Njɔyn 8
8
1Pîza Njisə̀s ə ndò ndûə ə pfɨ̀nə̀ Sèolìf. 2Nâʼà pɨsə̀pɨsə̀ ə fetuʼ fəmɔ̀ʼɔfe, È və fɨnə ndûə ə Ndɛ Ètsə̀mə. Ghɨ ghəkɨ̂m ə zùŋtə̀ kyîŋə̀ nga Vəyn, È və tsɨsə̂ əchi ə zhə̀tə̀ se zaʼlə ghənə. 3Tyə̀ynsè sə alàŋsè è ghɨə Falàsîə ə njiə pə̂ è wùzhɔyn mə ə ko vəyn, è ve nyɨ̂ŋə̀ yî wùə ə̀ va ndômə̀ vəyn. Ghənə ə pə̀ tɔmə wùzhɔyn ə̀təyn ə ghɨghə əshi ə̀kɨ̂m. 4Ghənə pìə sê Njisə̀s nə, “Tyə̀ynsè, ə ko wùzhɔyn vɨ̂yn, è ve nyɨŋ yî wùndômə̀, ə̀ va ndômə̀ vəyn. 5Ə ghàs ə alàŋ, Mosîs tè nyaʼ nə ə kyi se tɨmnə̂ zhwiə kyì ə wùzhɔyn nə vɨnə mə è chighe. Ghàyn pìə nə ghɛ sê ghànə?” 6Ghənə tè pìə zɨnə se tam echo ə Njisə̀szè, endom kə ghənə pi nə È və nə̀yn pofsê. Pîza È və ngɨmtə̂ nyàʼtə̀ èghɛ è paŋfə agho fə Vəynfe əchi. 7Ə pə̀ kə ghənə tyəm ke fu pfɨfə tèpfɨf sê Vəyn, È və ndwìə tyəmə̂ ə pìə se ghənə nə, “Ə wùə nyi ə ghàyn əfètəyn mə è paʼà tyə̂m nəyn pi, è və tɨmə vəyn è chi sə shi.” 8È və ke kɛsə ngɨmə̂ sè nyâʼà əchi. 9Kə ghənə tè zɨ zɨnə mə, ə ndò nâʼà ə̀kɨ̂m femɔ̀ʼ femɔ̀ʼ, se zhə̀tə̀ kə ə ndumne sə shi. Njisə̀s ə faŋə fumə Və̂yn nɨŋ yî wùzhɔyn ə̀təyn, è pa tyəm ke fumə. 10Njisə̀s ə ndwìə kɔʼɔ ə pfɨfə sê wùzhɔyn ə̀təyn nə, “Wùzhɔyn ghɨ ghɛ ghâyn ə pə̂yn è ghò fâ? Vîvè paʼà faŋ pî èmɔ̀ʼ se pì nə ə zhwi ghô?”
11Wùzhɔyn ətəyn ə pə̀ynsə̀ nə, “Nâʼà wùə èmɔ̀ʼ pâʼà faŋ ə Pɛ̀ apɨəyn.”
Njisə̀s ə pìə sê vəyn nə, “Nâʼàpî Mi nə̀ pɔŋɔ pîə va nə ə zhwi ghô. Ndo kwɨlə pîza kə ò kɛse nəyn pi.”#8.11 Ŋwàʼlè sə shi se tsɨse kyi va luʼ vɨ̀nə (7.53-8.11).
Njisə̀s ə pì nə Zhi nyi epayn sê ghɨ mbighe
12Njisə̀s ə fɨnə wâmnə̀ sê ghɨə Falàsîə pîə nə, “M nyi epayn ə mbize. Ə chùmtè pîndè Mi, ə è tə tàʼa kwì alɨm pîza ə è tə kyî èpayn zɛ ə ze fo ndame.”
13Ghɨə Falàsîə nə ghɛ ə pìə sê Vəyn nə, “Ò fɨyn tyəm kepî tsɛ̀ èsaʼ sê ngɨŋ Zɛ̂zè; pîza ə paʼà pomə tsɛ̀ esaʼ Zɛ̂zè.”
