवासगाड
22तोनोंग दिन तयोमरे ररंगराः बेलारे एरुसलेमरे हनूका परोब#10:22 भगवानराः ओड़ाः सिरिया देसरिकुःआ होड़कूराः आड़ अते एहूदाकू जूदा मकाबीसराः अगुवाइते ई. म. 164 बरिसरेकू सडावकिया। हनाराः बहालते एहूदाकू हनूका परोबकू मनाःता। दोहोना। 23दो ईसू भगवानराः ओड़ाःराः राचरे सुलइमान ञावराः परछी पेंदारेय दँड़ाःआ। 24हनमेला एहूदाकू हाँय चँड़ा रेडतिडिगखनकू होंबरेया, “अलेराः जीव तुमिनमे बार बंटागेता? आम मसी हवे दो अले एचेरेम कता उदुःबाःगोड।”
25दो ईसू कतातेड, “ईंग अपे एचेरेयिंग कनाता उदुःगोतेडा। मनदो अपे मेरपे बिसवासगेतना। ईंग अपांगराः ञावतेयिंग एचेयता, हनानाः बुता ईंगराः हिदइत हवे। 26मनदो अपे ईंगरिकुःआ भेड़ाकू ना लवे। हनालगा अपे ईंगराः कता मेरपे बिसवासगेता। 27ईंगरिकुःआ भेड़ाकू ईंगराः अरोकू अयूमता। ईंग हँकूयिंग सुदीता अरू हँकू इनिंग देह दूरकू वेगता। 28ईंग हँकू लगा ओरो टुटीगनेना हना जीविंग एमेवाकूता। हँकू कहियो ओरोकू लायनेना अरू तोनोंगीग हँकू ईंग तिःई अते ओरोकू गोः अवेतेडकुःआ। 29ईंगरीग अपांग भगवान, हँकुःआ होड़कू ईंग तिःईरेय जिमाकेडकुःआ अरू हाँय जमाकू अते मरंग इदानिया। अरू तोनोंगीग हँकू ईंग अपांगराः तिःई अते ओरोकू गोः अवेतेडकुःआ। 30ईंगरीग अपांग अरू ईंग मिनी हवे।”
31नाःआ अयूमतेडखन एहूदाकू ईसू तेके गोएगगेय लगा दिरिकू रेमतेरा। 32मनदो ईसू हँकू एचेरेय कताया, “ईंग अपांग अगीते मुरुक बयाव जुवाः इयाःआ बुताकूनिंग एचे उदुःवाडपेःआ। हना अते करा बुता लगा, दिरिते ईंग ञेड एंडा लगापे ओंगलेतना?”
33एहूदाकू कतातेरा, “नपाय बुताम एचेतेरा हना अते अले आम दिरिते ञेड एंडामे लगा मेरले ओंगलेतना। आम मी होड़ होनोड़ एकला हवे अरू ईंग भगवान हवे, माःआनमे कताकेडखन भगवान बदीरे ओपता बड़राम कतायतना। हनालगा अले आम दिरितेले तेके गोएग एंडामेता।”
34दो ईसू हँकू एचेरेय कताया, “भगवानराः कागदरे भगवान नाःआ इयाय कतातेरा,
ईंग कतातेरा, अपे भगवानकू हवे।#सेरेंगकून 82:6
35अरू भगवानराः कागदराः कता, लबरा ओरो होयानेना। भगवानराः सरवनकू मनेवातेरा हँकुःआ होड़कू भगवानकू माःआने कतावातेडकुःआ, 36अरू अपांग भगवान आँयगराः बुता बुता लगा ईंगे सुनावकिडिंगखन नाःआ चउंदीसरेय वारकिरिंगा। दो ईंग बदीरे अपे चेले माःआनपे कतायता? ईंग भगवानरीग बेटा हवे, माःआनिंग कतायतान दो अपे चिला लगापे कतायता, आम भगवानमे ओपताता, माःआन? 37ईंग भगवानराः बुता मेरिंग एचेयतना दो ईंग एचेरे अलोपे बिसवासगे। 38दो ईंग इनिंग अपांगराः बुतायिंग एचेता अरू अपे ईंग एचेरे मेरपे बिसवासगेता होले, ईंगराः बयाव जुवाः इयाःआ बुतारेपे बिसवासगे। हनाते अपे सुदीगोडता अपांग सुदायिंग मिनीयना अरू अपांग ईंग सुदा होंय मिनीयना।”
39हनते हाँय अरू सबेय लगाकू कुरनिसतेरा। मनदो हाँय हँकूराः तिःई अतेय बोड़ेड उडुंगयान।
40हना तयोमरे ईसू एरदन नई मार परोम तोराय। हना ततेररे एहुना मड़ंग दिनरे होड़कू बतिसमाय एमेवाकुःआ। अरू ईसू हंडा सेनेडखने दोहोना। 41मुरुक होड़कू हाँय एचेरेकू सेनेडा अरू हँकू कताया, “एहुना तोनोंगाः बयाव जुवाः इयाःआ बुता मेरेय उदुःगाड। मनदो एहुना नाँयग होड़ बदीरेय कतातेरा, हना जमा कताकून सनाताय दोहोना।” 42अरू हंडा मुरुक होड़कू ईसू एचेरेकू बिसवासतेरा।
Currently Selected:
एहुना 10: kfp
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
