Jone 12

Meri ne totofa sedi na ka ghahegna mae Jisas re

(Mat 26:6-13; Mak 14:3-9)

1Namno narane ngau ame thokeni nga narane Gaghamu Ghasa-Polho na, mae Jisas neke pulo Betani, ka namono aheva te au mae Lasaros. Mae igne teke lehe nu ke fakakarha mae Jisas teku ia. 2Mare ne tarabana kaisei gaghamu malagna mae Jisas jare. Eghuteuna Mafa ne toghodi mare ka tufagna gano na. Mae Lasaros gne kaisei mae ka mae teke ima balugna mae Jisas kau tevo na. 3Ka vido tuana Meri ne hata ne mei kaisei botol sedi te ninhigrana fara foligna na nei famane sisiri keligna teuna, ne totofa ka phia ghahegna mae Jisas re ne famomoja ka khaklagna thegna te brahure. Eghuteuna suga thongana na ne fodu ka sisirigna sedi na.

4Mae Judas Iskariot gne, kaisei mae ka hatimare mae fanomho gre au la jare. Mana kaisei mae nate majorani mae Jisas. Aonu mae Judas ne cheke eghu, 5“Tore! Sedi igne jame neke fofoli mala hata sileni te naba folini mae gloku kaisei finogha. Nu sileni igne mala tufa nodi naikno te kumare.” 6Nu mae Judas chekeni igne naugna mana kaisei mae mala blau kolho. Mana theome kokhonidi naikno te kumare. Theo, naugna mana ngala kaisei mae te mala reireghi gna gloi sileni hatimare mae fanomhore, eghuteuna mana blau sileni keha fata ka gloi sileni na.

7Mae Jisas ne cheke eghu, “Lisa lao ka naꞌa. Te keli na tathaji teu naꞌa u sedi igne malagna narane glehegu iara na. 8Naikno te kuma gre au fabrahu agne balumi ghotilo mala toghodi, eghuteuna iara gne theome au fabrahu agne balumi ghotilo.”

Mae pris ulure ne rodi faleheni mae Lasaros

9Kmana mae Jiu teke khapru tekeu Jerusalem re nomhini te au teu mae Jisas Betani na. Aonu, mare ne tei jare theome mala tei filoni kolho mae Jisas, nu mare mala tei filoni langau mae Lasaros tekela karha fapulo na. 10Eghuteuna mae pris ulure ne hiro phoge mala faleheni la mae Lasaros. 11Naugna kate filoni mae Lasaros teke karha fapulo na, kmana mae Jiu ne jifla kokodi mae pris ulure ne fatutuani ni mae Jisas.

Naiknore tei thafoni mae Jisas ka nabrou

(Mat 21:1-11; Mak 11:1-11; Luk 19:28-40)

12Ka keha narane na mae Jisas ne jifla Betani mala pulo Jerusalem. Eghuteuna kmana naikno teke tei ka narane Gaghamu Ghasa-Polho na nomhini te mei mae Jisas jare na. 13Eghume, mare ne tei pulei grege thubo mala tei thafoni mana ka nabrou na. Aonu, mare ne gleale'a fara kate filoni te mei mae Jisas na ne thagru eghu fabiꞌo,

“Hosanna! Kilo fnaknoni God!”

“God fablahini mana te mei ka nanghagna Lord!”

“God fablahini nodi King mae Israel!”

14Mae Jisas ne hata kaisei dongki majaghani ne saghe ne tei. Igne ne horoghoto fara ka unha te cheke eghu kau grioriso te blahi ia,

15“Ghotilo naiknomi Jerusalem, thosei mhaghu.

Nomi King ghotilo na la saghe la mei ka dongki.”

16Kate kilo fafnaknoni mae Jisas naiknore, nogna mae fanomho mana re ne theome laseni gaoghathogna te eni naiknore ka mana igne. Eghuteuna kate karha fapulo nei ke haghe kligna teu mana na, mare neke ghatho fapuloni unha teke eni naiknore ka mae Jisas na. Eghume, mae fanomhore ne cheke eghu, “Tutuani fara, igne siba gaoghathogna teke rioriso eigna mana hatimare mae profet tifa ra!”

