लूका 17

कसूर, बिसवास अरू नपाय बुता बदीरे चेड

(मती 18:6,7,21,22; मरकूस 9:42)

1ईसू आँयग चेलाकू एचेरेय कताया, “होड़कूके कसूररे बझाः लगा मुरुक दाव होयाःता। मनदो एटाः होड़कूय एचे बझावता हाँयग होड़राः जीव ठीक जुवाःता। 2तोनोंगीग हुडिंग बिसवासी होड़े एचे कसूरगेतान अते, हाँयग होड़राः होटोःरे जंता इया दिरि तोलकेडखन समुंदररे तेनेके बोलो एंडाय, हाँय लगा नपाय इदा। 3हनालगा अपे सवासितीपे दोहोन।

आम वपक बोपोकू अते तोनोंगीग कसूरगे दो, हाँयमे समझावगोड। अरू हाँय कसूर बदीरेय पसताः दो, हाँयराः कसूर आम ओंगोल अतेम बराव एंडागोड। 4मी दिन हाँय सात तुरहा आम एचेरेय कसूरगे अरू सातो तुरहा आम एचेरे वेगकियानखन आँयगराः कसूर बराव एंडा लगाय असेय दो, हाँयराः कसूरमे बनाराव एंडागोड।”

5ईसूरिकुःआ मूक चेलाकू परबू एचेरेकू कताया, “अलेराः बिसवासमे बडे।”

6दो परबू ईसू कताया, “अपेराः बिसवास मीटोंग ढड़हा बिहान मिन दोहोन दो नाःआ तूत दूब रवीगकियानखन समुंदररे बीड जुवाः माःआनपे कताय दो, हना तूत दूब हों अपेराः बड़रा मनाःता।”

7ईसू अरूय कताया, “ओंगलेपे, अपे तोनोंगीगरीग मी होड़ हड़वाहा इदा। हाँय दोहोड़रे हाड़े सीता सहे भेड़ाकूय सरावता। हड़वाहा दोहोड़ अतेय वेग दो, दबूमे ओहेन, जउः जोम लगाम दुड़ुः माःआनपे कतायता जा? ओरो! 8मनदो अपे हाँय एचेरेपे कतायता, ईंग लगा जउःमे जउः अरू ईंग अरीनिंग जोम ञूय वरी मयांग कासकेडखन ईंगमे सेवा। हना तयोमरे आम होंम जोम ञूय। 9अपे कतावाया हना हाँयग हड़वाहा एचेयतान दो, अपे हाँय धनियाबादपे ओवायता जा कोवान? 10हान इया अपे एचेरे भगवान कतावायता हना एचेवाडखन नाःआ इया ककता इदा, अले दो आमरिकुःआ सेवकियाकू हवे। आम कतातेरा हनानाः एकलाले एचेकेरा।”

कुड़गा होड़कूराः नपायगुः

11ईसू समरिया अरू गलील छतरराः सिमान अते एरुसलेम सहर अगीय सलाःआ। 12दो मीटोंग गाँवरेय सोदोरनेन मेला दसटोंग कुड़गा होड़कू ईसू एचेरेकू जुमावनेना। 13हँकू दुरहियारे चड़ाँवाडखन खिररी घड़ीनकू कतातेरा, “ने अलेरीग मालिक, ईसू! अलेम सोगावा।”

14ईसू हँकू ञेलवाडखने कताया, “अपे दूपे, भगवान ओड़ाःरीग पुजउरी एचेरे सेनेकियानखनपे एचे जासगुः।” दो हँकू सेनेन सेन दुनूररे बेमारीतेकू नपाययान। 15दो हँकू अते मी होड़ अनँयग सुदीगोतेड, ईंग नपाययना, माःआन। अरू मुरुक सटीक भगवान जागतेडखने कुदायान। 16हाँय ईसू मड़ंगरे तबेरनेनखनने धनियाबादतिरिया। हाँयग होड़ समरिया होड़े दोहोना।

17दो ईसू होंबोरतेरा, “दसो होड़कू मेरकू नपायगना जा? दो नवगोटोंग होड़कू करे इदानकुःआ? 18नाँयग समरिया होड़ अड़ावाडखन भगवान जागगेय लगा तोनोंगीग मेरेय दोहोगान, जा?” 19ईसू हाँयग होड़ एचेरेय कताया, “रेमकियानखन आम सलाव जुवाःमे। आम बिसवासतेड अतेम नपाययना।”

भगवानराः राइज बदीरे

(मती 24:23-28,37-41)

20मी दिन फरीसी होड़कू ईसू एचेरेकू होंबरेःआ, “भगवानराः राइज तुमिस बुँहड़ीगुःता?”

