Yòwanìrzɛ̀ 6

Yerzù à mà lìrzɛ rzayi-rzayi ja hwatò

(Mat 14.13-21; Mak 6.30-44; Luk 9.10-17)

1Ò mburzà yà hwenè hweyà Yerzù nà hwà-òkòwèlì hwa eni hwa mà aka ɔ̀nɛyi èhvàrzù yà yùlù yà Gàlìlì è mà e hwɛ̀lɛ̀hwɛ̀ yùlù yà Tìbɛ̀rìyàrzì. 2Ŋgindi ndɛnɛ è mà hwɛ lì mò òŋgama èhwanja hwa mà hwɛ lì ɛnɛ mànyakà mà hweyà ema à mà hwɛ lì gbèye mà lì wɔ̀wìrzɛ̀ là hwà-òkòlèlì. 3Yerzù à mà agba ò mòòlì rzi a lìya ò rze na hwà-òkòwèlì hwa eni. 4È mà hwɛ ndi e hvònda ema è Ndèma yà lì Akà ɔ̀nɛ̀yi yà wònyà Yudà ema kòmbɛ̀nɛ̀. 5Nà òma Yerzù à mà kàrzɛ mììrzɔ̀ mà eni, rzìi à ɛ̀nɛ̀ è ŋgindi yà hwatò ema è mà hwɛ lì mò jèeyà. Rzìi à ijòwa Hvìlìpì nanù ema, “One ì tànɛyi lì ànda mòlèlì ò lì lìrzɛ̀ hwanù hwatò hwa arzɛ e?” 6Yerzù à mà kèkìrzɛ̀ ndi Hvìlìpì èhwanja Yerzù à mà hwiya mamɛ ema à mà hwɛnɛ lì gbeyà. 7Hvìlìpì rzìi à mò alàhwɛ̀ nanù ema, “È wòwà lì aka eyà yà egbe hwèhwàkɛ̀ hwe hwekòlì hwe hvìlàŋgì ò lì anda mòlèlì ema mò tànɛyi lì lìrzɛ̀ hwanu hwatò hwa arzɛ aŋga nanù tɔ̀ ima mòtò à làa tenyi.” 8Rzìi òhvɛhvɛ Mòòkòwèlì hwa ama Yerzù, Àndèlè Rzimɔ̀ni Pètrò ŋmanyàŋgò wà eni à òhwa nanù ema, 9“Ò hwèlì è rzɔ̀mbɛ yà ŋmanà wà munyanà anù ema à òhvi hwèhvòòtò hwèta ema hwe gbeyàhwɛnɛyi nà mbarzi jà balì, à òhvi hvɛ hwàanà nyàmà ja malìhwa ihwakɛ. Ndi nɛ mònò mòlelì mò tànɛyi lì lìrzɛ ene ŋgindi ya hwatò e?” 10Yerzù rzìi à òhweyà hwà-òkòwèlì hwa eni àma, “Ohweyà hwanu hwatò hwa lìya ò rze.” Hwèwùle hwe mà aka lì kòka ò eŋge èki. Ò èŋgànɛ̀lɛ̀ hwaŋga hwatò hwa arzɛ hwa mà lìya ò rze. Ò ìtììtènì jà eŋge ŋgindi ò mà hwɛ hwekòlì hweta hwe wùnyànà. 11Yerzù rzìi à wòwà hwèŋge hwèhvòòtò, à ŋgbà Lohwɛ̀ jèka, rzìi à ŋgba hwà-òkòwèlì hwa eni rzìi hwa kahweyà hwatò. Ò mburzà yà nanù à mà gbeyà hvɛ nanù nà iŋgi nyàmà. Tɔ̀ ima mòtò à mà làa nà òma à mà arze. 12Nà òma wɔ̀ hwa arzɛ hwà mà lèè hwà mà ujè, Yerzù rzìi a òhweyà Hwà-òkòwèlì hwa eni nanù ema, “È rzàŋge rzɔ nàŋgɛ mòlelì mò arzɛ ema mò lìyelì. Tɔ̀ mòlelì mò rzi hvaŋgeyà.” 13O èŋgànɛ̀lɛ̀ hwa mà kulɛ lì laa, rzì hwa rzàŋga mòlelì mò arzɛ ema mò ma lìiya mò mà ònda lìyòmɛ̀ la ŋgata na ihwàkɛ. 14Nà òma hwaŋga hwatò hwà mà ɛnɛ manù mànyakà ma eyà ema Yerzù à mà gbeye rzìi hwa òhwa nanù ema, “O tɛ̀ɛtɛ̀ɛ e Mòòhwèlì wà èlìŋgɛ̀ ònò ema hwà mà òhwe ema a jà ò rze.” 15Yerzù a mà hwiya nanù ema hwà mà arza lì mò lɛmbɛ ò lì mò gbeyà ema a hwɛ̀ e kiŋgɛ̀. O èŋgànɛ̀lɛ̀ à mà timba lì agba hvɛ ò mòòlì.