17Naikno au tekeu balugna mae Jisas ka narane teke eha fajiflani mana mae Lasaros ka gluma na neke fakarha fapuloni mana ia, mare ne toutonu tafri unha teke filoni mare na. 18Naugna kate nomhini thoutonu eigna kofubobhoi biꞌo te eni mana igne, naiknore ne magnahaghei fara te mei filoni mae Jisas. 19Mae Farasi gre ne filodi naikno te keli tadi ka mae Jisas te kafe khapru ka mana re. Aonu, mare ne nanga nodi fara ne cheke eghu fari thedi, “Filo si ghotilo, unha puhi te edi tahati igre ginauna theo nafudi kolho, naugna naikno te gnafare la kafe tei leghuni mana!”

Keha naikno Griki re ne magnahaghei mei filoni mae Jisas

20Keha mae Griki neke haghe la Jerusalem mala tarai ka narane Gaghamu Ghasa-Polho na. 21Mare mei ne thafoni mae Filip, mae Filip gne mae gna Betsaeda ka nohi Galili. Mare ne cheke eghu ka mana, “Mae biꞌo, ghehati magnahaghei mei filoni mae Jisas.” 22Aonu, mae Filip kegra haghe ne tei cheke ka mae Aduru, eghuteuna phiamare ne kafe tei ne facheke ka mae Jisas.

23Mae Jisas ne cheke eghu ka mare, “Narane na la thoke meihi te mala hata nolaghi biꞌo iara mae teke mei funu ka God na. Eghuteuna naiknore ginauna filo meini igne ka iara. 24Tutuani fara te chekeni iara ka ghotilo na. Jame kaisei sisi sopho koko soru ka glose na eghuteuna lehe, sisi tuana ginauna kotu haghe, eghuteuna ginauna ure sisi kmana. Nu jame te theome koko soru sisi tuana ka glose te lehe na, sisi tuana ginauna na kaisei fabrahu kolho. 25Jateula tuana eghu nakarhagna naikno na. Naikno te namhani nakarhagna thegna na ginauna theome hatini thofno nakarha te tutuani na. Nu naikno te tirognani nakarhagna thegna ka nauthoglu igne ginauna tathaji malagna karha fei tifa. 26Jaola mae ihei te magnahaghei loku ranghi ghau iara na, mana mala leghu ghau iara. Eghuteuna nogu mae gloku iara tuana ginauna tei balugu iara ka namono aheva te tei iara na. Eghuteuna mae Kmagu iara na ginauna ghatho tahuni mana.”

Mae Jisas ne chekeni u glehegna thegna na

27Mae Jisas ne cheke eghu, “Gognaro na iara thono diꞌanagnafagu fara eigna glepo nate mei ginauna. Na cheke faꞌunha eghu iara ka mae Mama? Iara na cheke eghu, ‘Mama, thosei snakre mei ke klignagu iara glepo te biꞌo igne na eghu’? Theo. Naugna igne ngala teke meini iara ka nauthoglu igne na mala ruma ke lamnagna glepo te ninhigrana igne. 28Iara na cheke eghu, ‘Mama, fathakle ka naikno gre nou nolaghi te biꞌo!’ ”

Kate chekedi mana cheke igre, kaisei cheke ghosei ne soru mei funu kligna ne cheke eghu, “Nogu nolaghi biꞌo iara na neke thaklehi, eghuteuna ginauna nake fathakleniu ngala u nolaghi biꞌo tuana.” 29Naikno te kegra teu jare re ne kafe nomhini naogla tuana. Aonu mare gaoghathodi na ne kaisei fila ne taitanhi neu nodini, eghuteuna keha naiknore ne cheke mei neu kaisei engel ka mana eghu gaoghathodi na.

30Eghuteuna mae Jisas ne cheke eghu ka mare, “Cheke te cheke mae Mama te nomhini ghotilo igne theome malagu iara kolho, nu mala togho ghami ghotilo. 31Gognarona God ginauna kafe fatedi naikno te theome fatutuani ghau iara. Eghuteuna gognaro mana na kulu hata fadelei nogna nolaghi mae Satan, mae ihei te baubatu fadiꞌadi naikno te au ka nauthoglu igne. 32Ka narane nate tupijuru ghau iara mare ke kligna gaju fafatha na, iara na salo fodu mei naiknore ka thegu.” 33Mae Jisas neke chekedi glepo igre mala glola ka naiknore unha nafnata glehe nate lehe mana ginauna.