दो ईसू हँकू एचेरेय कताया, “भगवानराः राइज ञेनेल मेडरे मेर ञेल अवेनता। 21भगवान आँयगराः राइज अपे तलारेय बुँहड़ीकेरा। हनालगा तोनोंगीग होड़कू नाःआ इया ओरोपे कता अवेतेरा, भगवानराः राइज नंडा इदा सहे भगवानराः राइज हंडा इदा, माःआन।”

22हनते ईसू चेलाकू एचेरेय कताया, “मनुवारीग बेटातराः मी दिन ञेल लगा अपे चहाःता हना दिन निचकाःतना, मनदो हना अपे ओरोपे ञेल अवेतेरा। 23होड़कू अपे एचेरेकू कतायता, ञेलेयपे माँय नाःआरे इदानिया सहे माँय हंडा इदानिया, माःआन। अपे हँकूराः लबरा कता अहापे मनाः अरू हँकू तयोम अलोपे सेन। 24ठेड़ररे विड़चेड़ता अरू सेरमोराः चइरो गतर मरसल जुवाःता। हनन इया मनुवारीग बेटात आँयगराः दिनरेय एचे ञिलुःता। 25मनदो हना मड़ंगरे हाँयके पीरा ससहाव पनाराःता अरू नाःआ जूगरिकुःआ होड़कू हाँयकू आड-बेकारवाता।

26नूहराः परियारे होयानेना हनन इया मनुवारीग बेटात परियारे हों होयाःता। 27नूह मरंग जहाजरे अरीने देग वरी होड़कू जोम ञूःआ अरू बियाहगुःआकू अरू बियाह लगाकू एमे होड़ेंगा। हनमेला पुरा दाः वेजेडा अरू जमा होड़कू लाय एंडागोतेडकू।#रेःएत 7:1-24

28लूतराः परियारे हों नान इया होयानेना। होड़कू जोम ञूःआ अरू एमे होड़ेंगा अरूकू रोपाःआ अरू ओड़ाःकू तुतुलाःआ। 29मनदो हाँयग लूत सोदोम सहर अते उडुंगनेना, हनानाः दिन सेरमो अते सेंगेल अरू हितकाःतो लेटे दिरि लोजोरनेना अरू जमा होड़कू लाय एंडागोतेडकू।#रेःएत 19:12-26 30मनुवारीग बेटात अनँयग एचे ञिलुःता हना दिनरे हों ननन इया होयाःता।

31हना दिन तोनोंगीग सड़ुम सेरमोरे दोहोन अरू आँयगराः जमा बरानाः ओड़ाः पेंदारे दोहोन दो, हना उडुंग अगू लगा अलोय उतराः। हनन इया दोहोड़रे दोहोन हाँय, ओड़ाः अगी अलोय कुदान। 32लूतरीग अइमी बदीरेपे उहियार दोहोगे।#रेःएत 19:26#17:32 लूतरीग अइमी सहर अते ञीर मेला हाँय भगवानराः कता मेरेय मनावगान अरू उलटावनेनखन सहर अगीय ञेलतेरा। हनालगा भगवान हाँयग अइमी बुलुंगराः मीटोंग खुंटाय तुलागोतेडीग। 33अँननकू जीव बनसावराः ओंगोलरेकू दोहोनता हँकुःआ होड़कू अँननकूराः जीव ञेल केड़े एंडागोडता। मनदो अँननकू जीव बनसावराः ओंगोलरे मेरकू दोहोनता हँकुःआ होड़कूराः जीवे बनसावता।”

34ईसू अरूय कताया, “अपे ईंगपे अयूम। हना रइत, बार होड़ खटीरेकिन गेतेगकुःता दो, भगवान मी होड़े रेम गोःयायता अरू मी होड़े अटू एंडा अटूयता। 35बार होड़ अइमीकिन जंतारेकिन दड़ीता दो, भगवान मी होड़े रेम गोःयायता अरू मी होड़े अटू एंडा अटूयता। 36[बार होड़ दोहोड़रेकिन दोहोन दो, मी होड़े रेम गोःयायता अरू मी होड़े अटू एंडा अटूयता।”]

37नाःआ अयूमवाडखन चेलाकू ईसू एचेरेकू होंबरेःआ, “ने परबू, नाःआ करे होयाःता?”

दो हाँय हँकू एचेरेय कताया, “लास दोहोनता हननंडा कुड़ीडकू जुमाःता।”

Currently Selected:

लूका 17: kfp

Highlight

Copy