Yòwanìrzɛ̀ 10
10
Ŋmàna mò e mɔ̀ɔ̀ŋgèlì wà mɛ̀lɛ̀ŋgù nà mɛ̀lɛ̀ŋgù ma eni
1Yerzù rzi a òhwa nanù ema, “Nà e òhweyà ndi e jɔ̀kɛ̀ ema, e mòtò ema a rza akelɛ ò lìyòhva ò lì kpèeyà ò tenì ya e ndawò ya mɛ̀lɛ̀ŋgù, ndi à àgbelì ndì ò ehvɛhvɛ èhvarzù ò lì kpèeyà, a hwèlì ndì ŋmìhwɛ̀ na ekènɛ̀ŋgɛ̀. 2Ndi e mɔ̀ ema a akelì ò lìyòhva ò lì kpèeyà ò ndawò ya mɛ̀ɛlɛ̀ŋgù, a hwèlì ndi e mɔ̀ɔŋgèlì hwa mɛ̀ɛlɛ̀ŋgù. 3È mòtò ema a ɔŋgeya èki, a mò lìhvòweya lìyòhva la kɔtɔ̀. Mɛɛlɛŋgu meyɔhvɛ̀ me mò hweyàna lìlò la eni. Mɔ̀ a hwɛlɛ mɛ̀ɛlɛ̀ŋgù me eni na mìinà ma awu, ò lì me tìmba ò èwòka. 4Mɔ̀ a wurzana tɛ mɛ̀ɛlɛ̀ŋgù me eni me arzɛ ò èwòka, a ɛ̀ndɛ ò wòrzò ò lì me tìmba, èhwanja mɛ̀ɛlɛ̀ŋgù me eni me hwi lìlò la eni. 5Mene mɛ̀ɛ̀lɛ̀ŋgù me rza nɔ̀ŋgɔ ŋmɛ̀ni. Ndi me mò hwaŋga èhwanja me rza hwi lìlò la eni.” 6Ndi e wɔ̀ ema hwà mà hwèya e mbɔrzi ema Yerzù à mà òhwe, hwa rzi hvɔ̀ŋgɛ̀ mamɛ hwèŋge hweyà ema à mà òhwe hwe ma hwɛ.
Yerzù mɔ̀ndì à hwèlì e mɔ̀ɔ̀ŋgèlì wà gbamù wà mɛ̀lɛ̀ŋgù
7O èŋgànɛ̀lɛ̀ Yerzù à mà òhwà hvɛ nanù ema, “Nà e òhweyà ndi e jɔ̀kɛ̀, imba ndi na hwèlì lìyòhva là è ndawò yà mɛ̀lɛ̀ŋgù. 8Hwàŋga hwa arzɛ ema hwà mà lòma lì jà ndèŋgàna imba hvɛ na e ja, hwà mà hwɛ ndi hwayihwɛ na hwèkɛ̀nɛ̀ŋgɛ̀. Ndi mɛ̀lɛ̀ŋgù me rzi hwa hweyàne. 9Nà e jɔ̀kɛ̀ imba ndi na hwèlì lìyòhva. Mòtò a nò akelì tɛ imba ò lì kpèeyà, a rzùŋgàhwà. Mɔ̀ a òhva wònja lì kpèeyà na lì wurza, a lùwa tɔ̀ ima lìtumba la eyà ema a arza. 10È ŋmìhwɛ̀ a jà ndì ò lì ìhwa, na lì òŋwa na ò lì hvàŋga. Ndi imba na jɛlɛlɛ ndi ema hwa luwe lòŋgɛ, rzi hwa lì lùwa jɔ̀ɔ̀jɔ̀.” 11“Imba ndi nà hwèlì e mɔ̀ɔŋgèlì wà gbamù wà mɛ̀lɛ̀ŋgù. È mɔ̀ɔ̀ŋgèlì wà gbamù wà mɛ̀lɛ̀ŋgù à wòŋgìrzɛ̀nɛ̀yi ò lì ŋwèeyà mɛ̀lɛ̀ŋgù ma eni. 12È mògbèèlì ema a akàhwì ò lì ɔŋgeya mɛ̀lɛ̀ŋgù ema tɔ̀ mɔ̀ ŋmìti a rza enje ndi e mɔ̀ɔŋgèlì wa mɛ̀lɛ̀ŋgù, ndèŋgàna rzeketɛ mɔ̀ ndi à hwɛnì mɛ̀lɛ̀ŋgù. O èŋgànɛ̀lɛ̀ rzɔ mɔ̀ à ɛni tɛ na òma e njuwɛ e ja, mɔ̀ à kìnyɛ̀lɛ̀ mèŋge mɛ̀lɛ̀ŋgù rzi a hwaŋga e ya eni. Àŋga ndi e njuwɛ rzɔ e hvùma mɔ̀lɛ̀ŋgù mɔ̀kɔ ò ma menɛyi me ma wuhweyà. 