Matiyò 6

Hwèyòkòlelì hwe ama Yerzù lì hvòmɛ̀nɛ̀ lì òŋgòwàna là hwatò

1“È aŋgòwe! È rzìi gbeyà èwòlò yà anyu yà Lohwɛ̀ èhwanja è arza nanù ema hwatò hwa è ɛnɛ. È gbèyi tɛ nanù, è rza lùwa tɔ̀ mòrzawèlì na Tatɛ̀ wà anyu ema à hwèlì ò lìkànèyà là ŋmanyu.”

2“O èŋgànɛ̀lɛ̀ rzɔ è ŋgbà tɛ mòtò yòma ema mɔ̀ à endelì, è rza tòŋga rzehwa, nà òma hwatò hwa mèhvìlì hwa gbeyà. Wɔ̀ hwa tòŋga irzehwa ò indawò ja màkanɛ̀ nà ò hwèwòka hwe màlòkò ema hwatò hwa arzàŋganɛ, ema wɔ̀ hwa ɛnɛhwɛ. Nà è òhwèyà ndi è jɔ̀kɛ̀ nanù ema wɔ̀ hwa mà màa lì lùwa mòrzawèlì mò awu mò arzɛ hvɔni. 3Ndi ò ŋgbelì tɛ mòtò yòma ema mɔ̀ à endèli, ò rzi keka lì gbeyà ema tɔ̀ è mbunda yà aŋgɔ yà ndìŋgɛ yà màlìŋgò à hwiye mamɛ ema ò ŋgbelì. 4Aŋga nanù tɔ̀ mòtò à rza hwiya mamɛ ema ò mò ŋgbelì. Aŋga ndi Lohwɛ̀, Tatɛ̀ wà aŋgɔ̀ ema à ɛnɛ hweyà ema hwe gbèyɛ̀nɛ̀yi ò wùndɛ̀ à ò rzaweyà.”

Hwèyòkòlelì hwe ama Yerzù lì hvòmɛ̀nɛ̀ Lìkanɛ̀

(Luk 11.2-4)

5“È kanɛ̀ tɛ, è rzìi hwɛ ndi nàa hwatò hwa mèhvìlì, èma wɔ̀ hwa kanɛ̀ tɛ, hwa lìŋgàna lì tɛ̀mɛ̀ ò ndawò ja màkanɛ̀ nà ò tòŋgòŋgò ja hwewòka hwe màlòkò, nanù ema hwatò hwa à hwà ɛnɛ. Nà è òhwèyà ndi è jɔ̀kɛ̀ nanù ema, wɔ̀ hwa mà màa lì lùwa mòrzawèlì mò awu mò arzɛ. 6Ndi inyɔ è kanɛ̀ tɛ, è kpèeyà ò tùu ja anyu, è umbe màwòhva rzìi è kanɛ̀lɛ̀lɛ̀ Lohwɛ̀ Tatɛ̀ wà anyu, ema tɔ̀ mòtò à rza ɛnɛ. Aŋga ndi Lohwɛ̀ Tatɛ̀ wà anyu ema à ɛnɛ mamɛ è gbèyɛ̀nɛ̀ ò wùndɛ̀, à è rzaweya. 7È kànɛ tɛ è rza lìŋgɛ̀lɛ̀ è mbɔrzi ò lì hviyanɛ̀lɛ̀lɛ̀ hweyà ema hwe rza òhvɛ jànda nàa hwatò ema hwa rza enje wònyà Yudà hwa gbeyà. Hwanu hwatò wɔ̀ hwa ɔ̀ŋgɛ̀lɛ̀ ndi nanù ema, Tatɛ̀ Lohwɛ̀ à hwa hweyàna ehwànja hwa gbeyàna mbɔrzi rzayi-rzayi ò màkanɛ̀. 8È rzìi hwɛ nà òma wɔ̀ hwa hwèlì, èhwanja Lohwɛ̀, Tatɛ̀ wà anyu à hwi mamɛ yà arzɛ ema inyɔ yà arza ndèŋgànà è mò ijòwa ò màkanɛ̀. 9O èŋgànɛ̀lɛ̀ rzɔ nanù ndi inyɔ è hwɛnì lì kanɛ̀,

Lohwɛ̀, Tatɛ̀ wà arzu ema ò hwèlì ò ŋmanyu,

èluhwe è hwɛ nà lìinà là aŋgɔ̀.

