Ətefɨ̂aʼ 8
8
1Ə tè nyàple è Shìtifɨ̀yn zâ, Sɔ̂l e nyi fu ə lotə̂ piə kə nâʼà vəyn nə ə zhwi vəyn.
Sɔ̂l ə tə tsə̀fsè ghɨə ndɛ ə̀ Fèzhə̀
Se zhə̀tə pə̀yn fu fetuʼ, ghɨə ndɛ ə̀ Fèzhə̀ ghɛ ə ghe tè nyi Njèlusalɛ̀m ə zhə̀tə̀ se fe ngəʼ zhizè, è kwûəmə kə nyi. Ghɨə poməghe əkɨ̂m ə tə chyasə̀ ndûə epɨ̀as endaʼ ə Njòndyâvè è və Sàmalyàvè. Pîza ə̀ tè faŋ ke ə̀ghɨtomə Njisə̀sghè fu. 2Ghɨ mɔ̀ʼɔ ghɛ ə ghe tè ndə̀m təm ə ghənə̂ əkɨ̂m sə̂ kɔʼsə Fèzhə̀ ə pfɨ̀mə̀ Shìtifɨ̀yn ə chìə èkwu ə vəyn nâʼà sə ŋaŋ.
3Pîza, Sɔ̂l ə zhə̀tə̀ kyiŋə èndom nə ghɨə ndɛ ə̀ Fèzhə̀ghè mi, sè njiə kə ə ndɛ ə ndɛ, shînə̀ fɨsə̂ ə̀ ndômnè è zənə, ndə̂mə̀ ghənə ə ndɛ ə̀chaʼ.
Filìp ə tsàyn Tom èchùŋ sê ghɨ Sàmalyàghè
4Ghɨəpomə ghɛ ə ghe tè təle chyâsè tè ndùə pî ghayn, ndaʼà nduə kə tom èchùŋ. 5Filìp ə ndò ndûə endaʼ èghaʼâ zhîze apàs endaʼ ə Sàmalyàkè ə ndàʼà tom fumə kûmə̀ vɛ ə chɔʼ ndə̂m. 6Ə pə̀ kə nɔ̂yn ə ghɨ kɛ ə ke tè nyi fu fe ghɛ ə kayntə ghɛ ə Filìp tè nə̂, ə zɨə ə̀ghɛ ghɛ ə è tè pîə, ghənə ə fɛtə̂ zɨtə̂ nâʼà ə̀ghɛ ə̀kɨ̂m ghɛ ə è tè piə. 7Filìp ə nə̀ zuʼ se pise e fɨə ə ghɨghe mwìyn pɨa chîə è kyə̀ ètɛ, tsɨ̀tsɨ̂ ə̀ghɨ̀ ghɛ ə pɨas ewìynve tè nyi mə və kwu è ghə m̀ngə̂s fɨəyn e kyîə è tsuʼ ə ghənə̂zè. 8Zɨnə mə ə nə̀ nâʼà ə̀ghɨ ə̀kɨ̂m fumə endaʼ e nyi èsaŋnêzè.
