Lukàrzɛ̀ 2

Hwèŋyàwèlì hwe ama Yerzù

(Mat 1.18-25)

1O hwèŋge hwèyu, ema Àgurzitùrzì, Kayirzà yà Ròmànì à mà akɛlɛ e njàmbɛ̀, à ma hwatò hwa arzɛ ema hwa hwèlì ò rze yà lìkànèyà la eni, hwa ɛ̀ndɛ hwa tìle mìinà me awu. 2Iŋgi jaŋgì ndi ì ma hwɛ è jà wòrzò. Èŋge hvònda ɔ̀ndi Kpìlìnurzì a mà hwɛ è mòkànèlì hwà èkòmè ya Rzilìyà. 3O èŋgànɛ̀lɛ̀ mòtò tɛ à mà ɛ̀ndɛ ò mbòwà yà èni ò lì tìlìrzɛ lìinà la eni.

4Jòrzɛ̀hvù mɔ̀ hvɛ à mà uhwɛlɛlɛ̀ ò mbòwà yà Nàrzàrɛ̀tì yà Galìlì. À mà àgba ò Bɛtlɛ̀hɛmù, ò mbòwà yà ama kiŋgɛ̀ Dàhwitì, ò Jùdeyà. Mɔ̀ à mà ɛ̀ndɛ aŋga èhwanja à mà uhwɛlɛlɛ ndi ò lìhwende la ama kiŋgɛ̀ Dàhwitì. 5À mà ɛ̀ndɛ aŋga nà ehwàndà ya eni Màlìyɛ̀ ò lì tìlìrzɛ mìinà. Màlìyɛ̀ ema à ma rzììrzɛ̀. 6Nà òmà hwa mà hwɛ ò Bɛtlɛ̀hɛmù, mòrziyò mò lìyalì mò mà mò lɛ̀mbɛ. 7Màlìyɛ̀ rzìi a ŋya è ŋmanà wà mùnyanà. Mɔ̀ ndì à ma mò lìhvòhwa ewònì. À mà mò lìŋgɛ̀lɛ̀ ndi nà hwèhvàhve hwe mààtù. Rzìi à mò nàŋgɛlɛ ò èwòki ema hwèembè hwe mà leeyà. À mà gbeyà ndi nanù èhwanja, ò rzi hwɛ èhvòlò ò ndawò yà hwàyɛ̀ni.

È aŋgèlì è mà rzìhweyà hwà-ɔ̀ŋgèlì hwa mɛ̀lɛ̀ŋgù

8O mà hwɛ hwà-ɔ̀ŋgèlì hwa mbòlì wòŋgò wu, ò èŋge èrzòòkà ema imbòlì i ma lèeyà, ema hwà mà ɔŋgeya lìhwèmbà la awu la mbòlì. 9Lìwòkìmɛnɛ, è aŋgèlì yà ama Rzàŋgò è hwa wurzeyà, rzìi ŋmɛ̀ɛ̀nɛ̀nì mò ama Rzàŋgò mo hwa lìŋgà. Hwa mà tumeya nà mòkambiya. 10È aŋgèlì rzìi e hwa òhweyà nanù ema, “È rza òka wɔ̀ŋgɔ̀, nà è jànelì ndi Ŋmɛ̀ndì mò Gbamù ema mò jàneyà hwatò hwa arzɛ mɔ̀nyɛ̀ŋgì mò ndɛnɛ̀. 11È hwiyè nanù ema yàwònò è Mòrzùŋgèlì wà ànyu, à ŋyààhwì ò mbòwà yà ama kiŋgɛ̀ Dàhwitì. Mɔ̀ ndi à Ɔ̀kirzɛ̀hwɛ̀yi nà Lohwɛ̀. Mɔ̀ ndì à hwèlì e Rzàŋgò. 12È embànèlì e hwèlì ndi è Ŋmanà ema e ùŋma à lìŋgɛ̀lɛ̀hwɛ̀yì nà hwèhvàhve hwe mààtù. À ò nàŋgɛlɛhwɛ ò èwòki ema hwèembe hwe lèeyà.”

13O wòtɛmɛ̀tɛmɛ̀, ò mà uhweyà mòndèŋge mò ndɛnɛ̀, mò aŋgèlì ò ŋmanyu ema mò ma wurza lì ùŋma èŋge aŋgèlì, rzìi hwa wòteya ò lì eka Lohwɛ̀ nanù ema,

14“Èluhwe e hwɛ nà Lohwɛ̀ lì Karzamì, ndèŋgàna ɛ̀yɔ̀lɛ̀ hvɛ e hwɛ nà hwatò ema mɔ̀ à ŋgbelì mòrzìmà ò rze!”

