Yòwanìrzɛ̀ 8

1Yerzù à mà ɛ̀ndɛ ò hvàko ya Olìhvi. 2O elele, à mà wòŋgìrzɛ̀nɛ̀ hvɛ ò hwèkpèèlì hwe e ndawò yà màkanɛ̀. Èki ema hwatò hwa arzɛ hwà mà mò jèeya hwa mò tòŋga, rzìi mɔ̀ à lìya ò rze ò lì hwa òkòlɛ̀. 3Hwà-òkòlèlì hwa mbenda nà Ihvàlìrzàyì, rzìi hwa kpeyana mòlanà mɔ̀kɔ ema hwà mà lɛ̀mbɛ ò mòrzònje. Hwà mà mò tɛmirzɛ ò wòrzò wò èŋge ŋgìndì. 4Rzìi hwa òhweyà Yerzù nanù ema, “Ìi Mòòkòlèlì, ònò mòlanà i mò lɛ̀mbi ò tenì ya mòrzònje. 5O tenì ya mbenda ya ama Mòrzè, à mà jò kànèyà ama ene tumba mòlanà i hwɛni ndi lì mò ùŋma mànyayi. Ndì mamɛ ò wa ò òhwi e?” 6Wɔ̀ hwà mà gbeyàna ndi mene miijòwelì nàa ŋgundèli, ò lì lùwa njɔ̀mi ò lì mò hwɛlɛ. Ndi Yerzù mɔ̀ à mà ujama ò rze, rzìi a wòteya lì tìla na jɔ̀nɔ ja eni ò mɔ̀nyɛ̀ nàa a rzì hweye mamɛ hwà mà òhwe. 7Wɔ̀ hwà mà tìmba hvɛ lì mò ijòwa mene miijòwelì. Rzìi à tɛ̀mɛ̀, a hwa òhweyà nanù ema, “O hwèlì tɛ mɔ̀kɔ wa anyu anù ema a rza òhvɛ wòhwe, inyɛ mɔ̀ à hwɛ e wa wòrzò ò lì mò aŋgba lìŋyàyi” 8A tìmba hvɛ lì ujamà ò rze, ò lì tìla hvɛ ò mɔ̀nyɛ̀. 9Anu nàŋgɛ, hwaŋga hwatò ema hwà mà hwèya nanù, rzìi hwa wòteya lì ɛ̀ndɛ, e ɛkɔnji ya awu e ma gbeyà hwà mà hwiya matònà mà awu mɔ̀kɛ-mɔ̀kɛ. È wɔ̀ ema hwà mà rzɔ̀ɔ mòkèka hvɔni lì uka na ò mèlɔ̀kɛ, nàtɛ̀ɛ Yerzù mɔ̀ ŋmìti ndi à mà lìiya aŋga na òŋgò mòlanà. 10Yerzù rzìi a tɛ̀mɛ̀nɛ ò ŋmanyu, a rzi ɛnɛ hvɛ tɔ̀ mòtò lì aka tɛ òŋgò mòlanà mɛnɛ. A mò ijòwa nanù ema, “Mòlanà òne wɔ̀ hwa hwèlì e? Tɔ̀ mòtò tɔ̀ mɔ̀kɔ a rza ò tùulɛ̀ e?” 11Oŋgò mòlanà à mà mò alàhwɛ̀ nanù ema, “Wa èluhwe kòkò, tɔ̀ mɔ̀kɔ.” Yerzù rzìi a mò òhweyà nanù ema, “Tɔ̀ imba hvɛ na rza ò tùulɛ̀. Ɛ̀ndɛ nàŋgɛ ò hwɛmɛ lòŋgɛ lì aŋgɔ̀ la wòhwe.”

