Yòwanìrzɛ̀ 11
11
È kpelì yà àma Làrzàrɔ̀rzì
1O ma hwɛ mòòkelì hwa mùnyanà mɔ̀kɔ à mà ɔ̀kirzɛ̀ à mà hwɛ̀lɛ̀hwɛ̀ Làrzàrɔ̀rzì. À ma lìya ò mbòwa ya Bɛ̀tanì nà indòmɛ ja ani Màlìyɛ̀ na Mata. 2Manù Màlìyɛ̀ ndi mà hwèlì è mɔ̀ ema à mà nyàlɛ̀ lìyɔ̀ki là hvɛ̀ɛ̀hvɛ̀ ò màtaŋgà ma mà Rzàŋgò rzìi à mà titòwàna lìhvumbu là eni. Ndòmɛ̀ wà eni Làrzàrɔ̀rzì ndi à mà hwɛ lì ɔ̀kirzɛ̀. 3Aŋga ndi indòmɛ̀ jà eni jà à òmɛ̀nɛ̀ Yerzù ŋmɛ̀ndì nanù ema, “Rzàŋgò, mbunda aŋgɔ̀ wa ndìŋgɛ ya màlìŋgò a òkà.” 4Ndi nà òma Yerzù à mà hwèya nanù à mà òhwa nanù ema, “È nyàmbɛ ya ama Làrzàrɔ̀rzì e rza mò ùkirzɛ̀ ò kpelì. È gbèyɛ̀nɛ ndi ò lì ŋgbà Lohwɛ̀ èluhwe ò lì arza nanù ema è Ŋmanà wà ama Lohwà a lùwane enè eyà èluhwe.” 5Yerzù à mà lìŋgàna Mata, Màlìyɛ̀ na Làrzàrɔ̀rzì. 6È hvònda ema à mà hweye nanù ema Làrzàrɔ̀rzì a ɔ̀kirzɛ̀, à mà lìiya ò èki ema à mà hwɛ natɛ̀ɛ na mèenyà me hwàkɛ. 7O mburzà hvònda rzɔ rzi Yerzù a òhweyà hwà-òkòwèlì hwa eni ema, “I ɛ̀ndɛ ò Jùdeyà.” 8Hwà-òkòwèlì hwa eni hwa mò alàhwɛ̀ nanù ema, “Ìi Mòòkòlèlì ò rzi ikolɛnɛyi mèenyà ema hwatò hwa Jùdeyà hwà mà arze lì ò agba màŋyàyi rzi òma ò timba ò tenì hvɛ e?” 9Yerzù rzìi a hwa alàhwɛ̀ ama, “Rzeke e hwèlì e jɔ̀kɛ̀ nanù ema wùnyà tɛ wò hwɛni lìyòmɛ la awa na ihwàkɛ e? Hwàŋga hwatò ema hwa ɛndɛ o ŋmèrze hwa rza kpa, èhwanja wɔ̀ hwa hwèlì na e mɔ̀ ema a hwèlì ŋmàye mò ène rze. 10Ndi wɔ̀ hwa ɛndɛ tɛ na wùuwù, hwa kpa èhwanja ŋmàye mò rza enje na wɔ̀.” 11Yerzù rzìi a òhwa ene, rzìi a hwatɛ hvɛ ama, “Mbunda arzu Làrzàrɔ̀rzì à naŋga lì naŋga ndi ò nàŋgɛ na ɛ̀ndɛ lì mò imòlɛ.” 12Hwà-òkòwèlì hwa eni rzìi hwa òhwa nanù ema, “Rzàŋgò a naŋga tɛ nanù ò ma a ò wɔ̀wɔ̀.” 13Hwà mà ɔ̀ŋgɛ̀lɛ̀ nanù ema Yerzù a òhwa ndi lì hvòmɛ̀nɛ̀ ijò ema Làrzàrɔ̀rzì a nàŋgayi ndi Yerzù à mà òhwa ndi nanù ema Làrzàrɔ̀rzì à mà ŋwa. 14Àŋga ndi à hwa òhweyà gbèegbèe nanù ema, “Làrzàrɔ̀rzì à mà ŋwa. 15O nyòla inyɔ imba na òki mɔ̀nyɛ̀ŋgì nanù ema na rzi hwɛ aŋga, aŋga nanù e lòkɛ̀. Inyɛ̀ i ɛ̀ndɛ aŋga nàŋgɛ i mò ɔ̀ŋgɔ.” 16Tɔ̀marzì (ema à mà hwɛ̀lɛ̀hwɛ̀ hvɛ ema Mayirzɛ), rzìi a òhweyà wònyànyàŋgò hwa hwà-òkòwèlì nanù ema, “Inyɛ̀ irzɔ hvɛ jɛ̀ɛ̀ ɛ̀ndɛ aŋga na mɔ̀ àŋga nanù e hwèlì hvɛ tɛ ema kpelì irzɔ hvɛ i ŋwa na e Mòòkòlèlì.”
