Génesis 16
16
Agar judyeyaꞌ ạvaꞌ mọꞌ Ismael
1Sarai Abramsiꞌ p̂en muꞌ säräꞌ buꞌyis muꞌ, itŝij ạvaꞌ muꞌ Abramtyiꞌ. Mọꞌyaꞌ qui namꞌ úñis Saraisiꞌ, Agar tịj mọꞌ, Egiptoĉansiꞌ mọꞌ. 2Yiꞌ Sarai jéyaquiꞌ vämtyiꞌ mọꞌ:
—Ayoꞌ jam junꞌ soꞌmin ạvaꞌ yụ, yụ raꞌ jéye mi ọij raꞌ p̂entuiꞌ mi yụ́siꞌ úñis Agar. Vatyquej mọꞌ ạvaꞌyiꞌ jụijyaꞌ yụ́dyety raꞌ ạvaꞌ shupqui mọꞌ —yi Sarai jéte Abram.
Jụjjebiꞌ p̂eyacdyeꞌ Saraisiꞌ. 3Meꞌdye qui mọꞌ Sarai soꞌmete Agar, mọꞌ qui jäqueꞌ muꞌ. Aty yiriꞌtac yómodyeꞌ bäꞌyi Canaánĉan muꞌ Abram, q̂uinꞌdyemꞌ soꞌmete mọꞌ. 4Meꞌdye muꞌ mọꞌtum ĉọshi chat qui ạvaꞌyi muꞌ mọꞌĉan. Mọꞌ Agar aty chịꞌ aty jạjtsiꞌ ĉútiꞌ, chat qui äcäijjeyaquiꞌ ayoꞌ mọꞌ. 5Chat qui mọꞌ Sarai, yiꞌ mọꞌ jéte Abram:
—Mísdye juchaj meꞌ q̂uinꞌ äcäijjin yụ ọij Agar úñis yụ. Yụ́dye soꞌmeye paj qui p̂entuiꞌ mi. Q̂uinꞌ aty jạjtsiꞌ ĉútiꞌ anic äcäijjin yụ. Ayoꞌ raꞌ chäyibusinꞌ dyijyedyeꞌ tsun, tyis chuc juchaj muꞌ, jedac mis, jedac yụs —yiꞌ jéte Sarai.
6Vorjeꞌ Abram:
—Mi nash meꞌchuiꞌsiꞌ ọij Agar, tupuj junꞌjeꞌ ĉụiꞌ mi junꞌ chuc mi mạꞌjeꞌ —yi Abram jeꞌ.
Tiyacchuiꞌ mọꞌ ñịbeꞌtyeꞌ junꞌ quiꞌ chuc jiꞌcavꞌqueꞌ, cäjyaꞌ jịjcaiꞌ mọꞌ Agar. 7Anjer Ayoꞌtyiꞌ muꞌ cäjyaꞌ jadacdyiꞌ, yóyaꞌdyemꞌ jijmoꞌmoj u, majmiyaꞌ, Shurĉan jịjcaiꞌsiꞌ majmi mọꞌyaꞌ jadacdyiꞌ. 8Anjer jajiti:
—Agar, Saraisiꞌ úñis, ¿junaꞌ caꞌ jijtuiꞌ mi? ¿Junaꞌ qui bu raꞌ jịjcaiꞌ mi?
Vorjete Agar:
—Sarai nash ĉaꞌjoyeꞌ yụ ayoꞌ yụ.
9Anjer vorjajitiꞌ mọꞌ Agar:
—Caꞌñibuda chịmoꞌyaꞌ ayoꞌyam, quivij raꞌ úñeyebanꞌ mi, chiquebiꞌ raꞌ p̂eyacdyemꞌ.
10Chimeꞌdye muꞌ Ayoꞌtyiꞌ anjer jajitiꞌ:
"Yụ raꞌ jiꞌdaijbiye vóshiꞌ mi,
anic raꞌ daiꞌ in,
jam raꞌ tupuj tsic in.
11Voꞌcoĉantyiꞌ q̂uinꞌ ạvaꞌ mi sonꞌ raꞌ,
Ismael raꞌ yụꞌtyeyete tịj mi,
ĉaĉaij na muꞌ Ayoꞌ seꞌvibun ñịbeꞌdyeꞌ mi.
12Ạvaꞌ raꞌ mi jeñej raꞌ yirity chätity bórico muꞌ raꞌ räj fạ́cacsi muntyiꞌ in,
judyeyaꞌ raꞌ muꞌin chimeꞌ fạ́quete in.
Pạrej raꞌ bäꞌyi ạvaꞌ mi,
muꞌ raꞌ jam junꞌ c̣hẹiꞌyaꞌjeyaqui chätidyeꞌ muꞌ.
13Chat qui chị́quiꞌ mọꞌ Agar yiꞌ: "Meꞌ tsanꞌ Jenꞌ cavin yụ, tsạꞌ qui namꞌ tacaꞌ yụ." Mọꞌdyes mọꞌ Agar tịj yụꞌtyeyete Ayoꞌ p̂eyaquity mọꞌtum jéte mọꞌ: "Jenꞌ cavisinꞌtyiꞌ", meꞌ jéte Ayoꞌ mọꞌ Agar. 14Meꞌdyes yụꞌtyeyete tịj in jijmoꞌmoj, jéte in: "Ojñiꞌ tsạꞌtyiꞌ muꞌ Jenꞌ cavintyiꞌ yụ", meꞌ jéte jijmoꞌmoj dyeteꞌĉantyiꞌ Cades judyeyaꞌ Bered.
15Anicdye Agar ạvaꞌyiꞌ, Abramdyety ạvaꞌ mọꞌ, Ismael jịꞌtiꞌete muꞌ. 16Abram q̂uenꞌĉan quiꞌtac jäbän jiyiꞌdyemꞌ yómodyeꞌ tyiti muꞌ, naꞌi muꞌ Ismael jiquej.
Currently Selected:
Génesis 16: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
