Matyò 21
21
Njisə̀s ə nji ə Njèlusalɛ̀m kə̂ fɔ̀yn
(Mâk 11.1-11; Lûk 19.28-40; Njɔyn 12.12-19)
1Kə Njisə̀s yî chùmtè èpàm sə vəynse tè ndù paʼsə̂ ə Njèlusalɛ̀m, ə pə̀ ə tə̀ʼ ə Petfàs ə pfɨ̀yn ə Sèolìf ə tomə sèchùmtè èpàm sə vəynse sepɛ̀, 2ə pìə sê ghənə nə, “Ghàyn nji ndu fa əfètə̂ tə̀ʼ ə̂ ghàyn əshi. Ghàyn nə̀ piə njiə ndûə kə nyî ə fènjàkâs kə ə faŋa è vayn ə ngwùŋ ə̀təyn. Ə ghàyn sɔ pəyn è səynse sê Mi. 3Ə wùə pfɨf sê ghàyn nə ghàyn sɔ̀ kûmə̀ ghè ə? ghàyn ə pìə sê vəyn nə, ‹Pɛ̂pɛ nyîə kyiŋə səynse. Ə ghàyn pì zamə, kè sə ashìŋə̀ ə wùə ə̀təyn za sê ghayn.›”
4Ghɛ nə zɨ̂nə̀ tè kyànə se lwiynsê eghɛ zɛ ə Zhə̀fè tè pi tɔynə ə fɨ̀aʼtè nə:
5“Pì sê ghɨ tə̀ʼ ə̀ Zayɔ̀nə̀ nə,
Ghàyn fe, fɔ̀yn vâyn vɨ̀nə è pə̀ sê ghàyn è ngɨmnêzè,
tsɨs etûə njàkâs, e kwuŋ ə njàkâs endomə̀vè.”
6Chùmtè epàm sə təynse ə ndùə ə nə̀ kə èghɛ zɛ ə Njisə̀s pì nə ghənə nəyn. 7Ghənə ə pə̀ è njàkâs ə̀təyn paʼsə̂ è vayn ə lafsə̂ è laf ə ghənə̂kè, Njisə̀s ə kɔʼɔ tsɨsə̂ ətu. 8Nɔ̂yn ə ghɨ̀kè e sè chɔʼtə̂ àlaf ə ghənə̂kè, maʼà endom È ve tyâŋə̀ ətu. Yîghe e kyimtə̂ sèngɔyn sə mkàʼsè, ndə̂mə̀ endom. 9Nɔ̂yn kɛ ə ke tè ndùə ə vəyn əshi è kɛ ə ke tè pə epàm ə zhə̀tə̀ sè pɨa pîə kə nə, “Òsanà, tsîtèzè nyì sê Va Fɔ̀yn ə̀ ndɛ ə̀ fèghàŋ ə Ndàfît! Pɔsê e nyi sê vɛ è pə̀ e zə ə Pɛ̂pɛze! Òsanà, tsîtèzè nyì sê Zhə̀fè elùʼ engaŋtəve!”
10Kə Njisə̀s tè nji ə Njèlusalɛ̀m, tɔf ə ghɨ̀ zə fɨ nâʼà èkɨ̂m. Ghɨghe pfɨfə nə, ə̀ vɨ̀nə nyi nde?
11Nɔ̂yn ə ghɨ̀ kɛ ə pə̀ynsə̀ kə nə, “Ə̀ nyi Njisə̀s ə fɨ̀aʼtè vɛ è ndò ə tə̀ʼ ə Nazalɛ̀t apàs endaʼ ə Ngalìlîkè.”
