Lukàrzɛ̀ 4

Li Kèkìrzɛ̀ lì ama Yerzù

(Mat 4.1-11; Mak 1.12-13)

1Yerzù à mà uhwɛlɛlɛ ò mòrzò mò Jɔdànì, à mà ònda nà Èlìŋgɛ̀ yà Wòtani, rzìi e mò lìyɛlɛ ò lì ɛ̀ndɛ ò mòrzanjɛ̀. 2Aŋga ndi Mòkarzɛ̀ a mà mò kèkirzɛ mènì menì me mèenyà. O mèŋge mèenyà me àrzɛ, à rzì le tɔ̀ yòmà ò èŋgànɛ̀lɛ̀ è njàwò è mà mò lɛ̀mbɛ. 3Mòkarzɛ̀ rzìi a mò òhweyà nanù ema, “È hwèlì tɛ ema ò wa ndi ò hwèlì è ŋmanà wà ama Lohwɛ̀, ò kaneyà lìnì lìŋyayì lì tìmbè èhvòòtò.” 4Ndi Yerzù à mà mò alàhwɛ̀ nanù ema, “È tìlàhwì ò e kààtì ya Lohwà nanù ema, ‘Rzèketɛ èhvòòtò mɛnɛ ndi mòtò a làa ò lì hwɛ lòŋgɛ.’”

5Mòkarzɛ̀ rzìi a mò tìmbà, a mò agbana ò èkì ema è kàrzami lì aka, rzìi à mò uŋmɛ̀lɛ̀ ò èhvòhvò ya lìrzɔ̀ makànèyà ma è rze ya àrzɛ. 6Rzìi à mò òhweyà nanù ema, “Nà ò ŋgbà ìŋginyà nà hwèluhwe hwe awu hwe àrzɛ, èhwanja hwe nò ŋgbàahwì, nà tànɛyì lì hwe ŋgbà tɔ̀ njɛnɛ ema na àrza lì ŋgbà. 7O èŋgànɛ̀lɛ̀ ò nò ŋgbèlì tɛ èluhwe nà ò ŋgbà è hweyɔ hwe àrzɛ.” 8Yerzù à mà mò alàhwɛ̀ nanù ema, “È tìlahwì ò Kaàti ya Lohwà nanù ema,

kànɛ ndi Rzàŋgò Lòohwà là aŋgɔ̀,

nà lì mò gbèeyà mɔ̀ ŋmìti mɛnɛ.”

9Mòkarzɛ̀ rzìi a mò tìmbà a mò ɛ̀ndɛnɛ ò mbòwà ya Jèrurzalɛ̀mù. Rzìi à mò tɛ̀mɛ̀nɛ ò ŋmanyu ya e njòŋgò ya e Ndawò yà Lohwà. Rzìi à mò òhweyà nanù ema, “Ò hwèlì tɛ è Ŋmanà wà ama Lohwɛ̀, hvanja anù ò undè ò rze. 10È tìlahwì ò Kààtì ya Lohwà nanù ema,

‘Lohwɛ̀ à ò kànèyà i aŋgèlì jà eni ò lì ò nyàŋgà,’

11‘Hwa ò hwanɛ̀ ò ŋmanyu, aŋga nanù ò rza àyɛ̀rzɛ̀ lìtàŋgà lì aŋgɔ̀ ò lìŋyàyi.’”

12Ndi Yerzù à mò àlàhwɛ̀ nanù ema, “È tìlahwì ò Kààtì ya Lohwà nanù ema,

‘Ò rza kèkìrzɛ̀ Rzàŋgò Lòohwà là aŋgɔ̀.’”

13Nà òmà Mòkarzɛ̀ à mà kulɛ lì kèkirzɛ Yerzù manù màkèkìrzɛ̀nɛ mà arzɛ, rzìi à mò hwɛmɛ ò lì àrza è hvɛhvɛ hvònda.