Yerzù ndi à hwèlì hwèhvùmùwèlì nà lòŋgɛ
17Nà òma Yerzù à mà ùke ò Bɛ̀tanì à mà ùŋmànɛ̀lɛ̀ ema hwà mà màa lì imeya Làrzàrɔ̀rzì à mà hwɛ ò rzɔ̀ŋgɔ̀ mèenyà menii merzurzu. 18Lì anjiya ò Bɛ̀tanì ò lì ɛndɛ lì uka ò mbòwà ya Jèrurzalɛ̀mù e ma hwɛ ndi màyilì ma hwàkɛ. 19Rzayi-rzayi ja hwatò hwa wònyà Yudà hwà mà jà lì ɛhwɛnɛ Mata na Màlìyɛ̀ ò kpelì ya ama ŋmanyàŋgò wa awu. 20Nà òma Mata à mà hwèye nanù ema Yerzù a ja, à mà ɛ̀ndɛ lì mò ùŋma. Màlìyɛ̀ mɔ̀ à mà lìiya ò ndawò. 21Mata rzìi a òhweyà Yerzù nanù ema, “Rzàŋgò è mà hwɛ tɛ ema ò mà hwɛ anù, òma ndòmɛ̀ wà ami a rza ŋwelì. 22Ndi tɔ̀ nanù ò nàŋgɛ nanù na hwi ema Lohwɛ̀ a ò ŋgbà tɔ̀ mamɛ ema ò mò arzanì.” 23Yerzù rzìi a mò òhweyà nanù ema, “Ndòmɛ̀ wà aŋgɔ̀ à ò hwɛ ò lòŋgɛ hvɛ.” 24Mata rzìi a mò alàhwɛ̀ nanù ema, “A ò hvùmùwà hvɛ e hvònda hwanɛ̀yi hwa arzɛ hwa ò hvùmùwɛ̀ ò wùnyà wò lìrzukù.” 25Yerzù rzìi a mò òhweyà nanù ema, “Imba ndi na hwèlì hwèhvùmùwèlì nà lòŋgɛ, tɔ̀ ima mɔ̀ ema à nò lòkɛ̀ tɔ̀ nɛ à ŋwa, à ò tɛ̀mɛ̀ hvɛ ò lòŋgɛ. 26Tɔ̀ njɛnɛ ema, a hwelì o lìni lòŋgɛ, rzìi a nò lòkɛ̀, a rza ŋwa ò lòkɛ̀yì nanù e?” 27Mata rzìi a mò alàhwɛ̀ nanù ema, “Ɛ̀ɛ na lòkɛ̀ i hvònda ja arzɛ nanù ema ò wa ndi ò hwèlì è Ŋmanà wà ama Lohwà a Ɔ̀kirzɛ̀hwɛ̀yi e mɔ̀ ema Lohwɛ̀ a òhwi nanù ema a hwɛni lì jà ò rze.”
Yerzù à mà eyaa
28O mburza ema Mata à mà òhwɛ nanù, rzìi a timbeya Màlìyɛ̀ rzìi a mò hwɛlɛ ò tòŋgòŋgò rzi a mò òhweyà nanù ema, “È Mòòkòlèlì a hwèlì anù, a ò ijò.” 29Nà òma Màlìyɛ̀ à mà hweye nanù, rzìi a ahwèŋgɛ̀ hwe tɛmelì ò lì mò ùŋma. 30Yerzù à mà hwɛ a rzi kpèelì ò mbòwà, à mà hwɛ ò eŋge èki mɛnɛ ema Mata à mà mò ùŋmanɛlɛ. 31Nà òma hwatò hwa wònyà Yudà ema hwà mà hwɛ ò ndawò ò lì arzarzɛ Màlìyɛ̀, hwà mà ɛnɛ na òma Màlìyɛ̀ ahwèŋgɛ̀ ò lì ɛndɛ ò rzɔ̀ŋgɔ̀ ya ama Làrzàrɔ̀rzì hwà mà ɔ̀ŋgɛ̀lɛ̀ nanù ema a ɛndɛ ndi àŋga ò lì eyà. O èŋgànɛ̀lɛ̀ rzɔ hwà mà mò òŋgama aŋga.