9Wùə tè ndamə fu endaʼ e tɔŋtə̂ nə Shimùyn nə̂ ə̀ghɛ ə fɨyntəghe, ghɨ endaʼ ə Sàmalyàghè e nyi è kaynze. È ve kɔʼsə̂ èwiyn nə zhi nyi wùə ètɛ. 10Ghɨ ghəkɨ̂m fumə endaʼ, ə̀ nyi ə̀ghɨ ghaʼlə̂, è tsɨ̀yntsɨ̀yn sə ghɨ̀sè e fɛtə̂ ndə̂mə̀ àtûŋne se zɨte eghɛ zɛ ə è piə, sè pîə nə, “È lote nyi àtyaʼ ə Fezhə̀ kɛ ə tɔŋtə nə, atyaʼa Fezhə̀kè.” 11Ghənə tè ndə̀mə atûŋnê sə zɨə se vəyn kûmə̀ ə̀ghɛ fɨyntə ghɛ ə è tè kâynə ndamə nə̂ ə ghənə fètəyn sə aghaf e tyâkè. 12Pîza, ə pə̀ kə ghənə pomə sê Filìp kûmə̀ tom èchùŋ efɔ̂yn ə Fezhə̀vè, è kɨsè kûmə̀ Njisə̀s Klâys, ə fo m̀mo sê ghənə, sê ndômnèghè è zəynghe. 13Nâʼà Shimùyn è ngɨŋ ə vəyn ə pɔŋɔ pomə tom èchùŋ nə zɛ, ə fiə m̀mo, sè chumtə̀ Filìp nâʼàpî ghayn kə è tè ndùə. È tè pɔŋ nyi èkaynze kûmə̀ sèchwìə sɛ ə Filìp tè tyə̀nə è ghɛ kayntə ghɛ ə è tè nə̂.
14Ə pə̀ kə ghɨətom ə Njisə̀sghè ə Njèlusalɛ̀m zɨə nə ghɨ Sàmalyà ghə pomə tom ə̀ Fèzhə̀, ghənə ə tomə Pità yî Njɔyn sê ghənə. 15Pità yî Njɔyn ə ndùə zaʼâ ə tsə̀mə̀ sê ghɨ pomə nə ghɛ nə Zuʼse Ŋwaʼase pə̀yn sê ghənə. 16Zuʼse Ŋwaʼase tè pa nyi ndɔ̀ʼɔ se nyiəm pəyn sê ghənə; ə̀ tè nyi mə ghənə fi kə m̀mo ə Pɛ̂pɛ Njisə̀s ezə. 17Pità yî Njɔyn ə ke ndə̀mə əgho ə ghənə tu, ghənə ə fiə Sèzuʼ se Ŋwaʼase.
18Shimùyn ə fe nə ə fo Zuʼse Ŋwaʼase sê ghɨ poməghe kə ghɨətom ə Njisə̀sghè tè ndəm ghoghe ə ghənə etu, è və fo èkɛ sê Pità yî Njɔyn, 19ə pìə nə “Ghàyn fo kèpi àtyaʼ kɨ̂yn ə ghàyn kyi nyi sê mi kə mə ndə̂mə̀ ə̀gho ə nâʼà pi ndè atu, Zuʼse Ŋwaʼase ə pɔŋɔ pə̀ sê vəyn.”
20Pîza Pità ə pə̀ynsə̀ ə pìə nə, “Ə ò kwàʼtə̀ nə ò kàʼa ò zhɔyn fo ə Fezhə̀zè è kɛve, ə gho ghâyn kɛ vɛve ə ndùə tânə̀ elùʼ ewùs! 21Ò kyi va nâʼà èghɛ zhîze əfètəyn èfɨ̀aʼ zasze kûmə̀ nə təm ghɛghe va chichi ə Zhə̀fè shi. 22Kwiyne ə ghò ə tendom tepite, ə ndùə se Zhə̀fè, kûmə̀ tèkwâʼtè tepi tɨnə ò kyi, tsə̀m nə Pɛ̂pɛ lɛse fo ghò kûmə̀ kə ò kyi kwaʼtè nə tɨnə mə ə ghò ətəm. 23Kûmə̀ nə mə ə fe nə ò kyi aghə̀ʼ a kaynəke, fɨyn nyi àkɔ̂s sê pi.”
24Shimùyn ə piə sê Pità yî Njɔyn nə, “Ghàyn tsəm sê Pɛ̂pɛ sê mi, kə nâʼà èghɛ zhîze əfètəyn ə̀ghɛ ghɨ̂yn ə ghàyn pi nyî tàʼa kyàyn sê mi.”
