Jone 1

Mae Jisas Kraes neke mei kau nauthoglu igne

1Tifa na, mae te kiloi “Chekegna God” gne neke kulu auhi. Mana neke kulu auhi balugna God, nei mana kaisei ngala balugna God. 2Funu tifa ka vuvuhagna na mae “Chekegna God” gne neke auhi balugna God. 3Eghuteuna God neke vahini mana mala edi gobigna lepore. Eghume gobigna lepo gre mana ngala teke edire. 4Thofno karha na neke funu mei ka mana. Eghuteuna, karha tuana jateu langau u naphae eghu mala faphaedi naiknore. 5Naphae igne neke faphaedi namono te romno re, eghuteuna gromno na theome tangomana te toku tafruni naphae na.

6Ulu lahu na God neke kuru meini kaisei mae te kiloi Jone Apublahi. 7Mana neke mei neke toutonu ka naiknore eigna naphae tuana, mala tangomana naikno te kafe nomhini mana re fatutuani ni naphae na. 8Mae Jone gne theome naphae tuana, nu mana neke mei mala toutonuni eigna naphae tuana kolho.

9Thofno naphae igne ne mei kau nauthoglu gne mala kafe faphaedi naikno te gnafare. 10Mana la auhi ka nauthoglu igne, nu neuba God neke vahini mana neke vuavuha nauthoglu igne, naiknogna nauthoglu igne theome laseni ngala mana. 11Mana mei au ka nogna namono thegna na. Nu nogna naikno thegna mana re theome keli tadi ngala ka mana. 12Nu keha naiknore ne keli tadi nei fatutuani ni eghu mana. Aonu mana ne tusu ranghidi nolaghi te mala goro thugna God. 13Naugna mare theome karha mei jateula sua te karha mei ka dadaradi idogna ghe kmagna ra eghu, nu thegna God ngala kmadi na.

14Eghume Chekegna God igne neke karha mei fei thini jateula tahati neku, neke au balumi ghehati. Ghehati neke filonihi u nogna nolaghi mana na. Nolaghi tuana neke tusu lao mae Mama ka mae thofno Thugna na. Eghuteuna mae Chekegna God igne fodu kau khokofakasai nei tutuani.

15Mae Jone neke cheke eghu eigna mana, “Igne mae teke chekenihi iara ka ghotilo ia, ‘Mae te mei ke leghugu iara na, mana mae ke biꞌogu iarai, naugna mana neke kulu auhi neke karha nga iara.’ ” 16Tutuani fara, mae igne thofno mae keli fara, naugna mana ne edi fabrahu glepo te kelire ranghi ghita tahati hui. 17God neke tusu lao vetula na ka mae Moses. Nu khokofakasai ghe tutuani re neke mei balugna mae Jisas Kraes. 18Funu tifa te ghilei thoke ka narane gognarogne, theo kaisei naikno te thofno filoni God na. Nu mae Jisas Kraes thofno mae Thugna God te au balugna Mama na ngala te mei fatakleni God ka tahati na.

Nogna nonomho mae Jone Apublahi eigna mae Jisas

(Mat 3:1-12; Mak 1:1-8; Luk 3:1-18)

19Kaisei fata na, hatimare mae biꞌodi mae Jiu te au ka namono Jerusalem igre ne kurudi keha mae pris baludi keha mae te loku ka Sugablahi na mala mei ghusna eghu ka mae Jone, “Ghema, iagho mae hei?” 20Mae Jone ne theome ghatho peapea te cheke tughugna na ne cheke fadoglo eghu ka mare, “Iara theome mae Kraes.”

21Mare neke ghusna eghu ka mana, “Eghume mae ihei eghu sagho? Ba, iagho mae Elija?”

Mana ne cheke eghu ka mare, “Theo, iara theome mae Elija.”

Hatimare neke ghusna fapuloi ka mana, “Ba, iagho mae profet te ofoni teu ghehati gne?”

