Matyò 17
17
Wiyn ə Njisə̀svè ə kwiynê ə pfɨyn
(Mâk 9.2-13; Lûk 9.28-36)
1Epàm ə mtuʼ mtufə, Njisə̀s ə njiə Pità è Njə̂m yî ànyìə vəyn Njɔyn ə kɔʼɔ è ghənə etûə pfɨ̀yn è ngaŋtə kə nyi, mə nyì ke ghənə fu. 2Ghənə ə naynə̂, ə fe kə wiynə Njisə̀sè kwiyne, kyaʼ ə vəynze nyaynə̂ kə ezhwi. Ndzɨs sə vəynse ə kɛsə̂ sè fɨfə kə nyi fɨnə nyaynə̂. 3Kè nyî, Mosîs yî Èlanjà ə fɨ ə ghənə ekyàʼ sè wàmnə̀ sê Njisə̀s. 4Pità ə ke pì sê Njisə̀s nə, “Pɛ̂pɛ e tsɔ̂fə̀ ndò kə ghâsènì nyì fâyn. Ə ò kɔ̀ŋə̀ ə m pɛ pfɨ̀mè m̀ta fâyn, ə̀ o kyi fèmɔ̀ʼ, Mosîs e kyi fèmɔ̀ʼ, Èlanjà e kyi fə̀mɔ̀ʼ.”
5Kə è tè pa wâmnə̀, mbàʼ sefɨfə nyaynəse ə tso ə ghənə ətu ə kɨyte ghənə, Kyə̀ ə fɨə fu ə fètə̂ sèmbàʼ pîə nə, “Ə̀ vɨ̂nə nyi Vayn vɛ M kɔ̂ŋə̀, È nə̀ M saŋnə̂. Ghàyn zɨə sê vəyn.”
6Kə chùmtè èpàm sə Njisə̀sè tè zɨə kyə̀ nə zɛ, fâyn zə ko ghənə, ghənə ə pfɨ̀lə̀ ə chi è kyaʼtè. 7Njisə̀s ə pə̀ kûmə̀ ghənə ə pìə nə, “Ghàyn ndwi, kə ghàyn fayn.” 8Ghənə ndwìsə̀ ètu ə ghənə̂vè ə tàʼa fe wùə ə̀ tsɛ̂ kə va Njisə̀s.
9Kə ghənə tè kɛsə tso pə̂ fumə ə pfɨyn, Njisə̀s ə fo fɨ̀as sê ghənə nə, “Kə ghàyn tsayn ghɛ zɛ ə ghàyn fe sê wùə se zaʼâ kə Zhə̀fè zomse Vâ wùə.”
10Chùmtè èpàm sə Njisə̀sè ə pfɨfə sê vəyn nə, “Kûmə̀ ghè ə tyə̀ynsè sə alàŋsè tè pi nə ə̀ kyi Èlanjà se pə̀yn sə shi tsɔ̀fə vɛ ə nyi mə ə kɨmnê ə?”
11Njisə̀s ə pə̀ynsə̀ sê ghənə nə, “E nyi səmɔʼ nə Èlanjà pə̂ ndò sə shi, nyi se nə̀yn nə nâʼàpî àkè ə nyi èpɨaʼtêzè. 12Pîza M piə sê ghàyn səmɔʼ nə Èlanjà se nyi mə è və tè kàynè pəyn pîza ghɨghə tàʼa fe kê vəyn, pîza nə̂ se vəyn nâʼà pi èghɛ èkè ə ghənə tè kɔ̀ŋə. Ə̀ nyi kepî èghɨ kə Va Wùə tə fe tsôsè ə ghənə ə gho.”
13Chùmtè èpàm sə vəynse ə ke zɨə kê nə È fe wàmnə̀ sê ghənə kûmə̀ Njɔyn Fo M̀mò.
Njisə̀s ə tsuʼ vayn ndômə̀ viu ə è kyi zuʼ se pise
(Mâk 9.14-29; Lûk 9.37-43a)
14Kə Njisə̀s yî chùmtè èpàm sə vəynse kɛse pə̂yn sê nɔ̂ynkè, wùə ə pə̀ sê Njisə̀s ə tɨmə ə̀ ndzɨs ə Və shi, 15ə pìə nə, “Pɛ̂pɛ, kose səyn sê vayn vɨ̂m vê ndômə̀ vɨ̀yn. È kyi ezaf apfɨ̀zè, fe ngəʼ nâʼà sə ŋaŋ. È zàŋsə̀ pfɨ̂ə njiə ewùs è kɨsè mmò shîŋə̀ tekɨ̂m. 16M tè pəyn è vəyn sê chùmtè èpàm sɛse, è və ghaʼa ghənə se tsuʼ.”