25Ə̀ tè se nyi kə Pità yî Njɔyn tsâyn mɨ̂sè ghɛ ghɛ ə ghənə ke kûmə̀ tom ə̀ Pɛ̂pɛ, ghənə ə kɛsə kwɨlə ə Njèlusalɛ̀m, ə piə ə kwɨlə ndò sè fɨnə ndàʼà kwɨlə̂ ndùə kə tom èchùŋ ə setə̀ʼ se tsɨəse apàs endaʼ ə Sàmalyàkè.
Filìp ə tsàyn tom èchùŋ sê wùtwɔ mə è ndò ə Ètopyà
26Tuʼ fîfi, tsì ə̀ Pɛ̂pɛ ə pìə sê Filìp nə, “Pɨaʼte ngɨŋ zɛ̂zè ə ndò tso nduə endom vɛ ə ve ndô pə̂yn ə Njèlusalɛ̀m, tsɛ̂ tso ndûə ə Ngazà.” Ə nyi endom mə ə kɛsə̂ tsɛ va ətəyn. 27Filìp ə ke pɨaʼtê ə ndò. È və pîə è ndùə endom, ə fe wùə ə Ètopyà mə è vayn kàʼa è nyɨŋə è wùzhɔyn. È tè tɔ̂ʼnə̀ èkɛ ə Kaynndɛ̀svè, ə wùzhɔyn vɛ ə è tè saʼa ndaʼa Ètopyàzè. È tè nyi mə è və ndù se ngɨmnə Fèzhə̀ ə Njèlusalɛ̀m. 28È tè kɛsə̂ kwɨlə̂ ndò, nyɨŋə etûə fèchaʼ fîfe, mə ə̀ shɨ̂nə̀ ekwânyàm. È tè tɔŋɔ kwɨlə̂ pə̀ ŋwàʼlè ə̀ fɨ̀aʼtè Èsayà. 29Zuʼse Ŋwaʼase ə pîə sê Filìp nə, “Nduə fɛ ə ngwùŋ ə̀ fèchaʼ ə faŋə kə fu.” 30Filìp ə nyɨŋə ndùə paʼsə̂ sê vəyn ə zɨə kə è tɔŋɔ ghɛ ə ŋwàʼlè ə fɨ̀aʼtè Èsayà. È və pfɨfə sê vəyn nə, “Ò vɛ ò zɨə kê ghɛ zɛ ə ò tɔŋɔ ə?”
31Wùə nə vɛ ə pə̀ynsə̀ nə, “M nyi kàʼa ə m zɨ kê zàyn, ə̀ tsɛ̂ kə va mə wùə ə fɛte tsayn sê mi ə?” È və pìə za ə pîə sê Filìp nə, è kɔʼ pəyn tsɨsə ə vəyn etûə fèchyaʼ kə yî vəyn ə kwiə ndùə əmɔʼ. 32Ndiŋ ə ŋwàʼlè nə kɛ ə è tè tɔŋɔ tè wàmnə̀ endom vɨnə, nyiə nə:
“È tè nyi kə ndzè zɛ ə tè njì se se,
è kɨ̀sə kə va ndzè ə è kyi mɔŋ ezhoghɛ ə kɔmə nyuŋsə vəynse, è zə tàʼa pìə eghɛ.
33Ə tè ghomsê vəyn, ə fiə àtyaʼ ə vəynke.
Ə̀ tə tsâ ndè ghɛze kûmə̀ fèghâŋ fə vəynfe ə?
ə tə njì tsɨsè ndamə vəynze fa mbiə.”