15O mburzà nanù rzìi, i aŋgèlì ì tìmba ò ŋmanyu yà Lohwà. Àŋga ndi hwà-ɔ̀ŋgèlì hwa mɛ̀lɛ̀ŋgù hwa òhwanɛ̀lɛ̀ mɔ̀kɔ nà ɔ̀nɛ̀yi nanù ema, “Inyɛ̀ je ɛ̀ndɛ ò Bɛtlɛ̀hɛmù, ò lì ɛnɛ̀ enè eyà ema e gbèyɛ̀nɛ, ema Lohwɛ̀ lì Karzamì a jò hwìlɛ̀yi.”

16Hwa mà ɛ̀ndɛ kàrzì-kàrzì, rzìi hwa lùwa èki ema Màlìyɛ̀ nà Jòrzɛ̀hvù hwa mà hwɛ. Rzìi hwa ɛnɛ è ŋmanà à ma nàŋgɛlɛhwɛ ò èwòki ema hwèembe hwe mà lèeyà. 17Hwa mà ɛ̀nɛ nanù rzìi, hwa wòteya lì òhwà èki ya arzɛ, mamɛ è aŋgèlì e mà hwa òhweyà lì hvòmɛ̀nɛ̀ ònò ŋmanà. 18Hwatò hwa arzɛ ema hwà mà hwèya nanù, hwa mà tàmà ò lì hweyà mamɛ hwà-ɔ̀ŋgèlì hwa mɛ̀lɛ̀ŋgù hwa mà hwa òhweyà. 19Ndi Màlìyɛ̀ à mà ùta hwenè hweyà hwe àrzɛ ò ŋmèma mò eni, rzìi a à hwe lùteyà. 20Àŋga ndi hwaŋga hwà-ɔ̀ŋgèlì hwa mɛ̀lɛ̀ŋgù, hwa mà tìmbe rzìi hwa à kàrzɛ Lohwɛ̀ nà lì mò eka, èhwanja hweyà hwe àrzɛ ema hwa mà hweye rzìi hwa hwe ɛnɛ̀nɛ̀ hvɛ nà mììrzɔ̀ ma awu, nà òmà hwa mà òhwahwɛlɛ.

Lì jànà la amà Yerzù ò Ndawò yà Lohwà

21Hwèyu wàmbì hwe ma ùke ema hwa mà hwɛnɛ lì endà è ŋmanà, hwa mà mò kpɛ̀ɛ ndi lìinà Yerzù. Linì lìnà lɔ̀ ndi è aŋgèlì e mà mò kpɛɛ ndèŋgàna nyàŋgɛ à e mò lìta. 22Nàŋgɛ ema è hvònda ya ama Jòrzɛ̀hvù nà Màlìyɛ̀ yà lì tanìrzɛ̀hwɛ̀ e mà ùke, nà òmà è mbenda yà ama Mòrzè e mà òhwe, hwa mà tanìrzɛ̀hwɛ̀. Àŋga ndi hwa mà ɛ̀ndɛnɛ è Ŋmanà ò Jèrurzalɛ̀mù, ò lì mò ŋgbà Lohwɛ̀. 23Hwa mà ɛ̀ndɛ aŋga nà òmà e tìlahwì, ò mbenda ya ama Lohwɛ̀ nanù ema, “Tɔ̀ ima ŋmanà wà mùnyanà ema a lìhvòhwi ewònì ya ama nyàŋgɛ hwa mò ŋgba ndi ò maà ma ama Lohwɛ̀.” 24Wɔ̀ hwa mà ɛ̀ndɛ hvɛ ò lì ŋgba làhwèyà, nà ò lì òndìrzɛ̀ nà òmà è mbenda yà ama Lohwɛ̀ e òhwì nanù ema, “Mààhvà mà hweyòhve, tɔ̀ mènani me mbèŋgà mehwàkɛ.”

