Matyò 23
23
Njisə̀s ə fɨnə fo fɨ̀as kûmə̀ sètyə̀yn sə alàŋsè yî ghɨə Falàsîghè
(Mâk 12.38-39; Lûk 11.43, 46; 20.45-46)
1Njisə̀s ə ke wàmnè sê nɔ̂yn ə ghɨ̀kè è chùmtè èpàm sə vəynse, 2pîə nə, “Tyə̀ynsè sə alàŋsè è ghɨə Falàsîə nyi əghɨ ghɛ ə kyi tyaʼa sə̂ zaʼlə̂ àlâŋ ə Mosîskè. 3E za tyə̀nə̀ nə ghàyn kyi ke sə̂ nə nâʼàpî ghè vɛ ghənə pî nə ghàyn nəyn. Pîza, kə ghàyn tə seyne èndam əghənə̂zè kûmə̀ nə ghənə nə̂ va ghɛ ghɛ ə ghənə zaʼlə̂. 4Ghənə kolə èpɨ̀aʼa etɨləve ə ghɨghə tsɨm ve tɛ se pɨ̀aʼà. Pîza vayn kàʼa tɔʼte ghənə nə pɨaʼa kɛ̀ ətəynke. 5Ghənə nə̂ ə̀ghɛ kè se tyə̀yn ewiyn. Ghənə kolə̂ m̀puʼlə̂ mə m̀ ghaʼa ndò ə ghənə echo àtu è kɨsè ə ghənə tekɔyn mə nyàʼ ndiŋə̀ mə̂ ŋwàʼlə̀ Fèzhə̀m ətəyn. Ghənə nə̂ kəpî èpɨ̂aŋ ə sendzɨs vɛ ə kə̂ etuə sèsàŋ nə və tyaflə̀ tsɛsə̀ 6Ghənə kɔ̂ŋə̀ sə tsɨsə̂ ə telùʼ te ngaŋtəte elùʼ azhi è kɨsè sə tsɨs mkyə̀ mê ghaʼlə̂m ə sendɛ sə atsɨ̀yntese. 7Ghənə kɔ̀ŋɔ̀ nə ə tɔŋtə̂ ghənə è kɔʼsêzè ə telùʼ tə ezhɔynte è kɨsè nə ghɨghə tɔŋtə̂ ghənə nə, ‘Tyə̀ynsè.’ 8Pîza kə ghàyn za nə ə tɔŋtə̂ ghàyn nə, ‘Setyə̀ynsè’ kûmə̀ nə ghàyn kyi ke tyə̀ynsè èmɔ̀ʼ, mə ghàyn əkɨ̂m nyi əghɔnyì ə Və. 9Mə ghàyn kyi kepî va se tɔŋtə̂ wùə fa əchi nə, ‘Pɛ̂,’ kûmə̀ nə ghàyn kyi ke Pɨa emɔ̀ʼ, ə pɨ̀a vâyn mə È nyi ekwùtwəyn. 10Kə ghàyn za kepî nə ə tɔŋtə̂ ghàyn nə, ‘Tyə̀ynsè’ kûmə̀ nə Tyə̀ynse nyì ke emɔ̀ʼ mə za nyi vɛ ə chɔʼ ndə̂m. 11Wùə vɛ è ngaŋte tsɛ nâʼàpi ndè ə ghàyn əfètəyn kyi sə̂ nyi wùə èfɨ̀aʼa vâynvè. 12Ə njìə kɔʼsə pîndè ngɨŋə̂ vəyn, ə Zhə̀fè tə tsosê vəyn, ə nâʼà pîndè vɛ ə è tsose ngɨŋə̂ vəyn, ə Zhə̀fè tə nji kɔʼsê.”