Yerzù à mà ɛ̀ndɛ ò ŋmanyu yà malìhwa

(Mat 14.22-33; Mak 6.45-52)

16O èŋge ŋgòmbe mɛnɛ Hwà-òkòwèlì hwà mà Yerzù hwà mà rzihwa ò mòkòkò mò yùlu. 17Hwà mà kpèeyà rzɔ ò wɔ̀lɔ̀, ò lì aka yùlu, hwà mà hwɛ ndi lì ɛndɛ ò èhvàrzù ya Kàpɛ̀nàwɔ̀mì. Jììtìtì i ma rzìhwa ema Yerzù a rzi uki èki ema hwà mà hwɛ. 18O eŋge hvònda, mùulì nà è mbɛ̀hvɛ̀nì hwe ma aka, rzìi malìhwà mà hvùŋguweyà. 19Hwa mà luka eyà yà màyìlì màyawò tɔ̀ mànìi rzìi hwa ɛnɛ Yerzù à ɛ̀ndɛ ò ŋmanyu yà malìhwa rzìi a jèeyà wɔ̀ɔ̀lɔ̀ wò awu. Hwà mà lɛmbeya mòkambiya mò ŋginyà. 20Àŋga ndi Yerzù a hwa òhwàna nanù ema, “È rza òka wɔ̀ŋgɔ̀, imba.” 21Àŋga ndi hwa mò kpɛlɛ ò wɔ̀lɔ̀ na mɔ̀nyɛ̀ŋgì, ò lìwòkimɛnɛ rzìi hwa uka èki ema hwà mà hwɛ lì ɛ̀ndɛ.

Yerzù ndi à hwèlì ehvòòtò ema e ŋgbàà lòŋgɛ

22O ɛnɛyi eka ya elele e ŋgìndì ya hwatò ema e ma lìiya ò eŋge ehvàrzu ya yùlu ema Yerzù na hwà-òkòwèlì hwa eni hwà mà uwɛlɛlɛ, wɔ̀ hwà mà hwiya nanù ema e ŋgòmbe e màa aka, wɔ̀lɔ̀ wɔ̀kɔ wɔ̀ ndi wò ma hwɛ aŋga. Ndèŋgana wɔ̀ hwà mà hwiya nanù ema Yerzù a rzi kpèeyà ò wòŋgò wɔ̀lɔ̀ na hwà-òkòwèlì hwa eni. Hwà mà hwiya nanù ema hwà-òkòwèlì hwa eni mɛnɛ ndi hwà mà ɛndɛ. 23Rzayì-rzayì ja mɔ̀lɔ̀ ma uhwɛlɛ ò mbòwa ya Tìbɛ̀rìyàrzì ma mà rzɛ̀wɛ̀hwɛ̀ lì kòmbɛ̀nɛ̀ èki ema e ŋgindi e ma lèeyà hwèhvòòtò ò mburza hvònda ema Rzàŋgò à mà ŋgbe Lohwɛ̀ jèka. 24Nà òma e ŋgìndì ya hwatò e ma ayèmbɛ nanù ema Yerzù na hwà-òkòwèlì hwa eni hwa rzi hwɛ aŋga, hwà mà kpèeyà ò maŋga mɔ̀lɔ̀ rzìi hwa aka ɔ̀nɛyi lì ɛndɛ ò Kàpɛ̀nàwɔ̀mì ò lì arza Yerzù.

