Jone 11

U glehegna mae Lasaros

1Kaisei mae te fogra biꞌo fara nanghagna na mae Lasaros. Mana au ka namono Betani baludi Meri ghe Mafa phei greghagnare. 2Meri gne thau teke totofa sedi tifa ka ghahegna mae Jisas na ia. Naꞌa neke famomoja ka khaklagna thegna te brahure. 3Phei greghagna mana re ne kurudi keha mae mala tei cheke eghu ka mae Jisas, “Lord, mae kheramu iagho mae Lasaros ia ne fogra.”

4Kate nomhini mae Jisas nonomho igne mana ne cheke eghu, “U fogra tuana theome mala lehe mae Lasaros, nu mala filoni naiknore nogna nolaghi biꞌo God na. Eghuteuna mala laseni naiknore iara mae Thugna mana na jaola au nolaghi biꞌo jateula mana eghu.” 5Mae Jisas gne namhadi fara Meri ghe Mafa nei mae Lasaros. 6Nu kate nomhini mana te fogra mae Lasaros na, mana neke au soru phei narane ka namono na. 7Ke leghugna igne mana ne magnahaghei tei filoni mae Lasaros, ne cheke eghu ka nogna mae fanomhore, “Tahati na ke pulo Judia.”

8Mae fanomhore ne cheke eghu ka mana, “Mae velepuhi, iagho theome laseni ngala si teke rodi fadi falehe nigho hatimare mae biꞌodi mae Jiure ka thina jare ia? Nu gognarona iagho ke magnahaghei pulo ngala jare sia?”

9Mae Jisas ne cheke eghu ka mare, “Tore, kaisei narane na nabotho phei aoa ke lamnagna. Eghume, mae ihei te tei ka narane na mana theome tangomana te totokhei na, naugna mana ne filoni u naphae na kau nauthoglu igne. 10Nu mae ihei te tei bongiro na, mana tangomana te totokhei na naugna theo naphae te mala batuni mana na.”

11Ke leghugna te chekeni mae Jisas igne, mana neke cheke eghu, “Mae kherada Lasaros na khogla thuru kolho. Nu iara na tei jare mala fadofrani mana.”

12Mae fanomhore ne cheke eghu ka mana, “Lord, jame thuru kolho mana na, mana ginauna nake keli fapulo.” 13Mae Jisas chekeni eigna glehegna mae Lasaros na, nu gaoghathodi mae fanomhore ne thuru neu kolho mae Lasaros eghu.

14Aonu, mae Jisas ne cheke eghu fadoglo ka mare, “Mae Lasaros na la lehehi. 15Eghuteuna te mala kelimi ghotilo na, iara gleale'a fara te theome au jare na mala fatutuani ghau iara ghotilo. Tahati na ari mala filoni mana.”

16Aonu, mae Tomas, mae te kiloi mae Didimus ne cheke eghu ka mae fanomhore, “Tore, tahati na kafe tei balugna mae funei gne mala lehe balugna mana!”

Mae Jisas ne tei Betani

17Kate posa mae Jisas Betani na, thinigna mae Lasaros na la auhi fati narane ke lamna gluma. 18Nu Betani gne theome gaꞌu Jerusalem. 19Aonu, kmana mae Jiu ne mei funudi jare mala toghodi Mafa ghe Meri mala theome diꞌanagnafa repa eigna greghadi te lehe na. 20Kate nomhini Mafa te mei mae Jisas na, naꞌa tei ne thafoni mana ka nabrou na. Nu Meri ne au neu ka suga na.

21Mafa thoke lao ka mae Jisas ne cheke eghu ka mana, “Lord, jame au meu iagho agne na, greghagu iara mae Lasaros gne jame neke theome lehe. 22Nu te laseni iara na unha te tore iagho ka God gognaro na, God ginauna tusu ranghi nigho iagho.”

23Mae Jisas ne cheke eghu ka naꞌa, “Mafa, thosei nanga nou, greghamu iagho na nake karha fapulou ginauna.”

