Lukàrzɛ̀ 17

Wòhwe, lìlòkɛ̀ nà Èwòlò

(Mat 18.6-7,21-22; Mak 9.42)

1Yerzù à mà òhweyà hwà-òkòwèlì hwa eni nanù ema, “Hweyà ema hwe gbeyà hwatò hwa gbeyà wòhwe hwe hwɛnì lì hwa jèeyà. Ndi èwòma è ò hwɛ nà òŋgò ema à hwe jànà! 2O mà lɔ̀wu ndi ema, ene nyayi yà mòtò, è kakahwè ndi lìŋyàyi lì ndɛnɛ ò lìwɔ, rzìi hwa mò indirzɛ ò ŋmanjà. Lì akà ema à èmìrzɛ̀ hwanù hwanà hwàrzàlì ò lì gbeyà wòhwe. 3È aŋgòwè.

“Ŋmànyàŋgò wà aŋgɔ̀ à gbèyi tɛ wòhwe, ò mò òhweyà ema à tòni. À ayèmbɛ tɛ wòhwe wò eni rzìi a àyèŋgòwɛ̀, ò mò làkìrzɛ. 4À ò tònanì tɛ lìrzàmba la ŋgèlì ò wùnyà, rzìi a ò jèeya hvɛ lìzàmba la ŋgèlì ò lì ò atɛ̀kɛ̀ nanù èma, ‘Nà ma àyèŋgòwɛ̀,’ ò àŋgàmɛ̀nɛ̀ lì mò làkìrzɛ.”

Lìlòkɛ̀ a rza tùwa

5I àpɔ̀rzìtòlò rzi jò òhweyà è Rzàŋgò nanù ema, “O jò ètirzɛ màlòkɛ̀ ma arzu.” 6È Rzàŋgò à mà hwa alàhwɛ̀ nanù ema, “È òhvì tɛ lìlòkɛ̀ lì tu nàa ŋmanà hvɔ̀ŋgɔ̀ wà wòrzaŋgò, è kànèyà wònò wùuŋgu nanù ema, ‘Wuŋguhweyà anù, ò tɛ̀mɛ̀ ò ŋmanjà.’ Wòŋgò gbèe wò è hweyànà.”

Èwòlò ya e Mògbèèlì

7“È hwèlì tɛ ema mɔ̀kɔ wà ànyu à òhvi mògbèèlì ema à ɛ̀ndi ò wàŋgà ò lì tiyà mòònda, tɔ̀ lì ɔ̀ŋgeyà mɛ̀ɛ̀lɛ̀ŋgù. Òŋgò mògbèèlì à tìmbi tɛ ò ndawò, mamɛ ò mò òhweyà e? Ò mò òhweyà nanù ema, ‘jà anù ò lìya anù ò le.’ 8Ŋgà ò mò òhweyà ndi nanù ema, ‘O nò ihvɛlɛlɛ mòlelì mò ami, ò nò akɛlɛlɛ è mɔ̀. O nò tɛmeya ò tòŋgòŋgò natɛ̀ɛ na kulɛ̀ lì làa ndèŋgàna ò wà hvɛ ò e làa.’ 9È lòkɛ̀yi ema ònò mòtò à tànɛyi lì eka òŋgò mògbèèlì wà èni ò mamɛ ya arzɛ ema a mò gbèelì e? 10O èŋgànɛ̀lɛ̀ inyɔ hvɛ rzɔ e ma kulɛ tɛ lì gbeyà, nanù mɛnɛ ndi e hwɛnì lì hwɛ nà inyɔ. È mà kulɛ̀ tɛ lì gbeyà hweyà hwe àrzɛ, nà òmà hwe àrzàɛhwɛlɛ, e òhwa ndi nanù ema, ‘Ì hwèlì ndi hwàgbèèlì mɛnɛ. Ì mà gbeyà ndi èwòlò ya arzu ema ì hwɛnì lì gbeyà.’”