Yerzù à mà rzɔ̀rzɔwɔ ò Nàrzàrɛ̀tì

(Mat 4.12-17; Mak 1.14-15)

14Yerzù à mà tìmba ò Galìlì. Èlìŋgɛ̀ yà Wòtani ema hwɛ nà mɔ̀, rzìi ŋmɛ̀ndì mò eni mò eyàlɛ̀nɛ̀ ò erzòòkà yà arzɛ. 15A mà òkòlɛ̀ hwatò ò màndawò mà awu mà màkanɛ̀, hwatò hwa arzɛ hwa mà mò èka.

16Yerzù à mà ɛ̀ndɛ ò mbòwà yà èni yà Nàrzàrɛ̀tì e ma a mà kòkeya, rzìi a kpèeyà ò ndawò yà màkanɛ̀ ò Wùnyà wò lì Arzìyòlɛ̀ nà òma a ma nyàmɛ̀lɛ ò lì gbeyà. Rzìi à tɛ̀mɛ̀, ò lì laŋgà e mbɔrzi. 17À ma tɛtirzɛhwɛ yòwò ya mòtìlà mò ama è Mòòhwèlì wà Èlìŋgɛ̀ Àyìrzayà. A mà e wuluwe, rzìi a ɛnɛ èki ema e tìlahwi nanù ema,

18“Èlìŋgɛ̀ yà ama è Rzàŋgò è hwèlì nà ìmba,

èhwanja Lohwɛ̀ à nò hvɔ̀rzì, ò lì òhweyà mèlìrza me hwatò, Ŋmɛ̀ndì mò Gbamù.

À nò òmì nà ŋmɛ̀ndì, ema hwatò ema hwa kakahwi ì ŋgɔ̀kɔ̀hwi hwa ò ulɛhwɛ ò iŋgi ŋgɔ̀kɔ̀hwi,

ndèŋgàna hwaŋga hwatò ema hwa hwèlì ndima hwa ò ɛnɛ

hwaŋga hwatò hvɛ ema hwa tàkàà ò màa mà hwahvɛhvɛ hwatò, imba nà hwa ulɛ̀ ò mèŋge mètàkà.

19Ndèŋgà ò lì òhwa ema, e hvònda e ma uka ema, Lohwɛ̀ a uŋmɛ̀lɛ̀ hwatò ììlì ja eni.”

20Nà òma Yerzù a ma kulɛ lì laŋga, rzìi a lìŋgɛ̀lɛ̀ èŋge yòwò ya mòtìlà, a e timbirzɛlɛlɛ è Mòkànèlì wà è ndawò yà màkanɛ̀, rzìi a lìya ò rze. Hwatò hwa arzɛ ema hwà mà hwɛ aŋga, hwa mà mò rzòkɛ mìirzɔ̀ hvɛ̀nyɛ-hvɛ̀nyɛ. 21Rzìi à wòteya lì hwa òhweyà nanù ema, “Ène mbɔrzi ema e hweyi nanù, e ma òndìrzɛ̀hwɛ yàwònò.”