25È hvònda ema hwaŋga hwatò hwa mà uke ò enɛyi èhvàrzù ya yùlu rzi hwa ɛnɛ Yerzù. Hwà mà mò ijòwa nanù ema, “Ìi Mòòkòlèlì, ima hvònda ò wa ò ùkelì anù e?” 26Yerzù rzìi a hwa alàhwɛ̀ nanù ema, “Nà è òhweyà e jɔ̀kɛ̀ ema e nò arza ndi èhwanja nà mà e lìrzɛ e ma uja rzeketɛ ò mànyakà ema nà mà gbeye. 27È rza atàkìrzɛ̀ ò mòlelì ema mò hvaŋgeyà, ndi è atàkìrzɛ̀ ndi ò mòlelì ema mò ò hwɛ̀ɛ natɛ̀ɛ na ò gbìndèyà mòŋgò mòlelì ndi mò ŋgba lòŋgɛ ema lì rza kuwa. Mòŋgò mòlelì ndi è Ŋmanà wà è Mòtò wà Hwènàmà a ò e ŋgba. Mɔ̀ ndi Tatɛ̀ Lohwɛ̀ à mà ika èèmbanelì ò lì gbeyà nanù.” 28Hwàŋga hwatò hwà mà ijòwa Yerzù nanù ema, “Mamɛ i tànɛyi lì gbeyà ò lì arza nanù ema i gbèye hweyà ema Lohwɛ̀ arza nanù ema i gbeye e?” 29Yerzù rzìi a hwa alàhwɛ̀ nanù ema, “Èya ema Lohwɛ̀ a arza ema e gbeye e hwèlì ndi nanù ema e nò lòkɛ̀ imba ema mɔ̀ à òmi.” 30Hwa mà alàhwɛ̀ Yerzù nanù ema, “Ima eyà ya mànyakà ema ò gbeyà i ɛnɛ rzi i ò lòkɛ̀ e? Mamɛ ò tànɛyi lì gbeyà ò tɛ̀ɛ̀tɛ̀ɛ e? 31Imbamba ja arzu ja kòhwà hwà mà laa mana ò mòrzanjɛ̀, na òma e tìlahwì ò kààtì ya Lohwà nanù ema, ‘A ma hwa gba hwèhvòòtò ò lì laa ema hwe ma uhwɛlɛlɛ ò ŋmanyu yà lohwà.’” 32Yerzù rzìi à hwa alàhwɛ̀ nanù ema, “Nà è òhweyà è jɔ̀kɛ̀, rzeketɛ Mòrzè ndi à mà è ŋgba hwèhvòòtò ema hwe mà uhwɛlɛlɛ ò ŋmanyu. Ndi Rzàŋgò hwa ami ndi à mà è ŋgbà hwèhvòòtò ema hwe mà uhwɛlɛlɛ ò ŋmanyu yà Lohwà. 33Èhwanja imba ndi nà hwèlì eŋge èhvòòtò ema Lohwɛ̀ à ŋgba, ema è uhwɛlɛlɛ ò ŋmanyu yà lohwà, ema è ŋgba hwatò hwa ene rze lòŋgɛ.”