Yerzù à mà rzàŋgìrzɛ lìyòmɛ̀ la hwatò hwa Mɔ̀lɔ̀ŋgɔ̀

11Nà òmà Yerzù à mà hwɛ lì ɛ̀ndɛ ò Jèrurzalɛ̀mù, à mà akeyà ò ŋmèyò mò ma hwɛ è njìya yà èkòmè ya Rzàmarìyà nà Gàlìlì. 12Nà òmà Yerzù a mà kpèeyà ŋmanà mbòwà mɔ̀kɔ, à mà ùŋmanɛlɛ lìyòmɛ̀ la hwatò ema hwà mà ɔ̀kirzɛ̀ è nyàmbɛ yà mɔ̀lɔ̀ŋgɔ. Hwa mà tɛ̀mɛ̀ hvòhvò. 13Hwàŋga hwatò hwa mà mò hwɛlɛ nà lìlò lì kàrzàmi nanù ema, “Ìi Yerzù Rzàŋgò kòkò, ò jò òkeya ììlì!” 14Nà òmà Yerzù a mà hwà ɛnɛ rzìi a hwa òhweyà nanù ema, “È ɛ̀ndɛ̀ ya awuŋmɛ̀lɛ̀ Ipìlìrzì.” Nà òmà hwa mà hwɛ lì ɛ̀ndɛ, rzìi, ìnyò ja awu ì rzàŋgà. 15Mɔ̀kɔ wà àwu à mà ayèmbɛ ema à mà wurzeyà. Rzìi à tìmbà, a eka Lohwɛ̀ nà lìlò lì kàrzàmi. 16Ònò mòtò à mà kpèeyà Yerzù ò màtàŋgà, ò lì mò eka. À mà hwɛ ndi mòtò wà Rzàmarìyà. 17Yerzù rzìi a ijòwa nanù ema, “Rzèke nà rzàŋgirzɛ lìyòmɛ̀ la hwatò e? One lìnɛ̀yi lùùwa lì hwèlì e? 18Tɔ̀ mɔ̀kɔ wà àwu à rza tìmbì ò lì eka Lohwɛ̀, lì akà tɛ ònò mòjilì ŋmìti e?” 19Yerzù rzìi a mò òhweyà nanù ema, “Tɛmɛ ò ɛ̀ndɛ̀. Lìlòkɛ̀ lì aŋgɔ̀ lì ò tùnìrzɛ̀yi.”

Hwejèelì hwe Lìkànèyà la ama Lohwɛ̀

(Mat 24.23-28,37-41)

20Wùnya wɔ̀kɔ lòŋgò la Hvàlìrzàyì, hwa mà ijòwa Yerzù nanù ema, “Ima hvònda ema Lìkànèyà là ama Lohwɛ̀ lì jà e?” Yerzù à mà hwa alàhwɛ̀ nanù ema, “Lìkànèyà la ama Lohwɛ̀ lì rzà ɛnɛhwɛ nà mìirzɔ̀. 21Tɔ̀ eyà ema hwatò hwa tànɛyi lì òhwà nanù ema, ‘Ɔ̀ŋgɔ! Lɔ lìinì’ tɔ̀ɔ ‘Lɔ lìnɛ̀yi aŋga.’ Jàyɛ̀, Lìkànèyà là ama Lohwɛ̀ lì hwèlì ò ìtììtènì jà ànyu.” 22Yerzù rzìi a òhweyà hwà-òkòwèlì hwa eni hvɛ nanù ema, “È hvònda è hwèlì e jà ema jò ò lìŋgànà lì ɛnɛ tɔ̀ wùnyà wɔ̀kɔ ema è Ŋmanà wà è Mòtò wà Hwènàmà a jò àwuŋmɛ̀lɛ mɔ̀ ŋmìti, ndi è rza wò ɛnɛ. 23Hwatò hwa èŋge hvònda hwa è òhweyà nanù ema, ‘Mɔ̀ ònò’ tɔ̀ɔ ‘Mɔ̀ ɔ̀nɛ̀yi.’ Ndi è rzi hwa òŋgama. 24Wùùnyà ema è Ŋmanà wà è Mòtò wà Hwènàmà a ò jɛ̀ɛ̀, wò ò hwɛ ndi nàa lìŋmɛ̀tì-ŋmɛ̀tì lì ò ŋmɛ̀tɛ̀lɛ̀ njuka hvɔ̀kɔ yà è ŋmanyu ya Lohwà nà ènɛ̀yi. 25Ndi tɔ̀ nanù, mɔ̀ à lòma lì tàka rzayì-rzayì. À hwɛnì hvɛ lì rzɔ̀rzɔ̀wɔ̀ nà ène nyɔ̀ŋgɔ̀nì ya àrzɛ. 26Nà òmà e mà gbèyɛnɛ èŋge hvònda yà ama Nòwà, nanù ndi e ò hwɛ̀ɛ hvɛ ò wùnyà ema è Ŋmanà wà è Mòtò wà Hwènàmà a ò jɛ̀ɛ̀. 27O èŋge hvònda yà ama Nòwà, hwatò hwa mà hwɛ lì làa melelì nà lì nyɔ mìimbà, wùnyànà hwa mà hwɛ lì hwàa hwalanà. Hwalanà hvɛ hwa mà ŋgbàahwa ò mahwà, natɛ̀ɛ nà wùùnya Nòwà a mà kpèeyà ò wɔ̀lɔ̀ wò ndɛnɛ̀. È mbuwà e yɔ rzìi è tɔ̀ndɛ̀ e ɔ̀ndɔ̀ rzìi hwaŋga hwatò hwa arzɛ hwa kuwa lì indà. 28Nànù mɛnɛ ndi e mà hwɛ hvɛ nà è hvònda yà àma Lɔtì. Hwatò hwa mà hwɛ lì làa melelì, na lì nyɔ mimba, na ò ndàndɛ̀, lì ònà è mbòtà, nà lì òŋgà mandawò. 29O wòŋgò wùnyà mɛnɛ ema Lɔtì a mà ànjiye ò mbòwà yà Rzòdòmì, rzìi mùùnya nà màŋyàyi ma hwèkaàndò mò uhwɛlɛlɛ ò ŋmanyu yà Lohwà, nàa mbuwà. Hwe kùwa lì òŋwà hwaŋga hwatò hwa àrzɛ. 30Nànù mɛnɛ ndi e ò hwɛ̀ɛ ò wòŋgò wùnyà ema è Ŋmanà wà è Mòtò wà Hwènàmà a ò ɛnɛ̀hwɛ.