22Hwa arzɛ hwa mà mò eka, ndèŋgà hwa mà tàmeya hweyà hwe gbamù ema hwe ma wurza ò wàna yà èni. Rzìi hwa à ijòwà nanù ema, “Rzèke è ŋmanà wà ama Jòrzɛ̀hvù ònò e?” 23Yerzù à mà hwa òhweyà nanù ema, “O Jɔ̀kɛ̀ è ò nò kpɛ̀ɛya mònò ŋmàna, ‘Ŋgàŋgà ò à wɔ̀wìrzɛ̀ ò wà hwìti.’ Ndèŋgàna e ò no òhweyà hvɛ ema, hweyà ema e hweyi ema nà mà gbeyà ò mbòwà yà Kàpɛ̀nàwɔ̀mì ema nà mà hwɛ, na hwe gbeye anù mbòwà ya ami.” 24Rzìi à òhwa nanù ema, “Nà è òhweyà è jɔ̀kɛ̀ nanù ema, Mòòhwèlì wà Èlìŋgɛ̀ à rza ŋgbààhwà èluhwe ò mbòwà yà èni. 25È hwiye nanù ema, è hvònda ya àma Èlàyijà, ò mà hwɛ mekurze rzayì-rzayì ò Irzàyɛ̀lì. O èŋge hvònda ò rzi yɔ mbuwà meya meyawò nà èhvàrzù. O èŋgànɛ̀lɛ̀ ò mà hwɛ njàwò ndɛnɛ̀ ò èkòmè ya Irzàyɛ̀lì ya àrzɛ. 26Ndi Lohwɛ̀ à rzi hwa òmeyà Èlàyijà. Ndi a mà mò òma ndi ò ma mòkurze mɔ̀kɔ ema mò ma hwɛ ò èkòmè ya Rzidònì ò mbòwà ya Rzàlɛhvati. 27Ndèŋgàna ò mà hwɛ hvɛ rzayì-rzayì ja hwatò hwa mɛ̀lɔ̀ŋgɔ̀ ò Irzàyɛ̀lì, ò hvònda yà ma Èlìyèrzì è Mòòhwèlì wà Èlìŋgɛ̀, ndi tɔ̀ mɔ̀kɔ wà awu à rzi wɔ̀wìrzɛ̀hwɛ̀, lì akà tɛ Nàmànì, mòtò ema à mà uhwɛlɛlɛ ò èkòmè ya Rzìlèyini.”

28Hwatò hwa arzɛ ema hwà mà hwɛ ò ndawò yà màkanɛ̀, hwa mà hweye nanù, hwa mà ònda nà hwètàtò. 29Hwa mà tɛ̀mɛ̀ rzìi hwa à mò tindɛ̀lɛ̀, ò lì mò hvayà ò mbòwà yà àwu. Rzìi hwa mò àgbana ò ŋgòndoŋgòndò yà mòòlì kanatɛ aŋga ndi hwà mà òŋge, ema hwa mò hvìmbe ò rze yà èŋge mbèmbè yà mòŋgò mòòlì. 30Ndi Yerzù à mà akeyà ò ìtììtènì ja awu, rzì a ɛ̀ndɛ è ya eni.

Yerzù à mà hvaya èlìŋgɛ̀ ya Wòhwe

(Mak 1.21-28)

31Yerzù à mà ɛ̀ndɛ ò Kàpɛ̀nàwɔ̀mì, ò erzòòkà yà Galìlì, rzìi a wòteyà lì òkòlɛ̀ hwatò ò Wùnyà wò lì Arzìyòlɛ̀. 32Wɔ̀ hwa arzɛ hwa mà tàmeyà hwèyòkòlèlì hwe eni, èhwanja ŋmɛ̀ndì mò hwèyòkòlèlì hwe eni mò mà òhva màyìmbì. 33O tenì yà èŋge ndawò yà màkanɛ̀ ema à mà hwɛ lì òkòlɛ̀, ò mà hwɛ mòtò ema èlìŋgɛ̀ ya wòhwe ema hwɛ lì kànèyà. Òŋgò mòtò à mà tɛ̀ɛ̀ nà lìlò lì Karzami nanù ema, 34“Jìyeyi! Ìi Yerzù wà Nàrzàrɛ̀tì, mamɛ ò jò àrzàna e? Ò jelì ndi lì jò hvàŋga e? Nà hwi njɛnɛ ò hwèlì, ò hwèlì ndi è mɔ̀ ema Lohwɛ̀ a òmi, ema à Tanì.” 35Yerzù à mà kànèyà èŋge èlìŋgɛ̀ ya wòhwe nanù ema, “Andama! O mò wurze ò nyò.” Rzìi èŋge èlìŋgɛ̀ ya wòhwe e kpìrzɛ̀ òŋgò mòtò ò rze, ò ìtììtènì ja hwatò hwa arzɛ, rzìi e mò wurza ò nyò, e rzì hwɛ lì mò hwènirzɛ.

