Jone 7

Thabusigna mae Jisas re theome fatutuani ni mana

1Ke leghugna igne, mae Jisas neke teitei ke lamnagna Provins Galili. Mana ne tirogna teitei ka Provins Judia, naugna mae biꞌodi mae Jiu te au jare re ne ofo mala faleheni mana. 2U narane biꞌo nodi mae Jiu te kiloi “Gaghamu Grorofe” na la namohi. 3Aonu, mae thabusigna mae Jisas re ne cheke eghu ka mana, “Ghema, jifla sagho tei Judia mala filodi naikno te leghu nigho re kofubobhoi te edi iagho are eghu. 4Naugna mae ihei te magnahaghei fnakno ka tathadi naiknore, mana theome tangomana te eni poru nogna gloku na. Eghume te edi iagho glepo te biꞌo igre, edi fakakhana sagho ka tathadi naikno te gnafare mala kafe filo glani nigho.” 5Neubane mae thabusigna mae Jisas gre mare theome fatutuani ni mana.

6Mae Jisas ne cheke eghu ka mare, “U thofno nogu narane iara te mala tei jare na theome mei ngau. Nu ghotilo na lelheghu kolho ka themi te tei eni unha te magnahagheni na. 7Naiknogna nauthoglu igne mare na theome diꞌa tadi ka ghotilo. Nu ka iara na mare diꞌa tadi fara, naugna iara ne cheke thakledi u puhidi mare te diꞌare. 8Tei si ghotilo kau narane gaghamu tuana. Nu iara na theome tei gognaro, naugna u nogu narane iara te mala tei jare na theome thoke mei ngau.” 9Ke leghugna te cheke eghu ka mare igne, mana neke au fapulo keha narane ka Provins Galili.

Mae Jisas ne tei ka Gaghamu Grorofe na

10Aonu, hatimare mae thabusigna mae Jisas re ne tei Jerusalem ka gaghamu na. Mae Jisas ne tei la Jerusalem ke leghudi mare. Nu mana ne tei poru mala theome laseni kaisei naikno aheva te tei mana na. 11Kau narane gaghamu na mae biꞌodi mae Jiure ne hironi mae Jisas, ne ghusna eghu tafri, “Aheva si mae ignea?”

12Kmana naikno ne cheke pouporu eigna mae Jisas. Keha naiknore ne cheke eghu, “Mae igne kaisei mae keli fara puhigna na.”

Keha naiknore ne cheke eghu, “Theo, mae igne magnahaghedi naiknore mala leghudi kolho nogna chaghi thegna re.” 13Nu theo kaisei naikno ka mare te frane te cheke thakleni mana na, naugna mare thono mhaghudi fara goro mae biꞌodi mae Jiu.

14Kate thoke farihoteigna gaghamu na, mae Jisas ne ruma ka Sugablahi na ne funu farirhiudi naiknore. 15Hatimare mae biꞌodi mae Jiu gre ne jaglo nodi fara kate nomhidi nogna farirhiu mana re ne cheke eghu, “Mae igne neke theome tei kolho ka sikolu. Faꞌunha ne lasedi fara si mana glepo igrea?”

16Mae Jisas ne cheke eghu ka mare, “Hea, u glepo te farirhiu iara igre theome nogu iara thegu. Nogu farirhiu iara igre neke mei funudi ka mae teke kuru mei ghau iara na. 17Mae ihei te magnahaghei leghuni unha glepo te magnahaghedi God re, mae tuana ginauna lasedi unha te chekedi iara igre neke mei funudi ka God teuna. Mana ginauna laseni u farirhiu igre theome nogu iara thegu. 18Mae ihei te farirhiudi kolho nogna gaoghatho thegna re, mana fariuriu fafnaknoni kolho thegna. Nu mae ihei te fariuriu fafnaknoni mae teke kuru mei ghau iara na, naikno tuana chekeni koba u glepo te tutuani na eghuteuna mana theome lase chaghi. 19Mae Moses neke tusu ari ka ghotilo u vetula na, nu theo kaisei ka ghotilo te leghuni u nogna vetula mana na. Naugna unha site fariuriu falehe ghau iara ghotilo gnea?”

