Jone 9

Mae Jisas ne fakelini kaisei mae te dofu

1Mae Jisas tei ne filoni kaisei mae teke karha dofu. 2Nogna mae fanomho mana re ne ghusna eghu ka mana, “Mae velepuhi, nakhibogna mae ihei si te fadofuni mae ignea? Nakhibogna thegna ba idogna kmagnare?”

3Mae Jisas ne cheke eghu ka mare, “Theo, dofu mana tuana theome nakhibogna mana nei theome nakhibodi idogna kmagna manare eghu. Dofu tuana thokeni mana mala filoi naiknore gloku nate eni God ka mana na. 4Kani phae ngau narane gne edi tahati nogna gloku God mae teke kuru mei ghau iara na. Naugna bongi na la namo meihi. Eghuteuna theome tangomana kaisei naikno te loku kate romno na. 5Kani au nga teu iara kau nauthoglu igne, iara ngala u juta te mala faphaedi naikno te au kau nauthoglu igne.”

6Ke leghugna te chekeni igne mae Jisas ne kmisu ka thagru glose na ne edi keha chopu ne puipuki ne muki ka phia tathagna mae te dofu na. 7Aonu, mae Jisas ne cheke eghu ka mae te dofu na, “Tei dadalu tathamure ka kholo seu te kiloi Siloam.” Gaoghathogna Siloam gne “Kuru tei”. Aonu mana tei ka Kholo Siloam na ne dadalu phia tathagnare. Kate ke pulo mei ka sugagna na, mana tangomana teke fifilo na.

Kheragna mae te dofu na, nei mae Farasire eghu ne ghusnani mana

8Aonu keha naiknore ne filoni mae igne teke tore sileni ka naiknore tifa na. Mare nei kheragna fofodu mana re eghu ne funu cheke eghu fari thedi, “Tore, mae te dofu igne ngala jau si mae teke gnokro koba ka geri nabrou na teke tore sileni ia?”

9Keha naiknore ne cheke eghu, “Uve, mana ngala!”

Nu kehare ne cheke eghu, “Theo, theome mana, kaisei mae jateula mana eghu.”

Mana thegna ne cheke eghu ka mare, “Uve, iara ngala!”

10Hatimare ne ghusna eghu ka mana, “Ne faꞌunha neke keli fapulo sagho phei tathamu teke dofu ra?”

11Mana ne cheke eghu ka mare, “Mae te kiloi Jisas na neke eꞌei keha chopu neke muki ka tathagu iara re. Aonu mana cheke ghau iara neke tei dadalu ka kholo te kiloi Siloam. Aonu, iara tei ne dadalu phei tathagure, neke ghosei neke fifilo fapulo.”

12Hatimare ne ghusna eghu ka mana, “Ahevau mae igne?”

Mana ne cheke eghu ka mare, “Iara iho noguni.”

13Mare hatani mae teke dofu na ne tei ka mae Farasi re. 14Narane te fabobothu mae Jisas glose na te muki ka phei tathagna mana re teke fifilo fapulo igne, narane Sabat, nodi narane blahi hatimare mae Jiu. 15Hatimare mae Farasi neke ghusnani langau mana eigna teke keli fapulo mana phei tathagnare. Mana ne cheke eghu ka mare, “Mae igne ne muki glose te bothu na ka phei tathagu iara re. Kate tei dadalu iara tathagure, iara neke fifilo fakeli.”

16Eghuteuna, keha mae Farasi re ne cheke eghu, “Mae teke eni igne neke theome mei funu ka God, naugna mana ne theome leghuni vetula gna narane Sabat.”

Nu keha mae re ne cheke eghu, “Jame mae teke eni igne mana mae diꞌa meuna, mana jame theome tangomana te edi kofubobhoi igre.” Mae Farasire ne theome kaisei gaoghatho eigna mae Jisas.

17Hatimare mae Farasi gre neke fapea ghusna eghu ka mae teke dofu na, “Iagho te chekeni na mae igne ngala te fakelini dofumu na eghu, unha eghu iagho gaoghathomu themu na eigna mae igne?”

Mana ne cheke eghu ka mare, “Iara gaoghathogu na mae igne kaisei mae profet.”

Mae Farasire ne ghusnadi idogna kmagna mae teke dofu na

18Mae biꞌodi mae Jiu gre ne theome fatutuani neke karha dofu mana tifa teuna, nu gognarona kela fifilo fapulo. Aonu mare ne chekedi idogna kmagna teu mana re mala mei. 19Mare ne ghusna eghu ka repa, “Ba, thumi ghopa tutuani si mae ignea? Te chekeni ghopa na, mae igne neke karha dofu. Nu faꞌunha si gognarogne tekela fifilo mana gnea?”