36Hwatò hwa arzɛ hwa mà jeja, rzìi hwa àyijòwànɛ̀ mɔ̀kɔ nà ɔ̀nɛ̀yi nanù ema, “Ima lìtumba la mbɔrzi lìni e? Nɛ mòtò a tànɛyi lì kànèyà hwèlìŋgɛ̀ hwe wòhwe nà ŋginyà, rzìi hwe wurzà e?” 37Rzìi ŋmɛ̀ndì mò ama Yerzù, mò eyàlɛ̀nɛ̀ èŋge erzòòkà ya àrzɛ, ò hweyà ema à mà hwɛ lì gbeyà.

Yerzù à mà wɔ̀wìrzɛ̀ rzayì-rzayì ja hwatò

(Mat 8.14-17; Mak 1.29-34)

38Yerzù à mà uhwɛlɛlɛ ò ndawò yà màkanɛ̀, rzìi a ɛ̀ndɛ ò ndawò ya àma Rzìmɔ̀nì, Rzìmɔ̀nì nyàŋgò wà èni wà lìhwa à mà kòmeya ŋgɔ̀wu yà mòrzòrzòmbe. Àŋga, ndi hwa àkòwàna Yerzù ema, a mò wɔ̀wìrzɛ̀. 39Yerzù rzìi a tòmbeya ò tòŋgòŋgò yà èni, a ujama rzi a kànja èŋge ŋgɔwu ema e mò hwɛ̀mɛ̀, ò wòtɛmɛ̀tɛmɛ̀ èŋge ŋgɔwu rzìi e mò hwɛ̀mɛ̀. Rzìi à tɛ̀mɛ̀ a hwa kàrzɛ̀.

40È hvònda igbe ì mà wòteya lì ɔ̀ndɔ̀meyà, hwa mà mò jàneya hwà-òkèlì hwa nyayi nà nyayi ja nyàmbɛ. À mà kùwa lì hwa hwàkɛ màà mà eni, rzìi hwa arzɛ hwa wɔ̀wɔ̀. 41Hwèlìŋgɛ̀ hwe wòhwe hwe mà anjiya hvɛ rzayì-rzayì ja hwatò ò nyò ja awu na mèrzeya nanù ema, “Ò wa ndi ò hwèlì è Ŋmanà wà ama Lohwɛ̀!” À mà hwa kanja, rzìi a rzì hwa ŋgbe hvɛ tɔ̀ èhvòlò ò lì òhwà, èhwànja hwa mà hwiya ema mɔ̀ ndì à hwèlì è Mɔ̀ ema a Ɔ̀kirzɛ̀hwɛ̀yi nà Lohwɛ̀.

Hweyòhwèlì hwe ama Yerzù ò ndawò ya màkanɛ̀

(Mak 1.35-39)

42O hwèyawèlì hwe wùnyà, Yerzù à mà anjiya ò èŋge mbòwà, rzìi a ɛ̀ndɛ èki ya njuka. Hwatò hwa mà wòteya ò lì mò àrzà. Nà òma hwà mà mò ɛnɛ, hwa rzìi mò ŋgbe tɔ̀ ehvòlò ya lì ɛ̀ndɛ tɔ̀ èki. 43Ndi à mà hwa òhweyà nanù ema, “Nà hwɛnì lì òhweyà ma hvɛhvɛ mambòwà Ŋmɛ̀ndì mò Gbamù mò Lìkànèyà là ama Lohwɛ̀. Mònò Ŋmɛ̀ndì mò Gbamù ndeŋgàtɛ Lohwɛ̀ à nò òmì.” 44O èŋgànɛ̀lɛ̀ rzɔ à mà hwɛ ndi ò lì òhwa Ŋmɛ̀ndì mò Gbamù ò ndawò ja màkanɛ̀ ja erzòòkà ya Jùdeyà.

Currently Selected:

Lukàrzɛ̀ 4: bri

Highlight

Copy