एहुना 4

ईसू अरू समरिया अइमी

1ईसू सुदीगोतेड फरीसी होड़कू अयूमकेरा, ईसू एहुना अते मुरुक बगरा होड़कू अनँयग चेलाकू बड़ाँवकेडखन बतिसमाय एमेवातेडकुःआ, माःआन। 2सतायरे ईसू होड़कू बतिसमा मेरेय एमेवाकुःआ, मनदो आँयगरिकुःआ चेलाकू होड़कू लगा बतिसमाकू एमेःआ।

3हनते ईसू एहूदिया छतर अड़ाःतेडखन गलील छतररेय कुदायान। 4दो हाँय समरिया छतर पारकियानखन कुदा सेन लगा दोहोना। 5सेनेन सेनरे हाँय समरिया छतरराः सुकार सहररेय सोदोरनेना। हना ततेररे एकूब आँयगरीग बेटात उसूप लगाय एचे गडातेरा हना इंदोरा दोहोना। 6दो तिकिन बेलायान अरू ईसू दूर सेनेन सेन पड़ूनेनखन हनानाः इंदोरा धरीरेय दुड़ुःयान। 7हनमेला आँयग चेलाकूतेन जोम जिनिसकून किजा अगू लगा सहर अगीकू सेनेडा। 8हना तयोमरे मी होड़ समरिया छतररीग अइमी दाः गोः लगाय सेनेडा। दो ईसू हाँय एचेरेय कताया, “ईंग दाःमे ओवायिंग।”

9दो हाँयग अइमी कताया, “आम एहूदा होड़ हवे अरू ईंग दो समरियीन हवे। दो चिला लगा दाःमे असेतना?” (एहूदाकू समरिया छतररिकुःआ होड़कू सुदा तोनोंगाः जिनिसकून मेरकू एमे होड़ेंगा।)

10हनते ईसू कतातेड, “भगवान एमेयता हना बदीरे अरू आम एचेरे दाः ञूय लगाय असेयतना हाँयग होड़ बदीरेम सुदीकेः दो, आम ईंग एचेरेम असेकेःआ अरू आम लगा जीवराः दाःयिंग एमेवाकेमेःआ।”

11हनते हाँयग अइमी कतातेरा, “ने साहेब, आम एचेरे दाः ओर उडुंगगे लगा हों कही कोवानेःआ अरू इंदोरा दो मुरुक गहीर इदा। दो जीव एमेयता हना दाः करा अगीते आम एचेरे इदा? 12दो आम अबूरीग खुटिपरिया होड़ एकूब अते हों मरंग इदानमेःआ जा? हाँय अरू आँयगरिकुःआ बेटाकू अरू असूलतो जानरकू हों नाःआ इंदोरा अतेकू ञूतेरा अरू अले लगा नाःआ इंदोराय जिमाकेरा।”

13दो ईसू हाँय एचेरेय कता कुदातेरा, “नाःआ दाःए ञू, हाँयग होड़ अनारू ततंगगेयता, 14मनदो ईंग एमेयता, हना दाः तोनोंगीग ञूय दो हाँय सगर सइट जूग वरी ततंगतो ओरोय दोहोनेना। सनातायरे, ईंग हाँयिंग एमेवाता, हना दाः हाँयराः इंदरीरे दाः सूती इया तू ञवनता अरू हना दाः हाँय ओरो टुटीगनेना हना जीव अगी गोःयायता।”

15हनते हाँयग अइमी कतातेड, “ने साहेब, हना दाः ईंग एमेवायिंगमे दो, ईंग ओरो ततंगतिरिंगा अरू दाः गोः लगा नाःआमिन तान वेग लगा ओरो परावनेना।”

16दो ईसू हाँय एचेरेय कतातेड, “दूमे! आम हेरेल नंडाम राः अगूगेय।”

17हनते हाँयग अइमी कतातेड, “ईंग बे हेरेलते इदानिंगा।”

दो ईसू कतातेड, “आम बे हेरेलते इदानमेःआ माःआनमे कताकेरा, हनदो सताय हवे। 18मड़ंगरे आम पाँचगोटोंग मरदकूम हेरेल पुरावकेडकुःआ अरू नुँहू आम सुदा इदानिया हाँयग मरद आमरीग हेरेल ना लवे। हनालगा आम कताकेरा हना कता सनाताय हवे।”

