लूका 13

कसूर अते जीवपे कुदा

1दो हंडाकू दोहोना हँकू अते अदोम होड़कू ईसू एचेरे गलील छतररिकुःआ होड़कू बदीरेकू कताया, तोनोंग तोनोंग होड़कू भगवानराः ओड़ाःरे बलिदानकू देगा हनमेला मरंग हातपात होड़ पिलातूस हँकुःआ होड़कूय एचे ञेड एंडातेडकुःआ, माःआन। 2दो हना अयूमकेडखन ईसू हँकू एचेरेय कताया, “अपे चेले माःआनपे ओंगोलतना, नाःआ इयाःआ बिपइत हँकुःआ गलीली होड़कू जीवरे होयानेना अते हँकू एटाः गलीलरिकुःआ होड़कू अते बगराकू कसूरतेरा जा? 3ईंग अपे सुदायिंग कतायतना, नान इया कोवान। अपे हों कसूर अते जीव मेरपे कुदागे होले अपे हों नान इयापे लाय जुवाःता।

4अपे नान इयापे ओंगलेतना जा, सीलोमराः उसूल अगुरा ओड़ाः अठारहगोटोंग होड़कू चोटरे रूबनेना अरू हँकू तेन गोएगयानकू दो, हँकुःआ होड़कू एरुसलेमरिकुःआ एटाः होड़कू अते बगराकू कसूरतेरा, जा? नान इया कोवान। 5ईंग अपे एचेरेयिंग कतायतना, अपे कसूर अते जीव मेरपे कुदाय होले अपे हों नान इयापे लाय जुवाःता।”

लुवा दूबराः अउल-तउल कहड़ी

6तयोमरे ईसू मीटोंग कहड़ीय कतातेरा, “मी होड़ आँयगराः अंगूर बाड़ीरे लुवा दूबे रोपातेरा। मालिक हना सींग दूबरे जोःओ ञेले सेनेडा, मनदो मेर जोगान। 7हना बाड़ीरेय बुताःआ हाँयग होड़ एचेरे मालिक कताया, ञेलमे पेय बरिस वरीते ईंग नाःआ लुवा सींग दूबरे जोःओ ञेल लगायिंग वेगतना। मनदो नुँहू वरी मीटोंगाः मेर जोगना। नाःआ सींग दूब टड़वेक टड़वा इदा। घींग रूबगेमे, माःआन।”

8दो बुता होड़ कताया, ने मालिक, नाःआ सींग दूब अरू मी बरिसमे दोहो ओवा। ईंग दो नाःआ सींग दूब गडा किंदरावाडखन रसाइनिंग लगावता। 9अरू हना वरीते जोः होले नपाय दोहोनता। मेर जोः होले घींग रूब एंडायमे, माःआन।#13:9 मर 11:12-14,20-21

कुबड़ी अइमीराः नपायगुः

10लोड़ोनराः दिनरे ईसू मीटोंग अरजी ओड़ाःरे होड़कूय चेडा। 11हंडा मी होड़ अइमी दोहोना। हाँय मीटोंग भूत अठारह बरिस वरीतेय संतावगेया अरू तोनोंग इया हाँय सोएग मेरेय चड़ाँ अवेना। 12ईसू हाँय ञेलतिडिगखने राःतिरिया अरूय कतातेरा, “ने दिदी, आम हसूतेम नपाययना।” 13हनते ईसू हाँय चोटरे तिःईय खेपातेरा अरू ओहेन हाँय सोझावयान अरू भगवाने जागतेरा।

14ईसू लोड़ोनराः दिनरे हसूतेय नपायतिरिया। हनालगा अरजी ओड़ाःरीग हातपात होड़ रीसनेनखन होड़कू एचेरेय कताया, “बुता लगा हपतारे छो दिन इदा। हनामिन दिनरे वेगकियानखन हसूतेपे एचे नपायगुः। मनदो लोड़ोनराः दिनरे अलो।”

15नाःआ अयूमवाडखन परबू ईसू कताया, “ने बार जीव ओंगोल होड़कू, अपे लोड़ोनराः दिनरे उरिगकू सहे गदहाकू गोहाड़ अते लड़ाकेडखन दाः एचे ञूकू लगा मेरपे गोःकूता, जा? 16नाँयग अइमी इबराहीमरीग नइड़-बाँस होड़ हवे अरू अठारह बरिसते कलउ तोल दोहोतिरिया। हाँय लोड़ोनराः दिनरे ईंग सडावकिरिया दो, हना नपाय कोवानेःआ जा?”