17Njisə̀s ə pə̀ynsə̀ nə, “Ə̀ nyi ngwàʼ e pi èkè zɨ̂yn ə è làʼà pomə̂zè nyiə? M nə ndamə tânə̀ zàyn ghâsènì ə? M nə̀ kolə tânə̀ zàyn təmə è ghàyn ə? Pə̀yn è va ətəyn fayn sê mi.” 18Njisə̀s ə kàyntə̀ ə̀ghɛ sê pamə̂ tə satàyn nə tɛ, se ə fɨə ə vâ ətəyn ewìyn, kè fumə ashìŋə̀ è və tɛ.
19Chùmtè èpàm sə Njisə̀sè ə nyaʼtə̂ pə̀ se vəyn ə pfɨfə nə, “Kûmə̀ ghè ə ghàs tè vayn kaʼa chum fɨsê tèpamə̂ tə satàyn tə təyn tə?”
20Njisə̀s ə pə̀ynsə̀ nə, “Ə̀ nyi kûmə̀ nə pomə zayn nyiə ndɛnə. M piə sê ghàyn səmɔʼ nə ə ghàyn kyi pomə̂zè, ze ndɛnə pi kə eshi ə ngwàʼ ə mostàzè, ghàyn kàʼa ghàyn pi sê pfɨ̀yn zɨ̂yn nə è ndò fa elùʼ ə è ndu ndom fɛ̂, ə è nəyn ke za. Ə ghɛ zhîze ə tɛ ghaʼa va ghàyn. 21Ghàyn kàʼa ə ghàyn chùm fɨse èkyî ə sezuʼ se pise nyi kə sɨ̂nə̀ kè ezhoghɛ ghàyn tsə̀mə̀ fɨnə pamə ècho.”#17.21 Ŋwàʼlè sə shi sə mɔ̀ʼɔse kyi va ndiŋ nə kɨ̂yn.
Njisə̀s ə wàmnè kûmə̀ èkwu ə vəyn
(Mâk 9.30-32; Lûk 9.43e-45)
22Njisə̀s yî chùmtè èpàm sə vəynse tè zùŋte elùʼ emɔ̀ʼ apàs endaʼ ə Ngalìlîkè, È və pìə sê ghənə nə, “Ə nə̀ fo Va wùə ə ghɨghə gho, 23ə ghe zhwi vəyn, pîza epàm ə mtuʼ mta, ə Zhə̀fè zomse Vəyn.”
Chùmtè èpàm sə vəynse zɨə zɨnə mə saŋnə̂ va.
Njisə̀s ə ndàʼ tâks ə̀ Ndɛ Ètsə̀mə
24Njisə̀s yî chùmtè èpàm sə vəynse ə pə̀ endaʼ ə Kàpanùmzè. Ə tè nyì fumə ə ghɨ ghɛ ə ghe tè fitə kɛ tâks ə Ndɛ Ètsə̀mə tè pə̀yn sê Pità ə pfɨfə sê vəyn nə, “Piə tyə̀ynsè vâyn maʼà ndò tâks ə Ndɛ Ètsə̀mə?” 25Pità ə pə̀ynsə̀ nə, “Èn è màʼà ndò.”
Ə pə̀ kə Pità njiə ə ndɛ ndɔ̀ʼɔ ə è nyiəm wâmnè, Njisə̀s ə pfɨfə sê vəyn nə, “Ò kwàʼtə̀ nə ghe ə Shimùyn, ə̀ màʼà ndè ngwàʼ kɨ̀sə setaks sê fɔ̂yntə mbitə? Ə ghɨ endaʼa təynghe mə əghɨ etumghə?”
26Pità ə pə̀ynsə̀ nə, “Əghɨ etumə.” Njisə̀s ə pìə se vəyn nə, “E za nyi nə ghɨ tèndâʼà nə tɨ̂yn kyi va sə̂ ndâʼà. 27Pîza ghàs kɔ̀ŋə̀ va se nə̀yn nə ghɨ ghɨ̀nə nyɔʼse tɔŋe. Ndù ènjwì ə màʼa fèchyaʼ. Mbwɔ̀ kɛ ə ò ko sə shi, ŋaʼse cho ə kəynke, ə ò koyte kɛve ə ve kwəyn kə ghâsènì ndaʼ tâks ə təyn. Njì vəynve ə ndùə ndâʼà sê ghâsènì.”
Currently Selected:
Matyò 17: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