19दो हाँय कतातेड, “ने परबू, ईंग जीव ओंगलेतना आम भगवानराः बड़रा कतायीग होड़ हवे। 20अलेरिकुःआ खुटिपरिया होड़कू ननानाः पहाड़रे भगवानकू जागा। मनदो अपे एहूदाकू कतायता, एरुसलेम एकलारे हमा भगवान जाग लगा इदा।”

21दो ईसू कतातेड, “ने दिदी, ईंग एचेरेम बिसवासगे। दरवाःआ हना बेलारे अपे भगवान नाःआ पहाड़रे सहे एरुसलेमरे ओरोपे जागतिरिया। 22अपे जागगेयतना, हाँय अपे समरिया छतररिकुःआ होड़कू मेरपे सुदीगेयता। मनदो सडावदार एहूदाकू अतेय वेगता। हनालगा अले जागगेयतना, हाँयले सुदीयतना। 23मी बेला दरवाःआ अरू हनानाः बेला नुँहू बुँहड़ीयना। सतायते अपांग भगवानकू जागता, हँकुःआ होड़कू बिरुवा अरू सतायते हाँयकू जागता। अरू ननन इयाकू जागगेता हँकुःआ होड़कू भगवान ञामकूता। 24भगवान बिरुवा हवे, अरू हाँयकू जागता हँकुःआ होड़कू बिरुवा अरू सतायते भगवान जागगेय लगा इदा।”

25दो हाँयग अइमी कतातेरा, “ईंग सुदीयतना, मसी, किरिसत माःआनले कतावायता, हाँय वेग लगा इदानिया। हाँय वेग हनन बेला अले जमालेःआय उदुःवालेता।”

26दो ईसू हाँय एचेरेय कतातेरा, “नुँहू आम सुदाय बुतुड़ुतना, हनाँय ईंग मसी हवे।”

27हननमेला ईसूरिकुःआ चेलाकू कुदायान। हँकू ईसू मी होड़ अइमी सुदा बुतुड़ूत ञेलतिडिगखनकू बयावयान। मनदो चेलाकूतेन अते तोनोंगीग मेरकू होंबोरगाड, आम चिलाम चहाःतना सहे नाँय सुदा चिला लगाम बुतुड़ुतना, माःआन।

28हनते हाँयग अइमी आँयगराः गगरी अटूतेडखन सहर अगी कुदा सेनेडखन होड़कू एचेरेय कता उदुःगेःआ, 29“दबूपे अरू मी होड़पे ञेल। हाँय ईंग मड़ंगरेयिंग एचेतेरा हना जमाकूने कता उदुःगोतेडा। मसी हनाँय हवे जा?” 30नाःआ अयूमतेडखन होड़कू सहर अते ईसू एचेरेकू वेजेडा।

31हना वरीते चेलाकूतेन ईसू एचेरेकू कतातेड, “ने गुरुजी, कहिसाः जोमवामे।”

32दो ईसू हँकू एचेरेय कताया, “ईंग एचेरे जोम लगा इदा, हना बदीरे अपे तोनोंगीग मेरपे सुसुदीतना।”

33हनते चेलाकूतेन कता होड़ेंगा, “नाँय जोम लगा तोनोंगीग कहिसाः अगूकेराय, जा?”

34दो ईसू हँकू एचेरेय कताया, “ईंगे वारकेरा हाँयराः ओंगोल इयायिंग सेन अरू बुतायिंग बुता पुराव। ननानाः हवे ईंगराः जोम जिनिस। 35अपे मेरपे कतायता जा, नुँहू वरीते अरू चइर महिना हुड़ुकून ईर लगा बनसावकिया? अपे एचेरेयिंग कतायतना, अपे नपायते दोहोड़ अगीपे ञेल। इईर लगा हुड़ुकून बेलेयना। 36इईरीग होड़ बुतातना अरू हनाराः मंजूरीय गोःगोतना अरू ओरो टुटीगनेना हना जीव लगाय बटुड़ाव अदेरगेतना। नाःआते वेवेरीग होड़ इईर होड़ सुदा बना होड़किन बहाल जुवाःता। 37मी होड़ वेरताय अरू एटाः होड़ ईरता। नाःआ कहड़ी सताय हवे। 38एटाः होड़ वेरकेरा हना कियारीराः हुड़ू बेगर मिहनइतते इईर लगायिंग वारपेतना। एटाः होड़कू हंडाकू मिहनइततेरा, मनदो हनाराः नफा अपेपे पवावकिया।”

