Lukàrzɛ̀ 8

Ŋgùrzù ja hwalanà hwa mà nɔ̀ŋgɔ Yerzù

1O mburzà yà hvònda, Yerzù à mà ɛ̀ndɛ hwèyɔ̀ndɔ̀ lì akeyà màmbòwà mà rzàlì nà màndɛnɛ̀. Nà òma à ma hwɛ lì ɛ̀ndɛ nanù, à mà hwɛ ndi lì òhwà Ŋmɛ̀ndì mò Gbamù, mò Lìkànèyà là ama Lohwɛ̀. Lìyòmɛ̀ là eni la hwà-òkòwèlì nà hwàhwàkɛ̀ lì mà hwɛ nà mɔ̀. 2Lòŋgò la hwalanà ema hwà mà òhva hwèlìŋgɛ̀ hwe wòhwe, nà hwanɛ̀yi ema hwà mà òhva mehvɛhvɛ mèrziyò, ema mɔ̀ à mà wɔ̀wìrzɛ̀, wɔ̀ hvɛ hwa mà hwɛ nà mɔ̀. Hwanù hwalanà hwa mà hwɛ ndi, Màlìyɛ̀ ema à mà hwɛ̀lɛ̀hwɛ̀ Màdalenà, ema Yerzù a mà hvaye hwèlìŋgɛ̀ lìrzàmba hwe wòhwe ò nyò yà èni, 3Yòwanà è jòjìyɛ̀ yà ama Kurzà ema à ma hwɛ è mòkànèlì wà hwàgbèèlì hwà mà Hɛ̀rɔ̀dì, Rzùrzanà, nà hwahvɛhvɛ hwalanà rzayì-rzayì. Hwanù hwalanà hwa mà gbeyàna ì hvèyò ja awu ò lì òŋgòwàna Yerzù, na hwà-òkòwèlì hwa eni.

Ŋmàna mò è Mòònèlì wa mbòtà

(Mat 13.1-9; Mak 4.1-9)

4Hwatò hwa mà jèeyà Yerzù, ŋgìndì ndɛnɛ̀ è mà uhwɛlɛlɛ màmbòwà nà màmbòwà, ò lì jà lì ɛnɛ Yerzù. Nà òmà hwa mà arzàŋgànɛ rzìi a hwa kpɛ̀ɛ̀yà mònò ŋmàna nanù ema, 5“Mòònèlì wà mbòtà mɔ̀kɔ à mà hwɛ lì mùŋgùlɛ̀ ihvɔ̀ŋgɔ̀. Nà òmà a mà hwɛ lì mùŋgùlɛ̀ ìhvɔ̀ŋgɔ̀ ja eni, lòŋgò ì mà unda ò njìya, ò èŋgànɛ̀lɛ̀ na òma hwatò hwà mà akeyà aŋga hwà mà ji làalà. Hwènɔ̀nì hwe mà ji rzòmà. 6Lòŋgò la hvɔ̀ŋgɔ̀ i ma unda ò ŋmanyu yà èwòmà ya lìŋyàyi. Iŋgi hvɔ̀ŋgɔ̀ ì mà wurza ndi, ì mà uhwa, èhwanja mɔ̀nyɛ̀ mò hwèlì ò ŋmanyu yà èwòmà ya lìŋyàyi mò rza òhvi tɔ̀ màlìhwa. 7Lòŋgò la hvɔ̀ŋgɔ̀ hvɛ i ma unda ndi ò tenì ya wàŋga ya hwènyɛ̀ŋgɛnyɛ̀ŋgɛ̀. Ì ma òŋgà ndi hwènyɛ̀ŋgɛnyɛ̀ŋgɛ̀ hwe mà lìŋgɛ̀lɛ̀ iŋgi hvɔ̀ŋgɔ̀. 8Inɛ̀yi hvɔ̀ŋgɔ̀ jɔ hvɛ ì mà unda ò mɔ̀nyɛ̀ mò gbamù. Ì mà òŋgà gbamù, rzìi ì ŋya hvɛ jɔ̀ɔ. Lòŋgò la hwerzòŋgò hwe ma òhva ègbe ya hvɔ̀ŋgɔ̀.” Yerzù a mà kulɛ lì kpɛ̀ɛ mònò ŋmàna, rzìi a òhwa nanù ema, “Tɔ̀ ima mòtò ema à òhvi màtò, a hweyè.”

