Luku 1

Glepo ulu lahu teke risoni mae Luku

1Ranghi nigho iagho ghema Teofilas. Uve, mae biꞌo, kmana naikno neke hati nheta dina neke risodi u glepo teke edi ke lamnada tahati igre. 2Tahati lasedi ka mae iheire teke thofno filodi glepo igre funu tifa nei risodi. Mare jaola neke toutonuni u Nonomho te Keli na. 3Uve, mae biꞌo Teofilas, iara neke kulu hiro fakeli dila gobigna lepo igre ka narane teke fufunudi glepo igre. Eghume iara gognaro na magnahaghei te riso ranghi nigho eidi glepo igre 4mala lasedi iagho glepo teke farirhiu nigho mare igre thofno tutuani fara.

Cheke thakleni karhagna mae Jone Apublahi

5Kate kegra funei mae King Herod Israel na, jare kaisei mae pris nanghagna na mae Sekaraea au ka narane tuana. Mana kaisei mae ka tothoghei mae pris te kiloi mae Abia. Khetogna mana na nanghagna Elisabet, naꞌa jaola neke kaisei naikno ka vikegna mae pris Aron. 6Nu puhidi repa igre doglo fara ke ulugna God, naugna repa ne thofno leghudi nogna vetula nei farirhiu teu God re. 7Nu repa neke theo thudi, naugna Elisabet gne theome tangomana te au sua na, eghuteuna repa la kafe naikno biꞌo hi.

8Kaisei narane nogna tothoghei mae Sekaraea gne te mala loku ka Sugablahi na. 9Mare leghui nodi kastom mae prisire ne lalahu khale mala laseni mae ihei nate ruma haghe ka Sugablahi nogna Lord na, mala gahu insens ke kligna te olta. Aonu, mare neke vahini mae Sekaraea eghuteuna mana ne ruma suga ne eni igne. 10Ka vido tuana, naikno te kmanare ne tarai neu kosi.

11Eghuteuna, kaisei engel nogna Lord na ne mei thakle ka mae Sekaraea, ne kegra neu fei khame nheta ka olta mala fafara na. 12Mae Sekaraea ne filoni engel na ne rhana ne mhaghu nogna fara. 13Eghuteuna, engel na ne cheke eghu ka mana, “Sekaraea, thosei mhaghu. God na nomhinihi nou tharai iagho re te mala au thumu na. Nu khetomu iagho Elisabet na ginauna na au kaisei thugna nalhaꞌu. Iagho na kiloi nanghagna na mae Jone. 14Iagho ginauna na gleꞌa fara kate filoni mana na. Nu naiknore ginauna na gleꞌa langau kate nomhini karhagna mana na. 15Naugna ginauna mana na kaisei mae nafnakno ka tathagna Lord na. Eghuteuna mana na theome koꞌu waen ba unha nafnata khoꞌu te nheta fara. Nu funu ka karhagna na, mana na fodu ka Tharunga te Blahi. 16Mana ginauna nake hata fafigri kmana naiknodi Israel ka nodi Lord God na. 17Mana ginauna mala kulu tei ke ulugna Lord, eghu ka nogna nanheta nei nolaghi eghu God na mana jateula ngau mae profet Elija eghu. Mana mala loku fodudi mae kmadire ka mae thudire. Mana mala ke hata fapulodi iheire teke tutufu kau nabrou gaoghatho te doglo. Jaola, mana mala kulu tarabana naiknore malagna God.”

18Mae Sekaraea neke cheke fapulo ka engel na, “Faꞌunha eghume laseni iara glepo igne ne tutuani teuna eghu? Naugna ghepa gne la kafe naikno biꞌo hi.”

19Engel na neke cheke fapulo ka mana, “Iara Engel Gabriel. Iara kegra ke ulugna God, nu mana kuru mei ghau iara ka iagho mala toutonu ranghi nigho iagho u nonomho te keli igne. 20Nu fanomho ka igne! Iagho ginauna iho cheke naugna iagho ne theome fatutuani ni nogu cheke iara na. Glepo te chekedi iara ka iagho igre ginauna na thoke mei tutuani. Ke leghugna igne, iagho ginauna nake tangomana teke cheke na.”

21Ka vido tuana, naiknore ne ofo neu ke kosigna mae Sekaraea. Eghuteuna, hatimare ne jaglo nodi fara, naugna mana ne au fabrahu ke lamnagna Sugablahi na. 22Kate ke figri meigna na, mana ne theome tangomana te facheke ka mare na. Eghume hatimare ne laseni Lord te thakle ranghini mana ka Sugablahi na. Naugna te theome cheke na, mana ne eꞌei fagaglana kolho kau khamegna na.

23Kate gnafahi nogna narane te mala loku ke lamnagna Sugablahi na, mae Sekaraea neke pulo ka suga na. 24Keha narane ke leghugna igne, Elisabet ne bukla. Eghuteuna, naꞌa ne theome jifla ka suga na nabagna glima nhigra. 25Nu naꞌa ne cheke eghu, “Leghu lahu na Lord la ghilei togho ghau iara ka puhi igne la hata fadeleidi mamajagu iara teke theo thugu na.”