Njisə̀s ə wàmnè kûmə̀ èkaŋkaŋə nəze
(Mâk 12.40; Lûk 11.39-42, 44, 52; 20.47)
13-14Njisə̀s ə pìə sê tyə̀ynsè sə alàŋsè è ghɨə Falàsîə nə, “Ghàyn ghɨnə ə ghàyn kaŋkaŋa nə̂ nyî, ngəʼ èghaʼâ nyi sê ghàyn! Ghàyn fìnə̀ èchondɛ elùʼ efɔ̀yn ekwùtwəynve nə kə ghɨə nji. Mə ghàyn è ngɨŋ saynse vayn kaʼa nji, za va nə ghɨ mɔ̀ʼɔ ghɛ ə kyiŋə se nji nə nji.#23.13-14 Ŋwàʼlè sə shi sə mɔ̀ʼɔse ə kwəynsê ndiŋa 14: Tyə̀ynsè se saʼse è ghɨə Falàsîə Ghàyn ghɨnə ə ghàyn kaŋkaŋa nə̂ nyi, ngəʼ e ghaʼa nyi sê ghàyn. Ghàyn tyə̀ynə̀ m̀wiyn è tsə̂m te tyafəte, fiə èfɨa zhwiə kwuə sə atyaʼ. Ə za nyi nə ghàyn tə kyîə ètsə̂fsè nâʼà sə ŋaŋ.
15Ngəʼ èghaʼâ nyì sê ghàyn ə tyə̀ynsè sə alàŋsè è ghɨ Falàsîə, ghàyn ghɨ kaŋkaŋa nə ghɨ̂yn! Ghàyn tyàŋà tènjwî tə fengwaŋte, kwîə ə tendâʼà ə tendâʼà kè se nə̀yn nə wùə èmɔ̀ʼ zɨ ə è chumte ghàyn. Mə shîŋə̀ kɛ ə è pomə ghàyn ə nə̀ vəyn è fiə ètsə̂fsè e tsɨ̂ə tsɛ̂ zayn shîŋə̀ tepɛ̀ se ndù elùʼ ewùs.
16Ngəʼ èghaʼâ nyì sê ghàyn ghɛ ə ghàyn nyi mə fòf chisə̂ ə̀ghɨ mɔ̀ʼɔ. Ghàyn zaʼlə̂ nə, ‘Ə wùə kàyn ezə ə Ndɛ Ètsə̀məze, ə ghɛ zhîze tàʼa kyàyn se vəyn. Pîza ə wùə kàyn ezə efɨa ngôl vɛ ve nyi ə Ndɛ Ètsə̀mə, ə è və kyi se nə̀yn eghɛ zɛ ə è kàyn zəyn.’ 17Ngô efòf vɨ̂nə̀! Ə̀ kɔʼnə̂ tsɛ̂ zɨ̂yn zə, ə ngôl mə, mə Ndɛ Ètsə̀mə zɛ ə è nə̀yn zə̂ynzè nə è zə zo kwəynə̂ ə Zhə̀fè shiə? 18Ghàyn zaʼlə kəpi nə ə wùə kàyn ezə alaŋ efoke, ə ghɛ zhîze taʼa kyàyn sê vəyn, pîza mə wùə kàyn ezə efo zɛ ə ze nyi alaŋ efoke, ə è və kyi se nə̀yn kə è kàyn. 19Ghàyn nyi mə ə fòf tayn zàyn! Ə̀ tsɛ̀ èfo mə alaŋ efo kɛ ə ke nə̂ nə fo ətəynze ə zo kwəynə̂ ə Zhə̀fè əshi ə? 20Nâʼàpî ndè vɛ ə è kàyn ezə alaŋ efoke è fote ə nyi mə è kàyn paʼsê èfɨa vɛ ə ve nyi etûə ə̀təyn. 21Ə kàynə̀ pîndè ə Ndɛ Ètsə̀mə ezə, ə nyi mə è kàynə̀ ezə zə̂ynzè è Zhə̀ fɛ ə Fe ndamə ətəyn. 22Mə ə wùə kàyn ə kwutwəynze ezə, ə nyi mə è kàynə̀ ezə fekyə̀ fɛ ə Zhə̀fè tsɨs ətəyn è kɨsè zə Fezhə̀ fɛ ə Fe tsɨs fumə ə fekyə̀.
23Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə! Ghàyn ghɨnə ə ghàyn kaŋkaŋa nə̂ ghɛ nyî. Ghàyn njiə m̀fɨatə̀ mê lɨ̀mtə̂ mɛ ə ndə̂mə̀ əfètəyn èfɨazhiəve, ghàyn ə fo àmɔ̀ʼ sê Zhə̀fè ə fètə̂ èfɨa èghɨm. Pîza ndə̂mə̀ va tuke se nə̀yn eghɛ zɛ lâŋkè tsà. Pîza ə zàmaʼà ə̀ghɛ əchûŋ ghɛ ə lâŋkè zaʼlə mə nyi nə wùə kyi sə̂ nyi chichi sê ghɨ mɔ̀ʼɔ, kosə̂ esəyn, nyi se pomə̂ se Zhə̀fè. Ghàyn kyi sə̂ nə̂ ə̀ghɛ nə ghɨnə̀ ə̀kɨ̂m zâ fɨsə̂ va zhîze. 24Ghàyn ghɨnə ə ghàyn chisə ghɨ mə ghàyn ə fòf nyî! Ghàyn chùmtə̀ tsɛsə̀ ə̀ghɛ ghɛ ə ghe kyi va fɨaʼà. Ghàyn fɨsə èliŋ etətəzè əfètə̂m m̀mò mɛ ə ghàyn mɨə pîza zàmaʼà tèliŋ te tsɨəte fumə əfètəyn m̀mò!
25Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨnə ə ghàyn kaŋkaŋa nə̂ ghɛ nyi! Ghàyn shùə tsɨ̀m ə̀ wà è kaŋke, pîza fɨa zhiə vɛ ə ve nyi əfètə̂ ətəyn e nyi mə ghàyn kyi fi sê ghɨə sə atyaʼ kûmə̀ əshi ə fɨə. 26Ghɨə fofə Falàsî ghɨ̂yn! Ghàyn shùə chi fètəyn fə wàfè è kɨsè kaŋa, ə pɨəyn ə təynke pɔŋ zo.
27Ngəʼ èghaʼâ e nyi sê ghàyn ə tyə̀ynsè sə alàŋsè è ghɨ Falàsîghè. Ghàyn ghɨ kaŋkaŋa nə̂ ghɨ̀yn! Ghàyn nyi kə teshyə̂ teghaʼâ tɛ ə kɨmne te fɨfə. Te zo ə pɨəyn pîza mə fètəyn nyi mə ə̀ lwiyn ke èwɔf əghɨ̀ ə kwutə mə ə fì. 28Kèpî famə endom nə vɨnə mə, ə pɨəyn ghàyn chwìtə̀ sê nâʼàpî ndè nə ghàyn nyîə zo, pîza ə fə̀təyn, ə̀ lwiyn kê èkaŋkaŋa nə ze è pi.
Njisə̀s ə tsàyn ngəʼ zɛ ə ghɨ tə fo sê ghɨghe
(Lûk 11.47-51)
29Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨ kaŋkaŋa nə̂ ghɨ̂yn! Ghàyn fɛtə̂ pomə tèshyə̂ teghaʼâtè sefɨ̀aʼtèsè fɨnə pɛ teshyə̂ tə ghɨ̀ ghɛ ə tè ndamə ndam ə chichize. 30Ghàyn ndùə pîə nə, ‘Ə tè nyi nə ghàs ə nyi etuʼ ə ghə̀pɨ̀a pɨ̀a ə ghasènìghe, mə ghàs tè paʼà tsɨ̀yntè se ghənə se zhwitê ə sèfɨ̀aʼtè.’ 31E za nyi nə ghàyn lotə̂ pomə̂ ndò nə ghàyn fɨ ə feghâŋ fə ghɨ̀ ghɛ ə tè zhwite fɨ̀aʼtèsè. 32Ghàyn ndu èshike ə nəyn mɨ̂sè efɨ̀aʼ zɛ ə ghə̀pɨ̀a pɨ̀a ghaynghe tè zhə̀te. 33Ghàyn mbam sɨ̂nə̀! è ghɔyn ə se mbam ghɨ̂nə̀! Ghàyn kwàʼtə̀ nə ghàyn kàʼa kwi zayn se tàʼa ndù elùʼ ewùs ə? 34M pîə sê ghàyn nə, m tə tomə sèfɨ̀aʼtè è ghɨ tɔfə è tyə̀ynsèsè sê ghàyn. Ghàyn tə zhwitə̂ yîghe, ə paynte yîghe awâmnè, ə pus yîghe ə sendɛ sə atsɨ̀yntese ə fɨnə chumə̀ fɨsə̂ yîghe ə setɔ̂ŋ ə setɔ̂ŋ. 35Ə ghàyn zhwi ghənə, ə zɨnə mə nəyn nə Zhə̀fè tsɨfse ghàyn kûmə̀ nə ndə̂mmə̂ ghɨ̀ ghɛ ə nyi chichi nâʼà ə̀kɨ̂m ə ghàyn tè zhwi tso ə ghàyn ə tu. Kè se zhə̀tə̀ è Apɛ̀l vɛ ə tè zhwi ndɔ̀ʼɔ è pofse ghɛze, se kɔʼɔ tàyn ə Sàkàlyâ, ə va Pàlàkayà vɛ ə ghàyn tè zhwi. Sàkàlyâ vɛ ə ghàyn tè zhwi ə Ndɛ Ètsə̀mə è kɨsè alaŋ efoke. 36M pîə sê ghàyn səmɔʼ nə ə̀ nyi feghâŋ fɨnə zôyn ə tsôs vɨnə tə tso ə ghənə ə tu kûmə̀ èzhwi zɨ̀yn nâʼà èkɨ̂m.”
