Lukàrzɛ̀ 6

Mìijowelì me Wùnyà wò lì Arzìyòlɛ̀

(Mat 12.1-8; Mak 2.23-28)

1O wùnyà wɔ̀kɔ wò lì Arzìyòlɛ̀, Yerzù nà Hwà-òkòwèlì hwa eni hwa mà hwɛ lì akeyà mòònda mò mbàrzì. Hwà-òkòwèlì hwa eni rzìi hwa wòteya lì hvatà ì mbàrzi. Hwa nyùŋguhwa iŋgi hvɔ̀ŋgɔ̀ rzìi hwa wòteya lì ji làa. 2Lòŋgò la Ihvàlìrzàyì na òmà hwà mà ɛnɛ nanù, rzìi hwa wòteya lì ijòwa nanù ema, “Mamɛ ndeŋgàtɛ inyɔ è gbeyà hweyà ema è mbenda e rzà òhwɛ ema e gbèyè ò Wùnyà wò lì Àrzìyòlɛ̀ e?” 3Yerzù rzìi à hwa ijòwa nanù ema, “È rzi làŋgi mamɛ e tìlàhwì ò kààtì yà Lohwà, eyà ema kìŋgɛ Dàhwitì nà hwatò hwa eni hwa mà gbèyè è hvònda ema è njàwò e mà hwa lɛ̀mbɛ e? 4Dàhwitì à mà ɛ̀ndɛ ò Ndawò yà Lohwà nà hwatò hwa eni rzìi a wòwa hwèhvòòtò hwe ma ŋgbàahwa nàa màahweyà ò ma Lohwɛ̀. À mà hwe wòwa rzìi a hwe làa, rzìi a ŋgbà hvɛ è wɔ̀ hwà mà hwɛ nà mɔ̀, ndi è mbenda yà àrzu è rza ŋgbèlì tɔ̀ mòtò wònjà ò lì làa hwèŋge hwèhvòòtò lì akà tɛ Ipìlìrzì mɛnɛ.” 5Yerzù rzìi a hwa òhweyà hvɛ nanù ema, “È Ŋmanà wà e Mòtò wà Hwènàmà à hwɛnì hvɛ wònjà yà lì kàneya ò Wùnyà wò lì Arzìyòlɛ̀.”

Yerzù à mà wɔ̀wìrzɛ̀ mòtò wa mɔ̀ɔ mò njɛmbu

(Mat 12.9-14; Mak 3.1-6)

6O wòhvɛhvɛ Wùnyà wò lì Arzìyòlɛ̀ Yerzù à mà kpèeyà ò tenì yà è ndawò yà màkanɛ̀ yà wònyà Yudà rzìi a wòteyà lì òkòlɛ̀. O mà hwɛ mòtò aŋga ema mɔ̀ɔ̀ mò eni mò mòmɛ̀ mò ma ŋwa njɛmbu. 7Ihvàlìrzàyì nà hwà-òkòlèlì hwà mbenda, hwa mà hwɛ ndi lì ɔŋgɔ̀ Yerzù lòŋgòlòŋgò, ò lì àrza lì mò rzɔ̀ɔ njɔ̀mì ò lì mò hvòmɛ̀nɛ̀. O lì ɔŋgɔ̀ ŋgà mɔ̀ à wɔ̀wìrzɛ̀ òŋgò mòtò ò Wùnyà wò lì Arzìyòlɛ̀. 8Yerzù à mà hwiya mamɛ hwa mà hwɛ lì lùteya ò mèèmà me awu. À mà òhweyà òŋgò mòtò ema à ma òhva mɔ̀ɔ̀ mò ma ŋwa njɛmbu nanù ema, “Jà ònò, ò tɛ̀mɛ̀ anù.” Òŋgò mòtò à mà mò hweyàna. 9Yerzù rzìi a ijòwa hwaŋga hwatò nanù ema, “Nà è ijòwà ema, ò hwèlì mbenda ò lì gbeyà gbamù ŋgà lì gbeyà wòhwe ò Wùnyà wò lì Arzìyòlɛ̀ e? O hwèlì mbenda ò lì rzùŋgà lòŋgɛ la mòtò ŋgà ò lì mò òŋwa e?” 10À mà hwa akɛlɛlɛ hwa arzɛ mììrzɔ̀, rzìi a òhweyà òŋgò mòtò nanù ema, “Ènyòwa mɔ̀ɔ̀ mò aŋgɔ̀.” Oŋgò mòtò à mà gbeyà nà òmà Yerzù a mà òhwe, rzìi mɔ̀ɔ̀ mò eni mò wɔ̀hweyà. 11Ihvàlìrzàyì nà Hwà-òkòlèlì hwà mbenda hwa mà ònda nà hwètàtò rzìi hwa òhwanɛ̀lɛ mɔ̀kɔ nà ɔ̀nɛ̀yi mamɛ hwa tànɛyi lì gbeyàna Yerzù.