Mae Jone ne cheke eghu ka mare, “Theo, iara theome mae profet tuana.”

22Eghuteuna, hatimare ne cheke eghu ka mana, “Teuna, mae ihei eghu sagho ia? Famane cheke fakeli sagho eimu themu na mala ke pulo toutonu ghehati ranghidi mae teke kuru mei ghami ghehati ra. Ba, unha eghu iagho cheke eimu themu na?”

23Mae Jone ne cheke eghu ka mare, “Iara gne ngala mae teke cheke eghu mae profet Isaia tifa ia,

‘Kaisei mae na eha fabiꞌo ke lamnagna namono nagou na na cheke eghu:

Noda mae funei na la meihi, tarabana nabrou mala meigna mana!’ ”

24Aonu, mae teke kuru meidi mae Farasi gre, 25mare ne ghusna eghu ka mae Jone, “Jame iagho te theome mae Kraes nei theome mae Elija nei theome mae profet teuna. Naugna unha iagho te faꞌapublahi naikno gnea?”

26Mae Jone ne cheke eghu ka mare, “Iara mae mala faꞌapublahi naikno ka khoꞌu kolho. Nu kaisei mae biꞌo te au teu balumi ghotilo na, ghotilo theome laseni mana. 27Mana na mei ke leghugu iara, nu iara theome nabagu te rurutha nogna sadol mana re naugna mana mae ke biꞌogu iarai.”

28Cheke igre neke edi ka namono Betani ke maghati Kho'u Jordan. Igne ka vido aheva teke faꞌapublahi naikno mae Jone ia.

Mae Jone toutonu eigna mae Jisas

29Ka keha narane na mae Jone ne filoni mae Jisas ne mei ke ulugna mana. Mae Jone ne cheke eghu, “Filo laoni mae te mei ana. Mana ngala nogna sipu God te mala fafara na. Mana ginauna hata fadelei nakhibodi naiknore ka nauthoglu igne. 30Mae igne ngala mae teke chekeni iara ia. Iara neke cheke eghu, ‘Kaisei mae ginauna mei ke leghugu iara, nu mana mae ke biꞌogu iarai, naugna mana neke kulu auhi neke karha mei nga iara.’ 31Ulu lahu na iara neke theome raꞌe laseni mana, nu iara faꞌapublahidi naiknore ka khoꞌu, mala laseni mana naiknodi Israel re ginauna.”

32Aonu mae Jone ne cheke eghu ka naiknore, “Iara filoni Tharunga te Blahi na ne soru mei jateula kaisei balhu neu ka maloa na ne thoti ka mana. 33Iara theome raꞌe laseni ngala mae Kraes teuni na. Nu God mae teke kuru mei ghau iara na mala faꞌapublahi naikno ka khoꞌu teku na, neke cheke eghu ka iara, ‘Iagho ginauna filoni Tharunga te Blahi na, mana na soru mei thoti ka kaisei mae. Mae tuana ngala mae nate faꞌapublahi naikno kau Tharunga te Blahi na.’ 34Tutuani fara, iara la filonihi. Eghume unha te chekeni iara ka naiknore mae igne ngala thofno mae Thugna God na.”

Mae fanomho teke kulu kilodi mae Jisas re

35Ka keha narane na mae Jone kegra neu baludi phei mae nogna fanomhore. 36Mana filoni mae Jisas nolo te tei sala'u na ne cheke eghu ka phiamare, “Filoni mae tela ari ana! Mana ngala nogna sipu te mala fafara God na.”

37Aonu kate nomhini phei mae fanomhore cheke mana igne, phiamare kegra haghe ne tei ke leghugna mae Jisas. 38Mae Jisas figri ne filodi phiamare te mei ke leghugna re. Mana ne cheke eghu ka phiamare, “Magnahaghei unha si ghopa ia?”