32Nà òma Màlìyɛ̀ à mà ùke aŋga òma à mà ɛnɛ Yerzù rzìi Màlìyɛ̀ a mò kpèeyà ò matàŋga rzìi a òhwa nanù ema, “Rzàŋgò ò ma hwɛ tɛ anù òma ndòmɛ̀ wa ami a rzi ŋwe.” 33Nà òma Yerzù a mà mò ɛnɛ na òma a eyà rzìi hwanɛ̀yi hwatò hvɛ hwa mò eyàna, Yerzù à mà wukumeya ò ŋmèma rzayi-rzayi rzìi a atàkìrzɛ̀. 34Rzìi à hwa ijòwa nanù ema, “One e mò imelì e?” Rzìi hwa mò òhwàna nanù ema, Rzàŋgò e, jà anu ò ɛnɛ. 35Yerzù rzìi a èya. 36Wònyà Yudà ema hwà mà ukeya aŋga rzìi hwa òhwa nanù ema, “Ò jɔ̀kɛ̀ à mà mò lìŋgana ò!” 37Ndi hwanɛ̀ hvɛ hwà mà òhwa nanù ema, “O nò mòtò à mà wɔ̀wìrzɛ̀ e ndima mòtò rzeke òma à mà gbeyà ema Làrzàrɔ̀rzì a rzi ŋwe e?”
Yerzù a tìmbirzɛ̀ Làrzàrɔ̀rzì ò lòŋgɛ
38Yerzù à mà wukumeya ŋmèma hvɛ. O èŋgànɛ̀lɛ̀ à mà ɛndɛ ò rzɔ̀ŋgɔ̀. Èŋge rzɔ̀ŋgɔ e ma hwɛ ndi rzɔ̀ŋgɔ ema e ma hvòkòwahwa ò lìŋyàyi. Hwèkpèèlì hwe ma umbahwa ndi na lìŋyàyi. 39Yerzù rzìi a òhwa nanù ema, “È ulɛ lìŋgi lìŋyàyi” ndi Mata ema à mà yahwa na Làrzàrɔ̀rzì rzìi a òhwa nanù ema, “Ìi Rzàŋgò ŋmìimbà mò eni mò mà wòteyà lì uŋgba naŋgɛ èhwanja mò ma uka menya menii ò rzɔ̀ŋgɔ.” 40Yerzù rzi a mò timbirzɛlɛlɛ nanù ema, “Nà rzi ò òhweyà ema ò lòkɛ̀yì tɛ ò ɛnɛ èluhwe yà ama Lohwɛ̀ e?” 41O èŋgànɛ̀lɛ̀ hwaŋga hwatò hwà mà iŋgòlɛ lìŋgi lìŋyàyi ò lì ulɛhwɛ ò hwèkpèèlì hwe eŋge rzɔ̀ŋgɔ. Yerzù rzìi a ɔ̀ŋgɔ ò ŋmanyu yà lohwà rzìi a òhwa nanù ema, “Tatà na èki na òma ò nò alahwànɛ̀yi màkanɛ̀ mà ami. 42Nà hwi nanù ema ò òkànèyà màkanɛ̀ ma ami ihvònda ja arzɛ, na òhwa ndi nanù aŋga nanù hwanù hwatò ema hwa ukelì anù hwa lòkɛ̀ nanù ema ò wa ndi ò nò òmi.” 43O mburza hwene hwèyòhwèlì hwe ama Yerzù, rzìi a tɛɛ na lìlò lì karzami, a hwɛlɛ Làrzàrɔ̀rzì ama, “Ìi Làrzàrɔ̀rzì wurza!” 44Oŋgò mòtò ema à mà ŋwa rzi a tɛ̀mɛ̀. Lìhwatù ema hwà mà mò lìŋgɛ̀lɛ̀nɛ matàŋga, màa nà wòrzò wò eni lì mà mò hwɛ ò nyò nanù mɛnɛ. Yerzù rzìi a hwa òhweyà nanù ema, “È mò wuluwe lìŋgi lìhwatù ò nyò ya eni a ɛndɛ e ya eni.”