Njisə̀s ə chwìtè kosê esəynze sê ghɨghe ə Njelusalɛ̀mə̀
(Lûk 13.34-35)
37Njisə̀s ə fɨnə wàmnə̀ ə pìə nə, “Wêy!, ghàyn ghɨə Njèlusalɛ̀mə̀, ghàyn zhwitə̂ sèfɨ̀aʼtè, ghàyn tɨmnə̂ zhwiə ə̀ghɨ ghɛ ə Zhə̀fè tom sê ghàyn è chiə! Mə mɔ̀msè səteshiŋə̀ ə teshìŋə̀ se zùŋtə ghàyn nyiə kə nyìə mbvɨ nə̂ è zɨtə̂ ə̀ghɔyn ə vəynghe etyə̀ tèghɛ̀, pîza ghàyn ghɛ tə ke ndô! 38Zôyn, Zhə̀fè nə kyiynə̂ ndɛ zâynzè, ə wùə vîvè ə va ətəyn. 39M pîə sê ghàyn nə, se zhə̀tè zôyn se ndù əshi, ghàyn tə fɨnə fe va mi è tsɛ̂ kə va mə ghàyn ə pì nə, ‹Zhə̀fè pɔse vɛ ə è pə̀yn ə ezə ə Pɛ̂pɛze.›”
Currently Selected:
Matyò 23: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
Matyò 23
23
Njisə̀s ə fɨnə fo fɨ̀as kûmə̀ sètyə̀yn sə alàŋsè yî ghɨə Falàsîghè
(Mâk 12.38-39; Lûk 11.43, 46; 20.45-46)
1Njisə̀s ə ke wàmnè sê nɔ̂yn ə ghɨ̀kè è chùmtè èpàm sə vəynse, 2pîə nə, “Tyə̀ynsè sə alàŋsè è ghɨə Falàsîə nyi əghɨ ghɛ ə kyi tyaʼa sə̂ zaʼlə̂ àlâŋ ə Mosîskè. 3E za tyə̀nə̀ nə ghàyn kyi ke sə̂ nə nâʼàpî ghè vɛ ghənə pî nə ghàyn nəyn. Pîza, kə ghàyn tə seyne èndam əghənə̂zè kûmə̀ nə ghənə nə̂ va ghɛ ghɛ ə ghənə zaʼlə̂. 4Ghənə kolə èpɨ̀aʼa etɨləve ə ghɨghə tsɨm ve tɛ se pɨ̀aʼà. Pîza vayn kàʼa tɔʼte ghənə nə pɨaʼa kɛ̀ ətəynke. 5Ghənə nə̂ ə̀ghɛ kè se tyə̀yn ewiyn. Ghənə kolə̂ m̀puʼlə̂ mə m̀ ghaʼa ndò ə ghənə echo àtu è kɨsè ə ghənə tekɔyn mə nyàʼ ndiŋə̀ mə̂ ŋwàʼlə̀ Fèzhə̀m ətəyn. Ghənə nə̂ kəpî èpɨ̂aŋ ə sendzɨs vɛ ə kə̂ etuə sèsàŋ nə və tyaflə̀ tsɛsə̀ 6Ghənə kɔ̂ŋə̀ sə tsɨsə̂ ə telùʼ te ngaŋtəte elùʼ azhi è kɨsè sə tsɨs mkyə̀ mê ghaʼlə̂m ə sendɛ sə atsɨ̀yntese. 