10Inyɛ̀ lìkànèyà là aŋgɔ̀ lì jèe, lì jò kànèyà.

Inyɛ̀ hwatò hwà ene rze yà mɔ̀nyɛ̀ hwa gbèèyè hweyà ema ò wà ò arza, nà òma è gbèyɛ̀nɛ̀ ò ŋmanyu yà lohwà.

11Ò jò ŋgbe lì làa là arzu là wùnyà wò yàwònò.

12“Ò jò làkìrzɛ̀ wòhwe wò arzu, nà òma irzɔ̀hvɛ i làkìrzɛ̀ tɔ̀ ima mòtò ema à jò gbeyànì wòhwe.

13Ò rzi emeyà nanù ema, i unde ò màkèkìrzɛ̀nɛ̀, ndi ò jò hvɔ̀ɔ̀tè ò màà mà amà Mòkarzɛ̀.#6.13 Lòŋgò la ikààtì ja wòrzò i lati nanù ema Likànèyà, è ŋginyà nà èluhwe, hwe hwèlì ndi è hwe aŋgɔ̀ natɛ̀ɛ nà ò mòlìkɛ̀.

14Èhwanja è làkìrzɛ̀ tɛ hwatò ema hwa è gbeyàna lìwurze, Lohwɛ̀, Tatɛ̀ wà anyu wà è ŋmanyu yà lohwà mɔ̀ hvɛ à è làkìrzɛ̀. 15Ndi inyɔ è rza làkìrzɛ̀ tɛ hwahvɛhvɛ hwatò, aŋga nanù, tɔ̀ Lohwɛ̀, Tatɛ̀ wà anyu mɔ̀hvɛ à rza è làkìrzɛ̀.”

Hwèyòkòlelì hwe ama Yerzù lì hvòmɛ̀nɛ̀ mòkìyà njàwò

16“È hwèlì tɛ ò mòkìyà njàwò, è rzìi emeyà ema màrzò mà anyu mà ɛneya rzɔ̀luu, nà òma hwatò hwa mèhvìlì hwa gbeyà. Hwatò hwa mèhvìlì wɔ̀ hwa nyùkɛ̀ marzò mà awu aŋga nanù òma hwatò hwa mà ayèmbɛ ema hwa hwèlì ò mòkìyà njàwò. Nà è òhweyà nà è jɔ̀kɛ̀ ema, wɔ̀ hwa mà màa lì lùwa mòrzawèlì mò awu mò arzɛ. 17Ndi è hwèlì tɛ ò mòkìyà njàwò, è rzòrzè màrzò mà anyu, è rzàrzòhwe hvɛ mahvumbu mà anyu. 18È gbèyi tɛ nanù, hwatò hwa rza ayèmbɛ ema è hwèlì ò mòkìyà njàwò. Lì aka tɛ Lohwɛ̀, Tatɛ̀ wà anyu mɛnɛ ema tɔ̀ mòtò à rza ɛnɛ. Mɔ̀ à ɛnɛ hweyà hwe arzɛ ema è gbeyà ò jututa, ndèŋgànɛ̀lɛ̀ mɔ̀ ndi à hwèlì è mɔ̀ ema à è rzaweyà.”

