लूका 21

गरीब रंडियाहीनराः दान

(मरकूस 12:41-44)

1भगवानराः ओड़ाःरे ढिबुवाकून सोलोंग लगा दोहोना हना दसिना बकसारे गिरहत होड़कू ढिबुवाकून सोलोंगतो ईसू ञेलतेडकुःआ। 2मी होड़ गरीब रंडियाहीन हों वेगवाडखन हना दसिना बकसारे बारटोंग हुडिंग हुडिंग रिचकी ढिबुवाय सोलोंगतेरा। 3दो ईसू कताया, “ईंगपे अयूम, नाँयग गरीब रंडियाहीन जमाकू अते बगराय सोलोंगकेरा। 4गिरहत होड़कू हँकू एचेरे बगरा इदा हनाते अनादोम ढिबुवाकूनकू सोलोंगकेरा। मनदो नाँयग रंडियाहीन आँयग एचेरे जेमिन जियाः लगा दोहोना हना जनामाय सोलोंगगोतेरा।”

मड़ंगरे होयाःता हना चिनहाकून

(मती 24:1-28; मरकूस 13:1-23)

5हनमेला ईसूरिकुःआ चेलाकू भगवान ओड़ाःराः बदीरेकू कताया, “भगवानराः ओड़ाः तुमिन सुघर सुघर दिरिकूनते अरू होड़कू दानकू एमेकेरा हना जिनिसकूनते सिंगिरावतो इदा।”

6मनदो ईसू कताया, “नुँहू नाःआ ओड़ाः नपाय ञिलुःतना। मी दिन दरवाःआ हना दिन मुदइ होड़कू नाःआ ओड़ाःराः मेमेडटोंग मेमेडटोंग दिरिकून उडुंग घड़ीनकू एचे रूब एंडागोडता।”

7दो हँकू ईसू एचेरेकू होंबोरतेड, “ने, गुरुजी नाःआ कता तुमिस होयाःता? अरू नाःआ होयाःराः बेला सुदरुः दो चिला चिनहा ञिलुःता?”

8दो ईसू कताया, “तोनोंगीग अपे अहाकू बहकाव अवेपे लगा सवासितीपे दोहोन। मुरुक बगरा होड़कू ईंगराः ञावते अपे एचेरेकू वेगता अरूकू कतायता, ईंग हनाँय हवे, माःआन। अरूकू कतायता, चउंदीस टुटीगगुःराः बेला सोदोरयना, माःआन। मनदो अपे हँकू तयोम अलोपे सेन। 9लड़ाइ बुँहड़ीनता अरू होड़कू बलवादता हना बदीरेपे अयुमेता, मनदो अपे अहापे हदरावगुः। नाःआ इया मड़ंग होनोयाःता। मनदो हनमेला चउंदीस ओहेन ओरो टुटीगनेना।”

10हनते हाँय अरूय कताया, “मी जइतरिकुःआ होड़कू एटाः जइतरिकुःआ होड़कू सुदा अरू मी देसरिकुःआ होड़कू एटाः देसरिकुःआ होड़कू सुदाकू लड़ाइता। 11ओत मुरुक डोलाःता अरू एटाः एटाः ततेररे कतकाल अरू हइजाकून होयाःता। होड़कू मुरुक बोरो जुवाः इयाःआ कताकून अरू मरंग चिनहाकून सेरमोरेकू ञेलता।

12नाःआ जमा होयाः अते मड़ंग ईंग बदीरे होड़कू अपेकू साबता अरूकू संतावपेता। अपे पंचाइतरेकू जिमापेता अरू जेहेलरेकू एचे सींगपेता अरू राजाकू अरू हातपात होड़कू मड़ंगरेकू एचे चड़ाँपेता। 13हनमेला अपे ईंगरिकुःआ हिदइतदारकू बड़ाँः लगा दाव होयाःता। 14अले करा इयाले कता कुदागेता हना बदीरे मनाड़ंगतेपे ओंगोल दोहोबाःका, माःआन अलोपे ओंगोल कुहकाः। 15हननमेला अपे हँकू सुदा बड़रा लगा कनहूनिंग एमेवापेता। अपेराः हना बड़रा अयूमकेडखन अपेरिकुःआ मुदइ होड़कू ओरोकू हरुवाव अवेतेडपेःआ अरू ओरोकू घंटाव अवेतेडपेःआ। 16अपेरिकुःआ एंगा-अपा, वपककू अरू जइत सगाकू अरू सउंगताकू हों अपेकू एचे साबता, अरू अपे अते तोनोंग तोनोंग होड़कूकू एचे ञेड एंडागोडपेता। 17अपे ईंगरिकुःआ चेलाकू हवे। हनालगा हँकू अपेकू हिनइस-बिनइसवाता। 18मनदो अपेराः बोःराः मीटोंगाः ऊब हों ओरो रवीगनेना। 19कटसिया सहाव घड़ीन अपेराः जीवपे बनसाव दोहोगोडता।

