मरकूस 3

तिःई कोकोड़ावतो होड़ ईसू नपायतिरिया

(मती 12:9-14; लूका 6:6-11)

1एटाः लोड़ोनराः दिन ईसू अरजी ओड़ाःरेय सेनेडा। हंडा तिःई कोकोड़ावतो मी होड़ होड़ दोहोना। 2दो तोनोंग तोनोंग होड़कू ईसू बदीगेय लगाकू ञामा। हँकू ईसू लोड़ोनराः दिनरे माँयग होड़े नपायगेयता जा कोवान हनाकू टोहाःआ। 3ईसू हाँयग तिःई कोकोड़ावतो होड़ एचेरेय कताया, “जमा होड़कू तलारे चड़ाँनमे।”

4हनते ईसू हँकू एचेरेय होंबोरतेरा, “लोड़ोनराः दिनरे नियम इया नपाय एचे लगा इदा जा बेलूर? जीव बनसावगे लगा इदा जा ञेड एंडा लगा इदा?” मनदो हँकू कलेकालकू दोहोना। 5ईसू हँकुःआ होड़कूराः कटकट जीवतेय रीसयान। हनते ईसू चइरो गतर होड़कू ञेलवाडखन तिःई कोकोड़ावतो होड़ एचेरेय कताया, “आम तिःई लंबावगेमे।” दो हाँय अनँयग तिःईय लंबावगोतेड अरू हाँयराः तिःई नपाययान। 6हनते फरीसी होड़कू बहरी उडुंगवाडखन हरदोसरिकुःआ चेलाकू सुदा जुमावनेनकूखन ईसू एचे ञेड गोजेय लगाकू राइयान।

मुरुक होड़कू ईसूकू ओतोंग वेगा

7हनते ईसू अरू आँयगरिकुःआ चेलाकू हना सहर अते गलीलराः हुडिंग समुंदर अगीकू सेनेडा अरू गलील छतर अरू एहूदिया छतर अते मुरुक होड़कू हंडा हाँय तयोम तयोमकू सेनेडा। 8एरुसलेम सहर अते अरू इदूमिया छतर अरू एरदन नई मार परोम अते अरू सूर अरू सइदा सहर अते हों मुरुक होड़कू ईसू एचेकेरा हना अयूमकेडखन हाँय एचेरेकू सेनेडा।

9मुरुक होड़कू दोहोना हनालगा, ईसू आँयग चेलाकू एचेरेय कतातेड, “मीटोंग डोंगा ईंग लगा सपड़ावगोडपे जेमहा नँकुःआ होड़कू ईंगकू अलोकू रेहेड-तेपेडगे।” 10ईसू मड़ंगरे मुरुक होड़कूय नपायतेरा, हनालगा होड़कू हाँय टोँवाव लगाकू रेहेड-तेपेड होड़ेंगा। 11भूतकू ईसूकू ञेला दो हाँय मड़ंगरेकू कसड़ जुवाःआ अरू खिररीवाडखनकू कताया, “आम भगवानरीग बेटा हवे, माःआन।”

12मनदो ईसू हँकू एचेरे सेतावतेडखने कताया, “ईंग बदीरे होड़कू एचेरे अहापे कता उदुःगे।”

ईसू बारहगोटोंग मूक चेलाकू नुमाड़तेरा

(मती 10:1-4; लूका 6:12-16)

13तोनोंग दिन तयोमरे ईसू मीटोंग पहाड़रे अरजी लगाय सेनेडा। आँयग चहाःआ हँकुःआ होड़कू अनँयग एचेरेय राःतेडकुःआ अरू हाँय एचेरे हँकू वेजेडा। 14ईसू हँकू अते बारहगोटोंग होड़कूय नुमाड़तेरा अरू आँयगरिकुःआ मूक चेलाकूय बड़ाँवतेडकुःआ। हँकू ईसू सुदा दोहोन लगा अरू एटाः होड़कू एचेरे सेनेवाडखन परसारगे लगाय नुमाड़तेडकुःआ। 15हँकूके भूतकू एचे उडुंगकू लगा हों हातपाते एमेवातेडकुःआ। 16ईसू नुमाड़तेडकुःआ हँकुःआ बारहगोटोंग मूक चेलाकू नँकुःआ होड़कू हवे।