34Naiknore ne cheke eghu ka mana, “Tore! Na lehe sagho ia ghema? Ghehati te laseni ka vetula na mae Kraes na mala theome lehe sia, nu mana mala karha fabrahu! Naugna unha site chekeni iagho mae teke mei funugna ka God na na lehe teu gnea? Mae ihei si ‘Mae teke mei funugna ka God’ gnea?”

35Mae Jisas ne cheke eghu ka mare, “Gognarona naphae na ginauna au balumi ghotilo katha vido. Eghume te keli na ghotilo nonolo kani au ngau naphae na. Eghuteuna gromno na ginauna theome tangomana te mei ka ghotilo na. Mae ihei te nonolo kate romno na, mana na theome laseni nabrou na. 36Eghume, fatutuani ni si ghotilo naphae gne kani au ngau naphae gne balumi ghotilo, mala nogna naikno naphae ghotilo.” Ke leghugna te chekedi mana glepo igre mana jifla ne porudi mare.

Kmana mae Jiu ne tirodi fatutuani ni mae Jisas

37Neubane edi mana kmana kofubobhoi ke uludi mae Jiu, mare theome fatutuani ni ngala mana ne mae Kraes teuna. 38Igne ne horoghoto fara ka nogna cheke mae profet Isaia teke cheke eghu tifa ia,

“Lord, iheire nate fatutuanidi nomi cheke ghehati gre?

Ka iheire Lord teke fakakhana nogna nolaghi na?”

39Tutuani fara, naiknore tirodi fatutuani ni mae Jisas, naugna mae Isaia neke chekeni la igne tifa,

40“God neke fadodofu tathadire nei famamhaku nagnafadire.

Naugna igne gognaro na tathadire la dofuhi nei nagnafadire la ihohi.

Naugna igne mare ginauna theome ke pulo mei ka iara mala fakarhidi.”

41Mae Isaia neke chekedi glepo igre tifa na, naugna mana la kulu filonihi nogna nolaghi biꞌo mae Jisas na ne chekeni igne eigna mana.

42Neubane eghu ngau, kmana mae bi'odi mae Jiu ne fatutuani ni mae Jisas. Nu mare theome falalase ka ihei nga, naugna mare mhaghudi hatimare mae Farasi. Glahu faꞌau kosidi ka suga tharai na. 43Mare magnahaghei nafnakno ka naiknore ke tulao gnai nafnakno te mei ka God.

44Mae Jisas kegra haghe ne cheke eghu fabiꞌo, “Mae ihei te fatutuani ghau iara na, mana theome fatutuani ghau iara kolho, nu fatutuani nila mae Mama mae teke kuru mei ghau iara kau nauthoglu igne. 45Jateula ngau, mae ihei te filo ghau iara na, mana la filonihi mae Mama mae teke kuru mei ghau iara na. 46Iara mei jateula juta eghu mala faphaedi naikno te au ka nauthoglu igne. Eghuteuna iheire te fatutuani ghau iara re mare ginauna theome tei tafri ke lamna gromno.

47 “Ihei te nomhidi nogu cheke iara igre, eghuteuna theome leghudi nei theome fatutuani ghau iara teuna, iara na theome fateni mana. Naugna iara theome mei mala fatedi naikno te au ka nauthoglu igne, nu mei mala fakarhidi naikno te au ka nauthoglu igne. 48Mae ihei te theome keli tagna ka iara, nei tirogna fanomho ka chekegu iara na teuna, kaisei glepo nate fateni mana na. Cheke te farirhiu iara igre na fateni mana kau narane leghu lahu na. 49Naugna iara theome cheke leghudi kolho gaoghathogu thegu. Mae Mama mae teke kuru mei ghau iara kau nauthoglu igne te cheke ranghi ghau iara unha te mala chekedi nei farirhiudi teure. 50Eghuteuna te laseni iara na karha fei tifa na mei ka unha te chekedi mae Mama igre. Eghume unha mala chekedi iara ka ghotilo teku mae Mama re te chekedi iara igre.”

Currently Selected:

Jone 12: mrn

Highlight

Copy