Ŋmanò mò lì òŋwa Yerzù
(Mat 25.1-5; Mak 14.1-2; Luk 22.1-2)
45Rzayì-rzayì ja hwatò hwa wònyà Yudà ema hwà mà ja lì arzarzɛ Màlìyɛ̀ hwà mà ɛnɛ mamɛ ema e ma gbèyɛ̀nɛ, hwà mà lòkɛ̀ Yerzù. 46Lòŋgò hvɛ hwà mà ɛ̀ndɛ lì ùŋma Ihvàlìrzàyì rzìi hwa hwà òhweyà mamɛ Yerzù à mà gbeyɛ. 47Aŋga ndi Ipìlìrzì ndɛnɛ nà Ihvàlìrzàyì ja arzàŋganɛ ò ndòŋgamɛni, hwà mà òhwa nanù ema, “Mamɛ i gbeyà naŋgɛ e? I hwɛni lì gbeyà eyà èhwanja ònò mòtò a gbeyà hweyà rzayi-rzayi hwe mànyakà. 48I mò hwɛmì tɛ ò lì gbeyà hwenè hweyà nanù hwatò hwa arzɛ hwa mò lòkɛ̀ hwatò hwa Ròmànì hwa jà lì wòwà e Ndawò yarzu yà Lohwà nà èkòmè yarzu.” 49Rzìi mòtò mɔ̀kɔ ò ìtììtènì ja awu ema à mà hwɛ̀lɛ̀hwɛ̀ Kàyìhvàrzì mɔ̀ ndi hvɛ à mà hwɛ è Pìlìrzì ema è kàrzamì ò mòŋgò ŋma rzìi à òhwa nanù ema, “È rza hwi tɔ̀ eyà! 50È rza lutelì nanù ema ò lɔ̀wu mòtò mɔ̀kɔ à jò ŋwèeyà irzɔ hwa arzɛ lì aka nanù ema èkòmè yà arzɛ è hvàŋgahwè e?” 51À rza òhwe ndi ene eyà nà mɔ̀ mɛ̀nɛ. Nà òma mɔ̀ndi à mà hwɛ è Pìlìrzì ema è kàrzamì ò mòŋgò ŋma, à mà hwɛ rzɔ ndi lì òhwa eyà ema è ò gbèyɛ̀nɛ ò è hvònda ema è ò jɛ̀ɛ̀, ema Yerzù à ŋweya ndi wònyà Yudà. 52Rzekɛtɛ ò wònyà Yudà mɛnɛ ndi ò lì rzàŋga hwatò hwa arzɛ hwa ama Lohwɛ̀ ema hwa wuhwèlì ò èki yɔ̀kɔ, aŋga nanù hwa hwɛ mòtò mɔ̀kɔ.
53Lìwòteyà èŋge hvònda, hwàkànèlì hwa wònyà Yudà hwa wòteya lì ŋya ŋmanò ò lì òŋwa Yerzù. 54Ène eyà e ma gbeyà Yerzù a rzìi hwɛ lì wurza hvɛ ò ìtììtènì ja wònyà Yudà. Rzìi mɔ̀ na hwà-òkòwèlì hwa eni hwà mà anjiya rzìi hwa ɛ̀ndɛ ò èkòmè ema e ma hwɛ̀lɛ̀hwɛ̀ Èhvlèmì, rzìi hwa lìya aŋga. Èŋge mbòwa e ma kòmbɛnɛ mòrzanjɛ̀. 55È hvònda ya è Ndèma yà lì Akà Ɔ̀nɛ̀yi è mà kòmbɛnɛ. O èŋgànɛ̀lɛ̀ rzayi-rzayi ja hwatò hwà mà uwɛ̀lɛ̀lɛ̀yi ò màmbowà mà arzɛ hwà mà ja ò Jèrurzalɛ̀mù lì a tatòwɛ na òma e mbenda ya ama Mòrzè e ma arze, ò lì wòŋgirzɛnɛ è Ndèma yà lì Akà Ɔ̀nɛ̀yi. 56Hwàŋga hwatò hwa wònyà Yudà hwà mà hwɛ lì arza Yerzù nanù mɛnɛ. Ndi na òma hwà mà arzàŋganɛ ò Ndawò yà Lohwà, rzìi hwa a àyijòwànɛ̀yi mɔ̀kɔ na ɔ̀nɛyi nanù ema, “Mamɛ ò ɔ̀ŋgɛ̀lɛ̀ e? È lòkɛ̀ nanù ema a ò jà ò ndèma e?” 57Ipìlìrzì ndɛnɛ na Ihvàlìrzàyì hwà mà akɛ̀lɛ̀ e njàmbɛ̀ nanù ema, “Tɔ̀ njɛnɛ ema a hwi èki ema Yerzù a hwèlì a je a hwa òhweyà aŋga nanù òma hwà mà mò ŋgbaŋgɛ.”