È jɔ̀kɛ̀ lì hvòmɛ̀nɛ̀ e mbòŋgi yà ama Yerzù

12Yerzù à mà òhwìrzɛ̀nɛ̀ hvɛ hwatò, à mà òhwa nanù ema, “Imba ndì na hwèlì etùlù ya e rze. È mɔ̀ ema a nò nɔŋgi a rza tanɛ lì ɛ̀ndɛ ò jìtìtì, ndi à ò hwɛnɛ etùlù ya lòŋgɛ.” 13I Hvàlìrzàyì rzìi hwa mò teŋgɛ̀nɛ̀ nanù ema, “O wa ònò, ò atɛ̀mɛ̀lɛ̀ e ya aŋgɔ̀ mbòŋgi, e mbòŋgi ya aŋgɔ̀ e rza hvòmɛ̀nɛ̀.” 14Yerzù rzìi a hwa alàhwɛ̀ nanù ema, “Tɔ̀ na òma na atɛ̀mɛ̀lɛyi e mbòŋgi, hwe òhwèlì hwe ami hwe hwèlì ndì e jɔ̀kɛ̀, èhwanja na hwi èki ema na uwɛ̀lɛ̀lɛ̀yi, na èki hvɛ ema na ɛ̀ndɛ. Ndi inyɔ e rza hwi èki ema na uwɛ̀lɛ̀lɛ̀yi tɔ̀ èki ema na ɛ̀ndɛ. 15Inyɔ e kàyìrzɛ̀ ndi hwetɛmelì hwe ami hwe mòtò wa hwènàmà, imba na rza kàyìrzɛ̀ tɔ̀ mòtò mɔ̀kɔ 16Ndi na kàyìrzɛ̀ tɛ, e mbakò ya ami e hvomɛ̀nɛ̀, èhwanja na rza enje imba mbiti. Nà tɛmi ndi na Rzàŋgò ema e nò òmi 17O mbenda ya anyu, e tìlahwì ema e mbòŋgi ya hwatò hwahwàkɛ e hwiyahwi. 18Imba na hwèlì ndi mɔ̀kɔ ema na atɛ̀mɛ̀lɛ̀ e mbòŋgi, e Rzàŋgò hvɛ ema e nò òmi, mò hvɛ a nò tɛmelì mbòŋgi.” 19Rzìi hwa mò ijòwa nanù ema, “One e Rzàŋgò ya aŋgɔ̀ yɔ e hwèlì e?” Yerzù rzìi a hwa timbirzɛlɛlɛ nanù ema, “È rza nò hwi imba tɔ̀ Rzàŋgò wa ami. È ma nò hwiya tɛ ò mà è hwi hvɛ Rzàŋgò wà ami.” 20Yerzù à mà òhwa ndi hwenè hweyà nà òma mɔ̀ à mà hwɛ lì òkòlɛ̀ ò Ndawò yà Lohwà. Lì kòmbɛ̀nɛ̀ èki ema hwà mà aŋgbeyà e njàŋge ya e Ndawò yà Lohwà. Ndi tɔ̀ mòtò a rzi tanɛ lì mò hvùma, èhwanja e hvònda ya eni e rzi ùke. 21Yerzù à mà hwa òhweyà hvɛ ŋgèlì hvɔ̀kɔ nanù ema “Imba, nà ò ɛ̀ndɛ è yà ami, ndèŋgànɛ̀lɛ̀ è ò nò arza, ndèŋgàna è ŋwèeyà ò wòhwe wò anyu. Èki ema nà ɛ̀ndɛ, è rza tànɛ̀yi lì jà” 22Ène mbɔrzi è mà gbeyà hwatò hwa Yudà hwa mà ijòwa nanù ema, “À ò à òŋwɛ mɔ̀ ŋmìti e?” Èhwanja mɔ̀ à òhwa nanù ema, “Èki ema nà ɛ̀ndɛ, inyɔ è rza tànɛyi lì jà e?” 23Ndi Yerzù à mà ɛ̀ndɛnɛ e mbɔrzi ya eni ò wòrzò ò lì òhwa nanù ema, “Inyɔ e uwɛ̀lɛ̀lɛ̀yi ndi ò rze. Imba na uwɛ̀lɛ̀lɛ̀yi ò ŋmanyu. Inyɔ e hwèlì ndi hwatò hwa ene rze. Imba na rza enje wa ene rze. 24Nà ma e òhweyà ema e hwɛnì lì ŋwèeyà ò wòhwe wò anyu, e hwèlì tɛ ema e rza lòkɛ̀ tɛ ema imba na hwèlì ndi e mɔ̀ ema na òhwi nanù ema na hwèlì. Ò jɔ̀kɛ̀ inyɔ e ò ŋwaànà wòhwe wò anyu.” 25Hwà mà mò ijòwa nanù ema, “Ò wà ò hwèlì ndi njɛ e?” Yerzù rzìi a hwa timbirzɛlɛlɛ nanù ema, “Nà hwèlì ndi e mɔ̀ ema na hwèlì lì aàtɛ ene hvònda ya arzɛ. 26Nà òhvi hweyà rzayì-rzayì ò lì e òhweyà, na lì e kàyìrzɛ̀. Ndi e mɔ̀ ema à mà nò òma, a hwèlì ndi wa jɔ̀kɛ̀. Ndeŋga tɔ̀ mamɛ ema nà mà mò hweyànɛ, na òhweyà e rze.” 27Wɔ̀ hwa rzi rzɔ̀ŋgìtɛ̀nɛ̀ ema à mà hwɛ ndi lì hwa òhweyà lì hvòmɛ̀nɛ̀ Rzàŋgò wa eni. 28O èŋgànɛ̀lɛ̀ Yerzù rzìi a hwa òhwàna nanù ema, “È hvònda ema e ò kàrzɛ è Ŋmanà wà è Mòtò wà Hwènàmà ò ŋmanyu, lìŋgi lìrzakò òma e ma hwiya ema imba na hwèlì ndi e mɔ̀ ema na òhwa e ma na hwèlì. Ndèŋgànɛ̀lɛ̀ hvɛ ema, ò imba mbiti na rza gbeyà tɔ̀ eyà, ndi na òma Tatɛ̀ à mà nò òkòlɛ̀ na òhwa hwene hweyà. 29È mɔ̀ ema à mà nò òma a hwèlì na imba. Mɔ̀ a rza nò rzɔnjɛ̀lɛ̀ na imba mbiti, èhwanja na hwèlì ndi ò lì gbeyà mamɛ ema e mò lìŋgìrzɛ hvònda tɛ.” 30Nà òma Yerzù à mà hwɛ lì òhwa nanù, hwatò rzayì-rzayì hwà mà mò lòkɛ̀.