Njisə̀s ə chùm fɨsê ghɨpə̂ʼlə ə Ndɛ Ètsə̀mə
(Mâk 11.15-19; Lûk 19.45-48; Njɔyn 2.13-22)
12Epàm ətəyn, Njisə̀s ə njiə ə Ndɛ Ètsə̀mə sè chûmə̀ fɨsə̂ ə̀ghɨ ghɛ ə ghe tè zhɔnə, pəʼlə̂ nâʼà ə̀kɨ̂m. È və pɨŋsə̂ maʼà èlwɔ̂ŋ əghɨ̀ ghɛ ə ghe tè kwiynə kɛve ə pɨŋsə̂ maʼà kəpî mkyə̂ mə ghɨ̀ ghɛ ə tè pəʼlə kwɨ̀lə̂m. 13È və pìə sê ghənə nə, “Ə nyaʼ ə Ŋwàʼlè ə̀ Fèzhə̀ nə, Zhə̀fè pi nə, ‘Ə tə nə̂ ə tɔŋtə̂ ndɛ zɨ̂m nə ndɛ ètsə̀mə.’ Pîza ghàyn ghe kɛse zôyn sə ‹Elùʼ ə ghɨ̀ echɔŋəve.›”
14Ghɨ fofə, è m̀ngə̂s ə pə̀ sê vəyn fu, È və tsuʼə ghənə. 15Pîza, ghɨ kɔʼsə nə eshyə̀ ngaŋtəghe, è tyə̀ynsè sə alàŋsè e nyɔ̂ʼsə̀ ètɔŋ kə ghənə fe ghɛ ə kayntə ghɛ è nə̂ fɨnə zɨə kə mɨə̀tə̀m tè pɨa pîə fu nə, “Tsîtèzè nyì sê Va fèghàŋ fə ndɛ ə Fɔ̀yn Ndàfîtfè!” 16Ghənə ə pfɨfə sê Njisə̀s nə, “Ò zɨə ndò ghɛ zɛ ə mɨə̀tə̀m mîə pì ə?”
Njisə̀s ə pə̀ynsə̀ sê ghənə nə, “Ghàyn pâʼà tɔŋɔ luʼ ə Ŋwàʼlè ə̀ Fèzhə̀ zɛ ə nyâʼ ətəyn nə, ‹Zhə̀fè pɨaʼte mmɨ̂ətə̀m è ghɔyn epɔ nə ə tsìtə̀ zhi nâʼà àchûŋ.›”
17Njisə̀s ə ndò zâ ghənə ə fɨə Njèlusalɛ̀m ə ndùə pɨənə̂ ə tə̀ʼ ə̀ Petanì.
Njisə̀s è kaʼfə sèfîkfè
(Mâk 11.12-14; 11.20-24)
18Nâʼà è pɨ̂sə̀pɨ̂sə̀, kə Njisə̀s tè ndo ndûə ə Njèlusalɛ̀m, chɨ̀ŋ tè nyîə zafə Vəyn. 19È və fe fèkâʼ fə sefîkfè endom, ə njiə ndûə esâs ə̀təyn pîza ə tàʼa fe atam kyîke fu etûə fèkàʼ ə̀ tsɛ̂ kəva sɛ̂tè ə se pì sê kâʼ fə ətəynfe nə, “Ò tə fɨnə muə va twɔmve!” Kè sə ashìŋə̀, kâʼ fə sèfîkfə təynfe ə zomə.
20Chùmtè èpàm sə vəynse ə fe èghɛ nə zɨ̂nə̀ sè nyi è kayn ə ke pfɨf sê Njisə̀s nə, “Kâʼ fə sèfîkfè kwì zayn se zom kè sə fe zhwiə?”
21Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə ghàyn kyi pomə̂zè mɛnə̂ chîəva ndô, ə ghàyn ə nyi se kàʼa ghàyn nəyn ghɛ zɛ ə m nə̂yn sê kâʼ fə sèfîk fɨ̂nə̀ ə fɨyn pi nâʼà sê pfɨ̀yn èngaŋtə zɨ̂nə̀ nə, ‘Mùʼə ə ndùə tânə̀ ə enjwì ə fengwaŋve,’ ə è nəyn ke kə ghàyn pì. 22Ə ghàyn kyi pomə̂zè, ə ghàyn kyi nâʼàpî àkè kɛ ə ghàyn pfɨf e tsə̀m.”
Ghɨ tè kyiŋə se zɨ nə tyaʼa Njisə̀skè ndò ghayn zə
(Mâk 11.27-33; Lûk 20.1-8)
23Njisə̀s ə kɛsə̂ ə ndûə njiə ə Ndɛ Ètsə̀mə sè zaʼlə̂ ə̀ghɨ fu, ghɨ kɔʼsə nə eshyə̀ ə ngaŋtəghe è chəʼsə Isìlâysè ə pə̀ pfɨfə sê vəyn nə, “Ò kyi atyaʼ àkè se nə̀yn ə ghɛ ghɨ̀yn ə? Ə̀ fo nde tyaʼ nə kɨ̂yn sê ghò ə?”
