Matyò 22

Njisə̀s ə mɛ̀ ngàyn kûmə̀ ezhi ə malə̂zè

(Lûk 14.15-24)

1Njisə̀s ə fɨnə mɛ̂ ngàyn sê ghənə ə pìə nə, 2“Ə kaʼa ə səyne fɔ̂yn ə ekwùtwəyn è fèmɛngâyn fə fɔ̀yn vîvè ə è tè pɨaʼte zhi ə malə̂zè sê va vəyn ve ndômə̀. 3Ə tomə ə̀ghɨ fɨaʼa ə vəynghe nə ghe ndu tsayn se ghɨ ghɛ ə tè tɔŋə fumə ə malə̂, pîza ghɨ ətəynghe ə tə nə ghe pə̂ va. 4È və fɨnə tomə kwəynsə̂ ə̀ghɨ fɨaʼa ə vəyn ghə mɔ̀ʼɔ nə ghe ndu pi sê ghɨ ghɛ ə tè ndàmne nə, ə pɨaʼtê mɨ̂sè zhize, ə kàytə̀ sèmbɔ̀ŋ è nyam se ghaʼlə̂sè, nâʼà pîghè e sè nyi ke se zhi, nə ghənə pəyn elùʼ e zhiəve. 5Pîza ghɨ ghɛ ə tè tɔŋɔ ə tàʼa ndə̀mə atu eghɛ nə zɛ, nâʼàpi ndè e fɨə ndùə kə vəyn elùʼ. Ghɨə mɔ̀ʼɔghe ə səʼə ə ghənə mfùʼ, yîghe ə ndò ndûə ə ghənə ətelùʼ tepəʼləte. 6Yîghe kyiə ə̀ghɨ fɨaʼa nə ghɛ ə pusə zhwiə ghənə. 7Fɔ̀yn ə zɨə eghɛ ətəyn, ə zafsə̂ èndwɔ̂ nâʼà sə ŋaŋ ə tomə sèsokə̀ʼ sə vəynse. Kə ghənə ndû tâyn pî zɨyn, ə zhwitə̂ ə̀ghɨ ghɛ ə tè zhwi ghɨ ə fɨaʼa ghɛ ə nyɔ̀ʼɔ̀ èndaʼa ə ghənə̂zè. 8È və ke tɔŋə̂ əghɨ fɨaʼa vəynghe ə pìə sê ghənə nə, ‘Zhiə malə̂zè nyi mə pɨaʼte ndəm, pîza ghɨ ghɛ ə M ndâmnè kɔʼɔ kwəynə va se zhi zəynze. 9Zôyn ghàyn fɨ ndu efàf ə tendom teghaʼlə̂tè ə ndamne nâʼàpî ndè vɛ ə ghàyn fe.’ 10Ghɨ fɨaʼa nə ghɛ ə fɨə ndùə efàf ə zùŋtə̀ nâʼà ə̀ghɨ ə̀kɨ̂m ghɛ ə ghənə tè fe, ə ghe chûŋə̀ è ghe piə, se zaʼâ kə ndɛ ə̀ malə̂ ə̀təyn lwiyn.

11Pîza kə Fɔ̀yn tè pə̀yn se fe ə ghɨə ndamnəghe ə fe wùə fumə ndɔ̀ʼɔ è maʼa ndzɨs sə malə̂sè. 12È və pìə se vəyn nə, ‘Soyn, ò kwì zayn se tsɛ nji fàyn ndɔ̀ʼɔ ò maʼ ndzɨsə malə̂sè ə?’ Wùə ə̀təyn e kyi va ghɛze se pì. 13Fɔ̀yn ə ke pì sê ghɨ vəyn ghe fɨaʼa nə, ‹Ghàyn kol kɔyntə vəynte è fɨəyntə vəynte ə maʼa fɨsê vəyn elùʼ alɨm, elùʼ vɛ ə è nə̀ nə̂ ə è və chîə, kwɨlə ə̀sɔŋ.›”

14Njisə̀s ə kwùŋsə̀ nə, “Zhə̀fè ə tɔŋə̂ ghɨ tsɨə nə ə nyi ə vəyn etyə̂ àlâŋ, pîza ə kwùʼə̀ chɔʼɔ fɨsə̂ kə ə̀shi əghɨ̀ghè nyî.”