34Wùə nə vɛ ə pìə sê Filìp nə, “Fɨ̀aʼtè nə zɨnə wàmnə̀ kûmə̀ ndè, è wàmnə̀ kûmə̀ ngɨŋə̂ vəyn mə, mə è wàmnə̀ kûmə̀ wùə ndô ə?” 35Filìp ə zhə̀tə̀ àndiŋ ə ŋwàʼlè nə kɨ̂yn ə tsà tom èchùŋ kûmə̀ Njisə̀s sê vəyn. 36-37Ghənə e sè kwîə ndûə ə ndùə zaʼâ elùʼ vîve, ə fe m̀mo, wùə nə vɛ ə pìə sê Filìp nə, “Fe kə mômə. Ò vayn kàʼa ò fo mi èmôm zôyn kûmə̀ ghè?”#8.36-37 Ŋwàʼlè sə shi shîse ə kwəynsê ndîŋə̀m 37: Filìp ə pìə se vəyn nə, “M kaʼa m fo môm sê ghò kè ezhoghɛ ə ò pomə Njisə̀s ètəmze emɔ̀ʼ.” Wùə vɛ ə pə̀ynsə̀ nə, “M pomə̂ ndò nə Njisə̀s Klâys nyi Vâ Fèzhə̀.” 38Wùə ətəyn ə pìə nə tyəmse chaʼfe. Filìp yî wùə təyn ə tso pə̂ ə njiə ə tsô. Filìp ə fo m̀mo sê vəyn. 39Ə pə̀ kə ghənə kɛse fɨ kɔʼ pə̂yn mmò, Zuʼsə Pɛ̂pɛse ə pfɨ̀ŋə̀ njiə ndô è Filìp. Wùə nə vɛ ə tàʼa fɨnə fe vəyn, ə ndò sè kwɨlə̂ ndûə, saŋnə̂ nâʼà sə ŋaŋ. 40Kə Zuʼse ə Pɛ̂sè njì Filìp zâ, è və pfɨ̀ŋə̀ fe kə ngɨŋ ə vəyn endaʼa Àzotùszè, ə zhə̀tə̀ kwiə kə endaʼ endaʼ ndâʼà ndùə kə tom èchùŋ, se zaʼâ kə è ndu fɨ ə tɔ̂ŋ ə̀ Kàysaliyàzè.
Currently Selected:
Ətefɨ̂aʼ 8: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
Ətefɨ̂aʼ 8
8
1Ə tè nyàple è Shìtifɨ̀yn zâ, Sɔ̂l e nyi fu ə lotə̂ piə kə nâʼà vəyn nə ə zhwi vəyn.
Sɔ̂l ə tə tsə̀fsè ghɨə ndɛ ə̀ Fèzhə̀
Se zhə̀tə pə̀yn fu fetuʼ, ghɨə ndɛ ə̀ Fèzhə̀ ghɛ ə ghe tè nyi Njèlusalɛ̀m ə zhə̀tə̀ se fe ngəʼ zhizè, è kwûəmə kə nyi. Ghɨə poməghe əkɨ̂m ə tə chyasə̀ ndûə epɨ̀as endaʼ ə Njòndyâvè è və Sàmalyàvè. Pîza ə̀ tè faŋ ke ə̀ghɨtomə Njisə̀sghè fu. 2Ghɨ mɔ̀ʼɔ ghɛ ə ghe tè ndə̀m təm ə ghənə̂ əkɨ̂m sə̂ kɔʼsə Fèzhə̀ ə pfɨ̀mə̀ Shìtifɨ̀yn ə chìə èkwu ə vəyn nâʼà sə ŋaŋ.
3Pîza, Sɔ̂l ə zhə̀tə̀ kyiŋə èndom nə ghɨə ndɛ ə̀ Fèzhə̀ghè mi, sè njiə kə ə ndɛ ə ndɛ, shînə̀ fɨsə̂ ə̀ ndômnè è zənə, ndə̂mə̀ ghənə ə ndɛ ə̀chaʼ.
