Jone 4
4
Mae Jisas ghe kaisei gaꞌase gna Samaria
1Hatimare mae Farasi ne nomhini eigna mae Jisas te faꞌapublahi kmana naikno ke tulaogna mae Jone Apublahi te mala leghuni mana na. 2Eghuteuna mae Jisas thegna na neke theome faꞌapublahi naikno. Hatimare nogna mae fanomho mana re teke faꞌapublahi naikno na. 3Kate laseni mae Jisas te nomhini hatimare mae Farasi eigna nogna gloku mana na, mana jifla ka Provins Judia neke funu pulo ka Provins Galili.
4Aonu, mana neke sala'u ka nabrou fei Provins Samaria. 5Jare Samaria, mana ne mei posa ka namono te kiloi Saeka. Namono igne au rhegna sare teke tusu lao mae Jekop ka mae thugna Josep tifa. 6Kaisei seu teke dokha mae Jekop na au ngala jare. Aonu mae Jisas lao ne gnokro soru rhegna seu tuana, naugna mana ne babaꞌo fara ka thei. Ka vido tuana jame tanhi nabotho phei fari hotei naublatha.
7-8Ka vido tuana hatimare mae fanomhore neke tei kokoni mana mala foli gano ka namono na. Kaisei gaꞌase gna Samaria ne mei ka seu na mala toho khoꞌu. Aonu, mae Jisas ne cheke eghu ka gaꞌase na, “Mei katha ghegu khoꞌu.”
9Gaꞌase na ne cheke eghu ka mana, “Sei, iara jaglo nogu ka iagho te tore khoꞌu ka iara gne. Iagho maemu Jiu eghuteuna iara gne gaꞌase gu Samaria. Naugna unha site tore khoꞌu iagho ka iara gnea?” Mae Jiure theome fofodu ka mae Samaria re.
10Aonu mae Jisas ne cheke eghu ka gaꞌase na, “Naikno biꞌo, iagho theome laseni nogna khokofakasai God ranghini naikno na, nu iagho theome laseni mae ihei te tore khoꞌu teu ka iagho gne. Jame laseni iagho na, iagho tangomana te tore ghau iara na, eghuteuna iara tangomana te tusu ari ka iagho u khoꞌu karha na.”
11Gaꞌase na ne cheke eghu ka mana, “Mae biꞌo, khoꞌu na au pari fara, iagho theo kaisei glepo te mala krisu khoꞌu na. Na tei atha aheva saghoi u khoꞌu karha te chekeni iagho tuana? 12Ba iagho, mae biꞌo uluni mae kuꞌeda Jekop mae teke tusu ranghi ghita u seu igne sia? Naꞌa baludi goro thugnare nei nodi bulukare eghu neke koꞌu la ka khoꞌu igne tifa na.”
13Mae Jisas ne cheke eghu ka naꞌa, “Tutuani fara, ihei te koꞌu ka seu igne na, ginau nake roi koꞌu ngala. 14Nu ihei te koꞌu ka khoꞌu te tusu ranghini iara na, mana ginauna nake theome roi koꞌu. U khoꞌu nate tusu mei iara igne na jateula ngau glokha eghu na fura mei fabrahu ke lamnagna mana. U khoꞌu igne ginauna na tusu ranghini mana u karha fei tifa na.”
15Gaꞌase na ne cheke eghu ka mana, “Mae biꞌo, tusu mei ka iara u nafnata khoꞌu igne mala koꞌu iara nu theome ke roi koꞌu iara eghu. Eghuteuna iara ginau nake theome pulo mei agne mala toho khoꞌu koba.”
16Aonu, mae Jisas ne cheke eghu ka naꞌa, “Tei sagho mala chekeni mae khetomu ia mala kafe mei ghopa agne.”
17Naꞌa neke cheke eghu ka mana, “Iara theo khetogu.”
Mae Jisas ne cheke eghu ka naꞌa, “Iagho doglo fara te chekeni iagho ne theo khetomu teuna. 18Tutuani fara iagho neke au glima khetomu. Nu mae te au balumu teu iagho gognaro theome thofno khetomu iagho eghume unha te chekeni iagho na tutuani fara.”