Eyà ema e ma gbeyà ndeŋgàtɛ Yerzù à mà kpɛ meyàna

(Mat 13.10-17; Mak 4.10-12)

9O mburzà hvònda hwà-òkòwèlì hwa ama Yerzù rzìi hwa mò ijòwa ema a hwa telɛlɛlɛ mònò ŋmàna. 10Yerzù à mà hwa alàhwɛ̀ nanù ema, “Lohwɛ̀ à è ŋgbèlì è wònjà yà lì hwiyà ìwùndɛ̀ jà Lìkànèyà là ama Lohwɛ̀. Ndi hwanɛ̀yi hwatò hwa arzɛ hwa hweyànà ndì Lìkànèyà là ama Lohwɛ̀ nàa meyànà aŋga nanù,

tɔ̀ nɛ̀ hwa ɔ̀ŋgɔ, hwa rzà èmba,

hwa hweyà, ndi hwa rzà rzɔ̀ŋgìtɛ̀nɛ̀.

Yerzù à mà hwa telɛlɛlɛ ŋmàna mò ihvɔ̀ŋgɔ̀

(Mat 13.18-23; Mak 4.13-20)

11“Inyɛ̀ nà è tɛlɛlɛ mònò ŋmàna. Èŋge hvɔ̀ŋgɔ̀ è hwèlì ndi Eyà yà ama Lohwɛ̀. 12Iŋgi hvɔ̀ŋgɔ̀ ema ì mà undìrzɛ̀hwɛ̀ ò njìya, ì tɛmelì ndi hwatò ema hwa hweyà Eyà yà Lohwà, ndi Mòkarzɛ̀ à jà rzìi à hwa ulɛnɛ̀ è yɔ̀ ò mèèmà mè awu, ò lì àrza nanù ema hwa rzì lòkɛ̀ Lohwɛ̀, nà ò lì arza hvɛ nanù ema hwa rzà rzùŋgàhwa. 13Ìhvɔ̀ŋgɔ̀ hvɛ ema ì mà unda ò èwòmà yà lìŋyayì, jɔ̀ hvɛ ì tɛ̀mèlì ndi hwatò ema hwa mà hwèya Eyà yà Lohwà, rzìi hwa è wòwà nà mɔ̀nyɛ̀ŋgì. Ndi Eyà yà ama Lohwɛ̀ è rzi rzɔ̀ŋgɔ ò mèèmà mè awu. Ò ŋmanà hvòkà hvònda hwa mà lòkɛ̀ Lohwɛ̀, ndi màkèkìrzɛ̀nɛ̀ ma mà jèe, hwa mà tìmbeyà ò mburzà. 14Ìhvɔ̀ŋgɔ̀ hvɛ ema ì undi ò tenì yà wàŋga yà hwènyɛ̀ŋgɛnyɛ̀ŋgɛ̀, ì hwèlì ndi nàa hwatò ema hwa hweyi ŋmɛ̀ndì mò ama Lohwɛ̀, ndi mètàkà na mònàmɛ̀ mò ene rze, nà mɔ̀nyɛ̀ŋgì mò ene rze. Me lìŋga mèèmà me awu. Hwa rzi tànɛyi lì ŋya hwèhvùma hwe gbamù. 15Iŋgi hvɔ̀ŋgɔ̀ ema ì ma unda ò mɔ̀nyɛ̀ mò gbamù, ì tɛmelì ndi hwaŋga hwatò ema hwa hweyà Eyà ya Lohwà, rzìi hwa e kòmbɛ ò mèèmà me awu. Ènè eyà e hwa gbeyà ema hwa ajùlɛ̀ natɛ̀ɛ hwa ŋya hwèhvùma hwe gbamù.

Ètùlù a rza utahwa

(Mak 4.21-25)