13È mògbèèlì a hwaŋga e ya eni, èhwanja a akàhwì ndi ò lì gbeyà èwòlò, rzeketɛ ema a hwɛni hvònda ya mèŋge mɛ̀lɛ̀ŋgù.” 14“Imba na hwèlì ndi e mɔ̀ɔŋgèlì wa gbamù wa mɛ̀lɛ̀ŋgù, na hwi mɛ̀lɛ̀ŋgù me ami, mɛ̀lɛ̀ŋgù me ami meyɔhvɛ̀ me nò hwi. 15Nànù mɛnɛ ndi Tatɛ̀ wa ami a nò hwi, ndèŋgàna imba hvɛ na mò hwi. O èŋgànɛ̀lɛ̀ rzɔ na wòŋgìrzɛ̀nɛ̀yi ò lì ŋwèeyà mɛ̀lɛ̀ŋgù me ami. 16Nà òhvi mehvɛhvɛ mɛ̀lɛ̀ŋgù, ema me rza ènje ò tenì ya ene ndawò ya mɛ̀lɛ̀ŋgù. Nà àŋgàmɛ̀nɛ̀yi lì me jànà mèyɔ̀hvɛ. Me òkànèyà lìlò la ami, rzi me hwɛ gbaka wɔ̀kɔ na mɔ̀ɔŋgèlì mɔ̀kɔ. 17Tatɛ̀ a nò lìŋgàni èhwanja na wòŋgìrzɛ̀nɛ̀yi ò lì ŋwa aŋga nanù na luwa lòŋgɛ lì ami hvɛ. 18Tɔ̀ mòtò a rza tànɛyi lì nò wòwàna lòŋgɛ la ami. Imba na lì wɔ̀lɛ̀nɛ̀ ndi ò hwèlìŋgànèlì hwe ami. Nà òhvi hvɛ lìkànèyà ò lì ŋgbà lòŋgɛ la ami ndèŋgàna ò lì li wòwa hvɛ. Èya ene ema Tatɛ̀ a nò òhwèlì ema na gbeeye.”
19Yerzù à mà òhwe hwenè hweyà nanù, rzi hwatò hwa wònyà Yudà hwa a kahwanɛ̀ hvɛ. 20Lòŋgò hwà mà a òhwanɛ̀ nanù ema, “A òhvi èlìŋgɛ̀ ya wòhwe ndèŋgànɛ̀lɛ̀ hvɛ a rza enje ò lìhwiyè la eni. Mamɛ ndèŋgàtɛ̀ i mò òkànèyà e?” 21Lòŋgò la hwatò hvɛ rzi hwa òhwa nanù ema, “È mòtò ema a òhvi èlìŋgɛ̀ ya wòhwe a rza òhwa ini nyayi ja hweyà. Èlìŋgɛ̀ ya wòhwe e tànɛ̀yi lì wɔ̀wìrzɛ̀ mìirzɔ̀ ma mòtò wà ndima e?”
Wònyà Yuda hwà mà rzɔ̀rzɔ̀ Yerzù
22O ma hwɛ ndèma ya lì nàmìrzɛ̀ è Ndawò yà Lohwà ò Jèrurzalɛ̀mù. Ène hvònda ndì yùulùlì ya ŋginyà e ma hwɛ. 23Yerzù à mà ɛndeya ò hvàlàndà yà è Ndawò yà Lohwà ema e hwɛ̀lɛ̀hwɛ̀ e Hvàlàndà yà ama Rzòlòmɔ̀nì. 24Hwatò hwa Yudà hwà mà mò tòŋga rzi hwa mò ijòwa, nanù ema, “Ima hvònda ò hwɛni ò lì jò tàmìrzɛ̀ e? È hwèlì tɛ ema ò wa ndi ò hwèlì è Mɔ̀ ema à Ɔ̀kirzɛ̀hwɛ̀yi, ò jò òhweyà tòlòlò.” 25Yerzù rzi a hwa alàhwɛ̀ nanù ema, “Nà ma lòma lì òhweyà ndi inyɔ e rza nò lòkɛ̀yì. È mbòŋgi e hwèlì ndi èwòlò ya hwètàmìrzèlèlì ema na gbeyà ò lìinà là mà e Tatɛ̀ wa ami. 26Ndi e rza nò lòkɛ̀yì èhwanja e rza enje mɛ̀lɛ̀ŋgù me ami na òma nà mà e òhwane. 27Mɛ̀lɛ̀ŋgù me ami me òkànèyà lìlò la ami, na me hwi, rzi mèyɔ̀hvɛ me nò nɔ̀ŋgɔ. 28Nà ŋgbà mɛ̀ɛlɛ̀ŋgù me ami lòŋgɛ là gbìndèyà, ò èŋgànɛ̀lɛ̀ me rza ŋwa tɔ̀ wùnyà. Tɔ̀ mòtò arza tànɛyi lì nò hvùmana e meyɔ ò lìya la ami. 29Èhwanja Tatɛ̀ hwa ami ama nò ŋgbà e meyɔ, rzi mɔ̀ à òhvi ŋginyà la aka tɔ̀ ima mɔ̀. Tɔ mòtò a rza tànɛyi lì me hvùma ò lìya là mà e Tatɛ̀ wa ami 30È Tatɛ̀ na imba i hwèlì ndi mòtò mɔ̀kɔ.”