39समरिया छतरराः सुकार सहररिकुःआ होड़कू एचेरे हाँयग अइमी कतातेरा, “नाँय ईंग नुँहू वरीयिंग एचेकेरा हना जमाकूने कता उदुःगोतेडा।” नाःआ अयूमतेडखन हँकू अते मुरुक बगरा होड़कू ईसू एचेरेकू बिसवासतेरा। 40समरिया छतररिकुःआ होड़कू ईसू एचेरे वेगवाडखन हँकू सुदा दोहोन लगा हाँय एचेरेकू असेतेरा। अरू ईसू हँकू सुदा बार दिने दोहोनेना। 41ईसूराः कता अयूमकेडखन अरू बगरा होड़कू हाँय एचेरेकू बिसवासतेरा।

42हनते हँकुःआ होड़कू हाँयग अइमी एचेरेकू कतातेरा, “आम अले एचेरेम कतातेरा हना एकलाते मेरले बिसवासगेतना। नुँहू अले अँननले अयूमतेरा अरू अँननले सुदीगोतेडा, सतायतोरे नाँयग होड़ चउंदीसरिकुःआ होड़कूरीग सडावदार हवे, माःआन।”

हातपात होड़रीग बेटात ईसू नपायतिरिया

(मती 8:5-13; लूका 7:1-10)

43बार दिन समरिया छतररे ईसू दोहोना अरू हना तयोमरे हाँय गलील छतर तोराय। 44मड़ंगरे ईसू कतातेरा, “भगवानराः बड़रा कता होड़ अनँयगराः छतररे होड़कू मेरकू मान मरजइतगेयता।” 45मनदो ईसू मरंग सहर एरुसलेमरे पसहा परोब मेलाय एचेतेरा हना जमाकून गलील छतररिकुःआ होड़कू होंकू ञेलतेरा। हनालगा ईसू गलील छतररेय सोदोरनेन दो हँकू मुरुक बहालते हाँयकू मान मरजइततेरा।

46दाः अंगूरराः रसे तुलातेरा हनानाः गलील छतरराः काना सहररे ईसू अरूय सेनेडा। अरू कपरनहूम सहररे मी होड़ हातपात होड़रीग बेटात बेमारीरेय दोहोना। 47ईसू एहूदिया छतर अते गलील छतररेय वेगकिया, हना अयूमतेडखन हाँय ईसू एचेरेय सेनेडा अरूय असेतेरा, “ईंग बेटा गुजुः इया इदानिया अरू आम ईंग ओड़ाःरे सेनेकियानखन ईंग बेटाम नपायगोडेय।”

48दो ईसू कतातेरा, “अपे बयाव जुवाः इयाःआ बुताकून अरू चिनहाकून मेरपे ञेल वरी अपे ओरोपे बिसवासतेरा।”

49हनते राजारीग हातपात होड़ कताया, “ने साहेब, ईंगरीग बेटायिंग गुजुः अते मड़ंग ईंग सुदाम सेन।”

50दो ईसू कता कुदातेरा, “आम सलाव जुवाःमे। बेटाम जियाव जुवाःताय।”

दो ईसू कतातेरा हना जमाकून बिसवासतेडखन हाँयग होड़ आँयग ओड़ाः अगीय कुदायान। 51दो हाँय ओड़ाः सेनेन सेन मेला, दूररे आँयगरिकुःआ सेवकिया होड़कू सुदाय जुमावनेना अरू हँकू कतातेड, “ने साहेब, आम बेटाम नपाययनाय।”

52दो हाँय हँकू एचेरेय होंबोरतेड, “हाँय तुमिन बेलाय नपायनेना?”

दो हँकू हाँय एचेरेकू कतातेड, “होला बेर ढड़काः मेला हाँय जार अड़ाःकिडिया।”

53हनते हाँयग अपात सुदीगोतेडे, ईसू कतातेरा, आम बेटाम जियाव जुवाःताय, माःआन हनन मेलाय नपायनेना। हनानाः तयोमरे हाँय अरू आँयग ओड़ाःरिकुःआ जमा होड़कू ईसू एचेरेकू बिसवासतेरा।

54ईसू एहूदिया छतर अते गलील छतररे वेगनेनखने एचेतेरा हना बयाव जुवाः इयाःआ बुताकून अते नाःआ बुता बार नमारराः दोहोना।

Currently Selected:

एहुना 4: kfp

Highlight

Copy