20Aonu naikno khapru teu jare re ne cheke eghu ka mana, “Ghema, kaisei naitu na au ke lamnamu iagho! Mae ihei gne site rogna falehe nigho iagho na ia?”

21Aonu mae Jisas ne cheke eghu ka mare, “Iara neke eni kaisei kofubobhoi ka narane Sabat ia. Eghuteuna ghotilo neke kafe jaglo nomi. 22Mae Moses neke tusu ari ka ghotilo kaisei vetula eigna tohi fagaglana. (Theome mae Moses ulu lahu na, nu mae kuꞌeda tahati tifa re teke kulu eni na.) Eghuteuna neubane narane Sabat ghotilo neke eni ngala u puhi tuana. 23Te mala leghuni nogna vetula mae Moses na ghotilo tohi fagaglana sua nalhaꞌu na ka fahanagna narane na. Te khale kau narane Sabat fahanagna u narane na ghotilo ginauna eni tohi fagaglana na kau narane tuana. Naugna unha site diꞌatami ghotilo ka iara kate fakelini iara thinigna thongana kaisei mae kau narane Sabat gnea? 24Thosei vavahi ka unha glepo te keli kolho fifilogna ke kosi na, nu te keli na vavahi ka unha glepo te thofno tutuani.”

Gusna eigna mae Kraes

25Keha naikno te au Jerusalem re ne cheke eghu, “Igne si mae teke mala fariuriu faleheni teku goro mae biꞌo ra. 26Filoni si ghotilo, gognaro na mana kafe cheke ka naiknore, eghuteuna goro mae biꞌo re theome chekeni ngala kaisei cheke ka mana! Glahula me lasenihi goro mae biꞌo gre te mae igne tutuani ngala mae Kraes na. 27Nu kate mei mae Kraes na theo kaisei naikno nate laseni mana teke mei funugna aheva. Eghuteuna tahati kafe laseni namono gna mae igne.”

28Kate farirhiudi naiknore teu ka Sugablahi na mae Jisas ne cheke eghu fabiꞌo, “Uve, ghotilo lase ghau iara, eghuteuna ghotilo laseni funu aheva teke mei iara na. Nu iara theome mei ka nogu gaoghatho thegu. Mae ihei te tutuani na teke kuru mei ghau iara na. Ghotilo theome laseni mana! 29Nu iara laseni mana, naugna iara mei funu ka mana, eghuteuna mana neke kuru mei ghau iara!”

30Kate chekeni mae Jisas igne, mae Jiure ne fariuriu lokini mana. Nu theo kaisei mae ka mare tangomana te lokini mana na, naugna nogna narane mana na theome mei au. 31Nu kmana naikno ne fatutuani ni mana. Mare ne cheke eghu fari thedi, “Kofubobhoi te edi mana igre thono jateula gobigna lepo teke chekedi mare mala edi mae Kraes ka narane nate mei mana ginauna.”

Mae Jiure fariuriu lokini mae Jisas

32Mae Farasi re nomhidi naiknore te cheke pouporu eidi glepo te edi mae Jisas igre. Aonu mae pris ulu nei mae Farasi eghu igre ne kurudi keha mae greireghi Sugablahi na mala tei lokini mana.

33Mae Jisas ne cheke eghu, “Iara ginauna au balumi ghotilo katha vido kmoꞌei kolho. Aonu iara ginau nake pulo ka mae ihei teke kuru mei ghau na. 34Ghotilo ginauna hiro ghau iara, nu ghotilo ginauna theome filo ghau iara, naugna ghotilo ginauna theome tangomana te thoke ka vido aheva nate tei au iara na.”