Yerzù à mà hvɔ̀rzɔ̀ lìyòmɛ̀ la eni la Àpɔ̀rzìtòlò nà hwaahwàkɛ

(Mat 10.1-4; Mak 3.13-19)

12O wùnyà wɔ̀kɔ wò mèŋge mèènyà Yerzù à mà ɛ̀ndɛ lì kanɛ̀ ò ŋmanyu yà mòòlì mɔ̀kɔ, à mà akɛlɛ wuwu wò arzɛ ò lì kanɛ̀ Lohwɛ̀. 13Nà òmà wùùnya wò mà yahwe, rzìi a hwɛlɛ Hwà-òkòwèlì hwa eni ò nyò, rzìi a hvɔ̀rzɔ̀ ò ìtììtènì ja awu lìyòmɛ̀ nà hwàhwàkɛ̀ rzìi a hwa hwɛlɛ ì Àpɔ̀rzìtòlò. Iŋgi Àpɔ̀rzìtòlò ima hwɛ ndi, 14Rzìmɔ̀nì ema mɔ̀ à mà kpɛ̀ɛ̀ lìinà Pètrò, na ŋmanyàŋgò wà èni Àndèlè, nà Jèmìrzì, Yòwanìrzɛ̀, Hvìlìpì, nà Bàtòlomìyò, 15Matìyò, Tɔ̀marzì, Jèmìrzì, è ŋmanà wà ama Alhvàyèyùrzì, Rzìmɔ̀nì mòtò ema lì emèyà la eni lì rza àyèŋgòwɛ̀, 16Jùdàrzì e ŋmanà wà amà Jèmìrzì nà Jùdàrzì Ìrzìkarìyɔ̀tɛ̀ ema à ma àhwirzɛ̀ Yerzù.

Yerzù à mà òkòlɛ̀ nà lì wɔ̀wìrzɛ̀ rzayì-rzayì ja hwatò

(Mat 4.23-25)

17Yerzù à mà rzìhwa nà Hwà-òkòwèlì wà eni ò mòòlì rzìi hwa uka ò ètamba. Hwa mà ùŋmanɛlɛ rzayì-rzayì ja hwahvɛhvɛ Hwà-òkòwèlì hwà eni nà ŋgìndì ndɛnɛ ya hwatò. Èŋge ŋgìndì e ma uhwɛlɛlɛ ndi ò erzòòkà ya àrzɛ ya Jùdeyà, nà Jèrurzalɛ̀mù nà è mbòwà yà Tàyi nà Rzidònì. Manù màmbòwà ma mà hwɛ ò rzààwà yà ŋmanjà. 18Hwà mà jà ndi lì òkànèyà ŋmɛ̀ndì mò ama Yerzù nà lì wɔ̀wìrzɛ̀hwɛ la ì nyàmbɛ ja awu. È wɔ̀ ema hwà mà tàkirzɛhwɛ nà hwèlìŋgɛ̀ hwe wòhwe, wɔ̀ hvɛ hwa mà wɔ̀wìrzɛ̀hwɛ. 19Hwatò hwa arzɛ hwa mà hwɛ lì kèka ò lì mò lɛ̀mbɛ, èhwanja è ŋginyà è mà hwɛ lì mò wurzà ò nyò ya eni ò lì wɔ̀wìrzɛ̀ hwatò.

Hwènàmìrzèlì nà mejèmà

(Mat 5.1-12)

20Yerzù à mà ɔ̀ŋgɔ hwà-òkòwèlì hwa eni rzìi a hwa òhweyà nanù ema,

“Mònàmɛ̀ mò hwɛ nà inyɔ mèlìrza me hwatò èhwanja è hwèlì ò rze yà Lìkànèyà là ama Lohwɛ̀.