19Gaꞌase na ne cheke eghu ka mana, “Mae biꞌo, iara ao la filo glani nigho nga, iagho kaisei mae profet! 20Tifa na mae ku'emi ghehati mae Samaria gre neke tarai lao ka God ka thogele igne. Nu ghotilo mae Jiure te chekei na Jerusalem kolho thofno vido te mala tei tahati te mala tarai lao ka God na eghu.”
21Mae Jisas ne cheke eghu ka naꞌa, “Naikno biꞌo, fatutuanidi sagho te chekedi iara igre. Naugna ginauna thoke mei u narane nate theome ke pulo naiknore Jerusalem ba haghe ka thogele igne te mala tarai ka mae Mama na. 22Ghotilo naiknomi Samaria gre theome thofno laseni mae ihei te mala tarai lao tagna na. Nu ghehati mae Jiu gre laseni mae ihei te mala tarai lao tagna na. Naugna u nogna puhi God te mala fakarha naikno na mei funu ka ghehati mae Jiu gre kolho. 23Narane na la meihi, u narane tuana agne hi gognaro. Naikno te tarai tutuani ka mae Kmada na, u Tharunga te Blahi na ginauna toghodi mare mala falalase glepo eigna mana ka naiknore. Nafnata naikno igre te magnahaghedi mae Kmada te mala tarai lao ka mana na. 24God na mae tharunga, theome naikno. Eghume mae Tharunga te Blahi na falalase gobigna lepo te tutuani eigna mana re ka naikno te tarai lao ka mana na.”
25Gaꞌase na ne cheke eghu ka mae Jisas, “Iara laseni mae fakarhai te kiloni mae Kraes na na mei. Kate mei mae Kraes na mana ginauna famane rurutha ranghi ghita tahati gobigna lepore.”
26Aonu, mae Jisas ne cheke eghu ka naꞌa, “Iara mae te facheke teu balumu iagho igne ngala mae Kraes na.”
27Ka vido tuana, nogna mae fanomho mae Jisas re neke pulo mei teke tei foli gano ka namono na. Mare ne jaglo nodi fara naugna mare ne filoni mae Jisas te toutonu teu balugna gaꞌase gna Samaria na. Nu theo kaisei mae ka hatimare te cheke eghu ka naꞌa na, “Magnahaghei unha sagho ia?” Ba, te cheke eghu ka mana, “Naugna unha site toutonu iagho balugna gaꞌase tuana ia?”
28Aonu gaꞌase na ne lisa soru nogna glepo mala toho khoꞌu na neke pulo ka namono na. Naꞌa ne cheke eghu ka naikno au teu ka namono na, 29“Ghotilo re, kaisei mae na ne chekedi ka iara gobigna lepo teke edi iara tifa re. Mei si ghotilo filoni mana. Glahula me mae igne ngala mae Kraes na!” 30Aonu, naiknore jifla ka namono na ne tei mala filoni mae Jisas.
31Ke leghugna teke pulo naꞌa ka namono Saeka na mae fanomhore ne cheke eghu ka mana, “Velepuhi, ima gheu!”
32Nu mae Jisas ne cheke eghu ka mare, “Iara au ghegu gano te mala ghamu na, ghotilo theome laseni.”
33Kate nomhini mare te cheke eghu mana igne, mae fanomhore ne funu cheke eghu fari thedi, “Glahula keha naikno neke hata gano neke mei ka mana!”
34Aonu, mae Jisas ne cheke eghu ka mare, “Ghegu gano iara na te mala leghuni unha te magnahaghei mae teke kuru mei ghau iara na nei mala loku fahuidi gloku mala mei edi iara teku mana re. 35Nomi cheke ghotilo ia eghu agne, ‘Fati nhigra ngau te ofo na ame ghano nga nagare na eghu.’ Nu te chekeni iara ka ghotilo na, ‘Faghano filo fakeli si ghotilo ka nagare ana, u nagare na la ghanohi!’ 36Eghuteuna mae ihei te atha gano na mana atha nogna taba eigna nogna gloku na, u gano te salo fodu naiknore igre nate athani mare u karha fei tifa na. Eghume, mae ihei teke joꞌu na, nei mae ihei teke pulei na eghu phiamare na kafe gleale'a fodu. 37Kaisei cheke te eghu agnea, ‘Kaisei mae mala joꞌu, keha mae na mala atha gano’ teu igne gognaro la tutuani fara. 38Na jateula tuana eghu iara na kuru fajifla ghami ghotilo mala tei salo gano ka nagare aheva ghotilo teke theome kmusa ka joꞌu gna na. Keha naikno delei teke kmusa ka joꞌu gna na, eghuteuna u nodi nakmusa mare na mala togho ghami ghotilo.”