Hwàanà hwa ama Abràhamù

31Hwàŋga hwatò hwa Lohwà ema hwà mà lòkɛ̀ Yerzù mɔ̀ à mà hwa òhweyà nanù ema, “È alɛ̀mbɛnɛyi tɛ hwèyòkòlelì hwe ami, ò ma e hwèlì ndi Hwà-òkòwèlì hwa ami hwa jɔ̀kɛ̀. 32Àŋga nanù e hwiya e jɔ̀kɛ̀, ndèŋgànɛ̀lɛ̀ èŋge jɔ̀kɛ̀ yɔ ndì ye ŋgba wònjà.” 33Wɔ̀ hwà mà mò alàhwɛ̀ nanù ema, “Irzɔ i hwèlì ndi e nyɔ̀ŋgɔ̀nì ya ama Abràhamù. Ndèŋgànɛ̀lɛ̀ hvɛ irzɔ i rzi hwèlì a hwɛ, tɔ̀ hwàkòmì hwa tɔ̀ mòtò tɔ̀ mɔ̀kɔ. Nɛ rzɔ ò wa òhwa ema i hwɛnì lì lùwa wònjà e?” 34Yerzù à mà hwa alàhwɛ̀ nanù ema, “Nà e òhweyà ndi e jɔ̀kɛ̀, tɔ̀ ima mòtò ema a gbèe wòhwe a hwèlì ndi mòkòme ò wòhwe. 35È hwiye ema mòkòme a rza òhvi tɔ̀ hwèlìyelì ò tenì ya lìtumba. Ndi e ŋmana wa mùnyanà a hwɛnɛhwi ò lìŋgi lìtumba i hvònda ja arzɛ. 36O èŋgànɛ̀lɛ̀ rzɔ è Ŋmanà wà mùnyanà wa ama Lohwɛ̀ a o rzòlòhwì tɛ wònjà nanù òma ò hwɛmɛhwi wònjà na e jɔ̀kɛ̀. 37Nà hwi nanù ema inyɔ e hwèlì ndi e nyɔ̀ŋgɔ̀nì ya ama Abràhamù. Ndi tɔ̀ nanù, inyɔ e wòŋgirzɛnɛyi ò lì nò òŋwa, èhwanja hweyòhwèlì hwe ami hwe rza òhvi tɔ̀ ìlùkù ò mèèmà me anyu. 38Imba na e òhweyà ndi mamɛ ema na ɛni ò ma Tatɛ̀. Ndi inyɔ e gbeyà ndi mamɛ e ɛni na e rzàŋgò ya anyu.” 39Wɔ̀ hwà mà mò alàhwɛ̀ nanù ema, “Abràhamù mɔ̀ ndi à hwèlì e rzàŋgò ya arzu.” Yerzù rzi a hwa timbirzɛlɛlɛ nanù ema, “È ma hwɛ tɛ hwàna hwa ama Abràhamù, òma inyɔ e gbeyà ndi hwèŋge hwèwòlò ema Abràhamù à mà gbeye. 40Nà òma e hwèlì nanù, inyɔ e kimi ndi ò lì nò òŋwa. Imba e mòtò ema nà mà e òhweyà e jɔ̀kɛ̀, ema na hweyàni Lohwɛ̀. Abràhamù mɔ̀ à rzi gbeye ini nyayi ja hweyà. 41Inyɔ e gbeyà ndi hwèŋge hweyà ema e rzàŋgò ya anyu e gbeyà.” Hwà mà timbirzɛlɛlɛ na mbùnakɛ̀ nanù ema, “I rza enje ndi hwàna hwa mòrzònje, e rzàŋgò mɛnɛ ema i hwɛnì e hwèlì ndi Lohwɛ̀ mɔ̀ ŋmìti.”