16“Mòtò à rza tanɛ̀yi lì hvààlɛ̀ etùlù rzìi a e hwanda na èwòkì, tɔ̀ ò lì e ika ò rze yà lìnɔ̀ŋgɔ̀. Mòtò à hvààlɛ̀ tɛ ètùlù, à e ikà ndi ò ŋmanyu ya e mbòkò ema hwètùlù hwe tɛ̀mɛ̀, ema tɔ̀ njɛnɛ ema a kpèeyà ò ndawò à ɛnɛ̀ ŋmàye. 17O rzà ènje tɔ̀ eyà ema e utahwi ema e rzà ò wurza ò mòteŋyi. O rzà ènje hvɛ tɔ̀ eyà ema e utami ema e rzà ò hwiyɛ̀nɛ̀, nà lì awuŋmɛ̀lɛ̀ ò mòteŋyi. 18È aŋgòwà rzɔ nɛ e òkànèyà. Tɔ̀ njɛnɛ hvɛ ema a òhvi lì rzɔ̀ŋgìtɛ̀nɛ̀ lì hvòmɛ̀nɛ̀ ìwùndɛ̀ ja Lìkànèyà là ama Lohwɛ̀, Lohwɛ̀ à mò hwàteyà hvɛ lìhwiyè. Òŋgò hvɛ ema à rza òhvɛ̀ lìhwiyè, à wɔ̀lɛ̀nɛ̀ tɔ̀ èŋge tenyi ema a ɔŋgɛ̀lɛ̀yi nanù ema à òhvì.”

Lìtùmba la ama Yerzù

(Mat 12.46-50; Mak 3.31-35)

19Nàŋgɛ rzɔ, Yerzù nyàŋgɛ nà wònyanyàŋgò hwa eni hwa mà jà ò lì mò ɛnɛ̀. Ndi hwa rzi tanɛ̀ lì mò kòmbɛ̀nɛ̀, èhwanja è ŋgìndì, ema è ma mò tòŋgà è mà aka lì kòka. 20Mòtò mɔ̀kɔ rzìi a òhweyà Yerzù nanù ema, “È nyàŋgò, nà wònyanyàŋgò, hwa aŋgɔ̀ hwa tɛmì ò èwòkà. Hwa àrza lì ò ɛnɛ̀.” 21Yerzù rzìi a hwa tìmbirzɛlɛlɛ nanù ema, “È nyàŋgò wa ami, nà wònyanyàŋgò hwa ami hwa hwèlì ndi, è wɔ̀ ema hwa òkànèyà Eyà ya Lohwà, rzìi hwa gbeyà mamɛ e òhwì.”

Yerzù à mà lɔ̀kɔ̀ muulì

(8.23-27; Mak 4.35-41)

22Wùnyà wɔ̀kɔ, Yerzù à mà kpèeyà ò tenì yà wɔ̀lɔ̀ nà hwà-òkòwèlì hwa eni rzìi a òhwa nanù ema, “Je ɛ̀ndɛ, ja aka ò ɛnɛ̀yì èhvàrzù ya yùlù.” Rzìi hwa wòteyà lì ɛ̀ndɛ. 23Nà òmà hwa mà hwɛ lì ɛ̀ndɛ, rzi ijɔ ì lɛ̀mbɛ Yerzù. Mùùlì mòndɛnɛ̀ rzìi mò hwa ùŋmànɛ̀lɛ ò màlìhwa. O èŋgànɛ̀lɛ̀, wɔ̀ɔ̀lɔ̀ wò awu wò mà kpèeyà malìhwa. Hweyà hwe mà àmbana hwà-òkòwèlì hwa eni. 24Wɔ̀ rzìi hwa ɛ̀ndɛ lì mò imòlɛ̀ ò lì mò òhweyà nanù ema, “Ìi Rzàŋgò kòkò, ìi Rzàŋgò kòkò, kàà irzɔ ja à ŋwa ò!” Yerzù rzìi a ìmòwà ò ìjɔ, a lòmeya è mbɛ̀hvɛ̀nì, nà hwèmùnɛ̀, ò wòtɛmɛ̀tɛmɛ̀ rzìi hwe lɔ̀kɔ̀meyà, èki ya arzɛ e hwɛ ŋmɛ̀ɛ̀. 25Yerzù rzìi a ijòwa hwà-òkòwèlì hwa eni nanù ema, “O èŋgànɛ̀lɛ̀ e rza nò lòkɛ̀ e?” Hwa mà ònda nà wɔ̀ŋgɔ̀ nà hwètàmìrzèlì, rzìi hwa wòteya ò lì àyìjòwànɛ̀ mɔ̀kɔ nà ɔ̀nɛ̀yi nanù ema, “Ima nyayi yà mòtò ònò e? Èma à kànèyà è mbɛ̀hvɛ̀nì nà hwèmùnɛ̀ hwe malìhwa, rzìi hwe mò hweyànà e?”