34Hwa mà mò alàhwɛ̀ nanù ema, “Rzàŋgò è ò jò ŋgbè ene èhvòòtò wùnyà tɛ.” 35Yerzù rzìi à hwa alàhwɛ̀ nanù ema, “Imba ndi nà hwèlì èhvòòtò ema è ŋgba lòŋgɛ là gbìndèyà.” Tɔ̀ njɛnɛ ema à nò jɛ̀lɛ̀lɛ̀yi à rza ò hwèya njàwò hvɛ. Tɔ̀ njɛnɛ ema à nò lòkɛ̀yì à rza òhva nyìrzɛ̀ hvɛ. 36Nà è òhweyà nanù ema inyɔ è mà màà lì nò ɛnɛ ndi è rza nò lòkɛ̀. 37Hwatò hwa arzɛ ema Tatɛ̀ wà ami à nò ŋgbelì hwa ò nò jèeyà. Tɔ̀ njɛnɛ ema à nò jɛ̀lɛ̀lɛ̀ nà rza mò rzɔ̀rzɔ̀. 38Èhwanja na rza uhwɛlɛlɛ ò ŋmanyu yà lohwà ò lì jà lì gbeyà hweyà na òma na lìŋgàni. Nà jelì ndi ò lì gbeyà na òma Tatɛ̀ wa ami ema a nò òmi a àrzeyà. 39Ndèŋgànɛ̀lɛ̀ lì lùtèyà la ama e mɔ̀ ema a nò òmi lìini ema ò ìtììtènì ja hwatò hwa arzɛ ema a nò ŋgbelì, na rza wɔ̀lɛ̀nɛ̀ tɔ̀ mɔ̀kɔ, ndi ema na hwa hvùmùlɛ̀ hwa arzɛ ò wùnyà wò lìrzukù. 40Tatɛ̀ wa ami arza nanù ema, tɔ̀ ima mòtò ema a ɛni e Ŋmanà rzìi a mò lòkɛ̀ a ò luwa lòŋgɛ la gbìndèyà. Ndeŋgana imba na ò hwa hvùmùlɛ̀ ò wùnyà wò lìrzukù.

41Hwàŋga hwatò hwa wònyà Yudà rzìi hwa wòteyà lì tɔ̀kìrzɛ̀nɛ̀ Yerzù èhwanja à mà òhwa nanù ema, “Imba ndi nà hwèlì èhvòòtò ema è uhwɛlɛlɛ̀ ò ŋmanyu yà lohwà.” 42Hwa mà òhwa hvɛ nanù ema, “Rzeke Yerzù è ŋmana wà ama Jòrzɛ̀hvù ònò, e? Rzeke I hwi rzàŋgɛ na nyàŋgɛ e? Nɛ̀ rzɔ a tànɛyi lì òhwa naŋgɛ nanù ema a uwɛ̀lɛ̀lɛ̀yi ndi o ŋmanyu ya Lohwà e?” 43Ndi Yerzù ama timbirzɛlɛlɛ nanù ema, “È rza àyiŋgòwɛ̀. 44Ndi tɔ̀ mɔ̀kɔ a rza tànɛyi lì nò jèeyà e rza enje tɛ nanù ema, Tatɛ̀ ema a nò òmi mɔ̀ ndi à nò jàneyà e mɔ̀. Ndèŋgànɛ̀lɛ̀, imba na mò hvùmùlɛ̀ ò wùnyà wò lìrzukù. 45È tìlahwì na òma hwà-òhwèlì hwa hwèlìŋgɛ̀ hwa òhwi nanù ema, ‘Lohwà a ò hwa òkòlɛ wɔ̀ hwa arzɛ.’ Tɔ ima mɔ̀ ema a hweyàni Tatɛ̀ rzìi a òkòwa a nò jèeya imba. 46È rza enje nanù ema mòtò à mà ɛnɛ Tatɛ̀. È mɔ̀ ema a uwɛ̀lɛ̀lɛ̀yi ò ma Lohwɛ̀, mò ŋmìti ndi à mà ɛnɛ Tatɛ̀. 47Nà e òhweyà ndi e jɔ̀kɛ̀, tɔ̀ njɛ ema a nò lòkɛ̀yì a ò luwa lòŋgɛ la gbìndèyà. 48Imba ndi nà hwèlì èhvòòtò ema è ŋgba lòŋgɛ. 49Imbamba ja anyu ì mà là mana ò mòrzànjɛ, ndi tɔ̀ nanù hwa mà ŋwa. 50Ndi èhvòòtò ema è uwɛ̀lɛ̀lɛ̀yi ò ŋmanyu yà Lohwà è hwèlì ndi eŋge nyayi ema tɔ̀ ima mɔ̀ ema à è lelì à rza ŋwa. 51Imba ndi nà hwèlì èhvòòtò ema è ŋgba lòŋgɛ ema è uwɛ̀lɛ̀lɛ̀yi ò ŋmanyu yà Lohwà. Tɔ̀ njɛnɛ à lelì ene èhvòòtò, à hwɛnɛ lòŋgɛ ema lì rza kùwa. Ndèŋgànɛ̀lɛ̀ ene èhvòòtò ema nà è ŋgba è hwèlì ndi è nyò yà ami ema nà ò ŋgba ò lì rzùŋga lòŋgɛ là ene rze.”