14Njisə̀s ə pìə sê ghənə nə, “Ngaŋ. Pî kə m wâmnə̀ kûmə̀ ngɨŋ Zɨ̂mzè, ghɛ zɛ ə M pîə nyi ke nâʼà səmɔʼ, kûmə̀ nə M ke ndô luʼ vɛ ə M ndô ətəyn, ke eluʼ vɛ ə M ndùə ətəyn. Ghàyn ke va luʼ vɛ M ndô ətəyn kɨ̀sə eluʼ vɛ M ndûə ətəyn. 15Ghàyn saʼa è tɔf ə wûə m̀sɔ̀ŋze, M saʼa va wùə vîvè. 16Pîza, mə M nyi se saʼa wùə, M mə saʼa kə səmɔʼ kûmə̀ nə M saʼa va Mî nɨŋ. M saʼa ghasè Pɨ̀a Vɨm Vɛ ə È tom Mi. 17Ə̀ nyi mə nyàʼ ə ghàyn alàŋ nə ə ghɨghə pɛ̀ tyəm choze mɔ̀ʼ ə tə̂ èghɛ èmɔ̀ʼ, ə ghɛ zɛ ə ghənə pî ə nyi səmɔʼ 18Ghàyn ke nə M kyi setsɛ̀ èsaʼ sèpɛ̀, ə ngɨŋ Zɨ̂mè, è Pɨ̀a Vɨm vɛ ə È tom Mi.”
19Ghɨ ə Falàsî ghə ke pfɨf sê Vəyn nə, “Pɨ̀a Vɛ̂ vàyn?”
Njisə̀s ə pə̀ynsə̀ sê ghənə nə, “Ghàyn ke va Mi, ke va Pɨ̀a vɨm. Ə ghàyn fe ke Mi, mə ghàyn ke kepî ndò Pɨ̀a vɨ̂mè.”
20Njisə̀s tè piə əghɛ nə ghɨ̂yn ə̀kɨ̂m mə è zaʼlə̂ ə Ndɛ Ètsə̀mə, etipì elùʼ vɛ ə tè ndə̀mə kɛve ətəyn. Nâʼà wùə vîvè ə tàʼa ko Vəyn kûmə̀ nə shîŋə̀ Vəynke tè nyi ndɔ̀ʼɔ ke kwəyn.
Njisə̀s ə tsàyn nə zhi ndo ekwùtwəyn
21Njisə̀s ə pìə kwəynsə̂ se ghənə nə, “M nə̀ ndô, ə ghàyn ə kyiŋə mi, pîza ə ghàyn tàʼa fe Mi, ə ghàyn kwu ə ghàyn ə sepi. Luʼ vɛ M nə̀ nə̂ M mə nyi ətəyn, ghàyn vayn kàʼa ə pəyn fu.”
22Ghɨə Njûs ə chisəghe e sè pîə nə, “È pi nə ghâsènì vayn kàʼa ə ndu elùʼ vɛ È ndùə, ze kaʼa zə nyi nə è kyiŋə se zhwiə ngɨŋə̂ Vəyn mə?”
23Njisə̀s ə pìə sê ghənə nə, “Ghàyn nyi əghɨ mə ghàyn ndò fa chi, pîza M ndo pə̂yn ekwùtwəyn. Ghàyn nyi əghɨ mə ə ndo pə̂yn fa mbi, pîza M vachi wùə ə̀ mbi zɨ̀nə̀. 24Mə pì sê ghàyn nə ghàyn nə̀ kwuə ə ghàyn ə sepi. Ghàyn kyi se kwu ə ghàyn tàʼa pomə nə, ‹M nyi wùə vɛ ə M nyi Vəyn.›”
25Ghənə ə pfɨfə sê Njisə̀s nə, “Ò nyi nâʼà ndè?”
Njisə̀s ə pə̀ynsə̀ nə, “M nyi wùə vɛ ə M fe tsàyn sê ghàyn ə zhə̀te nə M nyi Vəyn. 26Ghɛ tsɨ̀ə kə nyi kə M kàʼa ə M pi kûmə̀ ghàyn, fɨnə tsɨ̀ə kəpi kə M kaʼa M pi nə ghàyn ə nə̀yn pofsê. Vɛ ə È tom Mi nyi Wùə səmɔʼ. Ghɛ ghɛ M tsâ sê ghàyn fa mbi nyi ke ə̀ghɛ ghɛ M zɨ sê Vəyn.”
27Ghənə tè paʼà zɨ kê nə Njisə̀s wàmnə̀ se ghənə kûmə̀ Pɨ̀a ə̀ Vəyn. 28Njisə̀s ə pìə sê ghənə nə, “Ghàyn tə kɔʼsə̂ Va wùə ə awâmnè, ə paynte Vəyn, ə ke nə, ‘M nyi wùə vɛ M pîə nə M nyi Vəyn,’ Ə fɨyn kê nə M nə̂ va ghɛ sə mìə ngɨŋ, pîza piə kə èghɛ zɛ Pɨ̀a nyi mə È və pì nə M pi. 29Vɛ ə È tom Mi nyi ghasè Vəyn, È paʼà zà Mi Mî nɨŋ kûmə̀ nə M zâŋsə̀ nə̂ kə èghɛ zɛ ə È kɔ̀ŋə̀.”