25O èŋge hvònda, ò mà hwɛ mùnyanà ò Jèrurzalɛ̀mù, à ma hwɛ̀lɛ̀hwɛ̀ Rzimìyɔ̀nì. Ò nò mùnyanà à mà tɛ̀mɛ̀ ehve-ehve, nà lì òkà Lohwɛ̀ wɔ̀ŋgɔ̀. À mà ambɛlɛlɛ è hvònda ema Lohwɛ̀ à mà hwɛnɛ lì òŋgìrzɛ̀ hwatò hwa Irzàyɛ̀lì, Èlìŋgɛ̀ yà Wòtani e mà hwɛ nà mɔ̀. 26Èlìŋgɛ̀ yà Wòtani e mà mò uŋmɛ̀lɛ̀ ema a rza ŋwa, natɛ̀ɛ a ɛnɛ̀ e mɔ̀ ema Lohwɛ̀ à Ɔ̀kirzɛ̀yì. 27Èlìŋgɛ̀ yà Wòtani e ma kɔ̀mɛ̀lɛ̀ Rzimìyɔ̀nì rzìi a ɛ̀ndɛ ò Ndawò yà Lohwà. O lìŋgi lìrzakò mɛnɛ, ndi Jòrzɛ̀hvù nà Màlìyɛ̀, hwa mà kpeyaneya è ŋmanà Yerzù, nà òmà è mbenda e mà àrze. 28Rzimìyɔ̀nì rzìi a wòwa è Ŋmanà a mò rzɛ̀hwɛ, rzìi a ekà Lohwɛ̀ nanù ema,

29“Ìi Lohwɛ̀, emeyà ema imbà è Mògbèèlì wà aŋgɔ̀, na ɛ̀ndɛ̀ nàŋgɛ nà ɛ̀yɔ̀lɛ̀, nà òmà ò òndirzɛ̀ lìkàkɛ̀nɛ̀ lì aŋgɔ̀.

30Èhwanja mììrzɔ̀ ma amì ma mà ɛnɛ è mòòŋgìrzèlì. 31Ema ò rzekelì nanù ema hwatò hwa arzɛ hwa ɛnɛ̀.

32Ŋmàye mò eni mò ò gbeyà hwaŋga hwatò ema hwa rza enje wònyà Yudà hwa ò hwiyà, ndèŋgàna a ò jànà èluhwe ò hwatò hwa aŋgɔ̀ hwa Irzàyɛ̀lì.”

33Jòrzɛ̀hvù nà Màlìyɛ̀ hwa mà tàmeya mamɛ ema e ma òhwàhwàa lì hvòmɛ̀nɛ̀ è ŋmanà. 34Rzimìyɔ̀nì rzìi, a hwa nàmìrzɛ̀, a òhweyà, Màlìyɛ̀ è nyàŋgò yà e Ŋmanà nanù ema, “Ɔ̀ŋgɔ tɛ! Ò nò Ŋmanà e ɛnɛ nanù à òmahwi ndi nà Lohwɛ̀. À ò jàneya lòŋgò la hwatò hwèkàyìrzèlì, lòŋgò hvɛ hwèyòŋgìrzèlì, ò èkòmè ya Irzàyɛ̀lì. Ò nò Ŋmanà a ò hwɛ ndi nàa ɛ̀mɛ̀nɛ̀nì ya ama Lohwɛ̀ ema rzayì-rzayì ja hwatò hwa ò mò teŋgɛ̀nɛ̀. 35O èŋge hvònda ndi hwègbèèlì hwe awu hwe uŋmɛ̀lɛ̀ màlùtèyà ma mèèmà me awu. Àŋga ndi è ndùtù e ò ùŋma ŋmèma mò aŋgɔ̀ nàa rzɔ̀lɔ̀.”

36O mà hwɛ hvɛ mòòhwèlì wà èlìŋgɛ̀ wà mòlanà. Lìinà la eni lì mà hwɛ ndi Anà, è ŋmanà wà mà Hvanùhwɛ̀lì. Hvanùhwɛ̀lì wà lìtumba la ama Arzà. Anà à mà ùna kɔ̀kɔ̀tìì. À mà lìya nà mòjòmɛ̀ wà èni meya lìrzàmba. 37À mà lìya mòkurze natɛ̀ɛ à mà uka mènì wàmbì me meya nà menì. A rzi hwɛ̀mɛ̀ è Ndawò yà Lohwà, nà màkanɛ̀, nà lì lìya njàwò ò màkanɛ̀ nà lì gbèeyà Lohwɛ̀ ŋmerze nà wu. 38Nà òmà Jòrzɛ̀hvù nà Màlìyɛ̀ hwa mà jànè è ŋmanà ò Ndawò yà Lohwà, Anà hvɛ à mà hwɛ aŋga. O wòtɛmɛ̀tɛmɛ̀, rzìi a ŋgbà Lohwɛ̀ jèka, nà lì òhweyà hwatò hwa arzɛ lì hvòmɛ̀nɛ̀ òŋgò ŋmanà. Hwàŋga hwatò ndi hwa mà hwɛ lì ambɛ̀lɛ̀ è hvònda ema Lohwɛ̀ a oŋgìrzɛ̀ è mbòwà yà Jèrurzalɛ̀mù.