Hwàna hwa ama Mòkarzɛ̀

42Yerzù à mà hwa òhweyà nanù ema, “Lohwɛ̀ à mà hwɛ tɛ e rzàŋgò ya anyu, ò ma e nò lìŋgàni èhwanja na uwɛ̀lɛ̀lɛ̀yi ndi ò ma Lohwɛ̀ ndèŋgànɛ̀lɛ̀ naŋgɛ na hwèlì anù. Nà rza jelì ndi ò hwe lìŋgànelì hwe ami. Ndi mɔ̀ ndi à nò òmi. 43Mamɛ ndeŋgatɛ e rza rzɔ̀ŋgìtɛ̀nɛ̀ e mbɔrzi ya ami e? Èhwanja inyɔ e ambi lì hwèya mamɛ na òhwa. 44È hwèlì ndi e hwa ama e rzàŋgò ya anyu, Mòkarzɛ̀, ɔ̀ndeŋgàtɛ̀ e arza ndi lì òndìrzɛ̀ e nyɔ̀ŋgi ya eni. Mɔ̀ à mà hwɛ ndi mòòŋwèlì natɛ̀ɛ na ò hwewòtelì. A rza alɛ̀mbɛnɛ ò jɔ̀kɛ̀, èhwanja a rza òhvi jɔ̀kɛ̀. Mɔ̀ a kɔ tɛ hweyà, a òhwa ndi e mbɔrzi ya eni ya mbòwà. Èhwanja mɔ̀ à hwèlì ndi mòtò wa mòlàŋgà, ndèŋgànɛ̀lɛ̀ a hwèlì ndi e rzàŋgò ya mòlàŋgà. 45Ndi èhwanja na òhwa e jɔ̀kɛ̀, inyɔ e rza nò lòkɛ̀! 46I ma mɔ̀kɔ wa anyu ema a nò rzɔ njɔ̀mi ya wòhwe e? Nà e òhweyà tɛ e jɔ̀kɛ̀, mamɛ ndeŋgatɛ e rza nò lòkɛ̀ e? 47È mɔ̀ e ma a hwèlì na Lohwɛ̀, a hwèya mamɛ Lohwɛ̀ a òhwa. Litiŋga mamɛ ndeŋgatɛ inyɔ e rza hwèya, lì hwèlì ndi ema inyɔ e rza enje e hwàa ama Lohwɛ̀.”