Yerzù à mà wɔ̀wìrzɛ̀ mòtò ema à ma òhva èlìŋgɛ̀ ya wòhwe

(Mat 8.28-34; Mak 5.1-20)

26Yerzù nà hwà-òkòwèlì hwa eni hwa mà aka èŋge yùlù, lì wòteya ò mbòwà yà Galìlì, rzìi hwa uka ò enɛ̀yi èhvàrzù ema e hwèlì ò erzòòkà ya Gɛ̀làrzà. 27Nà òmà Yerzù a mà ùke ò rzààwà yà èŋge yùlù, à mà tàneyà mòtò ema à ma òhva hwèlìŋgɛ̀ hwe wòhwe. O mà hwɛ hvònda ema è wàwi e ma ònò mòtò a rzi hwɛ lì wɔ̀tɔ̀ tɔ̀ mààtù. À rzi hwɛ lì lìya hvɛ tɔ̀ ò ndawò. À mà hwɛ ndi lì lìya ò mòònda mò rzɔ̀ŋgɔ̀. 28Nà òmà ònò mòtò a mà ɛ̀nɛ Yerzù, à mà tɛɛ nà lùwa. Rzìi à mò kpèeyà ò màtàŋgà, a òhwa nà lìlò lì kàrzàmi nanù ema, “Ìi Yerzù è Ŋmanà wà ama Lohwà lì Kàrzàmi, mamɛ ì rzɔ nà ò wa jò òhvanɛyi e? Nà ò atɛkɛ ema ò rzì nò kɔ̀kìrzɛ̀.” 29À mà eyaa nanù, èhwanja Yerzù à ma hwɛ a mà kànja hwèŋgè hwèlìŋgɛ̀ hwe wòhwe ò lì mò ànjiya ò nyò. Hvònda nà hvònda tɛ ema èlìŋgɛ̀ ya wòhwe e mà mò kpèeyà, tɔ̀ hwa mò kakanà ndi na ì ŋgɔ̀kɔ̀hwi ò màa na màtàŋgà, à kɛ iŋgi ŋgɔ̀kɔ̀hwì, rzìi èlìŋgɛ̀ ya wòhwe e mò tìmbà, e mò hvàwuùmìrzɛ̀ ò mòrzanjɛ̀.