17ईसू नाःआ इयाय कताया दो आँयगरिकुःआ मुदइकू गियुयानकू। अरू मुरुक बगरा होड़कू ईसू एचेया हना नपाय नपाय बुता बदीरेकू बहालयान।

बिहान अरू सेबेल सोड़ा

(मती 13:31-33; मरकूस 4:30-32)

18हनते ईसू कतातेरा, “भगवानराः राइज करा इया इदा? हना चिलाते ईंग अउल-तउलगे? 19हना राइज ढड़हा बिहान इया इदा। तोनोंगीग होड़ हना गोःकेडखन डंडहारेय वेरतेरा। हना दो हरानेनखन दूबयान अरू तितीगकू हना सींगरेकू बसावनेना।”#13:19 एहूदिया राइज अरू गलील छतररे दोहोना हना ढड़हा बार पुरसा उसूल हराना।

20ईसू अरूय कताया, “ईंग भगवानराः राइज चिलातेयिंग अउल-तउलगे? 21भगवानराः राइज सेबेल सोड़ा इया इदा। हान मी होड़ अइमी मुरुक बगरा गोहोम गुंडारेय सुवेडतेडा अरू दोहों दोहों जमा गुंडा पुड़सूड़यान।”

भगवानराः राइजरे बोल लगा सिकिसता इदा

(मती 7:13-14,21-23)

22ईसू एटाः एटाः सहररे अरू गाँवरे होड़कू चेनेड चेड एरुसलेम अगीय सेना। 23दो तोनोंगीग ईसू एचेरेय होंबोरतेरा, “ने परबू, भगवान अनादोम होड़कूय सडावता जा?”

दो हाँय हँकू एचेरेय कताया, 24“ईंग अपे एचेरेयिंग कतायतना, मुरुक बगरा होड़कू बोल लगाकू चहाःता मनदो ओरोकू बोलो अवेनेना। हनालगा सेपटा दुवारते भगवानराः राइजरे बोल लगापे कुरनिसगे। 25मी दिन ओड़ाःरीग मालिक रेमवाडखन ओड़ाः दुवारेय सींगगोडता। बहरीकू दोहोनता, हँकुःआ होड़कू टोकोः घड़ीनकू सालता, ने परबू अले लगा दुवारमे गीग, माःआन।

दो हाँय कतायता, ईंग अपे मेरिंग सिनहापेतना। अपे करेकुःआ हवे, माःआन?

26दो अपे कतायता, अले आम सुदा मिनीरेले जोम ञूःआ अरू आम अलेराः बजाररेम चेचेडा, माःआन।

27मनदो हाँय कतायता, ईंग अपे मेरिंग सिनहापेतना। अपे करेकुःआ होड़कू हवे? ने बेलूर बुता होड़कू, अपे जमाकू ईंगतेपे तोरे जुवाः, माःआन।

28अपे, अपेरिकुःआ खुटिपरिया होड़कू इबराहीम अरू इसहाक अरू एकूब अरू जमा भगवानराः बड़रा कता होड़कू भगवानराः राइजरे दुड़ुःतोपे ञेलकूता अरू भगवान अँननपे बहरीय एचे उडुंग एंडागोडपेता, 29मनदो एटाः जइत होड़कू पुरुब अरू पछिम अरू उतर अरू दखिन अते वेगकियानखन भगवानराः राइजराः जोजोम सरबहारेकू दुड़ुःता। हनालगा अपे इयामता अरू तिरिंग रेटेग-रेटेगपे कड़रावता। 30ईंगपे अयूम, तयोमरेकू दोहोनता हँकू मड़ंग जुवाःताकू अरू मड़ंगकू दोहोनता हँकू तयोम जुवाःताकू।”

एरुसलेम बदीरे ईसूराः फिकिराः

(मती 23:37-39)

31हनमेला तोनोंग तोनोंग फरीसी होड़कू ईसू एचेरेकू कताया, “हातपात होड़ हरदोस आम ञेड एंडा लगाय ओंगलेतना। हनालगा नाःआ अते उडुंगकियानखन सलाव जुवाःमे।”

32दो ईसू हँकू एचेरेय कताया, “अपे सेनेवाडखन हाँयग चलहू भुलरी बुःआ एचेरेपे कताय, ईंग तिसिंग अरू गपा भूतकूयिंग उडुंगता अरू बेमरियाकूयिंग नपायता। अरू पेय दिनरे ईंगराः बुतायिंग बुता पुरावता, माःआन। 33तोनोंगीग भगवानराः बड़रा कता होड़ एरुसलेमराः बहरी ओरोकू ञेड एंडा अवेतिरिया। हनालगा ईंग तिसिंग, गपा अरू मियांग सेनेनेगोड ञवनतिंग।”

34ईसू अरूय कताया, “ने एरुसलेमरिकुःआ होड़कू, अपे भगवानराः बड़रा कता होड़कूपे ञेड एंडाकूता अरू अपे एचेरे भगवान वारतेडकुःआ, हँकुःआ होड़कू दिरितेपे तेकेकूता। ईंग मुरुक तुरहा अपेरिकुःआ लइंकू, सिम अनँयग होनकूय बुरुमता हना इया बनसावकू लगायिंग चहाःआ। मनदो ईंग हना इयायिंग एचेय लगा अपेराः हिछा मेर दोहोगान। 35हनालगा अपेराः जाग ओड़ाः अड़ाः एंडात दोहोनता। अपे ईंगपे अयूम। परबूराः ञावतेय वेगता हाँयग होड़राः जीव भगवान भलावाता, माःआन अपे अरीनपे कताय वरी अपे ईंग ओरोपे ञेल अवेतिरिंगा।”

Currently Selected:

लूका 13: kfp

Highlight

Copy