Currently Selected:
Yòwanìrzɛ̀ 11: bri
Highlight
Share
Copy
Want to have your highlights saved across all your devices? Sign up or sign in
© 2022, CABTAL
Yòwanìrzɛ̀ 11
11
È kpelì yà àma Làrzàrɔ̀rzì
1O ma hwɛ mòòkelì hwa mùnyanà mɔ̀kɔ à mà ɔ̀kirzɛ̀ à mà hwɛ̀lɛ̀hwɛ̀ Làrzàrɔ̀rzì. À ma lìya ò mbòwa ya Bɛ̀tanì nà indòmɛ ja ani Màlìyɛ̀ na Mata. 2Manù Màlìyɛ̀ ndi mà hwèlì è mɔ̀ ema à mà nyàlɛ̀ lìyɔ̀ki là hvɛ̀ɛ̀hvɛ̀ ò màtaŋgà ma mà Rzàŋgò rzìi à mà titòwàna lìhvumbu là eni. Ndòmɛ̀ wà eni Làrzàrɔ̀rzì ndi à mà hwɛ lì ɔ̀kirzɛ̀. 3Aŋga ndi indòmɛ̀ jà eni jà à òmɛ̀nɛ̀ Yerzù ŋmɛ̀ndì nanù ema, “Rzàŋgò, mbunda aŋgɔ̀ wa ndìŋgɛ ya màlìŋgò a òkà.” 4Ndi nà òma Yerzù à mà hwèya nanù à mà òhwa nanù ema, “È nyàmbɛ ya ama Làrzàrɔ̀rzì e rza mò ùkirzɛ̀ ò kpelì. È gbèyɛ̀nɛ ndi ò lì ŋgbà Lohwɛ̀ èluhwe ò lì arza nanù ema è Ŋmanà wà ama Lohwà a lùwane enè eyà èluhwe.” 5Yerzù à mà lìŋgàna Mata, Màlìyɛ̀ na Làrzàrɔ̀rzì. 6È hvònda ema à mà hweye nanù ema Làrzàrɔ̀rzì a ɔ̀kirzɛ̀, à mà lìiya ò èki ema à mà hwɛ natɛ̀ɛ na mèenyà me hwàkɛ. 7O mburzà hvònda rzɔ rzi Yerzù a òhweyà hwà-òkòwèlì hwa eni ema, “I ɛ̀ndɛ ò Jùdeyà.” 8Hwà-òkòwèlì hwa eni hwa mò alàhwɛ̀ nanù ema, “Ìi Mòòkòlèlì ò rzi ikolɛnɛyi mèenyà ema hwatò hwa Jùdeyà hwà mà arze lì ò agba màŋyàyi rzi òma ò timba ò tenì hvɛ e?” 9Yerzù rzìi a hwa alàhwɛ̀ ama, “Rzeke e hwèlì e jɔ̀kɛ̀ nanù ema wùnyà tɛ wò hwɛni lìyòmɛ la awa na ihwàkɛ e? Hwàŋga hwatò ema hwa ɛndɛ o ŋmèrze hwa rza kpa, èhwanja wɔ̀ hwa hwèlì na e mɔ̀ ema a hwèlì ŋmàye mò ène rze. 10Ndi wɔ̀ hwa ɛndɛ tɛ na wùuwù, hwa kpa èhwanja ŋmàye mò rza enje na wɔ̀.” 11Yerzù rzìi a òhwa ene, rzìi a hwatɛ hvɛ ama, “Mbunda arzu Làrzàrɔ̀rzì à naŋga lì naŋga ndi ò nàŋgɛ na ɛ̀ndɛ lì mò imòlɛ.” 12Hwà-òkòwèlì hwa eni rzìi hwa òhwa nanù ema, “Rzàŋgò a naŋga tɛ nanù ò ma a ò wɔ̀wɔ̀.” 13Hwà mà ɔ̀ŋgɛ̀lɛ̀ nanù ema Yerzù a òhwa ndi lì hvòmɛ̀nɛ̀ ijò ema Làrzàrɔ̀rzì a nàŋgayi ndi Yerzù à mà òhwa ndi nanù ema Làrzàrɔ̀rzì à mà ŋwa. 14Àŋga ndi à hwa òhweyà gbèegbèe nanù ema, “Làrzàrɔ̀rzì à mà ŋwa. 15O nyòla inyɔ imba na òki mɔ̀nyɛ̀ŋgì nanù ema na rzi hwɛ aŋga, aŋga nanù e lòkɛ̀. Inyɛ̀ i ɛ̀ndɛ aŋga nàŋgɛ i mò ɔ̀ŋgɔ.” 16Tɔ̀marzì (ema à mà hwɛ̀lɛ̀hwɛ̀ hvɛ ema Mayirzɛ), rzìi a òhweyà wònyànyàŋgò hwa hwà-òkòwèlì nanù ema, “Inyɛ̀ irzɔ hvɛ jɛ̀ɛ̀ ɛ̀ndɛ aŋga na mɔ̀ àŋga nanù e hwèlì hvɛ tɛ ema kpelì irzɔ hvɛ i ŋwa na e Mòòkòlèlì.”