30Ghɨ ə tsɨə ghɛ ə tè zɨ kə Njisə̀s wâmnə̀ ghɛ ghɨ̀nə̀ ə pomə̂ se Vəyn.
Səmɔʼ nə̀ zhə̂nə̀ za ghò
31Njisə̀s ə pìə sê ghɨ ə Njûs ghɛ ə ghe tè pomə sê vəyn nə, “Ə ghàyn chùmtè zaʼlê zɨme, ə ghàyn ə lote nyi sèchùmtè èpàm Sɨmse. 32Ghàyn nə̀ kê èghɛ zɛ ə ze nyi səmɔʼ, ə səmɔʼ ə̀təyn tə zhəyn za ghàyn.”
33Ghənə ə pə̀ynsə̀ nə, “Ghàs nyi fe ghâŋfə Aplàghâmfè mə ghàs paʼà tyəm pəyn nyi àkɔs sê wùə vîvè. E tyə̂nə̀ nə ghe kə Ò pì nə, ‹Ə tə zhə̂nə̀ za ghàyn ə?›”
34Njisə̀s ə pìə sê ghənə nə, “M tsâ se ghàyn səmɔʼ nə, nâʼàpî ndè vɛ è nə̀ pi nyi àkɔ̂s sê pi. 35Kɔ̂sà pâʼà tyəmə̂ kɛsə̂ sə wùə è esas ə ndɛ, pîza vâ ndɛ ndamə faŋə ndò esas ə ndɛ. 36E za tyə̀nə̀ nə, ə Vâ wùə zhə̀yn zâ ghò, ò ke nə ò fɨyn va àkɔ̂s səmɔʼ. 37M ke ndò nə ghàyn nyi fe ghâŋfə Aplàghâmfè, pîza kyiŋə se zhwiə Mi kûmə̀ nə ghàyn kɔ̂ŋɔ̀ va se zɨə ezaʼlê Zɨme. 38M tsâ kə èghɛ zɛ ə Pɨ̀a Vɨm tyə̀yn sê Mi, ghàyn nə̂ kə zɛ ə pɨ̀a vâyn tsàyn sê ghàyn.”
39Ghənə ə pə̀ynsə̀ nə, “Aplàghâm nyi pɨ̀a vâsvè.”
Njisə̀s ə pìə sê ghənə nə, “Ə ghàyn tè lote nyi ə̀ghɔyn Aplàghâmə̀, mə ghàyn nə̂ kə ə̀ghɛ ghɛ ə Aplàghâm tè nə̂. 40Nâʼà ə̀ghɛ ə̀kɨ̂m ghɛ M nyi mə mə tyə̂m nəyn nyi nə m tsayn səmɔʼ sê ghàyn zɛ m zɨ sê Zhə̀fè, pîza ghàyn e mɔ̂msə̀ se zhwiə mi. Ə̀ zɨnə vachi èghɛ zɛ Aplàghâm tè nəyn. 41Ghàyn nə̂ kə ə̀ghɛ ghɛ ə pɨ̀a vayn nə̂.”
Ghənə ə pə̀ynsə̀ nə, “Zhə̀fè È ngɨŋə̂ Vəyn nyi ke Pɨ̀a vɛ ə ghàs kyi, ghàs e nyi ə̀ghɔ Vəynghe səmɔʼ.”