Kaisei engel ne cheke thakleni karhagna mae Jisas na

26Ka fafamno nhigra te bukla Elisabet, God kuruni Engel Gabriel mala tei Nasaret kaisei namono ka Provins Galili. 27Mana hata ne tei jare nonomho na ka gaꞌase te paru teu ka mae te kiloi Josep mae ihei teke karha ka vikegna mae King Devet. Nanghagna gaꞌase majaghani igne, Meri.

28Aonu engel na mei posa ka Meri ne cheke eghu, “Pharikeli nogna God na au balumu mala fablahi nigho!” 29Nu Meri ne nanga nogna fara kate nomhini u cheke igne, aonu naꞌa ne hironi fara gaoghathogna u cheke igne. 30Nu engel na neke cheke eghu ka naꞌa, “Meri, thosei mhaghu eigna cheke igne. Naugna God na thono keli tagna fara ka iagho. 31Iagho ginauna na bukla au kaisei thumu nalhaꞌu, eghuteuna iagho ginauna kiloni mana Jisas. 32Mana ginauna na kaisei mae funei biꞌo nei mare na kiloni mana ‘Thugna God mae te nolaghi te au kligna.’ Noda Lord God ginauna na tusu ranghini mana sapegna funei na mala jateula mae ku'egna King Devet eghu. 33Mana ginauna na funei frunidi fabrahu naiknodi Israel re eghuteuna funei fruni te eni mana ranghidi nogna naiknore na theo ka huigna.”

34Meri ne cheke eghu ka engel na, “Faꞌunha eghu tangomana te chekeni iagho gne? Eigna iara gne theo khetogu!”

35Engel ne cheke eghu ka naꞌa, “Meri, mae Tharunga te Blahi na ginauna na soru mei ke kligna mu iagho. Eghuteuna nogna nolaghi biꞌo God na ginauna na au balumu iagho. Naugna igne u sua na ginauna na blahi eghuteuna naiknore ginauna na kiloi mana thofno Thugna God. 36Filo sagho! Nebumu iagho Elisabet ia, naꞌa la khaekavehi nu gognaro gne naꞌa la namno nhigragnahi bukla na. 37Naugna theo kaisei glepo te ninhigrana ranghini God na.”

38Meri ne cheke eghu, “Iara gne nogna naikno gloku God kolho, eghume snakreni unha lepo te chekeni iagho igne mala eni ka iara.” Ke leghugna igne u engel na ne tei kokoni Meri.

Meri ne tei sighoni Elisabet

39Kau narane tuana, Meri ghosei ne tei filoni nebugna na ka kaisei namono te au holo ka nohi Judia. 40Kate posa ka namono na, naꞌa ruma ka sugagna mae Sekaraea na ne ludeni Elisabet khetogna mana na. 41Kate nomhini Elisabet chekegna Meri na, sua te au ka thi'agna na ne kaplo. Eghuteuna ka vido tuana mae Tharunga te Blahi na ne soru mei ka Elisabet. 42Naꞌa ne cheke eghu fabiꞌo ranghini Meri, “God fablahi nigho iagho, ke uludi goro gaꞌase te gnafare, nei fablahini langau sua te au ka thi'amu iagho ana! 43Iagho idogna nogu Lord te mei sigho ghau iara. Naugna unha site eni ka iara glepo te biꞌo fara ignea? 44Kate nomhini iara naoglamu iagho na, sua te au ka thi'agu iara na ne ghosei ne kaplo, naugna ne gleale'a fara. 45Keli tamu fara naugna iagho ne fatutuanidi glepo nate thoke mei tutuani jateula ngau God teke chekedihi ka iagho ra.”

Meri ne koje kilo fnaknoni God

46Meri ne cheke eghu,

“Iara thofno cheke fakelini nanghagna Lord na.

47Ka nagnafagu na iara thofno gleale'a fara naugna God neke fakarhi ghau iara.

48Iara kaisei nogna naikno gloku kolho,

neuba ne eghu ngau mana ghatho tahu ghau iara.

Funu gognaro te haghe na naikno te gnafare ginauna na chekeni ne keli tagu fara iara teuna.

49Naugna God mae te nolaghi na ne togho ghau iara.

Nanghagna na thono blahi fara.

50Mana kokhoni nognadi nei namhadi eghu naikno te gnafa te ghatho tahuni mana re,

funu ka naikno tifa te ghilei posa ka naikno te theome karha nga teure.

51Ka nogna nolaghi na, mana ne edi glepo te biꞌo re.

Mana ne nhaꞌa faparidi naikno te fahaehaghe kau gaoghathodire.

52Mana ne nhaꞌa sorudi mae funeire ka nodi sape nafnaknore,

eghuteuna ke nhaꞌa haghedi mae iheire teke nhaꞌa faparidi thedire.

53Mana toghodi iheire te rofo re mala fabohodi ka gano te keli.

