Jone 17

Jisas taraidi nogna mae fanomhore

1Ke leghugna te chekedi mae Jisas glepo igre, mana filo haghe kligna ne tarai,

“Mama, narane na la meihi. Fatakle meini nou nolaghi biꞌo na ka iara mae Thumu gne mala fatakle ari langau iara mae Thumu gne nolaghi biꞌo na ka iagho. 2Naugna iagho neke tusu mei ka iara nolaghi te mala reireghidi naikno fateo gre, mala tangomana iara te tusu lao u karha fei tifa na ka naikno nogu iara teku iagho gre. 3Eghuteuna karha fei tifa igne gaoghathogna na naiknore mala lase nigho, iagho kaisei God ngala te tutuani, eghuteuna naiknore mala lase ghau la iara mae Thumu Jisas Kraes, mae teke kuru mei iagho kau nauthoglu igne. 4Iara na fatakleni nou nolaghi biꞌo iagho na ka naiknogna nauthoglu igne. Eghuteuna iara la loku fahuidihi gobigna lepo mala edi iara teku iagho ra. 5Mama, gognarona fafnakno ghau iara ke ulumu. Tusu mei ka iara nafnakno teke kulu au ka iara kani teke au tekeu iara balumu iagho ia, ame eni nga iagho nauthoglu gne teku ia.

6 “Iara neke fatakle nigho iagho ka naikno teke tusu mei iagho ka iara teke vavahi fadelei iagho kau nauthoglu igne. Naikno igre nou iagho, eghuteuna iagho neke snakre meidi ka iara. Mare leghudi nou cheke iagho teke cheke ranghidi iara ra. 7Eghuteuna gognarona mare la lasedihi gobigna lepo teke tusu mei iagho ka iara ra, neke mei funudi ka iagho. 8U nou farirhiu iagho teke famei iagho ka iara ra, iara la cheke laohi ka mare, la nomhidihi mare. Mare fatutuani nigho iagho ngala mae teke kuru mei ghau iara na nei laseni fara teke mei iara funu ka iagho na. 9Gognaro na iara taraidi mare. Iara theome taraidi naikno te leghuni puhigna nauthoglu igne. Nu iara taraidi naikno teke tusu mei iagho ka iara gre, naugna mare nou iagho. 10Naikno te nogu iara re nou la iagho, nei naikno te nou iagho re nogu la iara. Naugna nogu nolaghi biꞌo iara na la thaklehi ka naikno igre. 11Iara theome raugha na ari ka iagho. Iara ginauna theome au ka nauthoglu igne, nu mae igre nga nate au teu ka nauthoglu igne. Mama te blahi, taji fakelidi ka nolaghi gna nanghamu, nangha teke famei iagho ka iara, mala kaisei mare jateula tapa te kaisei gne eghu. 12Kani au tekeu iara baludi, iara neke taji fakelidi kau nolaghi gna nanghamu iagho na, nangha teke famei iagho ka iara ia. Iara neke kafe taji fakelidi mare hui. Eghuteuna kaisei mae ngala ka mare nate snivi na mala horoghoto ka unha teke cheke eghu kau grioriso te blahi ia.

13 “Mama, iara theome raugha na ari ka iagho. Iara chekedi glepo igre ka iagho kani au nga iara kau nauthoglu igne, mala thofno gleale'a mare jateula te gleale'a fara iara gne eghu. 14Iara la tusu laohi ka mare nou farirhiu iagho ra. Eghuteuna naiknogna nauthoglu igne theome magnahaghedi mare, naugna mare theome nogna nauthoglu igne, jateula ngau iara gne theome nogna nauthoglu igne. 15Iara theome tore nigho iagho mala atha fajifladi kau nauthoglu igne. Nu iara tore nigho iagho mala reireghi fakelidi mare kau nogna nolaghi mae Satan. 16Mare theome thofno nogna nauthoglu igne, jateula iara te theome nogna nauthoglu igne. 17Mama, fablahidi kau chekemu te tutuani fara. 18Iara kuru fajifladi mala tei mare kau naiknogna nauthoglu igne, jateula ngau iagho teke kuru mei ghau iara kau nauthoglu igne. 19Iara na fablahi ghau thegu mala loku ranghi nigho iagho, mala tangomana langau mare te thofno blahi fara te mala loku ranghi nigho iagho na.”

Mae Jisas taraidi iheire te fatutuani

20 “Iara theome taraidi kolho mare, nu iara taraidi langau iheire te gnafa nate fatutuani ghau iara ginauna kate nomhidi nodi cheke mae igre. 21Mama, iara kafe taraidi naikno te fatutuani ghau iara gre mala kaisei ngala mare, jateula iagho te au balugu iara nei iara au balumu iagho. Iara tore nigho iagho mala kaisei ngala mare baluda tapa, eghuteuna naiknogna nauthoglu igne ginauna fatutuani nigho iagho mae teke kuru mei ghau iara gne. 22Nolaghi biꞌo teke tusu mei iagho ka iara ia kela tusu laohi iara ka naiknore. Iara la tusu laohi ka mare mala kaisei ngala mare jateula tapa te kaisei gne eghu. 23Iara au baludi mare, eghuteuna iagho au balugu iara. Eghume mare ginauna thofno mala kaisei ngala. Aonu nauthoglu igne ginauna lase nigho iagho teke kuru mei ghau iara na. Jaola, nauthoglu igne ginauna lase nigho iagho te namhadi naikno igre jateula iagho te namha ghau iara.

24 “Mama, iara magnahaghedi naikno teke tusu mei iagho ka iara igre mala au balugu iara ka namono aheva te au iara na, mala filoni mare nogu nolaghi biꞌo iara na. Nolaghi biꞌo teke famei iagho ka iara ia naugna iagho neke kulu namha ghau iara neke vuvuha nga nauthoglu igne.

25 “Mama, iagho ngala te thofno keli fara na. Naiknogna nauthoglu igne theome lase nigho iagho, nu iara lase nigho iagho. Eghuteuna nogu naikno iara igre lase nigho iagho mae teke kuru mei ghau iara na. 26Iara la falalasehi ka mare nanghamu iagho na, eghuteuna iara na eni koba igne. Iara ginauna au baludi mare, mala jateula iagho te namha ghau iara gne eghu mare mala namhadi keha naiknore.”

Currently Selected:

Jone 17: mrn

Highlight

Copy