24Mafa ne cheke eghu ka mana, “Iara laseni mana ginauna nake karha fapulo ka narane mala karha fapulodi naikno te gnafare kau narane leghu lahu na.”

25Mae Jisas ne cheke eghu ka naꞌa, “Uve, kaisei iara ngala te tusu lao u karha ka naikno te lehe na mala teke karha fapulo na. Nu ihei te fatutuani ghau iara na, neubane lehe mana ginauna karha fabrahu. 26Nu ihei te karha teu nu fatutuani ghau iara teuna, mana ginauna na theome lehe. Ba, Mafa, iagho fatutuani ni ngau te chekeni iara igne?”

27Mafa ne cheke eghu ka mana, “Uve, Lord. Iara fatutuani nigho iagho te mae Kraes Thugna God na. Iagho ngala mae ihei te ofoni ghehati te mala mei kau nauthoglu igne.”

Mae Jisas ne tanhi

28Ke leghugna te chekeni igne, Mafa neke pulo ka suga na ne cheke eghu faꞌikoi ka Meri, “Meri, mae velepuhi na la meihi. Mana neke ghusna nigho iagho mala tei ka mana.” 29Kate nomhini Meri igne, naꞌa ghosei ne kegra haghe ne tei ka mae Jisas ka nabrou na. 30Mae Jisas theome posa ngau ka namono na. Mana au ngau ka vido aheva Mafa teke tei thafoni mana ia. 31Naikno Jiure au neu balugna Meri mala toghoni naꞌa mala thosei diꞌanagnafa na'a. Mare ne filoni Meri te ghosei te kegra haghe te jifla te tei na. Aonu, naikno teke au balugna naꞌa re ne kafe jifla ne tei ke leghugna naꞌa, naugna gaoghathodi reꞌe re na tei tanhi naꞌa ka gluma na eghu.

32Nu Meri ne tei ka vido te au mae Jisas na. Kate filoni mana na, Meri ne tuturupuku soru ne cheke eghu ka mana, “Lord, jame au meu iagho agne na, greghagu iara mae Lasaros ia jame neke theome lehe.”

33Kate filoni mana te tanhi Meri na eghuteuna mana ne filodi la naikno te mei tanhi balugna naꞌa re, mana ne thono diꞌanagnafa ne phanga fabiꞌo. 34Aonu, mana ne cheke eghu, “Aheva teke giugiluni mana ghotilo na?”

Mare ne cheke eghu, “Lord, mei sagho mala filoni.”

35Mae Jisas ne tanhi.

36Aonu, mae Jiure ne cheke eghu fari thedi, “Filoni si ghotilo, mae igne namhani fara mae Lasaros.”

37Nu keha naiknore ne cheke eghu, “Tifei na mae igne neke fakelidi phia tathagna mae teke dofu na. Theome tangomana si mana te fakarhani mae Lasaros gnea, mala theome lehe mana?”

Mae Jisas ne fakarhini mae Lasaros teke lehe na

38Mae Jisas ne posa ka gluma na ne thono diꞌanagnafagna fara. Gluma igne mare neke jou ka thina tataba, eghuteuna kaisei thina biꞌo teke fofothogna gluma tuana. 39Mae Jisas ne cheke eghu ka mare, “Hata fadelei u thina biꞌo tuana.”

Nu, Mafa gregagna mae te lehe na ne cheke eghu ka mae Jisas, “Lord, la siri diꞌa gnahi, naugna gognarona la fati narane gnahi ke lamna gluma.”

40Mae Jisas ne cheke eghu ka naꞌa, “Mafa, kela ghatho ihoni sagho teke cheke ranghi nigho iara ia? Te fatutuani ghau iara iagho na, iagho tangomana te filoni fagaglana gna nogna nolaghi biꞌo God na.”

41Aonu, mare ne pili fadelei thina biꞌo tuana. Eghuteuna mae Jisas ne filo haghe kligna ne cheke eghu, “Mama, iara cheke fakeli nigho iagho, naugna iagho neke nomhi ghauhi iara. 42Iara lase nigho te nomhini koba nogu tharai iara na. Nu iara chekedi glepo igre ka iagho eidi naikno te kegra faligoho ghau teu iara igre. Iara magnahaghedi mare te fatutuani nigho iagho mae teke kuru mei ghau iara na.”