24Njisə̀s ə pìə sê ghənə nə, “M nə̀ pɔŋə pfɨfə èghɛ èmɔ̀ʼ sê ghàyn, ə ghàyn pə̀ynsè, ə m ke tsàyn sê ghàyn tyaʼ kɛ m kyi sə̂ nə̂ ə̀ghɛ nə ghɨ̂yn ətəyn. 25Njɔyn tè fo mmo mə è njì ghayn tyaʼke ə? Ə̀ tè fo Fèzhə̀ sê vəyn mə, mə əghɨ ə?”
Ghənə zhə̀tə̀ se saʼnê è ngɨŋ sə ghənə̂sè pîə nə, “Ə ghâsènì pì nə, ‘Ə fo Fèzhə̀ tyaʼa sê vəyn,’ ə è pfɨf nə, ‘Kûmə̀ ghè ə ghàyn tè tàʼa pomə̂ se Njɔyn ə?’ 26mə ə ghâsènì pì nə, ‘Ə tè fo əghɨ tyaʼa sê vəyn,’ ghɨ kaʼa ghe mɔm ghɛ sê ghâsènì kûmə̀ nə ghənə əkɨ̂m tè ke ndô nə Njɔyn tè nyi fɨ̀aʼtè èghaʼâ.” 27Ghənə ə pìə sê Njisə̀s nə, “Ghàs ke va.”
Njisə̀s ə pìə sê ghənə nə, “M nə̀ pɔŋɔ tsâ va luʼ vɛ ə m njî tyaʼa sə̂ nə̂ əghɛ nə ghɨ̂yn ətəyn.”
Ngàyn kûmə̀ wùə yî ghɔ vəynghe ə pɛ̀
28Njisə̀s ə fɨnə pfɨfə sê ghɨ eshyə̀ engaŋtə è chəʼse ndaʼse nə, ghàyn fe zàyn ngàyn zɨ̀nə? Wùə tè nyi kyi ə̀ghɔyn əpɛ̀. Ə ndùə sê ve ndumə ə pìə nə, ‘Vayn vɨ̂m ve ndômə̀, Səʼ fə̀ afùʼ ə mtama ndâyn.’ 29Vâyn endômə̀ ə̀təyn ə pə̀ynsə̀ nə, ‘M kɔ̂ŋə̀ va se səʼ. Pîza ə nə̀ kɛsə̂ kwiynə̂ èkwâʼtè ə vəynze ə səʼə. 30Pɨ̀a vəyn ə fɨnə ndùə sê Kùmtè ə vâ vəynke ə fɨnə pîə kə èghɨ kə è fə pì sê və shi. È və pomə, pîza ə tàʼa səʼ.’ 31Njisə̀s ə pfɨfə sê wùə èshyə̀ èngaŋtə nə, Ə̀ nyi nde ə ghɔyn ghɨ̂yn əfètəyn ə̀pɛ̀ ə è nə̀yn ghɛ zɛ pɨ̀a tè kyiŋə ə?
Ghənə pə̀ynsə̀ nə, “Ə nə̀yn və shi.”
Njisə̀s ə ke pì sê ghənə nə, “M pîə sê ghàyn səmɔʼ nə, ghɨ ghɛ ə ghe tənə tâksè è kwàlàvè tə njiə elùʼ efɔ̂yn ə Fezhə̀vè sə ghàyn sə shi. 32M pîə nyî kûmə̀ nə Njɔyn Fo M̀mò tè pə̀yn sê ghàyn tyə̂nə̀ èndom echûŋ vɛ kə ghàyn chumte, ghàyn ə tàʼa pomə̂ se vəyn, Pîza, ghɨ ghɛ ə ghe tənə tâksè è kwàlàvè ə pomə̂. Pî kə ghàyn tè fe zɨnə mə, ghâ tàʼa kwiynê, ə tàʼa pomə̂ se vəyn.”