52Hwàŋga hwatò hwà mà hweye nanù, hwà mà tata, hwa wòteya lì tɔ̀kirzɛnɛ wɔ̀ na wɔ̀, rzi hwa ijòwanɛ nanù ema, “Nɛ ònò mòtò a àŋgàmɛ̀nɛyi lì jò ŋgbà e nyàmà nyò ya eni ema i lee e?” 53Yerzù rzìi a hwa òhweyà àma, “Nà e òhweyà ndi e jɔ̀kɛ̀ e rza lelì tɛ e nyàmà nyò ya ama è Ŋmanà wà è Mòtò wà Hwènàmà rzi e nyɔ hvɛ màyija ma eni e rza tànɛyi lì òhva lòŋgɛ la gbìndèyà. 54Ndi tɔ̀ njɛnɛ ema a lelì e nyàmà nyò ya ami rzi a nyɔ hvɛ màyija ma ami a ò luwa lòŋgɛ la gbìndèyà ndèŋgàna na hvùmùlɛ̀ òŋgò mòtò ò wùnyà wò lìrzukù. 55È nyàmà nyò ya ami rzɔ e hwèlì mòlelì mò tɛ̀ɛ̀tɛ̀ɛ màyija ma ami mò hvɛ ma hwèlì ndi hwènyɔ̀ɔ̀nì hwe tɛ̀ɛ̀tɛ̀ɛ̀. 56Tɔ njɛnɛ ema a lelì e nyàmà nyò ya ami rzìi a nyɔ hvɛ màyija ma ami à hwèlì ndi na imba ndèŋgànɛlɛ imba hvɛ na hwèlì ndi na mɔ̀. 57Tatɛ̀ ema a gbèyi ema hwatò hwa hwɛ lòŋgɛ mɔ̀ ndi hvɛ a na òmi, mɔ̀ ndi hvɛ a gbèyi ema na hwèlì lòŋgɛ. Nànù ndi e hwèlì na tɔ̀ njɛnɛ hvɛ ema a lelì e nyò ya ami na mò gbeyà a hwɛ lòŋgɛ. 58O èŋgànɛ̀lɛ̀ imba ndi nà hwèlì èhvòòtò ema è uwɛ̀lɛ̀lɛ̀yi ò ŋmanyu yà lohwà. Nà rza enje ndi nàa èhvòòtò ema imbamba jà anyu ì mà lee tɔ̀ nɛ wɔ̀ hwa mà ŋwe. Ndi tɔ̀ njɛnɛ ema à ò lɛɛ è nyàmà nyò yà ami à ò hwɛnɛ ndi lòŋgɛ ema lì rza ò kuwa.”

59Yerzù à mà òhwa ndi hwenè hweyà hwe arzɛ e hvònda ema à mà hwɛ lì òkòlɛ ò tenì ya e ndawò ya màkanɛ̀ ò mbòwa ya Kàpɛ̀nàwɔ̀mì.