20एरुसलेम मरंग सहर सइनाकू चइरो गतरकू रेडगोडता हनापे ञेल दो, हनमेला अपे सुदीया, नाःआ जमा सहर लायगुःराः बेला सोदोरयना, माःआन। 21हनमेला एहूदिया छतररेकू दोहोनता हँकुःआ होड़कू पहाड़ अगी ञिनीर लगा इदा अरू एरुसलेम सहररे इदानकुःआ हँकू हना सहर अते बहरी उडुंगगुः लगा इदा। अरू गाँवरे इदानकुःआ हँकू हना सहररे अलोकू सेन। 22नाःआ डंड गोःराः बेला होयाःता अरू भगवानराः कागदरे ओजाःतो इदा हना जमाकून पुराव जुवाःता। 23हना दिनकूनरे उड़सी अइमीकू अरू दुदू एचे ञू अइमीकू लगा मुरुक कटसिया होयाःता। होड़कूके मुरुक गराह गिराह होयाःता अरू भगवानराः रीस हँकू एचेरे पराःता। 24मुदइकू तलवइरतेकू ञेड एंडनता अरू होड़कू तोलकेडकूखन एटाः एटाः देसरेकू गोःयाकूता। बेगर एहूदाकूराः बेला अरीन पुराः वरी एरुसलेम सहररिकुःआ होड़कू हरुवावकेडखन मुरुककू रमदावकूता।”

मनुवारीग बेटाराः कुदा वेग

(मती 24:29-31; मरकूस 13:24-27)

25“बेर, बांगो अरू इपीलकूरे तोनोंग तोनोंग चिनहाकून ञिलुःता। समुंदर अरू हनाराः हचकाः मुरुक गड़रा-गुड़रू इया विरीनता अरू नाःआ जमाते एटाः एटाः देसरिकुःआ होड़कू मुरुककू बोरता अरू हँकूराः जीव कटसिया जुवाःता। 26बेर, बांगो अरू सेरमोरे विड़चेड़ता हना जंगरकून डोलाव जुवाःता। नाःआ चउंदीसरे होयाःता हना गराह-गिराह ञेल ञेल बोतोरते होड़कूराः आधा-जीव उडुंग जुवाःता। 27हनमेला मनुवारीग बेटात जंगर अरू मुरुक मरसलते बदरीरेय वेगता अरू जमा होड़कू हाँयकू ञेलेयता।#दानि 7:13-14; मती 26:64 28नाःआ जमा होयाः दो अपे सडावगुःराः बेला निचकाःतना। हनलगा अपे डीड़ घड़ीन बहालतेपे तंगीगोड ञवन।”

लुवा दूबराः अउल-तउल कहड़ी

(मती 24:32-35; मरकूस 13:28-31)

29ईसू हँकू एचेरे अरू मीटोंग अउल-तउल कहड़ीय कताया, “लुवा दूब अरू एटाः जमा सींग दूबकूनपे ञेल। 30सींगरे सकम पलहुवानता, हनमेला अपे सुदीगोडता जेट असाड़ सोदोरयना, माःआन। 31हनन इया नाःआ जमाकूनपे ञेल दो, अपे सुदीया भगवानराः राइज निचकाःतना।

32अपे ईंगपे अयूम, नाःआ जमाकून अरीन होयाः वरी नाःआ जूगरिकुःआ होड़कू ओरोकू गोएगनेना। 33ओत अरू सेरमो टगाव जुवाःता मनदो ईंगराः सरवन कहियो ओरो टगावनेना।”

जगिया ञवनपे

(मती 24:36-44; मरकूस 13:32-37)

34“जोम ञूयते अरू बुनूलते अरू चउंदीसराः एटाः एटाः ओंगोल कुहकाःते अपेराः जीव अलो बेरुजगुः लगा सवासितीपे दोहोन। निही दो हना टुटीगगुःराः दिन अपे जीवरे फंदा इया असाका वेगता।#लूका 21:31 35नाःआ चउंदीसरे इदानकुःआ हँकुःआ जमा होड़कूराः जीवरे ननन इया होयाःता। 36हनलगा अपे जगलेपे दोहोन अरू नाःआ चउंदीसरे होयाःता हना गराहते बनसाव अवेन लगा अरू मनुवारीग बेटात वेग मेला आँयग मड़ंगरे चड़ाँ अवेन लगा अरजीगोड ञवनपे।”#लूका 18:1-8

37ईसू दिने मने भगवानराः ओड़ाःरे होड़कूय चेडा अरू रइत मेला जइतून पहाड़रे सेनेकियानखने दोहोना। 38अंगुः निंदावा मुरुक बगरा होड़कू ईसूराः बड़रा अयुमे लगा भगवानराः ओड़ाःरे हाँय एचेरेकू वेगा।

Currently Selected:

लूका 21: kfp

Highlight

Copy