Matyò 20
20
Njisə̀s ə mɛ̀ ngàyn kûmə̀ ə̀ghɨ efɨaʼaghe afùʼ ə mtamke
1Njisə̀s ə mɛ̀ ngàyn nə, “Fɔ̂yn ə Fezhə̀vè nyì kepî kə pɛ̀ àfùʼ vîvè ə è tè pɨs fɨ se ndùə kyiŋə əghɨ nə ghe səʼ fɨaʼ ə və afùʼ etwɔmke. 2Ghənə ə pomə̂ èkɛ vɛ ə è nə̀ ndaʼà ghənə ətəyn ə fetuʼ, è və tomə ghənə ə və afùʼ. 3Pɛ̀ àfùʼ ə̀təyn ə kɛsə̂ fɨə ndûə echô àfàf ə tezhwi tepole mɔ̀ʼ ə fe ə̀ghɨ mɔ̀ʼɔ ghe tyəm fu, nə̂ va ghɛze. 4È və pìə sê ghənə nə, ‘Ghàyn pɔŋ səʼ ndu ə ghâ fɨ̂aʼà ə mìə afùʼ etwɔmke ə m nə ndaʼ ghàyn èkɛ vɛ ə ve kwəynə.’ 5Ghənə ə səʼə. È və nə̀ kəpî zamə ashìŋə̀ kɛ chwì kɔʼ tɛ è kɨ̂sè ə tezhwi teta. 6Ə nə̀ nə̂ ə nyi ə tezhwi tetâyn ezhwikwɨlə, e və fɨnə fɨə ndûə afàf ə fe əghɨ̀ əmɔ̀ʼɔghe e tyəm fu səndô, e və pfɨfə sê ghənə nə, ‘Kûmə̀ ghè ə ghàyn tyəm fâyn sə fetuʼ fefɨ̂plèfè fɨ̂aʼà va fɨake ə?’ 7Ghənə pə̀ynsə̀ nə, ‘Ə̀ nyi kûmə̀ nə wùə paʼà njì ghàs efɨ̀aʼ.’ È və pìə sê ghənə nə ghənə pɔŋ səʼ ə fɨ̂aʼà ə vəyn afùʼ.
8Shîŋə̀ ezhwikwɨləke ə kwəynə, pɛ̀ àfùʼ ə̀təyn ə pìə sê tuə ghɨe fɨaʼa vəynke nə, ‘Tɔŋɔ ghɨ efɨaʼa ə ndàʼà èkɛ ə ghənə̂vè. Zhə̀te èghɨ ghɛ m tè njì kwûŋsè efɨ̀aʼ ə ndùə mɨ̂sə̀ è ghɛ m tè njì efɨ̀aʼ səshi’ 9È və ndàʼà əghɨ ghɛ ghe tè zhə̀te fɨ̂aʼà ə tezhwi tetâyn ezhwikwɨlə èkɛ ə fetuʼe. 10Ghɨ ghɛ ə tè nji efɨ̀aʼ sə shi ə pə̀ nə ndaʼ ghənə, kwaʼtə̀ nə ə nə̀ ndaʼà ghənə èkɛ ə və tsɨ̂ə tsɛ və ghɨ̀ ghɛ ə tè zhə̀te fɨ̂aʼkè ə tezhwi tetâyn ezhwikwɨlə, pîza ə ndàʼà kəpî ghənə èkɛ əfetuʼe. 11Kə ghənə tè fi kɛ ətəynve, ə zhə̀tə̀ se ghàm ə pɛ̀ àfùʼ. 12Ghənə tè pîə nə, ‹Ghɨ ghɨ̀yn ə ghe pə̂yn kwûŋsè fɨ̂aʼ ke sə chwìə emɔ̀ʼ, ò vêo ndàʼ ghənə kèpi kə ò ndàʼ ghàs, mə ghàs ə zɨsê fɨ̂aʼ tuʼfe fɨ̂flèfè etyə̀ chwì.