Njisə̀s ə mɛ̀ ngàyn kûmə̀ pɛ̀ àfùʼ yî ghɨ ə fɨaʼa ə vəynghe
(Mâk 12.1-12; Lûk 20.9-19)
33Njisə̀s ə fɨnə pîə nə, “Ghàyn zɨte kwəynsê ngàyn ə̀ mɔʼɔ̂, ‘Wùə vîvè tè kyi eluʼ ə zho ètwɔm ətəyn, ə lò kyîŋə̀ nga mbàyn ə̀təyn, ə tɨmə èpə zɛ kə ə nûʼə̀ ètwɔm ətəyn fɛtə mlɨ̂, ə pɛ àpfɨ̀ə e tsɨ̀ŋnəke əfètə̂ àfùʼ ə ke fo afûʼ ətəynke sê ghɨ nə fɨaʼà, chyâtə̀ fo vəyn è fɨa vɛ ə ve fɨə ətəyn, ə ndò ndûə èkwî. 34Shîŋə̀ ə kwiə ke ə kwəynə, è və tomə ə̀ghɨ vəyn ghe fɨaʼa nə ghənə ndu pi sê ghɨ fɨaʼa ghɛ ə è tè fo fûʼ nə kɛ sê ghənə nə ghe fo və vəyn nə etwɔm. 35Ghɨ ə fɨaʼa təynghe ə ndùə kyîə ə̀ghɨ ghɛ ə pusə èmɔ̀ʼ, ə zhwiə ve kòmtə, ə fɨnə tɨmnə̂ zhwiə və mɔ̀ʼɔ è chîə. 36Pɛ̀ àfùʼ ə̀təyn ə fɨnə tomə kwəynsə̂ ə̀ghɨ efɨaʼa ə vəyn ghəmɔ̀ʼɔ, ghe tsɨ̀ə tsɛ̂ ghɛ ə è tè tom sə shi, ghɨ afùʼ ghɛ ə nə̀ kə sê ghənə kə fə nə̀yn sê ghəshiə 37È və tomə kwûŋsə̀ vâyn èndômə̀ ə̀ vəyn sê ghənə, ə pìə nə, ‘Ghənə nə̀ kɔʼsə̂ vayn vɨ̂mè.’ 38Pîza, ghɨ fɨaʼa nə ghɛ ə fe kə vâ vəyn pə̂, ə pìə sê ngɨŋ sə ghənə̂sè nə, ‘Ə̀ vɨ̂nə nyì ke nâʼà va pɛ̀ àfùʼ. Ghàyn pəyn ə ghâsènì zhwi vəyn ə kyi fɨa ə vəynve.’ 39Ghənə ə kyîə vəyn ə màʼà fɨsə̂ vəyn fumə afùʼ ə zhwiə vəyn.”
40Njisə̀s ə pfɨfə sê ghɨ kɔʼsə nə eshyə̀, è ndumnə nə, “Zôyn ə pɛ̀ àfùʼ ə̀təyn pə̂yn, ə è pi nə ghe sê ghɨ ghɛ ə fɨaʼà fumə afùʼə?”
41Ghənə ə pìə sê vəyn nə, ə ze kyâyn nyî ə pɛ̀ àfùʼ ə̀təyn zhwite ghɨ piə nə ghɨ̂yn ə è fo fɨsê afûʼ ətəynke sê ghɨ ndôghè, ə ghənə ə fə̂, fo və vəynve nə efɨa ashìŋə̀ ə kwiəke.
42Njisə̀s ə pìə sê ghənə nə, “E za nyi nə ghàyn pâʼà tyəmə̂ tɔŋɔ zɨə eluʼ ə Ŋwàʼlè ə̀ Fèzhə̀ vɨnə ə ve pîə nyiə nə:
‘Chi zɛ ə ghɨ fɨaʼa tè tə
ə kɛsê sə echi epòlə̀ ə ndɛze.
Ə̀ nəyn Pɛ̂pɛ nyî
Ə̀ nyi eghɛ ekayntəze sê ghâsènì.”
43-44Njisə̀s ə kwəynsə̂ nə, “Ə tə fiə tsɨsə̀ eluʼ vayn sê ghàyn ghɛ ə ghàyn saʼa fɔ̂yn ə Fezhə̀vè ə fo sê ghɨ ghɛ ə ghe nyi chichi.”#21.43-44 Ŋwàʼlè sə shi sə mɔ̀ʼɔse ə kwəynsê ndiŋa 44 Ə̂ za pfɨ̀ pi ndè fâ echi, ə è kəmte kə mtimə̀ mtimə̀, mə e pfɨ̀ nâʼà pi ə ndè ətu, ə e nyayle ke ndò vəyn. 45Kə ghɨ kɔʼsə nə eshyə̀ engaŋtəghe è ghɨə Falàsîə ə zɨə sè ngàyn sə Njisə̀sè, ə kê kə ndò nə è wàmnə̀ kûmə̀ ghənə. 46Ghənə e kyiŋə èndom se kyîə vəyn pîza fânə̀ ànɔ̂yn kɛ ə ke tè nyì fu, kûmə̀ nə ghɨ anɔ̀yn ə təynghe tè fe Njisə̀s kə fɨ̀aʼtè.