Filìp ə tsàyn Tom èchùŋ sê ghɨ Sàmalyàghè
4Ghɨəpomə ghɛ ə ghe tè təle chyâsè tè ndùə pî ghayn, ndaʼà nduə kə tom èchùŋ. 5Filìp ə ndò ndûə endaʼ èghaʼâ zhîze apàs endaʼ ə Sàmalyàkè ə ndàʼà tom fumə kûmə̀ vɛ ə chɔʼ ndə̂m. 6Ə pə̀ kə nɔ̂yn ə ghɨ kɛ ə ke tè nyi fu fe ghɛ ə kayntə ghɛ ə Filìp tè nə̂, ə zɨə ə̀ghɛ ghɛ ə è tè pîə, ghənə ə fɛtə̂ zɨtə̂ nâʼà ə̀ghɛ ə̀kɨ̂m ghɛ ə è tè piə. 7Filìp ə nə̀ zuʼ se pise e fɨə ə ghɨghe mwìyn pɨa chîə è kyə̀ ètɛ, tsɨ̀tsɨ̂ ə̀ghɨ̀ ghɛ ə pɨas ewìynve tè nyi mə və kwu è ghə m̀ngə̂s fɨəyn e kyîə è tsuʼ ə ghənə̂zè. 8Zɨnə mə ə nə̀ nâʼà ə̀ghɨ ə̀kɨ̂m fumə endaʼ e nyi èsaŋnêzè.
9Wùə tè ndamə fu endaʼ e tɔŋtə̂ nə Shimùyn nə̂ ə̀ghɛ ə fɨyntəghe, ghɨ endaʼ ə Sàmalyàghè e nyi è kaynze. È ve kɔʼsə̂ èwiyn nə zhi nyi wùə ètɛ. 10Ghɨ ghəkɨ̂m fumə endaʼ, ə̀ nyi ə̀ghɨ ghaʼlə̂, è tsɨ̀yntsɨ̀yn sə ghɨ̀sè e fɛtə̂ ndə̂mə̀ àtûŋne se zɨte eghɛ zɛ ə è piə, sè pîə nə, “È lote nyi àtyaʼ ə Fezhə̀ kɛ ə tɔŋtə nə, atyaʼa Fezhə̀kè.” 11Ghənə tè ndə̀mə atûŋnê sə zɨə se vəyn kûmə̀ ə̀ghɛ fɨyntə ghɛ ə è tè kâynə ndamə nə̂ ə ghənə fètəyn sə aghaf e tyâkè. 12Pîza, ə pə̀ kə ghənə pomə sê Filìp kûmə̀ tom èchùŋ efɔ̂yn ə Fezhə̀vè, è kɨsè kûmə̀ Njisə̀s Klâys, ə fo m̀mo sê ghənə, sê ndômnèghè è zəynghe. 13Nâʼà Shimùyn è ngɨŋ ə vəyn ə pɔŋɔ pomə tom èchùŋ nə zɛ, ə fiə m̀mo, sè chumtə̀ Filìp nâʼàpî ghayn kə è tè ndùə. È tè pɔŋ nyi èkaynze kûmə̀ sèchwìə sɛ ə Filìp tè tyə̀nə è ghɛ kayntə ghɛ ə è tè nə̂.
14Ə pə̀ kə ghɨətom ə Njisə̀sghè ə Njèlusalɛ̀m zɨə nə ghɨ Sàmalyà ghə pomə tom ə̀ Fèzhə̀, ghənə ə tomə Pità yî Njɔyn sê ghənə. 15Pità yî Njɔyn ə ndùə zaʼâ ə tsə̀mə̀ sê ghɨ pomə nə ghɛ nə Zuʼse Ŋwaʼase pə̀yn sê ghənə. 16Zuʼse Ŋwaʼase tè pa nyi ndɔ̀ʼɔ se nyiəm pəyn sê ghənə; ə̀ tè nyi mə ghənə fi kə m̀mo ə Pɛ̂pɛ Njisə̀s ezə. 17Pità yî Njɔyn ə ke ndə̀mə əgho ə ghənə tu, ghənə ə fiə Sèzuʼ se Ŋwaʼase.