42Njisə̀s ə pìə sê ghənə nə, “Ə Zhə̀fè tè lote nyi Pɨ̀a vâyn, mə ghàyn kɔ̂ŋɔ̀ ndò Mi kûmə̀ nə M ndo pə̂yn se Zhə̀fè nyi zôyn fàyn. M tè paʼà pə̀yn chi sə Mì ə ngɨŋ pîza È tè tom ndô Mi. 43Kûmə̀ ghè ə ghàyn zɨə ke va ghɛ zɛ ə M piə ə? Ə nyi kûmə̀ nə ghàyn kɔ̀ŋɔ̀ va se zɨ ewâmnè Zɨmze. 44Ghàyn nyi əghɔ pɨ̀a vâynvè, ndə̂plè, kɔ̂ŋɔ̀ kə sə chûmtə̀ tè kwaʼtè tə vəynte. È tè zhwiə əghɨ kè ə zhə̀te, wàmnə̀ va ghɛze səmɔʼ kûmə̀ nə è kyi va səmɔʼ. Shîŋə̀ kɛ ə è wamə kaŋke, è lotə̂ wamnə̀ kə èwâmnè ə vəynze, kûmə̀ nə è nyi wùə àkaŋ, nyi pɨ̀a sê kwaŋve. 45Pîza kûmə̀ nə M wâmnə̀ kə səmɔʼ sê ghàyn, ə̀ za nyi eghɛ zɛ ə ghàyn kɔ̀ŋɔ̀ va se pomə̂ sê Mi. 46Ə̀ nyi nde ə ghàyn ə fètəyn ə è kàʼa è tyəyn nə Mə nə̀yn pi ə? Ə M tsâ səmɔʼ sê ghàyn, kûmə̀ ghè ə ghàyn pomə va sê Mi ə? 47Nâʼàpî ndè vɛ ə è ndò sê Zhə̀fè, zɨə ndò wâmnè ə Fezhə̀zè. Ghɛ zɛ ə ze nə̂ nə kə ghàyn ə zɨə nyi kûmə̀ nə ghàyn va əghɔ Fezhə̀.”
Ghɨ Njûs ghə mɛnê zaʼlê ə Njisə̀szè
48Ghɨ Njûs ghè ə ke pì sê Njisə̀s nə, “Ghàs tè paʼà nə̀yn àchûŋ se pì nə Ò nyi wùə Sàmalyà, kyi èpamə̂ ə satàynzè ə?”
49Njisə̀s ə pìə sê ghənə nə, “M kyi va pamə̂ ə satàynzè. M ngɨmnə̂ Pɨ̀a Vɨm, pîza ghàyn ngɨmnə̂ va Mi. 50M kyiŋə va nə ə kɔʼsə̂ Mi. Pîza wùə e nyi kə è kyiŋə nə ə kɔʼsə̂ Mi, mə ə̀ nyi Vəyn vɛ ə È tsɛ̀sə̀ saʼze səmɔʼ. 51M pîə sê ghàyn səmɔʼ nə, nâʼàpî ndè vɛ ə è nə̀ ghɛ zɛ M zaʼlə, kwuə va.”
52Ghɨ Njûs nə ghɛ ə pìə sê Vəyn nə, “Zôyn ghàs lote ke ndò nə ò nyiə kyi èpamə̂ ə satàynzè! Aplàghâm ə tè kwu, fɨ̀aʼtèsè ə kwuə, pîza Ò pîə nə nâʼàpî ndè vɛ ə è nə̀ ghɛ zɛ ə Ò zaʼlə, ə è tə taʼa kwu. 53Ò tsɨ̀ə tsɛ ndò pɨ̀a vâsvè Aplàghâm vɛ ə è tè kwuə? Fɨ̀aʼtè sə tè kwu kepî, Ò kwàʼtə̀ nə Ò nyi nde?”
54Njisə̀s ə pə̀ynsə̀ nə, “Ə M fe kɔʼsə ngɨŋ Zɨ̂m, mə kɔʼsê ətəynze tyə̂nə̀ va ghɛ zhîze. Ə̀ nyi Pɨ̀a Vɨm kə È nə̀ nə Mə kyi èkɔʼsê, ə Vɛ ə ghàyn pìə nə ə̀ nyi Pɨ̀a vàyn. 55Pî kə ghàyn ke va Vəyn, pîza M ke Vəyn. Ə M pi nə M ke va Vəyn, ə Mə nyi kepî wùə àkaŋ kə ghàyn. Pîza M ke ndô Vəyn nə̂ ə̀ghɛ ghɛ ə È pìə. 56Pɨ̀a vâyn Aplàghâm tè nyiə saŋnə̂ nə è tə fe fètuʼ fɛ M tə pə̂ ətəyn. Ə fe fəynfe sè saŋnə̂.”
57Ghɨ ətəynghe ə pìə se Vəyn nə, “Ò paʼà nyìəm zaʼâ pî pìŋ m̀ghɨm m tâyn, mə O kàynè fe Aplàghâm ə?”
58Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə tè piə piə Aplàghâm mə ‹M nyîə nyi!›”
59Ə pə̀ kə ghɨə tə zɨ zamə, ghənə ə komtə̂ ə̀chi se tɨmnə̂ Vəyn ətəyn, pîza Njisə̀s ə ndə̀ytə̀ ngɨŋə̂ Vəyn ə ndò fu ə Ndɛ Ètsə̀mə.
Currently Selected:
Njɔyn 8: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