35Hatimare mae Jiure nomhidi cheke mana igre ne cheke eghu fari thedi, “Sei, na tei aheva si mae ignea mala theome filoni tahati? Ba, na tei ka naikno tahati te au ka namonodi mae Griki ra? Ba mala tei farirhiudi mae Griki are? 36Mae igne te chekei na tahati ginauna hironi mana, nu tahati ginauna theome filoni mana, eghuteuna tahati ginauna theome tei thoke ka vido aheva te au mana na teu signe. Unha eghu si mana gaoghathodi u cheke igrea?”

Mae Jisas cheke eigna mae Tharunga te Blahi

37Narane leghu lahu igne ngala narane biꞌo fara ka gaghamu na. Kau narane tuana mae Jisas kegra haghe farihoteigna nakhapru na ne cheke eghu fabiꞌo, “Mae ihei te roi koꞌu na mei ka iara mala koꞌu. 38Mae ihei te fatutuani ghau iara na, mana ginauna jateula te cheke eghu kau grioriso te blahi na ia eghu, ‘U khoꞌu karha na ginauna loloro mei fabrahu ka nagnafagna mana na.’ ” 39Mae Jisas neke cheke eigna mae Tharunga te Blahi nate mei ka iheire te fatutuani ni mana re. Kau narane tuana God theome kuru mei ngau mae Tharunga na, naugna mae Jisas theome kegra ngau kau nafnakno.

Naiknore ne fapoaphola eigna mae Jisas

40Keha naiknore nomhidi glepo te chekedi mae Jisas igre ne cheke eghu, “Tutuani fara, mae igne ngala thofno mae profet biꞌo te ofoni tahati na.”

41Aonu, keha naiknore ne cheke eghu, “Mae igne ngala mae Kraes na.”

Nu keha naiknore ne cheke eghu, “Theo, mae Kraes na theome mala mei funugna ka Provins Galili. 42Unha te chekeni kau grioriso te blahi na mae Kraes na mala karha mei ka vikegna mae King Devet. Eghuteuna mana na karha ka namono Betlehem, namono aheva teke karha mae Devet.” 43Aonu naiknore ne theome kaisei gaoghatho eigna mae Jisas ne fnota. 44Keha naiknore ne magnahaghei lokini mana, nu theo kaisei naikno te frane te habo lao ka mana na.

Mae biꞌodi mae Jiure ne theome fatutuani ni mae Jisas

45Hatimare mae greireghi gna Sugablahi na neke pulo ka hatimare mae pris ulu nei ka hatimare mae Farasi. Aonu mae pris ulu nei mae Farasi teu igre ne cheke eghu, “Naugna unha site theome atha te mei ghotilo mae Jisas gnea?”

46Mae greireghigna Sugablahi gne ne cheke eghu ka mare, “Tore, ghehati theome nomhini kaisei mae te cheke ka nolaghi jateula mae igne teuna.”

47Mae Farasi gre ne cheke eghu ka mare, “Tutuani fara, ghotilo la fatutuanidi hila nogna chaghi mana re. 48Theo kaisei mae biꞌo nei kaisei mae Farasi eghu te fatutuani ni mana na. 49Nu naikno te fatutuani ni mana tuare theome laseni nogna vetula mae Moses. Eghume naikno tuare God ginauna tibridi mare!”

50Kaisei mae ka hatimare mae Farasi gre au jare, mae igne mae Nikodimas, mae ihei teke tei filoni mae Jisas kaisei fata tifa ia. Mana ne cheke eghu ka mare, 51“Nu noda vetula tahati ia, theome keli te fateni naikno na kate theome nomhini teu mana na. Tahati na theome fateni mana ghilei laseni ngau tahati unha puhi teke eni mana na.”

52Hatimare ne cheke eghu ka mae Nikodimas, “Ba, iagho mae funumu Galili la sia? Hiro fakelidi sagho grioriso te blahi igre, iagho ginauna theome filoni kaisei mae profet te mei funu Galili na.”

53Aonu mare ne kafe jifla ne sopa tei ka sugadire.

Currently Selected:

Jone 7: mrn

Highlight

Copy