Currently Selected:
Matyò 21: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
Matyò 21
21
Njisə̀s ə nji ə Njèlusalɛ̀m kə̂ fɔ̀yn
(Mâk 11.1-11; Lûk 19.28-40; Njɔyn 12.12-19)
1Kə Njisə̀s yî chùmtè èpàm sə vəynse tè ndù paʼsə̂ ə Njèlusalɛ̀m, ə pə̀ ə tə̀ʼ ə Petfàs ə pfɨ̀yn ə Sèolìf ə tomə sèchùmtè èpàm sə vəynse sepɛ̀, 2ə pìə sê ghənə nə, “Ghàyn nji ndu fa əfètə̂ tə̀ʼ ə̂ ghàyn əshi. Ghàyn nə̀ piə njiə ndûə kə nyî ə fènjàkâs kə ə faŋa è vayn ə ngwùŋ ə̀təyn. Ə ghàyn sɔ pəyn è səynse sê Mi. 3Ə wùə pfɨf sê ghàyn nə ghàyn sɔ̀ kûmə̀ ghè ə? ghàyn ə pìə sê vəyn nə, ‹Pɛ̂pɛ nyîə kyiŋə səynse. Ə ghàyn pì zamə, kè sə ashìŋə̀ ə wùə ə̀təyn za sê ghayn.›”
4Ghɛ nə zɨ̂nə̀ tè kyànə se lwiynsê eghɛ zɛ ə Zhə̀fè tè pi tɔynə ə fɨ̀aʼtè nə:
5“Pì sê ghɨ tə̀ʼ ə̀ Zayɔ̀nə̀ nə,
Ghàyn fe, fɔ̀yn vâyn vɨ̀nə è pə̀ sê ghàyn è ngɨmnêzè,
tsɨs etûə njàkâs, e kwuŋ ə njàkâs endomə̀vè.”
6Chùmtè epàm sə təynse ə ndùə ə nə̀ kə èghɛ zɛ ə Njisə̀s pì nə ghənə nəyn. 7Ghənə ə pə̀ è njàkâs ə̀təyn paʼsə̂ è vayn ə lafsə̂ è laf ə ghənə̂kè, Njisə̀s ə kɔʼɔ tsɨsə̂ ətu. 8Nɔ̂yn ə ghɨ̀kè e sè chɔʼtə̂ àlaf ə ghənə̂kè, maʼà endom È ve tyâŋə̀ ətu. Yîghe e kyimtə̂ sèngɔyn sə mkàʼsè, ndə̂mə̀ endom. 9Nɔ̂yn kɛ ə ke tè ndùə ə vəyn əshi è kɛ ə ke tè pə epàm ə zhə̀tə̀ sè pɨa pîə kə nə, “Òsanà, tsîtèzè nyì sê Va Fɔ̀yn ə̀ ndɛ ə̀ fèghàŋ ə Ndàfît! Pɔsê e nyi sê vɛ è pə̀ e zə ə Pɛ̂pɛze! Òsanà, tsîtèzè nyì sê Zhə̀fè elùʼ engaŋtəve!”
10Kə Njisə̀s tè nji ə Njèlusalɛ̀m, tɔf ə ghɨ̀ zə fɨ nâʼà èkɨ̂m. Ghɨghe pfɨfə nə, ə̀ vɨ̀nə nyi nde?
11Nɔ̂yn ə ghɨ̀ kɛ ə pə̀ynsə̀ kə nə, “Ə̀ nyi Njisə̀s ə fɨ̀aʼtè vɛ è ndò ə tə̀ʼ ə Nazalɛ̀t apàs endaʼ ə Ngalìlîkè.”