› 13Pɛ̀ àfùʼ nə vɛ ə pìə sê wùə èmɔ̀ʼ ə ghənə fètəyn nə, ‹Zɨte ə soyn, m pâʼà chɔŋtê ghò. Nâʼà sə kàyn piə ò fe pomə nə m ndaʼ gho sə ekɛ ə fetuʼve ə? 14Zôyn fi ndâʼ zɛze ə kwɨlə̂. Ə̀ kɔ̀ŋ mi se ndàʼ ə wùə vɛ ə m tè njì kwûŋsè kèpî kə m ndâʼ ghò. 15M kyi va tyaʼa se nə̀yn eghɛ zɛ m kɔ̂ŋə̀ se nə̀yn è kɛ vɨmve ə̂? Mə ò ghə̀ʼə̀ ndò kûmə̀ nə m kyi ətəm əchûŋ ghə?›”
16Njisə̀s ə mɨ̀sə̀ ngàyn zɨ̀nə̀ pîə nə, “Ghɨ ghɛ ə nyi ashi zôyn tə pə̂ ə nyi èpam, ghɛ ə ghe nyi epàm zôyn tə pə ə nyi àshi.”
Njisə̀s ə fɨyn wâmnè nə ə̀ ndu shîŋə̀ teta kûmə̀ èkwu ə Vəynze
(Mâk 10.32-34; Lûk 18.31-34)
17Njisə̀s è chùmtè èpàm sə vəynse tè kɔʼɔ ndûə ə Njèlusalɛ̀m. Kə ghənə tè kɔʼɔ ndûə, È və tɔŋtə̂ kɨŋtə̂ pə̂ è ghənə ə nyaʼtə̂ pîə sê ghənə nə, 18“Ghàyn zɨte ghâsènì kɔʼɔ ndûə ə Njèlusalɛ̀m zôyn, elùʼ vɛ ə nə̀ fo tsɛsə̀ Va Wùə sê ghɨ kɔʼsə nə eshyə̀ engaŋtə è tyə̀ynsè sə alàŋsè. Ghənə nə̀ tsɛsə̀ èsaʼ nə è kyi se kwu. 19Ə nji fo vəyn sê tûm nə ve nyəʼse vəyn ə pus vəyn è wàynsè, ə fɨyn payntê vəyn ə awâmnè, epàmə̂ m̀tuʼ mtam ə Zhə̀fè zomse Vəyn.”
Nyìə Njə̂m è Njɔyn ə pfɨf ghɛze sê Njisə̀s
(Mâk 10.35-45)
20Epàm ətəyn, zhwìə Zepɛndì ə ke pə̀yn sê Njisə̀s è ghɔ vəyn ghendômə̀ ghəpɛ̀, ə pə̀ ə tɨmə ə̀ndzɨs ə vəyn əshi ə chyatə̂ vəyn nə, È nəyn zhi èghɛ echûŋzè.
21Njisə̀s ə pfɨfə sê vəyn nə, “Ò kyiŋə nə zhi ghayn ghe sê gho ə?”
È və pìə nə, “Tsɨ̀ne sê mi nə, ashìŋə̀ kɛ ə ò nyi ə ghò efɔ̀yn, ghɔyn ghɨm ghɨnə̀ ə̀pɛ̀ tə tsɨsə̂ èmɔ̀ʼ ə ghò akɔyn ə zhiəke, è və mɔ̀ʼɔ̂ ə ghò akɔyn ə ekôkè.”
22Pîza Njisə̀s ə pə̀ynsə̀ sê ghɔyn endômnè ətəynghe nə, “Ghàyn ke va ghɛ zɛ ə ghàyn pfɨfə. Ghàyn nyi kàʼa ə ghàyn fe ngəʼ zɛ ə m tə fe ə?”
Ghənə pə̀ynsə̀ sê Njisə̀s nə, “Èn.”