21Mònàmɛ̀ nà inyɔ ema è hweyà njàwò nàŋgɛ èhwanja Lohwɛ̀ à è ujìrzɛ̀.

Mònàmɛ̀ nà inyɔ ema è hwèlì ò lùwa nàŋgɛ èhwanja è hwɛnì lì yɔ̀ɔ.

22Mònàmɛ̀ nà inyɔ ema è kɔ̀ɔ̀hwi nà hwatò rzìi hwa è ndinda ò ìtììtènì ja awu rzìi hwa è hwɛnyɛ̀ rzìi hwa è hwɛlɛ mìnà ma wòhwe èhwanja è òŋgama è Ŋmanà wà e Mòtò wà Hwènàmà. 23È òkè mɔ̀nyɛ̀ŋgì ò wòŋgò wùnyà, e hvanjè hvɛ nà èrzimò èhwanja mòrzawèlì mò anyu e lùwa mò lìtelì ò ŋmanyu yà Lohwà. Nànù ndi ì mbamba ja anyu ja kòhwà ì mà hwɛnyɛ hwà-òhwèlì hwa hwèlìŋgɛ̀.

24Mòjèmà nà inyɔ hwèwàŋgì hwe hwatò ema e ma màà lì lùwa hvɛ mòrzawèlì mò anyu.

25Mòjèmà nà inyɔ ema è uji nàŋgɛ èhwanja è hvònda e ò jà ema e tàkàna e njàwò.

Mòjèmà nà inyɔ ema è yɔ̀ɔ nàŋgɛ èhwanja è hwɛnì lì ɛ̀hwɛ nà lì eyà.

26Mòjèmà mò hwɛ nà inyɔ ema hwatò hwa arzɛ hwa è ekà. Nànù ndi ì mbamba ja awu ja kòhwà ì mà eka hwà-òhwèlì hwa hwèlìŋgɛ̀ hwa mèlàŋgà.

O lìŋgàne hwakɔ̀èlì hwa aŋgɔ

(Mat 5.38-48; 7.12a)

27“Ndi nà è òhweyà inyɔ ema e nò òkànèyà ò nàŋgɛ, e lìŋgàne hwàkɔ̀yèlì hwa anyu. È gbèeyà hwaŋga ema hwa è kɔ̀wu gbamù. 28È nàmìrzɛ̀ hwaŋga ema hwa è jèmàà, e kànɛlɛ̀lɛ̀ hwaŋga ema hwa è gbeyànà wòhwe wò injùwènjùwè. 29Mòtò à ò rzamì tɛ lùùmbɛ̀ ò lìyamà lɔ̀kɔ, ò mò eŋgòweyà hvɛ lìnɛ̀yi lìyàmà. Mòtò à ò hvɔ̀ɔ̀tɔ̀nì tɛ lòòkì lì aŋgɔ̀ ò mò hwɛ̀mɛ a wòwè hvɛ è rzɔ̀tì yà aŋgɔ̀. 30Tɔ̀ imà mòtò ema à ò ɔ̀mbì yòmà ò mò ŋgbè è yɔ. Mòtò à ò lùmbànì hvɛ tɛ hwèèmà hwe aŋgɔ̀, ò rzì kèka lì mò àrzana è yɔ hvɛ. 31Ò gbèeyà hwahvɛhvɛ hwatò nà òmà ò àrza nanù ema wɔ̀ hvɛ hwa ò gbèeyà.