Yerzù ndi à hwèlì hwèhvùmùwèlì nà lòŋgɛ
17Nà òma Yerzù à mà ùke ò Bɛ̀tanì à mà ùŋmànɛ̀lɛ̀ ema hwà mà màa lì imeya Làrzàrɔ̀rzì à mà hwɛ ò rzɔ̀ŋgɔ̀ mèenyà menii merzurzu. 18Lì anjiya ò Bɛ̀tanì ò lì ɛndɛ lì uka ò mbòwà ya Jèrurzalɛ̀mù e ma hwɛ ndi màyilì ma hwàkɛ. 19Rzayi-rzayi ja hwatò hwa wònyà Yudà hwà mà jà lì ɛhwɛnɛ Mata na Màlìyɛ̀ ò kpelì ya ama ŋmanyàŋgò wa awu. 20Nà òma Mata à mà hwèye nanù ema Yerzù a ja, à mà ɛ̀ndɛ lì mò ùŋma. Màlìyɛ̀ mɔ̀ à mà lìiya ò ndawò. 21Mata rzìi a òhweyà Yerzù nanù ema, “Rzàŋgò è mà hwɛ tɛ ema ò mà hwɛ anù, òma ndòmɛ̀ wà ami a rza ŋwelì. 22Ndi tɔ̀ nanù ò nàŋgɛ nanù na hwi ema Lohwɛ̀ a ò ŋgbà tɔ̀ mamɛ ema ò mò arzanì.” 23Yerzù rzìi a mò òhweyà nanù ema, “Ndòmɛ̀ wà aŋgɔ̀ à ò hwɛ ò lòŋgɛ hvɛ.” 24Mata rzìi a mò alàhwɛ̀ nanù ema, “A ò hvùmùwà hvɛ e hvònda hwanɛ̀yi hwa arzɛ hwa ò hvùmùwɛ̀ ò wùnyà wò lìrzukù.” 25Yerzù rzìi a mò òhweyà nanù ema, “Imba ndi na hwèlì hwèhvùmùwèlì nà lòŋgɛ, tɔ̀ ima mɔ̀ ema à nò lòkɛ̀ tɔ̀ nɛ à ŋwa, à ò tɛ̀mɛ̀ hvɛ ò lòŋgɛ. 26Tɔ̀ njɛnɛ ema, a hwelì o lìni lòŋgɛ, rzìi a nò lòkɛ̀, a rza ŋwa ò lòkɛ̀yì nanù e?” 27Mata rzìi a mò alàhwɛ̀ nanù ema, “Ɛ̀ɛ na lòkɛ̀ i hvònda ja arzɛ nanù ema ò wa ndi ò hwèlì è Ŋmanà wà ama Lohwà a Ɔ̀kirzɛ̀hwɛ̀yi e mɔ̀ ema Lohwɛ̀ a òhwi nanù ema a hwɛni lì jà ò rze.”
Yerzù à mà eyaa
28O mburza ema Mata à mà òhwɛ nanù, rzìi a timbeya Màlìyɛ̀ rzìi a mò hwɛlɛ ò tòŋgòŋgò rzi a mò òhweyà nanù ema, “È Mòòkòlèlì a hwèlì anù, a ò ijò.” 29Nà òma Màlìyɛ̀ à mà hweye nanù, rzìi a ahwèŋgɛ̀ hwe tɛmelì ò lì mò ùŋma. 30Yerzù à mà hwɛ a rzi kpèelì ò mbòwà, à mà hwɛ ò eŋge èki mɛnɛ ema Mata à mà mò ùŋmanɛlɛ. 31Nà òma hwatò hwa wònyà Yudà ema hwà mà hwɛ ò ndawò ò lì arzarzɛ Màlìyɛ̀, hwà mà ɛnɛ na òma Màlìyɛ̀ ahwèŋgɛ̀ ò lì ɛndɛ ò rzɔ̀ŋgɔ̀ ya ama Làrzàrɔ̀rzì hwà mà ɔ̀ŋgɛ̀lɛ̀ nanù ema a ɛndɛ ndi àŋga ò lì eyà. O èŋgànɛ̀lɛ̀ rzɔ hwà mà mò òŋgama aŋga.