Njisə̀s ə chùm fɨsê ghɨpə̂ʼlə ə Ndɛ Ètsə̀mə
(Mâk 11.15-19; Lûk 19.45-48; Njɔyn 2.13-22)
12Epàm ətəyn, Njisə̀s ə njiə ə Ndɛ Ètsə̀mə sè chûmə̀ fɨsə̂ ə̀ghɨ ghɛ ə ghe tè zhɔnə, pəʼlə̂ nâʼà ə̀kɨ̂m. È və pɨŋsə̂ maʼà èlwɔ̂ŋ əghɨ̀ ghɛ ə ghe tè kwiynə kɛve ə pɨŋsə̂ maʼà kəpî mkyə̂ mə ghɨ̀ ghɛ ə tè pəʼlə kwɨ̀lə̂m. 13È və pìə sê ghənə nə, “Ə nyaʼ ə Ŋwàʼlè ə̀ Fèzhə̀ nə, Zhə̀fè pi nə, ‘Ə tə nə̂ ə tɔŋtə̂ ndɛ zɨ̂m nə ndɛ ètsə̀mə.’ Pîza ghàyn ghe kɛse zôyn sə ‹Elùʼ ə ghɨ̀ echɔŋəve.›”
14Ghɨ fofə, è m̀ngə̂s ə pə̀ sê vəyn fu, È və tsuʼə ghənə. 15Pîza, ghɨ kɔʼsə nə eshyə̀ ngaŋtəghe, è tyə̀ynsè sə alàŋsè e nyɔ̂ʼsə̀ ètɔŋ kə ghənə fe ghɛ ə kayntə ghɛ è nə̂ fɨnə zɨə kə mɨə̀tə̀m tè pɨa pîə fu nə, “Tsîtèzè nyì sê Va fèghàŋ fə ndɛ ə Fɔ̀yn Ndàfîtfè!” 16Ghənə ə pfɨfə sê Njisə̀s nə, “Ò zɨə ndò ghɛ zɛ ə mɨə̀tə̀m mîə pì ə?”
Njisə̀s ə pə̀ynsə̀ sê ghənə nə, “Ghàyn pâʼà tɔŋɔ luʼ ə Ŋwàʼlè ə̀ Fèzhə̀ zɛ ə nyâʼ ətəyn nə, ‹Zhə̀fè pɨaʼte mmɨ̂ətə̀m è ghɔyn epɔ nə ə tsìtə̀ zhi nâʼà àchûŋ.›”
17Njisə̀s ə ndò zâ ghənə ə fɨə Njèlusalɛ̀m ə ndùə pɨənə̂ ə tə̀ʼ ə̀ Petanì.
Njisə̀s è kaʼfə sèfîkfè
(Mâk 11.12-14; 11.20-24)
18Nâʼà è pɨ̂sə̀pɨ̂sə̀, kə Njisə̀s tè ndo ndûə ə Njèlusalɛ̀m, chɨ̀ŋ tè nyîə zafə Vəyn. 19È və fe fèkâʼ fə sefîkfè endom, ə njiə ndûə esâs ə̀təyn pîza ə tàʼa fe atam kyîke fu etûə fèkàʼ ə̀ tsɛ̂ kəva sɛ̂tè ə se pì sê kâʼ fə ətəynfe nə, “Ò tə fɨnə muə va twɔmve!” Kè sə ashìŋə̀, kâʼ fə sèfîkfə təynfe ə zomə.
20Chùmtè èpàm sə vəynse ə fe èghɛ nə zɨ̂nə̀ sè nyi è kayn ə ke pfɨf sê Njisə̀s nə, “Kâʼ fə sèfîkfè kwì zayn se zom kè sə fe zhwiə?”
21Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə ghàyn kyi pomə̂zè mɛnə̂ chîəva ndô, ə ghàyn ə nyi se kàʼa ghàyn nəyn ghɛ zɛ ə m nə̂yn sê kâʼ fə sèfîk fɨ̂nə̀ ə fɨyn pi nâʼà sê pfɨ̀yn èngaŋtə zɨ̂nə̀ nə, ‘Mùʼə ə ndùə tânə̀ ə enjwì ə fengwaŋve,’ ə è nəyn ke kə ghàyn pì. 22Ə ghàyn kyi pomə̂zè, ə ghàyn kyi nâʼàpî àkè kɛ ə ghàyn pfɨf e tsə̀m.”
Ghɨ tè kyiŋə se zɨ nə tyaʼa Njisə̀skè ndò ghayn zə
(Mâk 11.27-33; Lûk 20.1-8)
23Njisə̀s ə kɛsə̂ ə ndûə njiə ə Ndɛ Ètsə̀mə sè zaʼlə̂ ə̀ghɨ fu, ghɨ kɔʼsə nə eshyə̀ ə ngaŋtəghe è chəʼsə Isìlâysè ə pə̀ pfɨfə sê vəyn nə, “Ò kyi atyaʼ àkè se nə̀yn ə ghɛ ghɨ̀yn ə? Ə̀ fo nde tyaʼ nə kɨ̂yn sê ghò ə?”