Mana brue fadelei iheire te dedei fara mala ke kuma.

54Mana mei mala toghodi naiknodi Israel nogna naikno gloku te leghudi nogna chekere.

Mana theome ghatho ihoni nogna nhaꞌa cheke teke eni ka mae ku'edara mala toghodi.

55Jateula ngau teke cheke ranghidi ku'edara,

nei ranghidi mae Ebraham nei vikegna mana te theo ka huigna.”

56Aonu, Meri ne au thilo nhigra balugna Elisabet. Ke leghugna igne naꞌa neke pulo ka nogna namono na.

Karhagna mae Jone Apublahi

57Kate thokeni narane te mala karhagna thugna, Elisabet ne fakarhani kaisei mae thugna nalhaꞌu. 58Eghuteuna, kheragna nei vikegna teu Elisabet re ne nomhini te thono keli fara Lord ranghini naꞌa na ne kafe gleale'a.

59Kaisei wik ke leghugna igne, naiknore ne kafe khapru mei balugna tharaknagna mae Sekaraea na mala tohi fagaglana mae sua nalhaꞌu na. Naiknore magnahaghei te kiloni nanghagna na mae Sekaraea, ka nanghagna mae kmagna na. 60Nu idogna na ne cheke eghu, “Theo! Nanghagna na mae Jone.”

61Naiknore ne cheke eghu ka Elisabet, “Nu theo kaisei ka vikemu iagho na te au nangha tuana.”

62Aonu, mare ne eni kaisei fagaglana ka mae kmagna na, mala laseni mae ihei eghu ni nanghagna mae sua na. 63Mae Sekaraea ne eni kaisei fagaglana ka mare mala tusu lao kaisei glepo mala rioriso ka mana. Mana ne rioriso eghu, “Nanghagna na mae Jone.” Naikno te gnafare ne jaglo nodi fara. 64Ka narane tuana, mae Sekaraea neke tangomana teke cheke na. Mana ne funu kilo fnaknoni God. 65Ke leghugna igne kheragna fofodu mana re ne mhaghu nodi fara eidi glepo te edi God ka mare igre. Aonu naikno heva te heva ka namono holo te au ka nohi Judia na ne toutonudi glepo igre. 66Naikno te nomhidi glepo igre, ne hirodi u gaoghathodi cheke igre ne cheke eghu, “U sua igne ginauna na faꞌunha si gnea?” Mare ne cheke eghu naugna mare laseni nogna nolaghi God na au ka mana.

Mae Sekaraea ne koje balu kilo fnaknoni God

67Mae Tharunga te Blahi na ne soru mei ka mae Sekaraea, kmagna mae Jone na. Eghuteuna mae Sekaraea ne toutonu u chekegna God ka naiknore eidi u glepo nate thoke mei ginau re. Mana ne cheke eghu,

68“Tahati kilo fnaknoni noda Lord God gna Israel!

Mana mei mala togho ghita nogna naiknore nei tusu ranghi ghita u nasnagla.

69God ginauna kuru meini kaisei mae te au nolaghi biꞌo ka tahati,

mae igne kaisei mae vikegna King Devet nogna mae gloku.

70God neke nhaꞌa chekeni igne ka tahati ka chekedi hatimare nogna mae profet te blahi ra.

71God ginauna na fakarhi ghita ka khamedi noda mae naokare nei ka nodi nolaghi iheire te susuku ghita.

72God neke nhaꞌa cheke ranghi ghita mala kokhonidi mae kuꞌeda tifa ra.

Mana neke ghatho fapuloni u nogna nhaꞌa cheke te blahi na.

73-74God neke nhaꞌa cheke ka kuꞌeda mae Ebraham te mala fakarhi ghita kau nodi nolaghi noda mae naokare mala theome mhaghu tahati kate loku ranghini God na.

75Funu gognaro te ghilei lehe na, tahati ginauna na doglo nei blahi eghu fabrahu ke ulugna God.”

76Mae Sekaraea ne cheke eghu ka mae Jone,

“Iagho mae thugu iara, mare ginauna na kilo nigho kaisei mae profet nogna God te au kligna.

Iagho ginauna mala kulu tei ke ulugna Lord, mala tarabana nabrougna mana.

77Eghuteuna mala chekedi nogna naikno God re,

God ginauna na fakarhidi kate hata fadelei nakhibodire.

78Kau nogna kokhoni ghita noda God,

kaisei nathunu rane majaghani funugna kligna ginauna na phae ke klignada tahati.

79Na phae jateula naprai eghu ka tahati te au kate romno,

nei au ke parigna naungogna u glehe.

Mana ginauna na batu fadoglo ghita kau nabrou te mala hatini tahati u pharikeli na.”

80Aonu mae Jone ne biꞌo haghe ne rheta u gaoghathogna na. Mana ne tei ne au ka namono nagou na ne ghilei thokeni u narane te fufunu mana nogna gloku na ranghidi naiknodi Israel re.

Currently Selected:

Luku 1: mrn

Highlight

Copy