Hweyà hwe ama Yerzù hwe jànà lòŋgɛ là gbìndèyà

60Rzayì-rzayì ja hwatò ema hwà mà hwɛ lì òŋgama Yerzù na òma hwà mà hweye hwene hweyà rzìi hwa òhwa nanù ema, “Hwene hwèyòkòlèlì hwe ambi ò lì rzɔ̀ŋgìtɛ̀nɛ̀, njɛnɛ mɔɔ a tànɛyi lì e emeyà lìni lìtumba la eyà e?” 61Yerzù a mà ayèmbɛ nanù ema hwà mà hwɛ lì àyiŋgòwɛ̀ lì mò hvòmɛ̀nɛ̀, rzi a hwa òhweyà nanù ema, “Ènè eyà ye e tàtìrzɛ̀ e? 62Mamɛ e òhwa e ɛni tɛ è Ŋmanà wà è Mòtò wà Hwènàmà a kòòhwa tɛ lì timba ò èki ema à mà uwɛ̀lɛ̀lɛ̀yi! 63Èlìŋgɛ̀ yà ama Lohwɛ̀ yɔ ndi e hwèlì e yɔ ema e ŋgba lòŋgɛ. È nyàmà nyò e rza enje tɔ̀ eyà. Hweyà ema nà mà e òhweyà hwe hwèlì ndi èlìŋgɛ̀ na lòŋgɛ. 64Ndi ò hwèlì lòŋgò la hwa inyɔ ema e rza lòkɛ̀yì.” (Li wòteyà lìrzakò ema Yerzù à mà wòteyà lì òkòlɛ à ma hwiya hwatò ema hwa rza lòkɛ̀ ndèŋgàna hwà mà hwɛnɛ lì mò àhwirzɛ̀). 65Yerzù rzìi a hwa òhweyà nanù ema, “Nànù ndeŋgatɛ nà mà òhwa nanù ema tɔ̀ mòtò a rza tànɛyi lì nò jèeya natɛ̀ɛ Tatɛ̀ wa ami a mò gbeyà ema a nò jèeya.”

66Lìwòteyà eŋge hvònda, ene eyà e ma gbeyà hwatò ema hwà mà hwɛ lì nɔŋgɔ Yerzù hwà mà hwɛmɛ ò lì mò nɔŋgɔ rzi hwa timbeya ò mburza. 67Yerzù rzìi a ijòwa lìyòmɛ̀ la eni la hwà-òkòwèlì na hwahwàkɛ nanù ema, “Inyɔ hvɛ e arza lì timbeya ò mburza e?” 68Rzimɔ̀ni Pètrò rzi a timbirzɛlɛlɛ ama, “Rzàŋgò e, òma njɛnɛ irzɔ jɛ̀ɛ ɛ̀ndɛ e? O wa ndi òhvi e mbɔrzi ema e ŋgbà lòŋgɛ la gbìndèyà. 69Irzɔ i lòkɛ̀yì ndèŋgàna i hwi nanù ema ò wa ndi ò hwèlì e Mɔ̀ wa Wòtani ema a uwɛ̀lɛ̀lɛ̀yi ò ma Lohwɛ̀.” 70Yerzù rzìi a hwa alàhwɛ̀ nanù ema, “Rzeke nà mà è hvɔ̀rzɔ̀ inyɔ lìyòmɛ na hwahwàkɛ ndi mɔ̀kɔ hwa anyu a hwèlì ndi mòkarzɛ̀” 71A mà hwɛ ndi lì òhwàna Jùdàrzì e ŋmanà wà ama Rzimɔ̀ni Ìrzìkalìyɔ̀tɛ̀. Tɔ nɛ à mà hwɛ ndi mɔ̀kɔ hwa lìyòmɛ̀ la eni la hwà-òkòwèlì na hwahwakɛ mɔ̀ ndi à mà hwɛnɛ lì àhwirzɛ̀ Yerzù.

Currently Selected:

Yòwanìrzɛ̀ 6: bri

Highlight

Copy