24Njisə̀s ə pìə sê ghənə nə, “M nə̀ pɔŋə pfɨfə èghɛ èmɔ̀ʼ sê ghàyn, ə ghàyn pə̀ynsè, ə m ke tsàyn sê ghàyn tyaʼ kɛ m kyi sə̂ nə̂ ə̀ghɛ nə ghɨ̂yn ətəyn. 25Njɔyn tè fo mmo mə è njì ghayn tyaʼke ə? Ə̀ tè fo Fèzhə̀ sê vəyn mə, mə əghɨ ə?”
Ghənə zhə̀tə̀ se saʼnê è ngɨŋ sə ghənə̂sè pîə nə, “Ə ghâsènì pì nə, ‘Ə fo Fèzhə̀ tyaʼa sê vəyn,’ ə è pfɨf nə, ‘Kûmə̀ ghè ə ghàyn tè tàʼa pomə̂ se Njɔyn ə?’ 26mə ə ghâsènì pì nə, ‘Ə tè fo əghɨ tyaʼa sê vəyn,’ ghɨ kaʼa ghe mɔm ghɛ sê ghâsènì kûmə̀ nə ghənə əkɨ̂m tè ke ndô nə Njɔyn tè nyi fɨ̀aʼtè èghaʼâ.” 27Ghənə ə pìə sê Njisə̀s nə, “Ghàs ke va.”
Njisə̀s ə pìə sê ghənə nə, “M nə̀ pɔŋɔ tsâ va luʼ vɛ ə m njî tyaʼa sə̂ nə̂ əghɛ nə ghɨ̂yn ətəyn.”
Ngàyn kûmə̀ wùə yî ghɔ vəynghe ə pɛ̀
28Njisə̀s ə fɨnə pfɨfə sê ghɨ eshyə̀ engaŋtə è chəʼse ndaʼse nə, ghàyn fe zàyn ngàyn zɨ̀nə? Wùə tè nyi kyi ə̀ghɔyn əpɛ̀. Ə ndùə sê ve ndumə ə pìə nə, ‘Vayn vɨ̂m ve ndômə̀, Səʼ fə̀ afùʼ ə mtama ndâyn.’ 29Vâyn endômə̀ ə̀təyn ə pə̀ynsə̀ nə, ‘M kɔ̂ŋə̀ va se səʼ. Pîza ə nə̀ kɛsə̂ kwiynə̂ èkwâʼtè ə vəynze ə səʼə. 30Pɨ̀a vəyn ə fɨnə ndùə sê Kùmtè ə vâ vəynke ə fɨnə pîə kə èghɨ kə è fə pì sê və shi. È və pomə, pîza ə tàʼa səʼ.’ 31Njisə̀s ə pfɨfə sê wùə èshyə̀ èngaŋtə nə, Ə̀ nyi nde ə ghɔyn ghɨ̂yn əfètəyn ə̀pɛ̀ ə è nə̀yn ghɛ zɛ pɨ̀a tè kyiŋə ə?
Ghənə pə̀ynsə̀ nə, “Ə nə̀yn və shi.”
Njisə̀s ə ke pì sê ghənə nə, “M pîə sê ghàyn səmɔʼ nə, ghɨ ghɛ ə ghe tənə tâksè è kwàlàvè tə njiə elùʼ efɔ̂yn ə Fezhə̀vè sə ghàyn sə shi. 32M pîə nyî kûmə̀ nə Njɔyn Fo M̀mò tè pə̀yn sê ghàyn tyə̂nə̀ èndom echûŋ vɛ kə ghàyn chumte, ghàyn ə tàʼa pomə̂ se vəyn, Pîza, ghɨ ghɛ ə ghe tənə tâksè è kwàlàvè ə pomə̂. Pî kə ghàyn tè fe zɨnə mə, ghâ tàʼa kwiynê, ə tàʼa pomə̂ se vəyn.”