Njisə̀s è ndâʼa sè tâkszè

(Mâk 12.13-17; Lûk 20.20-26)

15Ghɨə Falàsîghə ndò sè nə̂ èpɨaʼtê endom se nə̀yn nə Njisə̀s wàmnə tsas, ə kyi vəyn. 16Ghənə ə ke tomə se chùmtè èpàm sə ghənə̂sè è ghɨə anɔ̀yn ə Ɛlɔ̀tkè sê Njisə̀s. Kə ghənə ndû tâyn ə pìə se Vəyn nə, “Tyə̀ynsè, ghàs ke ndô nə ò wàmnə̀ kə səmɔʼ, zaʼlə̂ kə èghɛ zɛ ə ze nyi səmɔʼ kûmə̀ àlâŋ ə Fèzhə̀kè se ghɨə, fɨmsə̂ va ngɨŋ zɛ̂zè kûmə̀ ə̀ghɛ ghɛ ə ghɨ kwaʼtə̀, pî ə̀ghɨ ghɛ ə ghənə nyi ghənə kûmə̀ nə ghənə vayn kaʼa kwiyne zaʼlê zɛze. 17Tsàyn sê ghàs nə ə ghò ekwâʼtè lâŋkè pomə̂ ndò nə ə maʼà tâks sê fɔ̀yn èghaʼâ ə Lûm mə, mə ke pomə̂ va ə?”

18Njisə̀s ə kê èghɛ epi zɛ ə ghənə tè pɨaʼtə ə ke pì sê ghənə nə, “Ghàyn ghe kaŋkaŋə nə ghɨ̂yn! Kûmə̀ ghè ə ghàyn mɔ̀msə̀ se mɔ̀m ə mi ə? 19Ghàyn tyən pəyn èkɛ akas vɛ ə mâʼà tâks ətəyn sê mi.”

Ə pə̀ è kɛ akasve sê vəyn. 20È və pfɨfə sê ghənə nə, “Ə̀ nyi ekyâʼ è zə nde ze nyiə?”

21Ghənə ə pə̀ynsə̀ nə, “Ə̀ nyi zə Kaysàzè.”

Njisə̀s ə ke pì sê ghənə nə, “Ghàyn fo sê Kaysà fɨa vɛ ə kyi Kaysà, ə fo sê Zhə̀fè fɨa vɛ ə kyi Fezhə̀.”

22Kə ghənə tè zɨ zɨnə mə, cho ə ghənə̂ghè ə zomə, ghənə ndò zâ vəyn.

Njisə̀s ə zaʼlê ghɛ kûmə̀ èzômə̀

(Mâk 12.18-27; Lûk 20.27-40)

23Kèpî fumə fetuʼ, ghɨə Sandùsîə ə pə̀ sê Njisə̀s, ə ghɨ ghɛ ə ghe pomə va nə wùə tə zômə̀ ndò, ə pfɨfə sê vəyn nə, 24“Tyə̀ynsè, piə lâŋ ə Mosîskè pì sê ghàs nə, ‘Ə ànyì ə̀ wùə kwu, kyi zhwi pîza kyi va ghɔnə, ə ànyìə wùə èkwuə ə kyi se njiə zhwiə kwu ə̀təyn, nə yî vəyn piə ghɔynghe sê ànyìə vəynvê kwuə nə vɛ ə’ 25Zôyn, ghɔnyì yîghe tè ndamə fâyn ə̀sɛ̀mbɛ̂, və shi ə njìə zhwi ə kwuə kyi va ghɔnə, ə zà zhwîə vəyn sê ànyìə vəyn. 26Vɛ mə ə kwuə kəpî ndɔ̀ʼɔ è piə vayn yîə zhwiə kwu nə vɛ. Kyì eghɛ nə zɨ̂nə mə ə kyànə̀ kəpî sê kòmte ànyìə vəyn nə vɛ, se tso zaʼâ ə ghənə esɛ̀mbɛ. 27Epàm ə̂təyn, wùzhɔyn ə̀təyn ə pɔŋɔ kwuə. 28Zôyn, ə̀ tə nə̂ ə nyi etuʼ vɛ ə zômə̀, ə wùzhɔyn ə̂təyn ə nyi zhwîə ndè, kûmə̀ nə ghɔnyì nə ghɛ ə̀kɨ̂m ə tè malə̂ vəyn sə zhwiə?”