ईसू पतरस माःआने ञावतिरिया हाँयग सिमोन,

17ईसू बुअनरगिस माःआने कतावाया हँकिन जबदीरीग बेटा एकूब अरू आँयग बोहोत एहुना,

(बुअनरगिसराः मतलोब ठेड़ररेरिकिनाः बेटाकिन हवे),

18अंदरियास,

पिलिपूस,

बरतुलमाय,

मती,

तोमा,

हलपाइरीग बेटात एकूब,

तददे,

सिमोन कनानी#3:18 कनानी एहूदाकूराः मीटोंग गउदारिकुःआ होड़कू दोहोना। हँकू रूमी देसरिकुःआ होड़कू अते अजइतकू पवाः लगाकू कड़ीगा। कनानी अरामिया भासीरे इदा अरू उनानी भासीरे जेलोतीस माःआनकू कतायता। (लूका 6:15)

19अरू ईसू तयोमरेय एचे साबतिरिया हाँयग जूदा इसकरियोती।

ईसू अरू दरहा

(मती 12:22-32; लूका 11:14-23; 12:10)

20हनते ईसू मीटोंग ओड़ाःरेय बोलोनेना। हंडा हों मुरुक होड़कू जुमावनेना अरू ईसू अरू आँयगरिकुःआ चेलाकू जोम लगा हों मेरकू अवेया। 21नाःआ कता ईसूराः ओड़ाःरिकुःआ होड़कू अयूमतेरा दो हँकू हाँय साब गोःगे लगाकू वेजेडा। हँकू कतातेड, “नाँयग ईसू दो बउड़ावयनाय।”

22एरुसलेम सहर अते नियम चेडदार होड़कू वेजेडा, दो हँकू होंकू कतातेड, “नाँय एचेरे भूत इदानिया। नाँय भूतकूरीग राजा दरहाते भूतकूय उडुंगता।”

23दो ईसू हंडाकू दोहोना हँकुःआ होड़कू एचेरे अउल-तउल कहड़ीय कतातेड, “कलउ करा उड़ी कलउए उडुंग अवेता? 24मिनी देसरेरिकुःआ होड़कू अँननकू अँकू रेडेग होड़ेंग दो करा उड़ीकू दोहो अवेन? 25मिनी ओड़ाःरिकुःआ होड़कू अँननकू अँकू रेडेग होड़ेंग दो करा उड़ीकू सलसतरेकू दोहो अवेन? 26हनन उड़ी कलउ अरू आँयगरिकुःआ सइनाकू अँननकू अँकू रेडेग होड़ेंग दो हाँयराः राइज लाय जुवाःता।

27ओंगलेपे, अपे तोनोंगीग जंगरदार होड़राः ओड़ाःराः जमा जइतकून इनिग उउडुंग दोहोन दो, मड़ंगरे हना ओड़ाःरीग जंगरदार होड़ तोल रहावगेय लगा इदा। हनते हाँयराः जमा जइतकूनपे इनिग अवेता। 28अयुमेपे, होड़कूराः जमा कसूर अरू एटाःकूकू ओपताता हना हों भगवान बराव एंडागोडता। 29मनदो तोनोंगीग होड़ सुद बिरुवा बदीरेय ओपताता, दो हना भगवान कहियो ओरोय बराव एंडातेरा अरू सगर सइट वरी कसूर होड़े दोहोनता।” 30हँकू कतातेरा, नाँय एचेरे भूत इदा, माःआन। हनालगा ईसू नाःआ इया सुद बिरुवाराः ओपता बदीरे सेतावकेडखने कताकेरा।

ईसूराः सताय मइछुवा

(मती 12:46-50; लूका 8:19-21)

31दो ईसूरीग एंगात अरू बोपोहकूतेन हाँय एचेरेकू वेजेडा। हँकू बहरीकू चड़ाँनेनखन तोनोंगीग होड़ हाँय राः अगूगेय लगाकू वारगोतेडीग। 32मुरुक होड़कू हाँय सुदाकू दुड़ुःकुःआ। हँकू कतातेड, “ने गुरुजी, ञेलमे, आम एंगात अरू बोपोहकूताम बहरीरे आमकू ञामतना।”

33दो ईसू हँकू एचेरेय होंबरेःआ, “ईंगरीग एंगायिंग अरू बोपोहकूतिंग इयेकू हवे?” 34दो ईसू हाँय सुदाकू दुड़ुःकुःआ हँकुःआ होड़कू अगी ञेलकेडखने कताया, “अयुमेपे, ईंगरीग एंगायिंग अरू ईंगरिकुःआ मेमेसकू अरू वपक बोपोहकूतिंग नंडा इदानकुःआ। 35भगवानराः हिछा इया सलाःता हँकुःआ होड़कू सतायरे ईंगरीग एंगायिंग अरू ईंगरिकुःआ मेमेसकू अरू वपक बोपोहकूतिंग हवे।”

Currently Selected:

मरकूस 3: kfp

Highlight

Copy