31“O wòŋgò wùnyà è mòtò ema à ò hwɛ̀ɛ ò ŋmanyu yà lìkaàndò, ema erzàŋgò ya eni e ò hwɛ̀ɛ ò tenì yà ndawò, à rza ò rzìhwa ò lì wòwà tɔ̀ yòmà. È mòtò hvɛ ema a ò hwɛ ò wàŋgà, à rza ò tìmba ò ndawò. 32È ɔŋgɛ̀lɛ̀ mamɛ e ma gbèyɛnɛ nà jòjìyɛ̀ wà àma Lɔtì. 33Tɔ̀ ima mòtò ema à arza ò lì kòmbɛ̀ lòŋgɛ là eni, à lì wɔ̀lɛ̀nɛ̀. È mɔ̀ hvɛ ema à wɔ̀lɛ̀nɛ̀ lòŋgɛ la eni, à lì kòmbɛ̀. 34Nà è òhweyà ema, hwatò hwàhwàkɛ̀ hwa ò nàŋgà ò lìnɔ̀ŋgɔ̀ lɔ̀kɔ, mɔ̀kɔ à ò wòwàhwà, ndi ɔ̀nɛ̀yi à ò lììyà. 35Hwalanà hwàhwàkɛ̀ hwa ò hwɛ lì rzikà ìhvɔ̀ŋgɔ̀ ja mbàrzì, mɔ̀kɔ à ò wòwàhwa, ɔnɛ̀yi à ò lììyà.” 36[Hwatò hwàhwàkɛ̀ hvɛ hwa ò hwɛ ò wàŋgà, mɔ̀kɔ à ò wòwàhwà, ndi ɔ̀nɛ̀yi à ò lììyà.] 37Hwà-òkòwèlì hwa ama Yerzù rzìi hwa mò ijòwa nanù ema, “Ìi Rzàŋgò, òne hwenè hweyà hwɛ àrzɛ hwe ò gbèyɛ̀nɛ e?” Yerzù rzìi à hwa alàhwɛ̀ nanù ema, “Tɔ̀ ima èki è hwèlì èèmbè, aŋga ndi jòŋgò jà mbeyà jà arzàŋgànɛ.”

Currently Selected:

Lukàrzɛ̀ 17: bri

Highlight

Copy