39Kmana naiknodi Samaria teke au ka namono tuana mare mei ne fatutuani ni mae Jisas naugna ka cheke te eghu gaꞌase na igre, “Thau igne ne chekedi gobi lepo teke edi iara tifa te ghilei thoke ka narane gognaro gne.” 40Naiknore mei ka mae Jisas ne toreni mana mala au baludi. Aonu, mana ne au jare phia narane. 41Kmana naikno langau neke fatutuani ni mae Jisas naugna ka unha te chekedi mana re.
42Aonu, naiknore ne cheke eghu ka gaꞌase na, “Ulu lahu na ghehati neke fatutuani ni mae Jisas ka unha teke chekedi iagho ka ghehati ra. Nu gognaro na ghehati fatutuani naugna ghehati neke nomhini themi. Tutuani fara, ghehati laseni mae igne ngala thofno mae te mala fakarhadi naikno te gnafa ka nauthoglu gne.”
Mae Jisas ne fakelini thugna nalhaꞌu kaisei mae biꞌo
43Mae Jisas ne au phei narane Samaria, ke leghugna igne mana jifla baludi nogna mae fanomhore ne tei ka Provins Galili. 44Naugna mae Jisas neke kulu cheke eghu agne, “Mae ihei te profet na, kheragna mana re na theome ghatho tahuni mana.” 45Kate posa mae Jisas Galili na, naikno jare re ne gleale'a fara kate filoni mana na. Naugna mare neke tei ka Gaghamu Ghasa-Polho Jerusalem neke filodi gobigna lepo teke edi mana ka narane gaghamu na.
46Ka vido tuana mae Jisas neke pulo ka namono Kena jare Galili, ka namono teke eni mana khoꞌu na teke vuhai u waen na ia. Kaisei mae biꞌo te loku ranghini mae King gna Rom na au jare Kapanam. Thugna mae biꞌo igne na ne fogra fara. 47Mana ne nomhini mae Jisas teke funugna nohi Judia teke mei Provins Galili na. Aonu mana mei ka mae Jisas ne toreni mana mala tei ka namono Kapanam, mala ke keli fapulo mae thugna te namo lehe na.
48Mae Jisas ne cheke eghu ka mae biꞌo na, “Ghotilo magnahaghei te kulu filodi ghu kofubobhoi nei fagaglana teu te edi iara re ame fatutuani ghau nga iara eghu.”
49Mae biꞌo na ne cheke eghu ka mae Jisas, “Mae biꞌo, faghose mei sagho balugu iara ame lehe nga mae thugu iara na eghu.”
50Mae Jisas ne cheke eghu ka mana, “Ke pulo sagho. Mae thumu iagho na kela keli fapulohi!”
Mana ne fatutuani ka cheke mae Jisas na neke pulo ka namono na. 51Ka teke pulo mana ka nabrou na, nogna mae gloku mana re mei ne thafoni mana ka nabrou na ne cheke eghu ka mana, “Mae thumu iagho na kela kelihi!” 52Mana neke ghathoni nogna cheke mae Jisas na ne ghusna eghu ka mare, “Ka tanhi nihai teke keli fapulo mae thugu iara na?” Mare ne cheke eghu ka mana, “Tanhi kaisei ngala naublatha gnorai teke ghaota mana ka fogra na.”
53Mae kmagna masitei na neke ghatho fapuloni ka tanhi kaisei ngala teke cheke eghu mae Jisas na, “Mae thumu iagho na kela kelihi.” Aonu ke leghugna igne mana nei tharaknagna mana na eghu ne kafe fatutuani ni mae Jisas.
54Igne fapea kofubobhoi teke eni mae Jisas Galili ke leghugna teke pulo mei funugna Judia na.
Currently Selected:
Jone 4: mrn
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