Jòrzɛ̀hvù nà Màlìyɛ̀ hwa mà tìmba nà è ŋmanà ò Nàrzàrɛ̀tì

39È hvònda ema Jòrzɛ̀hvù nà Màlìyɛ̀ hwa mà kulɛ lì gbeyà hweyà hwe àrzɛ nà òmà è mbenda ya ama Lohwɛ̀ e mà òhwe, hwa mà tìmbà ò mbòwà yà awù yà Nàrzàrɛ̀tì, ò èkòmè yà Galìlì. 40Ò èŋge hvònda, è ŋmanà hvɛ̀ à mà hwɛ lì òŋgà. À mà òŋgà nà màyìmbì. Lìhwiye la eni hvɛ lì mà hwɛ lì òŋgà. Ììlì ja ama Lohwɛ̀ ì mà hwɛ nà mɔ̀.

È ŋmanà Yerzù ò Ndawò yà Lohwà

41Ŋma tɛ è rzàŋgò nà è nyàŋgò ya ama Yerzù hwa mà ɛ̀ndɛ ò Jèrurzalɛ̀mù, ò Ndema yà lì Akà Ɔnɛ̀yi. 42È hvònda ema Yerzù a mà ùke lìyòmɛ̀ la meya nà mehwàkɛ, hwa mà ɛ̀ndɛ ò èŋge Ndema yà lì Akà Ɔnɛ̀yi nà òmà ɛ̀ɛ̀mɛ̀ ya awu e mà òhwe. 43È hvònda è ndemà e mà kuwe, rzàŋgɛ nà nyàŋgɛ hwa mà hwɛ lì tìmba ò mbòwà yà àwu. Yerzù à mà lììya ò mburzà ò Jèrurzalɛ̀mù, e rzi hwɛ rzàŋgɛ nà nyàŋgɛ lì hwiyà. 44Nà òmà hwa mà hwɛ lì ɛ̀ndɛ yɔ̀ndɔ̀ ya lì wòteya èèlèlè natɛ̀ɛ nà è ŋgòmbe, wɔ̀ hwà mà ɔ̀ŋgɛ̀lɛ̀ ema e Ŋmanà à mà hwɛ ò tenì ya mòŋgò mòndèŋge ema mò ma hwɛ lì tìmba. Rzìi hwa wòteya ò lì mò àrza. Àŋga ndi hwa mà wòteyà lì mò ijòlɛ̀lɛ̀ ò màtumba nà hwatò ema hwa mà ahwiyanɛ. 45Nà òmà hwa rzi mò ɛnɛ̀, rzìi hwa tìmba ò Jèrurzalɛ̀mù ò lì mò àrza.

46O mèènyà meyawò hwa mà mò ùŋma ò Ndawò yà Lohwà. À mà lìya nà hwà-òkòlèlì, rzìi a hwa òkànèyà nà lì hwa ijòwà mììjòwelì. 47Hwa arzɛ ema hwà mà hwèya hweyà ema Yerzù a mà òhwe, hwa mà tàmeya lìhwiyè nà hwè-alàhwèlì hwe eni. 48Nà òmà rzàŋgɛ nà nyàŋgɛ hwa mà mò ɛ̀nɛ hwa mà jeja. Nyàŋgɛ rzìi a mò ijòwa nanù ema, “Ìi Ŋmanà, mamɛ ndeŋgàtɛ ò jò gbeyànì nanù e? Ɔ̀ŋgɔ tɛ! Rzɔ̀ŋgɛ nà ìmba jòò àrzi ije-ije jɔ̀ ɔtɔ̀wù.” 49Yerzù rzìi à hwa alàhwɛ̀ nanù ema, “Mamɛ e nò àrzana e? È rza hwi ema nà hwɛnì ndi lì hwɛ ò ndawò ya ama Rzàŋgò wà ami e?” 50Ndi hwa rzi hvɔ̀ŋgɛ̀ mamɛ a mà hwa òhweyà.

51Aŋgà ndi Yerzù a ɛ̀ndɛ nà rzàŋgɛ nà nyàŋgɛ, rzìi hwa tìmba ò Nàrzàrɛ̀tì. À mà hwa hweyàna. Nyàŋgɛ à mà ùta hwenè hweyà hwe àrzɛ ò ŋmèma mò eni. 52Nà òmà Yerzù a mà hwɛ lì òŋgà, à mà òŋgàna lìhwiyè nà ò hwèhwɛ̀ɛ̀lì. Jèka ja ama Lohwɛ̀ nà hwatò ì mà hwɛ nà mɔ̀.

Currently Selected:

Lukàrzɛ̀ 2: bri

Highlight

Copy