23Njisə̀s ə pìə sê ghənə nə, “Səmɔʼ, ghàyn tə fe ndò ngəʼ zɛ ə m nyi se tə fe, pîza ə va chi eluʼ vɨmve se chɔʼɔ wùə vɛ ə è tə tsɨsə ə mi ekɔyn etwɔ è kɨ̂sè ə mì ekɔyn ekôvè. Pîza luʼ ətəyn nyi sê ghɨ ghɛ ə Pɨ̀a vɨ̂m pɨaʼte ndə̂m sê ghənə.”
24Kə chùmtè epàm sə vəyn sə mɔ̀ʼɔ sɛ èghɨm zɨ ghɛ ətəyn, ə nyɔ̂ʼsə̀ ètɔŋ sê ghɔnyì nə ghɛ ə̀ pɛ̀. 25Njisə̀s ə tɔŋɔ zûŋtə̀ ghənə əkɨ̂m ə pìə sê ghənə nə, “Ghàyn ghe ke nə fɔ̂yntè è ghɨ ghɛ ə saʼa mbi zɨ̀yn njìə atyaʼ ə ghənə̂kè sə̂ saʼa ə̀ghɨ ghənə̂ghè ə? 26Pîza, e nə̀ nə ze ə vachi zamə ə ghàyn ə fètəyn. Nâʼàpî ndè vɛ ə è kyiŋə sə̂ nyi wùə èngaŋtə ə ghàyn əfètəyn kyi sə̂ nyi wùə èfɨ̀aʼa sê ghàyn, 27mə naʼapi ndè ə ghàyn ə fètəyn vɛ è kɔ̀ŋə̀ sə̂ nyi əshi, kyi sə̂ nyi àkɔs se ghàyn. 28E za nyi kepî eghəs kə Va Wùə tè tàʼa pə̀yn nə ə fɨ̂aʼà sê vəyn. È tè pə̀yn sə̂ fɨ̂aʼà sê ghɨ, se fɨnə fo ngɨŋə̂ ə̀ vəyn se sɔzà əghɨ tsɨəghe.”
Njisə̀s ə tsuʼ ghɨ fofəghe əpɛ̀
(Mâk 10.46-52; Lûk 18.35-43)
29Kə Njisə̀s yî chùmtè èpàm sə vəynse tè ndô pə̂ ə Njèlikò, nɔ̂yn ə ghɨ̀kè e chûmtə̀ ghənə. 30Ghɨə fofə tè nyì əpɛ̀ tsɨs etipìə èndom. Kə ghənə tè zɨ nə Njisə̀s tsɛ̀ ndò, ghənə ə pɨa pîə nə, “Vâ fèghàŋ fə ndɛfə Ndàfîtfè, kose səyn sê ghàs!”
31Nɔ̂yn ə ghɨ̀ kɛ ə ke tè nyì fumə e kɨ̂ytə̀ ghənə pîə nə ghənə kɨme mɔŋ, pîza ghənə tɔ̀ʼɔ̀ pɨa ndûə kə èshike pîə nə, “Va fèghàŋ fə ndɛfə Ndàfîtfè, Pɛ̂pɛ, kose səyn sê ghàs!”
32Njisə̀s ə tyəmə̂ ə tɔŋɔ ghənə ə pfɨfə nə, “Ghàyn kyiŋə nə m ghaynghe sê ghàyn ə?”
33Ghənə ə pìə nə, “Pɛ̂pɛ, nə̀yn nə shi ghasghe ə fe tèluʼ.”
34Njisə̀s ə kosə̂ èsəyn sê ghənə ə ndə̀mə̀ ə̀gho əvəynghe ə ghənə əshi. Kè sə ashìŋə̀, ghənə zhə̀tə̀ se fe teluʼ ə ndò sè chûmtə̀ ndùə vəyn.
Currently Selected:
Matyò 20: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