7Ghənə kɔ̀ŋɔ̀ nə ə tɔŋtə̂ ghənə è kɔʼsêzè ə telùʼ tə ezhɔynte è kɨsè nə ghɨghə tɔŋtə̂ ghənə nə, ‘Tyə̀ynsè.’ 8Pîza kə ghàyn za nə ə tɔŋtə̂ ghàyn nə, ‘Setyə̀ynsè’ kûmə̀ nə ghàyn kyi ke tyə̀ynsè èmɔ̀ʼ, mə ghàyn əkɨ̂m nyi əghɔnyì ə Və. 9Mə ghàyn kyi kepî va se tɔŋtə̂ wùə fa əchi nə, ‘Pɛ̂,’ kûmə̀ nə ghàyn kyi ke Pɨa emɔ̀ʼ, ə pɨ̀a vâyn mə È nyi ekwùtwəyn. 10Kə ghàyn za kepî nə ə tɔŋtə̂ ghàyn nə, ‘Tyə̀ynsè’ kûmə̀ nə Tyə̀ynse nyì ke emɔ̀ʼ mə za nyi vɛ ə chɔʼ ndə̂m. 11Wùə vɛ è ngaŋte tsɛ nâʼàpi ndè ə ghàyn əfètəyn kyi sə̂ nyi wùə èfɨ̀aʼa vâynvè. 12Ə njìə kɔʼsə pîndè ngɨŋə̂ vəyn, ə Zhə̀fè tə tsosê vəyn, ə nâʼà pîndè vɛ ə è tsose ngɨŋə̂ vəyn, ə Zhə̀fè tə nji kɔʼsê.”
Njisə̀s ə wàmnè kûmə̀ èkaŋkaŋə nəze
(Mâk 12.40; Lûk 11.39-42, 44, 52; 20.47)
13-14Njisə̀s ə pìə sê tyə̀ynsè sə alàŋsè è ghɨə Falàsîə nə, “Ghàyn ghɨnə ə ghàyn kaŋkaŋa nə̂ nyî, ngəʼ èghaʼâ nyi sê ghàyn! Ghàyn fìnə̀ èchondɛ elùʼ efɔ̀yn ekwùtwəynve nə kə ghɨə nji. Mə ghàyn è ngɨŋ saynse vayn kaʼa nji, za va nə ghɨ mɔ̀ʼɔ ghɛ ə kyiŋə se nji nə nji.#23.13-14 Ŋwàʼlè sə shi sə mɔ̀ʼɔse ə kwəynsê ndiŋa 14: Tyə̀ynsè se saʼse è ghɨə Falàsîə Ghàyn ghɨnə ə ghàyn kaŋkaŋa nə̂ nyi, ngəʼ e ghaʼa nyi sê ghàyn. Ghàyn tyə̀ynə̀ m̀wiyn è tsə̂m te tyafəte, fiə èfɨa zhwiə kwuə sə atyaʼ. Ə za nyi nə ghàyn tə kyîə ètsə̂fsè nâʼà sə ŋaŋ.
15Ngəʼ èghaʼâ nyì sê ghàyn ə tyə̀ynsè sə alàŋsè è ghɨ Falàsîə, ghàyn ghɨ kaŋkaŋa nə ghɨ̂yn! Ghàyn tyàŋà tènjwî tə fengwaŋte, kwîə ə tendâʼà ə tendâʼà kè se nə̀yn nə wùə èmɔ̀ʼ zɨ ə è chumte ghàyn. Mə shîŋə̀ kɛ ə è pomə ghàyn ə nə̀ vəyn è fiə ètsə̂fsè e tsɨ̂ə tsɛ̂ zayn shîŋə̀ tepɛ̀ se ndù elùʼ ewùs.