Phiamare ne cheke eghu ka mana, “Rabae, au aheva si iagho ia?” Cheke “Rabae” teu igne gaoghathogna na “Mae velepuhi” eghu.

39Mae Jisas ne cheke eghu ka phiamare, “Mei si ghopa balugu iara mala ari filoni themi.”

Vido tuana jame tanhi fati fei grafi. Phiamare tei balugna mae Jisas ne filoni aheva te au teu mana na. Phiamare au balugna mana narane tuana ne ghilei bongi.

40Kaisei mae ka phia mae nogna fanomho mae Jone igre nomhini unha teke chekeni mae Jone na teke leghuni mae Jisas igne mae Aduru, tahigna mae Simon Pita. 41Glepo ulu lahu teke eni mae Aduru na, mana tei ne hironi mae Simon ne cheke eghu ka mana, “Ghepa la filonihi mae Mesia teke ofoni tahati ia!” Mae Mesia teu igne gaoghathogna na “Mae Kraes.” 42Mae Aduru hatani mae Pita ne tei ka mae Jisas.

Mae Jisas ne filo ka mae Pita ne cheke eghu ka mana, “Gognarona nanghamu iagho na mae Simon, thugna mae Jone, eghuteuna ginauna mare na kilo nigho iagho mae Sifas.” Nangha igne gaoghathogna na “mae Pita” ba “thina.”

Mae Jisas ne kilodi Filip ghe Natanel

43Ka keha narane na, mae Jisas neke magnahaghe tei ka Provins Galili. Kate posa ka namono na, mana thafoni mae Filip ne cheke eghu ka mana, “Ghema Filip, mei leghu ghau iara.”

44Mae Filip gne mae gna Betsaeda, kaisei namono baludi mae Aduru ghe mae Pita. 45Ke leghugna igne, mae Filip tei ne thafoni mae Natanel ne cheke eghu ka mana, “Ghehati la thafonihi mae ihei mae Moses teke rioriso eigna mana ka buka vetula ia, nei hatimare mae profet neke rioriso eigna la mana. Nanghagna na mae Jisas, thugna mae Josep, mae gna ka namono Nasaret.”

46Nu mae Natanel ne cheke eghu ka mae Filip, “Nasaret! Theome tangomana kaisei glepo te keli te jifla mei Nasaret na!”

Mae Filip ne cheke eghu ka mana, “Mei sagho, mala filoni themu!”

47Mae Jisas filoni mae Natanel te mei ke ulugna mana na, ne cheke eghu eigna mana, “Filoni si ghotilo. Mae igne ngala thofno mae gna Israel na, naugna mana theome tangomana te chaghi na.”

48Mae Natanel nomhini cheke mae Jisas igne ne jaglo nogna fara ne cheke eghu ka mana, “Faꞌunha neke lase ghau iara sagho ia?”

Mae Jisas ne cheke eghu ka mana, “Iara neke kulu filo nigho iagho ka teke gnokro teku iagho ke parigna gaju fig ia. Ka vido tuana mae Filip neke theome kilo mei nigho iagho nekeu ka iara.”

49Mae Natanel ne cheke eghu ka mana, “Mae velepuhi, iagho thofno Thugna God! Iagho nodi King hatimare mae Israel!”

50Mae Jisas ne cheke eghu ka mae Natanel, “Iagho fatutuani ghau iara naugna te cheke nigho iara neke filo nigho ke parigna gaju fig na teu ia. Nu iagho ginauna filoni glepo ke biꞌogna ignei!” 51Mae Jisas ne cheke eghu ka mare, “Tutuani fara, te chekeni iara ka ghotilo na, ghotilo ginauna filoi maloa na thora. Eghuteuna ghotilo ginauna filodi nogna engel God re na haghe nei soru eghu ke klignagu iara, mae teke mei funu ka God na.”

Currently Selected:

Jone 1: mrn

Highlight

Copy