30Yerzù à mà mò ijòwa nanù ema, “O hwɛ̀lɛ̀hwɛ̀ ndi njɛnɛ e?” Rzìi à mò alàhwɛ̀ nanù ema, “Nà hwɛ̀lɛ̀hwɛ̀ ndi jɔ̀ɔjɔ̀ɔ.” Onò mòtò à mà òhwa ndi nanù, èhwanja hwèlìŋgɛ̀ hwe wòhwe rzayì-rzayì hwe mà mò kpèeyà ò nyò. 31Hwèŋge hwèlìŋgɛ̀ hwe wòhwe rzìi hwe rzòrzòmeya Yerzù nanù ema à rzì hwe undirzɛ ò tenì yà èhvɔ̀ndi ema e rza òhvɛ̀ lìrzukù. 32O ma hwɛ gbakà wò ŋgòwa èma wò ma hwɛ lì leeyà ò mbèmbè yà mòòlì. Hwèŋge hwèlìŋgɛ hwe wòhwe rzìi hwe rzòrzòmeya Yerzù nanù ema, a hwe hwɛmɛ hwe kpèeyà iŋgi ŋgòwa. Yerzù rzìi a hwa ŋgba e wònja ò lì kpèeyà iŋgi ŋgòwa. 33Hwèŋge hwèlìŋgɛ̀ hwe wòhwe rzìi hwe ànjiya òŋgò mòtò ò nyò, rzìi hwe kpèeyà iŋgi ŋgòwa. Iŋgi ŋgòwa ja arzɛ rzìi ì hwàŋgà lìhwaŋgi la mànyakà ò mbèmbè yà lìyòwà rzìi, i unda ò tenì yà yùlu ya malìhwa, ì kùwa lì indeya aŋga. 34Hwàŋga hwatò ema hwà mà hwɛ lì ɔ̀ŋgeyà iŋgi ŋgòwa hwa mà ɛ̀nɛ mamɛ ya arzɛ ema e ma gbèyɛ̀nɛ̀, rzìi hwa hwaŋgà. Nà òmà hwa mà tìmbe ò mbòwà, hwa mà wòteyà ò lì òhweyà hwatò hwa arzɛ nà mambòwà ema hwà mà kòmbɛ̀nɛ̀, mònò ŋmàŋgò. 35Nà òmà hwatò hwa mà hweye enè eyà, hwa mà wurza lì ɛnɛ̀ mamɛ ya arzɛ ema, e ma gbèyɛ̀nɛ̀. Nà òmà hwa mà ùke èki ema Yerzù a mà hwɛ, hwa mà ɛ̀nɛ òŋgò mòtò ema hwèlìŋgɛ̀ hwe wòhwe hwe mà hwɛ lì tàkirzɛ, mɔ̀ ndì à lìyelì Yerzù ò tòŋgòŋgò yà eni. Òŋgò mòtò à mà wɔ̀wìrzɛ̀hwɛ, a wɔtɔ̀ hvɛ nà lìwɔti la eni. Èŋge eyà e mà òkirzɛ hwaŋga hwatò wɔ̀ŋgɔ̀. 36Hwàŋga hwatò ema hwà mà ɛnɛ enè eyà, hwa mà òhweyà hwanɛ̀yi hwatò nɛ Yerzù a mà wɔ̀wìrzɛ̀ òŋgò mòtò. 37Hwatò hwa arzɛ hwa erzòòkà ya Gɛ̀ràrzɛ̀nì rzìi hwa òhweyà Yerzù nanù ema, a ànjìyè ò erzòòkà ya awu èhwanja wɔ̀ɔŋgɔ̀ wò mà hwa aka. Yerzù rzìi a kpèeyà ò wɔ̀lɔ̀, a tìmba è ya eni. 38Òŋgò mòtò ema Yerzù a mà wɔ̀wìrzɛ̀, rzìi a rzòrzòmeyà Yerzù ò lì mò òŋgama. Ndi Yerzù a mà mò tìmbìrzɛ̀ rzìi a mò òhweyà nanù ema, 39“Tìmba ò mbòwà yà aŋgɔ̀, ò òhweyà hwatò hwa aŋgɔ, mamɛ ya arzɛ ema Lohwɛ̀ a ò gbèelì.” O èŋgànɛ̀lɛ̀ òŋgò mòtò, à mà tìmba ò mbòwà yà èni, rzìi a òhweyà hwatò hwa arzɛ, mamɛ ema Yerzù a mò gbèelì.

Yerzù à mà imòlɛ ŋgɔ̀ndɔ̀ rzìi a wɔ̀wìrzɛ̀ hvɛ mòlanà mɔ̀kɔ

(Mat 9.18-26; Mak 5.21-43)

40È hvònda ema Yerzù a mà tìmbe ò enɛyi èhvàrzù ya yùlu, è ŋgìndì è mà mò kɔmɔ nà mɔ̀nyɛ̀ŋgì, èhwanja hwa mà hwɛ lì mò ambɛ̀lɛ̀. 41Mòtò mɔ̀kɔ ema hwa mà hwɛlɛ Jàrìyɔ̀rzɛ̀, à mà mò jèeya. Jàrìyɔ̀rzɛ̀ à mà hwɛ ndi mòkànèlì mɔ̀kɔ wà è ndawò yà màkanɛ̀. À mà kpèeyà Yerzù ò màtàŋgà, rzìi a mò atɛkɛ ema a jèe ò ndawò yà èni. À mà atɛkɛ Yerzù nanù, 42èhwanja ehvòwà ya eni ya ŋmanà ŋgɔ̀ndɔ̀ wà lìyòmɛ̀ la meya nà mèhwàkɛ, e mà kòmbɛ̀nɛ̀ è kpelì.