32Nà òma Màlìyɛ̀ à mà ùke aŋga òma à mà ɛnɛ Yerzù rzìi Màlìyɛ̀ a mò kpèeyà ò matàŋga rzìi a òhwa nanù ema, “Rzàŋgò ò ma hwɛ tɛ anù òma ndòmɛ̀ wa ami a rzi ŋwe.” 33Nà òma Yerzù a mà mò ɛnɛ na òma a eyà rzìi hwanɛ̀yi hwatò hvɛ hwa mò eyàna, Yerzù à mà wukumeya ò ŋmèma rzayi-rzayi rzìi a atàkìrzɛ̀. 34Rzìi à hwa ijòwa nanù ema, “One e mò imelì e?” Rzìi hwa mò òhwàna nanù ema, Rzàŋgò e, jà anu ò ɛnɛ. 35Yerzù rzìi a èya. 36Wònyà Yudà ema hwà mà ukeya aŋga rzìi hwa òhwa nanù ema, “Ò jɔ̀kɛ̀ à mà mò lìŋgana ò!” 37Ndi hwanɛ̀ hvɛ hwà mà òhwa nanù ema, “O nò mòtò à mà wɔ̀wìrzɛ̀ e ndima mòtò rzeke òma à mà gbeyà ema Làrzàrɔ̀rzì a rzi ŋwe e?”
Yerzù a tìmbirzɛ̀ Làrzàrɔ̀rzì ò lòŋgɛ
38Yerzù à mà wukumeya ŋmèma hvɛ. O èŋgànɛ̀lɛ̀ à mà ɛndɛ ò rzɔ̀ŋgɔ̀. Èŋge rzɔ̀ŋgɔ e ma hwɛ ndi rzɔ̀ŋgɔ ema e ma hvòkòwahwa ò lìŋyàyi. Hwèkpèèlì hwe ma umbahwa ndi na lìŋyàyi. 39Yerzù rzìi a òhwa nanù ema, “È ulɛ lìŋgi lìŋyàyi” ndi Mata ema à mà yahwa na Làrzàrɔ̀rzì rzìi a òhwa nanù ema, “Ìi Rzàŋgò ŋmìimbà mò eni mò mà wòteyà lì uŋgba naŋgɛ èhwanja mò ma uka menya menii ò rzɔ̀ŋgɔ.” 40Yerzù rzi a mò timbirzɛlɛlɛ nanù ema, “Nà rzi ò òhweyà ema ò lòkɛ̀yì tɛ ò ɛnɛ èluhwe yà ama Lohwɛ̀ e?” 41O èŋgànɛ̀lɛ̀ hwaŋga hwatò hwà mà iŋgòlɛ lìŋgi lìŋyàyi ò lì ulɛhwɛ ò hwèkpèèlì hwe eŋge rzɔ̀ŋgɔ. Yerzù rzìi a ɔ̀ŋgɔ ò ŋmanyu yà lohwà rzìi a òhwa nanù ema, “Tatà na èki na òma ò nò alahwànɛ̀yi màkanɛ̀ mà ami. 42Nà hwi nanù ema ò òkànèyà màkanɛ̀ ma ami ihvònda ja arzɛ, na òhwa ndi nanù aŋga nanù hwanù hwatò ema hwa ukelì anù hwa lòkɛ̀ nanù ema ò wa ndi ò nò òmi.” 43O mburza hwene hwèyòhwèlì hwe ama Yerzù, rzìi a tɛɛ na lìlò lì karzami, a hwɛlɛ Làrzàrɔ̀rzì ama, “Ìi Làrzàrɔ̀rzì wurza!” 44Oŋgò mòtò ema à mà ŋwa rzi a tɛ̀mɛ̀. Lìhwatù ema hwà mà mò lìŋgɛ̀lɛ̀nɛ matàŋga, màa nà wòrzò wò eni lì mà mò hwɛ ò nyò nanù mɛnɛ. Yerzù rzìi a hwa òhweyà nanù ema, “È mò wuluwe lìŋgi lìhwatù ò nyò ya eni a ɛndɛ e ya eni.”