43Ke leghugna te cheke eghu igne, mae Jisas ne eha fabiꞌo, “Lasaros, jifla mei!” 44Mae teke lehe na nolo ne jifla mei ka gluma na. Nabreku pohe teke pipiha ka khamegna, ghahegna nei ka pha'ugna teku mana re ne maku neu ngala.

Mae Jisas ne cheke eghu ka mare, “Hata koko ghotilo u pohe are mala snakre teini mana.”

Mae biꞌodi mae Jiu re ne hiro puhi mala faleheni mae Jisas

(Mat 26:1-5; Mak 14:1-2; Luk 22:1-2)

45Kmana mae Jiu teke mei au balugna Meri igre ne filoni unha te eni mae Jisas igne ne fatutuani ni mana. 46Nu keha naiknore ne tei ka mae Farasi gre ne toutonu ka mare eigna unha teke eni mae Jisas na. 47Aonu, hatimare mae Farasi baludi mae pris ulure ne kilo fodudi goro mae biꞌo re ne eni kaisei faidu.

Mare ne cheke eghu, “Na faꞌunhani si tahati mae ignea? Naugna mana edi kmana nafnata kofubobhoi fara. 48Jame te lisa laoni tahati te eni fabrahu mana igne na, naiknore ginauna kafe fatutuani ni mana. Aonu, mae armi di Rom gre ginauna na mei goigoni ni noda Sugablahi gne nei goigoni nila noda namono gne eghu!”

49Kaisei mae ka hatimare nanghagna na mae Kaefas. Mana te mae pris biꞌo kau finogha tuana. Mana ne cheke eghu ka mare, “Ghotilo theome laseni kaisei unha glepo nga. 50Te keli na mala kaisei mae te mala lehe tughudi naiknore, mala theome kafe lehe naikno te gnafare.”

51Mae Kaefas gne neke theome fiti ghathoni kau nagnafagna thegna na cheke igne. Nu God neke cheke ranghini mae Kaefas, naugna mana neke mae pris biꞌo ka finogha tuana. Mana kulu cheke thakleni eigna mae Jisas te mala kafe lehe tughudi naikno Jiu te au ka nauthoglu igne. 52Eghuteuna mae Jisas theome mala lehe tughudi kolho mae Jiu gre, nu mana jaola maladi nogna naikno God te au heva heva ka namono te kmana ka nauthoglu igne. Mana mala hata fodu meidi mala ke kaisei tothoghei ngala mare. 53Aonu funu ka narane tuana te haghe na, goro mae biꞌodi mae Jiu gre ne edi kmana nafnata phoge mala faleheni mae Jisas.

54Naugna igne mana ne theome nolo tafri ke uludi mae Jiu. Nu mana jifla jare baludi nogna mae fanomhore ne tei au Ifrem rhegna namono nagou na.

55Ka vido tuana, nodi narane biꞌo mae Jiu te mala eni gna Gaghamu Ghasa-Polho na la namohi. Eghuteuna kmana naikno mei Jerusalem funudi ka namono te au namo teu jare, te mala kulu gae ke ulugna God ame thoke mei nga narane gaghamu na. 56Kate khapru teu mare kau glalabagna u Sugablahi na, mare ne funu hironi mae Jisas ne ghusna eghu fari thedi, “Ba, unha eghu ghotilo gaoghatho mina, mana ginauna mei kau gaghamu igne ba theo?” 57Nu mae pris ulu nei mae Farasi teu gre ne kulu lilisei cheke igne ranghidi naiknore eigna mae Jisas. “Ihei te laseni aheva te au teu mae Jisas na chekeni ka ghehati eghu.” Mare ne cheke eghu, naugna mare ne magnahaghei te lokini mae Jisas.

Currently Selected:

Jone 11: mrn

Highlight

Copy