18Shimùyn ə fe nə ə fo Zuʼse Ŋwaʼase sê ghɨ poməghe kə ghɨətom ə Njisə̀sghè tè ndəm ghoghe ə ghənə etu, è və fo èkɛ sê Pità yî Njɔyn, 19ə pìə nə “Ghàyn fo kèpi àtyaʼ kɨ̂yn ə ghàyn kyi nyi sê mi kə mə ndə̂mə̀ ə̀gho ə nâʼà pi ndè atu, Zuʼse Ŋwaʼase ə pɔŋɔ pə̀ sê vəyn.”
20Pîza Pità ə pə̀ynsə̀ ə pìə nə, “Ə ò kwàʼtə̀ nə ò kàʼa ò zhɔyn fo ə Fezhə̀zè è kɛve, ə gho ghâyn kɛ vɛve ə ndùə tânə̀ elùʼ ewùs! 21Ò kyi va nâʼà èghɛ zhîze əfètəyn èfɨ̀aʼ zasze kûmə̀ nə təm ghɛghe va chichi ə Zhə̀fè shi. 22Kwiyne ə ghò ə tendom tepite, ə ndùə se Zhə̀fè, kûmə̀ tèkwâʼtè tepi tɨnə ò kyi, tsə̀m nə Pɛ̂pɛ lɛse fo ghò kûmə̀ kə ò kyi kwaʼtè nə tɨnə mə ə ghò ətəm. 23Kûmə̀ nə mə ə fe nə ò kyi aghə̀ʼ a kaynəke, fɨyn nyi àkɔ̂s sê pi.”
24Shimùyn ə piə sê Pità yî Njɔyn nə, “Ghàyn tsəm sê Pɛ̂pɛ sê mi, kə nâʼà èghɛ zhîze əfètəyn ə̀ghɛ ghɨ̂yn ə ghàyn pi nyî tàʼa kyàyn sê mi.”
25Ə̀ tè se nyi kə Pità yî Njɔyn tsâyn mɨ̂sè ghɛ ghɛ ə ghənə ke kûmə̀ tom ə̀ Pɛ̂pɛ, ghənə ə kɛsə kwɨlə ə Njèlusalɛ̀m, ə piə ə kwɨlə ndò sè fɨnə ndàʼà kwɨlə̂ ndùə kə tom èchùŋ ə setə̀ʼ se tsɨəse apàs endaʼ ə Sàmalyàkè.
Filìp ə tsàyn tom èchùŋ sê wùtwɔ mə è ndò ə Ètopyà
26Tuʼ fîfi, tsì ə̀ Pɛ̂pɛ ə pìə sê Filìp nə, “Pɨaʼte ngɨŋ zɛ̂zè ə ndò tso nduə endom vɛ ə ve ndô pə̂yn ə Njèlusalɛ̀m, tsɛ̂ tso ndûə ə Ngazà.” Ə nyi endom mə ə kɛsə̂ tsɛ va ətəyn. 27Filìp ə ke pɨaʼtê ə ndò. È və pîə è ndùə endom, ə fe wùə ə Ètopyà mə è vayn kàʼa è nyɨŋə è wùzhɔyn. È tè tɔ̂ʼnə̀ èkɛ ə Kaynndɛ̀svè, ə wùzhɔyn vɛ ə è tè saʼa ndaʼa Ètopyàzè. È tè nyi mə è və ndù se ngɨmnə Fèzhə̀ ə Njèlusalɛ̀m. 28È tè kɛsə̂ kwɨlə̂ ndò, nyɨŋə etûə fèchaʼ fîfe, mə ə̀ shɨ̂nə̀ ekwânyàm. È tè tɔŋɔ kwɨlə̂ pə̀ ŋwàʼlè ə̀ fɨ̀aʼtè Èsayà. 29Zuʼse Ŋwaʼase ə pîə sê Filìp nə, “Nduə fɛ ə ngwùŋ ə̀ fèchaʼ ə faŋə kə fu.” 30Filìp ə nyɨŋə ndùə paʼsə̂ sê vəyn ə zɨə kə è tɔŋɔ ghɛ ə ŋwàʼlè ə fɨ̀aʼtè Èsayà. È və pfɨfə sê vəyn nə, “Ò vɛ ò zɨə kê ghɛ zɛ ə ò tɔŋɔ ə?”