29Njisə̀s ə ke pì sê ghənə nə, “Ghàyn ə pì pofsê kûmə̀ nə ghàyn zɨə kê va ghɛ zɛ ə Ŋwàʼlè ə̀ Fèzhə̀ pìə, fɨnə zɨə kê va nə tyaʼa Fezhə̀kè nyì zaynzə. 30Ə̀ tə nə̂ ə nyi ezhoghɛ əghɨ zômə̀, ə wùə ə njiə va zhwi, wùə e pomə̂ va ndom. Ghɨ tə nə̂ ə nyi kə setsì ekwùtwəyn mə malə̂ va. 31Ghàyn pâʼà tɔŋɔ̂ ghɛ zɛ ə Zhə̀fè pì sê ghàyn kûmə̀ èzômə̀ ə? Zhə̀fè tè pi kûmə̀ ghə̀ pɨ̀a ghasènìghə shiə nə, 32‘M nyi Fezhə̀ fə Aplàghâmfè, nyi Fezhə̀ fə Azɨ̀kfè, nyi Fezhə̀ fə Njàkɔ̂pfè.’ Zhə̀fè nyi Fezhə̀ fə ghɨ̀ ghɛ ə pa ndamə, ə̀ va Fèzhə̀ fə ghɨə ghɛ ə nyi mə ə kwutê.”

33Ə pə̀ kə nɔ̂ynkè zɨ zaʼlê ə Vəynze, nyi è kaynze.

Elwɔ̂ŋ èpɨ̀a vɛ ə ve ngaŋtə kwəynə

(Mâk 12.28-34; Lûk 10.25-28)

34Kə ghɨə Falàsîə zɨ nə Njisə̀s ə kɨmsê cho ə ghɨə Sandùsîə, ghənə ə tsɨ̀yntə̀ pə̂. 35Wùə èmɔ̀ʼ ə ghənə əfètəyn, ə nyi tyə̀ynsè àlâŋ ə mɔ̀msə̀ se tam echo Njisə̀szè è pfɨfze nə, 36“Tyə̀ynsè, ə nyi esaʼ èkè əfètə̂ tèsaʼ tə Mosîstè ə ze ngaŋtə tsɛ̂ lwɔ̂ŋ vekɨ̂m ə?”

37Njisə̀s ə pə̀ynsə̀ nə, “Ə̀ nyi zɛ ə ze piə nə, ‘Ò kyi sə̂ kɔ̂ŋɔ̀ Pɛ̂pɛ Zhə̀ fɛfe è təm ghɛghe ə̀kɨ̂m, è zuʼ sɛse sekɨ̂m, è kwâʼtè zɛze ekɨ̂m.’ 38Ə̀ zɨnə nyi zɛ ə ze ngaŋtə tsɛ̂ ə̀ fɨyn nyi àlâŋ ə shike. 39Kùmtè alàŋ kɛ ə ke ngaŋtə e nyi kepî zamə nə, ‘Ò kɔ̂ŋɔ̀ èkɔ vɛve kè eghɨ kə ò kɔ̂ŋɔ̀ ngɨŋ zɛ̂zè.’ 40Saʼ tə Mosîstè nâʼà tèkɨ̂m è zaʼlê ə sèfɨ̀aʼtè se ghaʼâsè tè nyɨ̀ŋə zaʼnə̂ fa elwɔ̀ŋ èpɨ̀a.”

Epfɨf kûmə̀ vɛ ə chɔʼ ndə̂m

(Mâk 12.35-37; Lûk 20.41-44)

41Ghɨə Falàsîə tè pa nyi ke ə ghənə anɔ̀yn, Njisə̀s ə ke pfɨf sê ghənə nə, 42“Ghàyn kwàʼtə̀ nə ghe kûmə̀ vɛ ə chɔʼ ndəm ə? È ndò ə ndè fèghàŋfə nde fə?”

Ghənə ə pə̀ynsə̀ nə, “È ndò pə̂yn ə feghàŋfə ndɛ fə fɔ̀yn Ndàfîtfè.”

43Njisə̀s ə pfɨfə sê ghənə nə, “E za nyi za, Zuʼse ə ŋwaʼase ə kwiə zàyn se fɨnə nə̀yn nə è tɔŋtə va vəyn nə vɨ̂yn nə Pɛ̂pɛ ə? Ndàfît ə pìə nə:

44‘Pɛ̂pɛ Zhə̀fè tè pì sê Pɛ̂pɛ vɨm nə,

Tsɨsə apàs ekɔyn e twɔ kɨma

se zaʼâ kə m ndəm pàyn sɛse əghò etyə̂ ə̀ghòl.’

45Ə Ndàfît è ngɨŋə̂ vəyn tɔŋtə vəyn nə Pɛ̂pɛ, ə vɛ ə chɔʼ ndə̂m ə fɨyn nyi zàyn Va və ə?” 46Wùə e sè fɨnə pə̀ynsə̀ va Njisə̀s. Se zhə̀tè fumə ə fetuʼ, wùə ə tàʼa fɨnə tyəmə mɔ̀msè se pfɨf epfɨf sê Njisə̀s.

Currently Selected:

Matyò 22: bfm

Highlight

Copy