Njisə̀s ə mɛ̀ ngàyn kûmə̀ pɛ̀ àfùʼ yî ghɨ ə fɨaʼa ə vəynghe
(Mâk 12.1-12; Lûk 20.9-19)
33Njisə̀s ə fɨnə pîə nə, “Ghàyn zɨte kwəynsê ngàyn ə̀ mɔʼɔ̂, ‘Wùə vîvè tè kyi eluʼ ə zho ètwɔm ətəyn, ə lò kyîŋə̀ nga mbàyn ə̀təyn, ə tɨmə èpə zɛ kə ə nûʼə̀ ètwɔm ətəyn fɛtə mlɨ̂, ə pɛ àpfɨ̀ə e tsɨ̀ŋnəke əfètə̂ àfùʼ ə ke fo afûʼ ətəynke sê ghɨ nə fɨaʼà, chyâtə̀ fo vəyn è fɨa vɛ ə ve fɨə ətəyn, ə ndò ndûə èkwî. 34Shîŋə̀ ə kwiə ke ə kwəynə, è və tomə ə̀ghɨ vəyn ghe fɨaʼa nə ghənə ndu pi sê ghɨ fɨaʼa ghɛ ə è tè fo fûʼ nə kɛ sê ghənə nə ghe fo və vəyn nə etwɔm. 35Ghɨ ə fɨaʼa təynghe ə ndùə kyîə ə̀ghɨ ghɛ ə pusə èmɔ̀ʼ, ə zhwiə ve kòmtə, ə fɨnə tɨmnə̂ zhwiə və mɔ̀ʼɔ è chîə. 36Pɛ̀ àfùʼ ə̀təyn ə fɨnə tomə kwəynsə̂ ə̀ghɨ efɨaʼa ə vəyn ghəmɔ̀ʼɔ, ghe tsɨ̀ə tsɛ̂ ghɛ ə è tè tom sə shi, ghɨ afùʼ ghɛ ə nə̀ kə sê ghənə kə fə nə̀yn sê ghəshiə 37È və tomə kwûŋsə̀ vâyn èndômə̀ ə̀ vəyn sê ghənə, ə pìə nə, ‘Ghənə nə̀ kɔʼsə̂ vayn vɨ̂mè.’ 38Pîza, ghɨ fɨaʼa nə ghɛ ə fe kə vâ vəyn pə̂, ə pìə sê ngɨŋ sə ghənə̂sè nə, ‘Ə̀ vɨ̂nə nyì ke nâʼà va pɛ̀ àfùʼ. Ghàyn pəyn ə ghâsènì zhwi vəyn ə kyi fɨa ə vəynve.’ 39Ghənə ə kyîə vəyn ə màʼà fɨsə̂ vəyn fumə afùʼ ə zhwiə vəyn.”
40Njisə̀s ə pfɨfə sê ghɨ kɔʼsə nə eshyə̀, è ndumnə nə, “Zôyn ə pɛ̀ àfùʼ ə̀təyn pə̂yn, ə è pi nə ghe sê ghɨ ghɛ ə fɨaʼà fumə afùʼə?”
41Ghənə ə pìə sê vəyn nə, ə ze kyâyn nyî ə pɛ̀ àfùʼ ə̀təyn zhwite ghɨ piə nə ghɨ̂yn ə è fo fɨsê afûʼ ətəynke sê ghɨ ndôghè, ə ghənə ə fə̂, fo və vəynve nə efɨa ashìŋə̀ ə kwiəke.
42Njisə̀s ə pìə sê ghənə nə, “E za nyi nə ghàyn pâʼà tyəmə̂ tɔŋɔ zɨə eluʼ ə Ŋwàʼlè ə̀ Fèzhə̀ vɨnə ə ve pîə nyiə nə:
‘Chi zɛ ə ghɨ fɨaʼa tè tə
ə kɛsê sə echi epòlə̀ ə ndɛze.
Ə̀ nəyn Pɛ̂pɛ nyî
Ə̀ nyi eghɛ ekayntəze sê ghâsènì.”
43-44Njisə̀s ə kwəynsə̂ nə, “Ə tə fiə tsɨsə̀ eluʼ vayn sê ghàyn ghɛ ə ghàyn saʼa fɔ̂yn ə Fezhə̀vè ə fo sê ghɨ ghɛ ə ghe nyi chichi.”#21.43-44 Ŋwàʼlè sə shi sə mɔ̀ʼɔse ə kwəynsê ndiŋa 44 Ə̂ za pfɨ̀ pi ndè fâ echi, ə è kəmte kə mtimə̀ mtimə̀, mə e pfɨ̀ nâʼà pi ə ndè ətu, ə e nyayle ke ndò vəyn. 45Kə ghɨ kɔʼsə nə eshyə̀ engaŋtəghe è ghɨə Falàsîə ə zɨə sè ngàyn sə Njisə̀sè, ə kê kə ndò nə è wàmnə̀ kûmə̀ ghənə. 46Ghənə e kyiŋə èndom se kyîə vəyn pîza fânə̀ ànɔ̂yn kɛ ə ke tè nyì fu, kûmə̀ nə ghɨ anɔ̀yn ə təynghe tè fe Njisə̀s kə fɨ̀aʼtè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©2022 CABTAL