32“È lìŋgàni tɛ hwaŋga mɛnɛ ema hwa è lìŋgàni, ima jèka e ò lùwa e?” Tɔ̀ hwatò hwa wòhwe wɔ̀ hvɛ hwa lìŋgàni hwaŋga hwatò ema hwa hwà lìŋgàni. 33È hwèlì hvɛ tɛ ema è gbèeyà ndi gbamù ò hwaŋga mɛnɛ ema hwa è gbeyà gbamù, ima mɔ̀rzɛ̀ŋgì e ò lùwa e? Èhwanja tɔ̀ hwatò hwa wòhwe wɔ̀ hvɛ hwa gbeyà nanù mɛnɛ. 34È hwèlì tɛ ema e hwi tɛ hwatò ema e ikayi mèèmà ema hwe hwàlɛ̀yi hwema wɔ̀ hvɛ ndi inyɔ hvɛ e hwàlɛ̀yi hwèèmà, ima mɔ̀rzɛ̀ŋgì e ò lùwa e? Tɔ̀ hwatò hwa wòhwe wɔ̀ hvɛ hwa hwàlɛ̀ imbunda ja awu ja wòhwe, èhwanja wɔ̀ hvɛ hwa hwi ema wɔ̀ hwa ahwalɛ̀nɛ̀. 35Ndi e lìŋgàne hwàkɔ̀yèlì hwa anyu. È hwa gbèeyà gbamù. È hwàlɛ̀ hwatò è rzì hwɛ lì ikà lìhvìtà ema è hwa àrzànà lìyɛmɛ ò lì è tìmbirzɛlɛlɛ. Aŋgà ndi Lohwɛ̀ a e ŋgba jàhwèyà ema ì karzami, ndèŋgànɛ̀lɛ̀ e ò hwɛ̀lɛ̀hwɛ̀ ndi hwàànà hwa eni, hwàànà hwa ama Lohwɛ̀ lì Kàrzami, e hwɛnì hvɛ lì hwiya nanù ema Lohwɛ̀ à òhvi ììlì jà èni ò hwaŋga hwatò ema hwa rza eka Lohwɛ̀ nà hwaŋga hwa ekɔnì. 36È hwɛnɛ̀ ììlì nà òmà Tatɛ̀ Lohwà la anyu a hwɛnì ììlì.

È rza kàyìrzɛ̀ hwahvɛhvɛ hwatò

(Mat 7.1-5)

37“È rzi kàyìrzɛ̀ hwahvɛhvɛ hwatò, ndèŋga Lohwɛ̀ à rza ò kàyìrzɛ̀ wa hvɛ. È rzi òhwa hweyà hwe wòhwe lì hvòmɛ̀nɛ̀ hwahvɛhvɛ hwatò, Lohwɛ̀ mɔ̀ hvɛ à rza òhwa wòhwe lì è teŋgɛ̀nɛ̀. È àlàkìrzɛ̀nɛ̀, aŋga ndi Lohwɛ̀ mɔ̀ hvɛ a è làkìrzɛ̀. 38È a ŋgbà hwatò, aŋga nanù Lohwɛ̀ mɔ̀ hvɛ à è ŋgbà, inyɔ hvɛ. Lìmɛ̀nì ema è lùwa, lì rzɛ̀ɛ̀hwɛ̀, lì òndà natɛ̀ɛ lì hvùhvà, rzìi lì è ŋgbààhwà ò lì hwànɛ. Èhwanja lìmɛ̀nì ema e gbeyànì, lɔ mɛnɛ ndi Lohwɛ̀ mɔ̀ hvɛ a ò gbeyànɛ̀.” 39Yerzù à mà hwa kpɛ̀ɛyà hvɛ mònò ŋmàna nanù ema, “Mòtò wà ndìma à tànɛyi lì tìmba òhvɛhvɛ mòtò wà ndìma e? Rzèke wɔ̀ hwààhwàkɛ hwa undà ò tenì yà èhvɔ̀ndì e? 40È ŋmanà wà hwèyòkòwèlì à rza tànɛ̀yi ò lì akà è Mòòkòlèlì wà èni. Ndi tɔ̀ njɛnɛ ema à kulɛ hwèyòkòwèlì hwe eni à ò hwɛ ndi lìmɛ̀nì lɔ̀kɔ nàa è mɔ̀ ema à mò òkòlɛ̀yi.