Lì akɔ̀tɛ lì ama Yerzù na mɔ̀ ŋmìti

48Hwatò hwa Yudà hwa mò alàhwɛ̀ nanù ema, “O èŋgànɛ̀lɛ̀ irzɔ i rza hvòmɛ̀nɛ̀ lì òhwa nanù ema ò wa ò hwèlì ndi mòtò wa Rzàmàrìyà, ndèŋgànɛ̀lɛ̀ ò òhvi èlìŋgɛ̀ ya wòhwe ò nyò ya aŋgɔ e?” 49Yerzù à mà hwa alàhwɛ̀ nanù ema “Nà rza òhvi tɔ̀ èlìŋgɛ̀ ya wòhwe ò nyò ya ami. Ndi na ŋgba tɛ e Tatɛ̀ wa ami èluhwe, ndi inyɔ e rza nò ŋgba èluhwe. 50Nà rza arzɛlɛ èluhwe na imba mbiti. Ndi ò hwèlì mɔ̀kɔ ema a ya arza. Mɔhvɛ ndi à hwèlì e mòkàyìrzèlèlì. 51Nà e òhweyà e jɔ̀kɛ̀ ema tɔ̀ ima mòtò ema a ika i mbenda ja ami, mɔ̀ à rza ɛnɛ e kpelì.” 52Hwatò hwa Yudà hwà mà hwèya nanù rzi hwa tɛ na merzeya mèndɛnɛ me hwetàtò nanù ema “Nàŋgɛ nanù, irzɔ i hwi ema ò hwèlì èlìŋgɛ̀ ya wòhwe ema yò ò tàkirzɛ! Abràhamù à mà ŋwa, hwanɛ̀yi hwà-òhwèlì hwa hwèlìŋgɛ̀ wɔ̀ hvɛ hwà mà ŋwa. Ndi ò wa ònò ò òhwa òma, tɔ̀ ima mòtò ema a ikayi e mbɔrzi ya aŋgɔ, e kpelì e rza tànɛyi lì mò keka. 53O wa ò òlò lì aka rzàŋgò ya arzù Abràhamù e? Abràhamù à mà ŋwa, nanù mɛnɛ na hwanɛ̀yi hwà-òhwèlì hwa hwèlìŋgɛ̀. Njɛnɛ ò wa ò ɔ̀ŋgɛ̀lɛ̀yi ema ò hwèlì e?” 54Yerzù ama hwa timbirzɛlɛlɛ nanù ema “È hwèlì tɛ ema na akàrzɛ̀yi imba mbiti, lì kàrzɛ̀lɛ̀hwɛ̀ lì ami lì rza òhva tɔ̀ wòlìtò. Rzàŋgò wa ami, ema inyɔ e kɔti nàa Lòohwà là anyu, mɔ̀ ndi à hwèlì e mɔ̀ ema a nò kàrzɛ. 55Tɔ̀ nɛ inyɔ e rza mò hwiyɛ, imba na mò hwi na òhwi tɛ ema na rza mò hwi, ò ma na hwèlì mòlàŋgà na òma inyɔ e hwèlì. Ndi imba na mò hwi ndèŋgànɛ̀lɛ̀ na hweyàna e mbɔrzi ya eni. 56È rzàŋgò ya anyu Abràhamù à mà òka mɔ̀nyɛ̀ŋgì ò lì hwiya màlùtèyà ma lì ɛnɛ wònò wùnyà wò ami. Mɔ̀ à mà wò ɛnɛ, ndèŋgàna à mà lìŋga.” 57Hwàŋga hwatò hwa Yudà hwa ijòwa Yerzù nanù ema, “O wa ò rzi uki menìmeta me meya, ndi ò òhwa ema ò ma ɛnɛ Abràhamù!” 58Yerzù rzi a hwa alàhwɛ̀ nanù ema, “Nà è òhweyà ndi è jɔ̀kɛ̀ ema, ndèŋgàna Abràhamù a e ŋyahwa, imba na hwèlì.” 59Nà òma à mà òhwe nanù, rzi hwa kòma màŋyàyi ò lì mò aŋgba, ndi Yerzù à mà àwutɛ̀ mɔ̀ ŋmìti, rzìi a nyɔ̀lɔ̀lɔ̀ èŋge ŋgìndì ò tenì ya èwòka ya e ndawò yà màkanɛ̀.

Currently Selected:

Yòwanìrzɛ̀ 8: bri

Highlight

Copy