16Ngəʼ èghaʼâ nyì sê ghàyn ghɛ ə ghàyn nyi mə fòf chisə̂ ə̀ghɨ mɔ̀ʼɔ. Ghàyn zaʼlə̂ nə, ‘Ə wùə kàyn ezə ə Ndɛ Ètsə̀məze, ə ghɛ zhîze tàʼa kyàyn se vəyn. Pîza ə wùə kàyn ezə efɨa ngôl vɛ ve nyi ə Ndɛ Ètsə̀mə, ə è və kyi se nə̀yn eghɛ zɛ ə è kàyn zəyn.’ 17Ngô efòf vɨ̂nə̀! Ə̀ kɔʼnə̂ tsɛ̂ zɨ̂yn zə, ə ngôl mə, mə Ndɛ Ètsə̀mə zɛ ə è nə̀yn zə̂ynzè nə è zə zo kwəynə̂ ə Zhə̀fè shiə? 18Ghàyn zaʼlə kəpi nə ə wùə kàyn ezə alaŋ efoke, ə ghɛ zhîze taʼa kyàyn sê vəyn, pîza mə wùə kàyn ezə efo zɛ ə ze nyi alaŋ efoke, ə è və kyi se nə̀yn kə è kàyn. 19Ghàyn nyi mə ə fòf tayn zàyn! Ə̀ tsɛ̀ èfo mə alaŋ efo kɛ ə ke nə̂ nə fo ətəynze ə zo kwəynə̂ ə Zhə̀fè əshi ə? 20Nâʼàpî ndè vɛ ə è kàyn ezə alaŋ efoke è fote ə nyi mə è kàyn paʼsê èfɨa vɛ ə ve nyi etûə ə̀təyn. 21Ə kàynə̀ pîndè ə Ndɛ Ètsə̀mə ezə, ə nyi mə è kàynə̀ ezə zə̂ynzè è Zhə̀ fɛ ə Fe ndamə ətəyn. 22Mə ə wùə kàyn ə kwutwəynze ezə, ə nyi mə è kàynə̀ ezə fekyə̀ fɛ ə Zhə̀fè tsɨs ətəyn è kɨsè zə Fezhə̀ fɛ ə Fe tsɨs fumə ə fekyə̀.
23Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə! Ghàyn ghɨnə ə ghàyn kaŋkaŋa nə̂ ghɛ nyî. Ghàyn njiə m̀fɨatə̀ mê lɨ̀mtə̂ mɛ ə ndə̂mə̀ əfètəyn èfɨazhiəve, ghàyn ə fo àmɔ̀ʼ sê Zhə̀fè ə fètə̂ èfɨa èghɨm. Pîza ndə̂mə̀ va tuke se nə̀yn eghɛ zɛ lâŋkè tsà. Pîza ə zàmaʼà ə̀ghɛ əchûŋ ghɛ ə lâŋkè zaʼlə mə nyi nə wùə kyi sə̂ nyi chichi sê ghɨ mɔ̀ʼɔ, kosə̂ esəyn, nyi se pomə̂ se Zhə̀fè. Ghàyn kyi sə̂ nə̂ ə̀ghɛ nə ghɨnə̀ ə̀kɨ̂m zâ fɨsə̂ va zhîze. 24Ghàyn ghɨnə ə ghàyn chisə ghɨ mə ghàyn ə fòf nyî! Ghàyn chùmtə̀ tsɛsə̀ ə̀ghɛ ghɛ ə ghe kyi va fɨaʼà. Ghàyn fɨsə èliŋ etətəzè əfètə̂m m̀mò mɛ ə ghàyn mɨə pîza zàmaʼà tèliŋ te tsɨəte fumə əfètəyn m̀mò!
25Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨnə ə ghàyn kaŋkaŋa nə̂ ghɛ nyi! Ghàyn shùə tsɨ̀m ə̀ wà è kaŋke, pîza fɨa zhiə vɛ ə ve nyi əfètə̂ ətəyn e nyi mə ghàyn kyi fi sê ghɨə sə atyaʼ kûmə̀ əshi ə fɨə. 26Ghɨə fofə Falàsî ghɨ̂yn! Ghàyn shùə chi fètəyn fə wàfè è kɨsè kaŋa, ə pɨəyn ə təynke pɔŋ zo.
27Ngəʼ èghaʼâ e nyi sê ghàyn ə tyə̀ynsè sə alàŋsè è ghɨ Falàsîghè. Ghàyn ghɨ kaŋkaŋa nə̂ ghɨ̀yn! Ghàyn nyi kə teshyə̂ teghaʼâ tɛ ə kɨmne te fɨfə. Te zo ə pɨəyn pîza mə fètəyn nyi mə ə̀ lwiyn ke èwɔf əghɨ̀ ə kwutə mə ə fì. 28Kèpî famə endom nə vɨnə mə, ə pɨəyn ghàyn chwìtə̀ sê nâʼàpî ndè nə ghàyn nyîə zo, pîza ə fə̀təyn, ə̀ lwiyn kê èkaŋkaŋa nə ze è pi.