31O ene hvònda hwatò hwa wònyà Yudà hwà mà kòma màŋyàyi ò lì uŋma Yerzù hvɛ. 32Ndi à mà hwa òhweyà nanù ema, “Nà ma e uŋmɛ̀lɛ̀ rzayi-rzayi ja hwèwòlò hwe gbamù ema hwe uwɛ̀lɛ̀lɛ̀yi ò ma Tatɛ̀. È arza lì nò uŋmanà màŋyàyi ò lì nò òŋwa. O ima èwòlò ema e arza lì nò uŋma màŋyàyi e?” 33Rzìi à hwa alàhwɛ̀ nanù ema, “I rza arza lì uŋma màŋyàyi ò nyòla hwèwòlò hwe gbamù ema ò ma gbeyɛ. Ndi i uŋma ndì èhwanja ò hwɛnyi Lohwɛ̀.” 34Yerzù à mà hwa òhweyà nanù ema, “Rzeke e tìlahwì ò kààti ya anyu ya mbenda nanù ema, Lohwɛ̀ a òhwi nanù ema, ‘Inyɔ e hwèlì ndi mòohwà.’ 35È hwɛni lì hwiya nanù ema Eyà ya Lohwà e rza kpa. Lohwɛ̀ a kpɛ̀yi hwatò lìinà ema mɔ̀ à mà òmane Eyà ya Lohwà ama hwa hwèlì ndì mòohwà. 36Imba ndì na hwèlì e mɔ̀ ema Lohwɛ̀ à nàmìrzɛ̀yi rzi a nò òmi ò rze, nɛ rzɔ inyɔ e tànɛ̀yi lì òhwa nanù ema imba na hwɛnyɛ Lohwɛ̀ e? Èhwanja imba na òhwi nanù ema imba ndì nà hwèlì è Ŋmanà wà ama Lohwɛ̀ e? 37Nà rza gbèyi tɛ èwòlò ya ama Tatɛ̀, e rzi nò lòkɛ̀. 38Ndi imba na e gbèyi tɛ, e hwɛni lì lòkɛ̀ èwòlò ya eni tɔ̀ e hwɛ ndi nanù ema e rza nò lòkɛ̀. Aŋga nanù inyɔ e hwɛni lì lòkɛ̀ na lì hwiya na lì rzɔ̀ŋgìtɛ̀nɛ̀ ŋgelì hvɔ̀kɔ ò i ŋgelì ja arzɛ nanù ema Tatɛ̀ a hwèlì ò tenì ya ami ndèŋgàna imbahvɛ na hwèlì ò tenì ya eni ò ŋgelì ja arzɛ.”
39Hwene hweyà hwe arzɛ ema à mà òhwe hwe ma gbeyà hwà mà arza lì mò lɛmbɛ hvɛ ndi à mà anjiya ò màà mà awu.
40O mburza nanù, Yerzù à mà timba ò enɛyi èhvàrzù ya mòrzò mò Jɔdànì ò èki ema Yòwanìrzɛ̀ è Mòlùhwìrzèlì à mà hwɛ lì lùhwìrzɛ̀ hwatò. A ma lìiya aŋga. 41Rzayi-rzayi ja hwatò hwà mà hwɛ lì mò jèeya. Hwàŋga hwatò hwà mà hwɛ lì òhwa nanù ema, “Yòwanìrzɛ̀ è Mòlùhwìrzèlì a rzi hwɛ lì gbeyà hweyà hwe mànyakà ndì tɔ̀ mamɛ ema à mà òhwe lì hvòmɛ̀nɛ̀ ònò mòtò hwe hwèlì ndì e jɔ̀kɛ̀.” 42O èŋgànɛ̀lɛ̀ e ŋgindi ema e ma hwɛ aŋga e ma lòkɛ̀yì Yerzù.
Currently Selected:
Yòwanìrzɛ̀ 10: bri
Highlight
Share
Copy
Want to have your highlights saved across all your devices? Sign up or sign in
© 2022, CABTAL