20Idogna kmagna teu mana re ne cheke eghu, “Te laseni ghepa na, mae igne thofno thumi ngala ghepa neke karha mei balugna dofu. 21Nu ghepa theome laseni ne faneha neke keli nga mana phei tathagnare teuna, nu ghepa theome laseni mae ihei teke fakelidi phei tathagnare. Tei si ghotilo ghusnani mana mala toutonu mana thegna, mana theome mae sua.” 22Idogna kmagna teu mana ne cheke eghu naugna repa ne mhaghudi mae biꞌodi mae Jiure. Mae Jiure la kulu chekenihi mae ihei te chekeni mae Jisas gne ngala mae Kraes na teuna mala au kosi kau suga tharai na. 23Naugna igne, idogna kmagna teu mana ne cheke eghu ka mare, “Ghusnani mana si ghotilo themi.”

Mae Farasire ne faꞌau kosini mae teke dofu na ka suga tharai na

24Hatimare ne fapea kilo meini mae teke dofu tifa na ne cheke eghu ka mana, “Ghema, iagho mei agne mala nhaꞌa cheke ke ulugna God, mala chekeni iagho unha te tutuani na! Ghehati laseni mae te fakelidi phei tathamu iagho gre mana kaisei mae diꞌa fara puhigna na.”

25Eghuteuna, mana ne cheke eghu ka mare, “Iara theome laseni ne mae diꞌa fara mana puhigna teuna. Nu kaisei glepo te lase fakelini iara na, iara neke dofu, eghuteuna gognaro na iara kela fifilo!”

26Goro mae biꞌo re ne ghusna eghu ka mana, “Phei tathamu are ba? Unha te eni mana ka iagho tekela fifilo iagho gognarogne?”

27Mana ne cheke eghu ka mare, “Iara la chekehi ka ghotilo sia, nu ghotilo theome fatutuanidi nogu cheke iara re neu. Mala ke faꞌunhai si ghotilo teke magnahaghei nomhini ngala gnea? Ba, ghotilo magnahaghei teke mala nogna mae fanomho la mana sia?”

28Hatimare diꞌa tadi fara ka mana ne cheke eghu balu thibri, “Iagho themu te mala nogna mae fanomho mana na, ghehati gne nogna fanomho mae Moses. 29Ghehati laseni mae Moses, naugna tifa na God neke cheke balugna mana. Nu mae Jisas gne ghehati theome laseni mana nei theome laseni neke mei funugna heva!”

30Mana ne cheke eghu ka mare, “Tore! Iara la thono jaglo nogu fara ka ghotilo sia! Ghotilo theome laseni aheva teke mei mana na, nu mana au nolaghi neke fakelidi phei tathagu iara gre. 31Tahati kafe laseni God na theome fanomho ka nogna tharai mae te diꞌa na nei toghoni mana eghu. Nu God na fanomho ka ihei te pogho soruni nei leghuni teu mana na ngala. 32Funu tifa te mei ka vuvuhagna nauthoglu igne te ghilei mei posa gognarona tahati theome nomhini kaisei naikno te fakelini tathagna mae teke karha dofu na. 33Jame theome mei funugna ka God mana meuna, mana jame theome tangomana te eni kaisei glepo te nolaghi fara na.”

34Aonu, hatimare diꞌa tadi fara ka mana ne cheke eghu, “Ghema, iagho mae tuana diꞌa fabrahu ngala puhimu na funu karha mei mu! Iagho theome naba te farirhiu ghami ghehati na!” Aonu, hatimare ne faꞌau kosini mana kau suga tharai na.

Mae Jisas neke fapea filoni mae teke dofu gne

35Mae Jisas ne nomhini te faꞌau kosini mana hatimare ka suga tharai na. Aonu, mae Jisas tei ne filoni mana ne cheke eghu, “Ba, ghema, iagho fatutuani ni ngau mae teke mei funu ka God gne sia?”

36Mana ne cheke eghu ka mae Jisas, “Mae biꞌo, mae ihei sia? Cheke ranghi ghau iara mala fatutuani ni mana iara.”

37Mae Jisas ne cheke eghu ka mana, “Iagho la filonihi mana. Iara ngala, mae te cheke teu balumu iagho gognaro gne.”

38Aonu mana ne cheke eghu, “Uve, Lord, iara fatutuani nigho iagho gognaro na.” Aonu, mana tuturupuku ne pogho soru ranghini mae Jisas.

39Mae Jisas ne cheke eghu, “Iara mei ka nauthoglu igne mala fatakle nakhibodi naiknore. Nu tathadi naikno teke dofure ke fifilo, eghuteuna naikno ne fifilohi thedi teure nake dofu.”

40Keha mae ka hatimare mae Farasire nomhini cheke te eni mae Jisas igne ne cheke eghu, “Ghema, ne dofu ghehati eghu jau sagho?”

41Mae Jisas ne cheke eghu ka mare, “Te dofu tutuani ghotilo na, ghotilo jame theome jafra. Nu te chekeni ghotilo na, ‘Ghehati la lasenihi u tutuani na teuna!’ Tuana ngala gaoghathogna te chekeni iara ne jafra fara ghotilo teuna.”

Currently Selected:

Jone 9: mrn

Highlight

Copy