Njisə̀s ə tsàyn ngəʼ zɛ ə ghɨ tə fo sê ghɨghe
(Lûk 11.47-51)
29Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨ kaŋkaŋa nə̂ ghɨ̂yn! Ghàyn fɛtə̂ pomə tèshyə̂ teghaʼâtè sefɨ̀aʼtèsè fɨnə pɛ teshyə̂ tə ghɨ̀ ghɛ ə tè ndamə ndam ə chichize. 30Ghàyn ndùə pîə nə, ‘Ə tè nyi nə ghàs ə nyi etuʼ ə ghə̀pɨ̀a pɨ̀a ə ghasènìghe, mə ghàs tè paʼà tsɨ̀yntè se ghənə se zhwitê ə sèfɨ̀aʼtè.’ 31E za nyi nə ghàyn lotə̂ pomə̂ ndò nə ghàyn fɨ ə feghâŋ fə ghɨ̀ ghɛ ə tè zhwite fɨ̀aʼtèsè. 32Ghàyn ndu èshike ə nəyn mɨ̂sè efɨ̀aʼ zɛ ə ghə̀pɨ̀a pɨ̀a ghaynghe tè zhə̀te. 33Ghàyn mbam sɨ̂nə̀! è ghɔyn ə se mbam ghɨ̂nə̀! Ghàyn kwàʼtə̀ nə ghàyn kàʼa kwi zayn se tàʼa ndù elùʼ ewùs ə? 34M pîə sê ghàyn nə, m tə tomə sèfɨ̀aʼtè è ghɨ tɔfə è tyə̀ynsèsè sê ghàyn. Ghàyn tə zhwitə̂ yîghe, ə paynte yîghe awâmnè, ə pus yîghe ə sendɛ sə atsɨ̀yntese ə fɨnə chumə̀ fɨsə̂ yîghe ə setɔ̂ŋ ə setɔ̂ŋ. 35Ə ghàyn zhwi ghənə, ə zɨnə mə nəyn nə Zhə̀fè tsɨfse ghàyn kûmə̀ nə ndə̂mmə̂ ghɨ̀ ghɛ ə nyi chichi nâʼà ə̀kɨ̂m ə ghàyn tè zhwi tso ə ghàyn ə tu. Kè se zhə̀tə̀ è Apɛ̀l vɛ ə tè zhwi ndɔ̀ʼɔ è pofse ghɛze, se kɔʼɔ tàyn ə Sàkàlyâ, ə va Pàlàkayà vɛ ə ghàyn tè zhwi. Sàkàlyâ vɛ ə ghàyn tè zhwi ə Ndɛ Ètsə̀mə è kɨsè alaŋ efoke. 36M pîə sê ghàyn səmɔʼ nə ə̀ nyi feghâŋ fɨnə zôyn ə tsôs vɨnə tə tso ə ghənə ə tu kûmə̀ èzhwi zɨ̀yn nâʼà èkɨ̂m.”
Njisə̀s ə chwìtè kosê esəynze sê ghɨghe ə Njelusalɛ̀mə̀
(Lûk 13.34-35)
37Njisə̀s ə fɨnə wàmnə̀ ə pìə nə, “Wêy!, ghàyn ghɨə Njèlusalɛ̀mə̀, ghàyn zhwitə̂ sèfɨ̀aʼtè, ghàyn tɨmnə̂ zhwiə ə̀ghɨ ghɛ ə Zhə̀fè tom sê ghàyn è chiə! Mə mɔ̀msè səteshiŋə̀ ə teshìŋə̀ se zùŋtə ghàyn nyiə kə nyìə mbvɨ nə̂ è zɨtə̂ ə̀ghɔyn ə vəynghe etyə̀ tèghɛ̀, pîza ghàyn ghɛ tə ke ndô! 38Zôyn, Zhə̀fè nə kyiynə̂ ndɛ zâynzè, ə wùə vîvè ə va ətəyn. 39M pîə sê ghàyn nə, se zhə̀tè zôyn se ndù əshi, ghàyn tə fɨnə fe va mi è tsɛ̂ kə va mə ghàyn ə pì nə, ‹Zhə̀fè pɔse vɛ ə è pə̀yn ə ezə ə Pɛ̂pɛze.›”
Currently Selected:
:
Highlight
Share
Copy
Want to have your highlights saved across all your devices? Sign up or sign in
©2022 CABTAL