Nà òmà Yerzù a mà hwɛ lì ɛ̀ndɛ ò èŋge ndawò, è ŋgìndì è mà mò tòŋgà ì tòŋgòŋgò jà arzɛ. 43Mòlanà mɔ̀kɔ à ma hwɛ aŋga, ema à ma hwɛ lì wurzà màyija ò nyò yà èni yà mòlanà lìyòmɛ̀ la meya nà mehwàkɛ. Ònò mòlanà tɔ̀ mòtò tɔ̀ mɔ̀kɔ à rzi tanɛ̀ lì mò wɔ̀wìrzɛ̀. 44Ònò mòlanà, rzìi a wurzeya Yerzù ò mburzà, rzìi a tɔ̀tɔ̀ lìrzukù la mòŋgòmbè mò eni na lìya la eni. O wòtɛmɛ̀tɛmɛ̀ màŋga màyija ma mà kɛ̀ɛ̀yà. 45Yerzù rzìi a ijòwa nanù ema, “Njɛnɛ à nò tɔ̀tì e?” Hwatò hwa arzɛ hwa mà rzɔ̀rzɔ̀. Pètrò rzìi a òhwa nanù ema, “Rzàŋgò kòkò rzèke è ŋgìndì yò ò tòŋgi ema è ò àyinɛ̀lɛ̀ ò nyò.” 46Ndi Yerzù à mà òhwa nanù ema, “Mòtò mɔ̀kɔ à nò tɔ̀tì èhwanja nà hweyi nà òmà è ŋginyà e nò ànji ò nyò.” 47Nà òmà òŋgò mòlanà a mà ayèmbɛ nanù ema à ò wùlùwahwà, à mà ònda nà mòkambiya, a kpa ò màtàŋgà ma ama Yerzù. O màrzò ma hwatò hwa arzɛ rzìi a òhweyà Yerzù lìtìŋgà ema lì mò gbèyi a mò tɔ̀ti. Nà nɛ hvɛ ema mɔ̀ à wɔ̀hwèlì, ò wòtɛmɛ̀tɛmɛ̀. 48Yerzù, rzìi a mò òhweyà nanù ema, “È ŋmanà wà amì wà mòlanà kòkò, lìlòkɛ̀ lì aŋgɔ̀ ndi lì ò wɔ̀wìrzɛ̀. O ɛ̀ndɛ na ɛ̀yɔ̀lɛ̀.”

49Nà òmà Yerzù a mà hwɛ lì òhwà nanù, mòtò mɔ̀kɔ à mà uhwɛlɛlɛ̀ ò ndawò yà ama Jàrìyɔ̀rzɛ̀. Rzìi à òhweyà Jàrìyɔ̀rzɛ̀ nanù ema, “È ŋmanà ŋgɔ̀ndɔ̀ wà aŋgɔ̀ à mà màà lì ŋwa. O èŋgànɛ̀lɛ̀ ò rza tàkìrzɛ̀ è Mòòkòlèlì hvɛ.” 50Nà òmà Yerzù a mà hweye nanù, a òhweyà Jàrìyɔ̀rzɛ̀ nanù ema, “O rzì òka tɔ̀ wɔ̀ŋgɔ̀! Ohva lìlòkɛ̀ nanù ema è ŋmanà wà aŋgɔ̀ à hwɛnì lì lìya.” 51Nà òmà Yerzù a mà ùke ò ndawò yà ama Jàrìyɔ̀rzɛ̀ à rzi imànɛ̀lɛ̀ tɔ̀ mòtò ò lì kpèeyà ò tenì yà èŋge ndawò nà mɔ̀, lì akà tɛ Pètrò, Yòwanìrzɛ̀, Jèmìrzì nà è rzàŋgò yà ama òŋgò ŋmanà nà nyàŋgɛ. 52Hwatò hwa arzɛ hwa mà hwɛ lì eyàa, nà lì èhwɛ òŋgò ŋmanà. Yerzù rzìi a hwa òhweyà nanù ema, “È rza eyàa. È ŋmanà à rzi ŋwelì, a hwèlì ndi ò ìjɔ.” 53Hwatò hwa arzɛ, hwa mà mò yɔ̀yèeyà èhwanja hwa mà hwiya ema è ŋmanà à mà màa lì ŋwa. 54Yerzù à mà lɛ̀mbɛ lìya la ama òŋgò ŋmanà, rzìi a mò hwɛlɛ nanù ema, “È ŋmanà wà amì, imòwa!” 55O wòtɛmɛ̀tɛmɛ̀ rzìi èlìŋgɛ̀ ya ama òŋgò ŋmanà e mò tìmba ò nyò, a imòwa. Yerzù rzìi a hwa òhweyà à ma hwa mò ŋgbè mòlelì a lee. 56È rzàŋgò nà è nyàŋgò ya àma òŋgò ŋmanà hwa mà tàmà rzayì-rzayì. Yerzù rzìi a hwa òhweyà àma hwa rzì kèka lì òhweyà tɔ̀ mòtò mamɛ ya arzɛ ema e gbèyɛ̀nɛ̀yì.

Currently Selected:

Lukàrzɛ̀ 8: bri

Highlight

Copy