41“Mamɛ ndèŋgatɛ̀ ò ɛnɛ̀ è ŋmanà jùma lìmùki ema è hwèlì ò lìrzɔ lì ama ŋmànyɔ̀ŋgɔ̀ wà aŋgɔ̀, ndi ò rza tànɛ̀yi lì ɛnɛ̀ ètumba ema è hwèlì ò lìrzɔ̀ là aŋgɔ̀ e? 42Nɛ rzɔ ò tànɛyi lì òhweyà ŋmanyɔ̀ŋgɔ̀ wà aŋgɔ̀ nanù ema, ‘Ŋmanyàŋgò wà ami, inyɛ nà ò ulɛ̀ è ŋmanà jùma lìmòki ò lìrzɔ̀ là aŋgɔ̀,’ ema ò wà hwìti ò rza tànɛ̀yi lì ɛnɛ ètùmba ema è hwèlì ò lìrzɔ̀ là aŋgɔ̀ e? Ò wà mòtò wà mèhvìlì! Lòma lì ulɛ̀ ètùmba ema è ò hwèlì ò lìrzɔ̀ là aŋgɔ̀, aŋgà nanù ò tànɛ̀yi lì ɛnɛ̀ gbamù, è ŋmanà jùma lìmòki ema à hwèlì ò lìrzɔ̀ là ama ŋmànyɔ̀ŋgɔ̀ wà aŋgɔ̀.

Gbèe wò èmbahwà ndi nà hwèhvùma hwe eni

(Mat 7.16-20; 12.33-35)

43“O rza enje tɔ̀ gbèe wò gbamù ema wò ŋya hwèhvùma hwe wòhwe. Ndèŋgànɛ̀lɛ̀ hvɛ ò rza enje tɔ̀ gbèe wò wòhwe ema wò ŋya hwèhvùma hwe gbamù. 44Gbèe na gbèe tɛ wò embàhwà ndi nà hwèhvùma hwe eni. È hwiyahwi ema, hwatò hwa rza hvɔ̀kɔ mbàrzì ò wàŋgà yà njenje. Tɔ̀ lì hvatà hwèhvùma hwe màlanjò ò ŋmanyu yà gbàŋgu. 45È mòtò wà gbamù a gbeyà ndi hweyà hwe gbamù, èhwanja hwe uwɛ̀lɛ̀lɛ̀yi ndi ò tenì yà ŋmèma mò eni, ema gbàamù wò utahwi. Ndèŋgànɛ̀lɛ̀ hvɛ è mòtò wà wòhwe à gbeyà ndi hweyà hwe wòhwe, èhwanja hwe uhwɛlɛlɛ̀ ndi ò tenì ya ŋmèma mò eni ema wòhwe wò utahwi. È hwèlì ndi nanù èhwanja, hweyà ema hwe òndi mòtò ò ŋmèma mò eni, hwe ɔ̀ndi à wurzìrzɛ ò wàna yà èni.

Hwà-òŋgèlì hwa lìhwiyè nà è wɔ̀ hwa èèti

(Mat 7.24-27)

46“Mamɛ ndeŋgàtɛ è nò hwɛlɛ nanù ema, ‘Ìi Rzàŋgò, Ìi Rzàŋgò,’ ndi e rza gbeyà mamɛ ìmba na òhwa e? 47Tɔ̀ njɛnɛ ema a nò jèeyàa, ema à nò hweyànà hwèyòkòlelì hwe amì, rzìi a gbeyà mamɛ ema na òhwa, ìmba, nà è wulùhweyà è mɔ̀, njɛnɛ a hwèlì. 48À hwèlì ndi nàa mòtò ema a òŋgà wòòŋgì. Èma a rzɔ̀ŋgɛ̀lɛ̀yi mawòndì ò mɔ̀nyɛ̀, ema mɔnɔ̀ŋgɔ̀ mò eni mò tɛmi ò ŋmanyu yà èwòmà ya lìŋyàyi. È hvònda ema è mbuwà e mà yɔ, è tɔ̀ndɛ̀ ema ɔ̀ndɔ̀, e lìhwa èŋge ndawò nà ŋginyà ndi è rzi tànɛyi lì wùulɛ èŋge ndawò, èhwanja è mà òŋgàhwa gbamù. 49Ndi è mòtò ema a hweyà hwèyòkòlelì hwe amì rzìi à rzi gbèye mamɛ hwe e òhwa, a hwèlì ndi nàa è mòtò ema à mà òŋgà è ndawò ò mɔ̀nyɛ̀ e rzi hwɛ mɔ̀nɔ̀ŋgɔ̀. È hvònda ema è mbuwà e mà yɔ, rzìi è tɔ̀ndɛ̀ e lìhwa èŋge ndawò, èŋge ndawò e mà rzùuwa lìwòkimɛnɛ, rzìi e wùweya kɛrzɛ-kɛrzɛ.”

Currently Selected:

Lukàrzɛ̀ 6: bri

Highlight

Copy