Jone 21

Mae Jisas ne thakle ka nabotho kaisei mae fanomhore

1Kaisei fata ke leghugna igne, mae Jisas neke fatakleni thegna ka nogna mae fanomhore ka grathagna Kholo Galili. Igne neke eghu. 2Keha nogna mae fanomho mana igre kafe khapru neu jare, mae Simon Pita ghe mae Tomas ihei te kiloi mae Didimus, nei mae Natanel gna ka namono Kena te au ka nohi Galili, phia mae thugna Sebedi nei keha phia mae nogna fanomho mana re. 3Mae Simon Pita ne cheke eghu ka mare, “Iara na tei ugra sasa.” Mare ne cheke eghu ka mana, “Ghehati na kafe ari balumu iagho.” Mare ne kafe saghe ka mola na ne tei. Mare ne ugra ka bongi brahu tuana ne braku kolho.

4Ghagra pasa, ka keha narane na mae Jisas thakle kegra neu ka gratha na. Eghuteuna, mae fanomhore ne theome filo glanini mae Jisas teuna.

5Aonu, mana ne cheke eghu ka mare, “Kheraguro, ne atha keha sasa ghotilo ia?”

Mare ne cheke eghu, “Theo kolho.”

6Mana ne cheke eghu ka mare, “Atha tei fangna na mala koko soru ka keha phile mola na, ghotilo ginauna maluaga.” Mare leghuni chekegna mana na ne koko soru ka keha phile mola na. Mare ne maluaga fara ne theome tangomanadi te korho haghe fangna na ke lamna mola.

7Eghuteuna, mae fanomho te namhani fara mae Jisas na filo glanini mae Jisas ne cheke eghu ka mae Pita, “Noda Lord ia signe!” Kate nomhini mae Pita te cheke mana igne, mana atha pohe na neke pipichi. Naugna mana neke hata koko pohe na mala loku neku. Uve, mana krofu soru lamna kholo ne longa ka mae Jisas. 8Keha mae fanomhore ne longa ka mola na ne korho ne longa fangna te fodu ka sasa na. Mare theome thei gaꞌu ka gratha na jame nabagna glimafulu khangafa kolho. 9Mare longa mata ne filoni kaisei khaꞌaghi te karha teu sisibegna na. Keha sasare ne foefobe neu ka khaꞌaghi na nei keha bret eghu jare.

10Aonu, mae Jisas ne cheke eghu ka mare, “Atha mei keha sasa ka teke atha ghotilo are mala gahu.” 11Mae Simon Pita neke pulo ne haghe ka mola na ne toghodi keha mae fanomhore neke korho famata fangna te fodu ka sasa biꞌo na. Kaisei gobi glimafulu thiloi khaputudire. Neuba ngau ne kmana fara sasa, fangna na ne theome tangomana te breku na. 12Mae Jisas ne cheke eghu ka mare, “Mei ghotilo mala ghamu gheda.” Eghuteuna, theo kaisei mae ka mae fanomhore tangomana te ghusna eghu ka mana na, “Mae ihei sagho ia?” naugna mare la kafe glanihi mana. 13Mae Jisas ne atha bret na, ne tufa ka mare. Eghuteuna, mana ke jaola neke tufa sasare. 14Funu ka narane ke leghugna teke kegra fapulo mana kau glehe na, igne fatilo fata mae Jisas te thakle ka nogna mae fanomhore.

Mae Jisas cheke ka mae Pita

15Ke leghugna te gnafa ghamu mare na, mae Jisas ne cheke eghu ka mae Simon Pita, “Simon, thugna Jone, iagho thofno namha ghau iara ngau ke uludi keha mae igrei sia?”

Mae Pita ne cheke eghu ka mana, “Uve Lord, iagho lase ghauhi iara te namha nigho na.”

Mae Jisas ne cheke eghu ka mae Pita, “Reireghidi gnafa nogu naikno iara jateula sua sipu teu igre.”

16Fapea fata na mana neke cheke eghu la ka mae Pita, “Simon, thugna Jone, iagho thofno namha ghau iara ngau sia?”

Mae Pita ne cheke eghu ka mana, “Uve Lord, iagho lase ghauhi iara te namha nigho iagho na.”

Mae Jisas neke cheke eghu ka mae Pita, “Reireghidi gnafa nogu naikno iara jateula sipu teu igre.”

17Fatilo fata na mae Jisas neke cheke eghu la ka mae Pita, “Simon, thugna Jone, iagho namha ghau iara ngau sia?”

Mae Pita ne diꞌanagnafa gna fara naugna mae Jisas ne thilo fata cheke eghu ka mana, “Iagho namha ghau iara ngau sia?” teuna. Eghume, mae Pita ne cheke eghu ka mana, “Lord, iagho lasedihi gobigna lepore. Iagho lase ghau iara te thofno namha nigho na.”

Mae Jisas ne cheke eghu ka mae Pita, “Reireghidi gnafa nogu naikno iara jateula sipu teu igre.” 18Mae Jisas ne cheke eghu ka mae Pita, “Tutuani fara, te chekeni iara ka iagho na. Kate mae majaghani teu iagho na, iagho neke haru famaku themu nou nhugha na neke tei ka vido aheva te magnahaghei tei iagho na. Nu, kate mae khueku'e na, iagho na fadodoglo phia khamemu are, eghuteuna keha naikno delei nate haru famaku nigho te hata nigho te tei ka vido aheva iagho te theome magnahaghei tei na.” 19Cheke igre mae Jisas ne kulu cheke thakledi ka mae Pita, mala kulu laseni mana unha nafnata glehe nate ludeni mana ginauna, mala kilo fnaknoni God. Aonu, mae Jisas ne cheke eghu ka mae Pita, “Pita, mei leghu ghau iara!”

20Mae Pita figri ne filoni mae fanomho te namhani fara mae Jisas te mei ke leghudi phiamare na. Mana kaisei mae teke gnokro rhegna mae Jisas ka teke ghamu mare Gaghamu Ghasa-Polho na teke ghusna eghu ka mana ia, “Lord, mae ihei si nate majora nigho iagho na ia?” 21Kate filoni mae Pita te mei mana ke leghudi na, mana ne cheke eghu ka mae Jisas, “Lord, mae igne ba, na faꞌunha eghu mana ginauna?”

22Mae Jisas ne cheke eghu ka mae Pita, “Uve, jame iara magnahagheni mana te karha teu teke ghilei pulo mei iara na, tuana theome glepo ulu ka iagho. Mei sagho leghu ghau iara!” 23Eghuteuna, u thoutonu na theome lehe mae fanomho igne teuna, ne tei tongana ka mae fanomhore. Nu mae Jisas theome chekeni te mana na theome lehe teuna. Theo, te chekeni mae Jisas na, “Jame iara magnahagheni mana te karha teu teke pulo mei iara na, tuana theome glepo ulu ka iagho.”

24Mae fanomho te chekeni mae Jisas igne iara ngala. Eghuteuna, iara ngala mae te toutonudi nei rioriso sorudi teu glepo igre. Eghuteuna tahati kafe laseni unha te toutonudi iara igre thono tutuani fara.

Cheke leghu lahu

25Gloku te edi mae Jisas re thono kmana fara. Jame kafe rioriso sorudi me gnafa gobigna lepo teke edi mana re meuna, te ghathoni iara na buka te kmanare jame theome nabagna nauthoglu igne.

Currently Selected:

Jone 21: mrn

Highlight

Copy