31Wùə nə vɛ ə pə̀ynsə̀ nə, “M nyi kàʼa ə m zɨ kê zàyn, ə̀ tsɛ̂ kə va mə wùə ə fɛte tsayn sê mi ə?” È və pìə za ə pîə sê Filìp nə, è kɔʼ pəyn tsɨsə ə vəyn etûə fèchyaʼ kə yî vəyn ə kwiə ndùə əmɔʼ. 32Ndiŋ ə ŋwàʼlè nə kɛ ə è tè tɔŋɔ tè wàmnə̀ endom vɨnə, nyiə nə:
“È tè nyi kə ndzè zɛ ə tè njì se se,
è kɨ̀sə kə va ndzè ə è kyi mɔŋ ezhoghɛ ə kɔmə nyuŋsə vəynse, è zə tàʼa pìə eghɛ.
33Ə tè ghomsê vəyn, ə fiə àtyaʼ ə vəynke.
Ə̀ tə tsâ ndè ghɛze kûmə̀ fèghâŋ fə vəynfe ə?
ə tə njì tsɨsè ndamə vəynze fa mbiə.”
34Wùə nə vɛ ə pìə sê Filìp nə, “Fɨ̀aʼtè nə zɨnə wàmnə̀ kûmə̀ ndè, è wàmnə̀ kûmə̀ ngɨŋə̂ vəyn mə, mə è wàmnə̀ kûmə̀ wùə ndô ə?” 35Filìp ə zhə̀tə̀ àndiŋ ə ŋwàʼlè nə kɨ̂yn ə tsà tom èchùŋ kûmə̀ Njisə̀s sê vəyn. 36-37Ghənə e sè kwîə ndûə ə ndùə zaʼâ elùʼ vîve, ə fe m̀mo, wùə nə vɛ ə pìə sê Filìp nə, “Fe kə mômə. Ò vayn kàʼa ò fo mi èmôm zôyn kûmə̀ ghè?”#8.36-37 Ŋwàʼlè sə shi shîse ə kwəynsê ndîŋə̀m 37: Filìp ə pìə se vəyn nə, “M kaʼa m fo môm sê ghò kè ezhoghɛ ə ò pomə Njisə̀s ètəmze emɔ̀ʼ.” Wùə vɛ ə pə̀ynsə̀ nə, “M pomə̂ ndò nə Njisə̀s Klâys nyi Vâ Fèzhə̀.” 38Wùə ətəyn ə pìə nə tyəmse chaʼfe. Filìp yî wùə təyn ə tso pə̂ ə njiə ə tsô. Filìp ə fo m̀mo sê vəyn. 39Ə pə̀ kə ghənə kɛse fɨ kɔʼ pə̂yn mmò, Zuʼsə Pɛ̂pɛse ə pfɨ̀ŋə̀ njiə ndô è Filìp. Wùə nə vɛ ə tàʼa fɨnə fe vəyn, ə ndò sè kwɨlə̂ ndûə, saŋnə̂ nâʼà sə ŋaŋ. 40Kə Zuʼse ə Pɛ̂sè njì Filìp zâ, è və pfɨ̀ŋə̀ fe kə ngɨŋ ə vəyn endaʼa Àzotùszè, ə zhə̀tə̀ kwiə kə endaʼ endaʼ ndâʼà ndùə kə tom èchùŋ, se zaʼâ kə è ndu fɨ ə tɔ̂ŋ ə̀ Kàysaliyàzè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©2022 CABTAL