Ŋmanò mò lì òŋwa Yerzù
(Mat 25.1-5; Mak 14.1-2; Luk 22.1-2)
45Rzayì-rzayì ja hwatò hwa wònyà Yudà ema hwà mà ja lì arzarzɛ Màlìyɛ̀ hwà mà ɛnɛ mamɛ ema e ma gbèyɛ̀nɛ, hwà mà lòkɛ̀ Yerzù. 46Lòŋgò hvɛ hwà mà ɛ̀ndɛ lì ùŋma Ihvàlìrzàyì rzìi hwa hwà òhweyà mamɛ Yerzù à mà gbeyɛ. 47Aŋga ndi Ipìlìrzì ndɛnɛ nà Ihvàlìrzàyì ja arzàŋganɛ ò ndòŋgamɛni, hwà mà òhwa nanù ema, “Mamɛ i gbeyà naŋgɛ e? I hwɛni lì gbeyà eyà èhwanja ònò mòtò a gbeyà hweyà rzayi-rzayi hwe mànyakà. 48I mò hwɛmì tɛ ò lì gbeyà hwenè hweyà nanù hwatò hwa arzɛ hwa mò lòkɛ̀ hwatò hwa Ròmànì hwa jà lì wòwà e Ndawò yarzu yà Lohwà nà èkòmè yarzu.” 49Rzìi mòtò mɔ̀kɔ ò ìtììtènì ja awu ema à mà hwɛ̀lɛ̀hwɛ̀ Kàyìhvàrzì mɔ̀ ndi hvɛ à mà hwɛ è Pìlìrzì ema è kàrzamì ò mòŋgò ŋma rzìi à òhwa nanù ema, “È rza hwi tɔ̀ eyà! 50È rza lutelì nanù ema ò lɔ̀wu mòtò mɔ̀kɔ à jò ŋwèeyà irzɔ hwa arzɛ lì aka nanù ema èkòmè yà arzɛ è hvàŋgahwè e?” 51À rza òhwe ndi ene eyà nà mɔ̀ mɛ̀nɛ. Nà òma mɔ̀ndi à mà hwɛ è Pìlìrzì ema è kàrzamì ò mòŋgò ŋma, à mà hwɛ rzɔ ndi lì òhwa eyà ema è ò gbèyɛ̀nɛ ò è hvònda ema è ò jɛ̀ɛ̀, ema Yerzù à ŋweya ndi wònyà Yudà. 52Rzekɛtɛ ò wònyà Yudà mɛnɛ ndi ò lì rzàŋga hwatò hwa arzɛ hwa ama Lohwɛ̀ ema hwa wuhwèlì ò èki yɔ̀kɔ, aŋga nanù hwa hwɛ mòtò mɔ̀kɔ.
53Lìwòteyà èŋge hvònda, hwàkànèlì hwa wònyà Yudà hwa wòteya lì ŋya ŋmanò ò lì òŋwa Yerzù. 54Ène eyà e ma gbeyà Yerzù a rzìi hwɛ lì wurza hvɛ ò ìtììtènì ja wònyà Yudà. Rzìi mɔ̀ na hwà-òkòwèlì hwa eni hwà mà anjiya rzìi hwa ɛ̀ndɛ ò èkòmè ema e ma hwɛ̀lɛ̀hwɛ̀ Èhvlèmì, rzìi hwa lìya aŋga. Èŋge mbòwa e ma kòmbɛnɛ mòrzanjɛ̀. 55È hvònda ya è Ndèma yà lì Akà Ɔ̀nɛ̀yi è mà kòmbɛnɛ. O èŋgànɛ̀lɛ̀ rzayi-rzayi ja hwatò hwà mà uwɛ̀lɛ̀lɛ̀yi ò màmbowà mà arzɛ hwà mà ja ò Jèrurzalɛ̀mù lì a tatòwɛ na òma e mbenda ya ama Mòrzè e ma arze, ò lì wòŋgirzɛnɛ è Ndèma yà lì Akà Ɔ̀nɛ̀yi. 56Hwàŋga hwatò hwa wònyà Yudà hwà mà hwɛ lì arza Yerzù nanù mɛnɛ. Ndi na òma hwà mà arzàŋganɛ ò Ndawò yà Lohwà, rzìi hwa a àyijòwànɛ̀yi mɔ̀kɔ na ɔ̀nɛyi nanù ema, “Mamɛ ò ɔ̀ŋgɛ̀lɛ̀ e? È lòkɛ̀ nanù ema a ò jà ò ndèma e?” 57Ipìlìrzì ndɛnɛ na Ihvàlìrzàyì hwà mà akɛ̀lɛ̀ e njàmbɛ̀ nanù ema, “Tɔ̀ njɛnɛ ema a hwi èki ema Yerzù a hwèlì a je a hwa òhweyà aŋga nanù òma hwà mà mò ŋgbaŋgɛ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, CABTAL