Hwèyòkòlelì hwe ama Yerzù lì hvòmɛ̀nɛ̀ lì hwɛnɛ là erzàŋgò

(Luk 12.33,34)

19“È rzi keka lì awutɛlɛ mònàmɛ̀ anù rze yà mɔ̀nyɛ̀, èki ema lìrziyɛyi nà màaŋgàaŋgò mà hvaŋga hwèèmà, ema hwayihwɛ hwa ò gbɛɛ è ndawò ò lì kpèeyà lì ihwa. 20Ndi è ute mònàmɛ̀ mò anyu ò ŋmanyu yà lohwà. Èki ema lìrzìyɛ̀ nà màaŋgàaŋgò mà rza ò hvaŋgɛ hwèèmà. Ndèŋganɛlɛ hvɛ, hwàyihwɛ̀ hwa rza tànɛ lì gba e ndawò ò lì hwe ihwa. 21Ŋmèemà mò mòtò mò hwèlì ndi èki ema lùùtà lì eni lì hwèlì.

22“Mììrzɔ̀ mà hwèlì ndi nàa ètùlù yà è nyò. È hwèlì tɛ nanù ema mììrzɔ̀ mà aŋgɔ̀ mà hwèlì tɛ gbamù, è nyò yà aŋgɔ̀ yà arzɛ yɔ̀hvɛ è òndà nà ŋmàye. 23Ndi lìirzɔ̀ là aŋgɔ̀ lì rza rzɛŋgi tɛ, è nyò yà aŋgɔ̀ ya arzɛ è ònda ndi nà jìtìtì. È hwèlì tɛ ema yòòma ema ò gbeyà ò ɛnɛ yɔ̀ ndi è ò ika ò tenì yà jìtìtì, aŋga nanù, iŋgi jìtìtì ema o ò hwɛ ò tenì, jò ò hwɛ ndi jìtìtì ndɛnɛ.

24“O rzà ènje tɔ̀ mògbèèlì tɔ̀ mɔ̀kɔ ema à tànɛyi lì gbèeyà rzàŋgò ihwàkɛ ò ŋgèlì hvɔ̀kɔ. À hwɛnì lì kɔ̀ɔ mɔ̀kɔ, rzìi à lìŋgàna ɔ̀nɛ̀yi. À ò gbèeyà mɔ̀kɔ nà ŋmèemà mò eni mò arzɛ, rzìi à ndinda ɔ̀nɛyi. Ò rza tanɛ̀ lì hwɛ è mògbèèlì wà àma Lohwɛ̀, rzìi ò hwɛ hvɛ è mògbèèlì wà màlì.”

25“Ɔ̀ndeŋgàtɛ̀, nà è òhweyà nanù ema, è rza atàkìrzɛ̀ ò lòŋgɛ, ò inyɔ lì òhwa nanù ema, mamɛ jò ò lɛ̀ɛ̀, tɔ̀ mamɛ jò ò nyɔ, tɔ̀ mamɛ ema jò ò wɔ̀tɛ. Rzeke lòŋgɛ lì hwɛnì wòlìtò lì aka mòlelì e? Ndèŋgànà rzeke è nyò hvɛ è hwɛnì wòlìtò lì aka lìwɔtì e? 26È ɔŋgɔ̀ tɛ̀ hwènɔ̀nì, hweyɔ hwe rza ònà tɔ̀ hwema, hwe rza hvata tɔ̀ mbòtà, ndèŋgànɛ̀lɛ̀ hvɛ hwe rza òhvi tɔ̀ èki ya lì uta è mbòtà. Ndi Lohwɛ̀, Tatɛ̀ wà anyu wà ŋmanyu à hwe lìrzɛ̀! Rzeke inyɔ è hwɛnì wòlìtò nà mɔ̀ lì aka hwènɔ̀nì e? 27Njɛnɛ wà anyu ema ò lì atàkìrzɛ̀ là eni, à tànɛyi lì hwata ehvòwa yà eyu ò lòŋgɛ là eni e?” 28“Mamɛ hvɛ ndèŋgatɛ̀ è à tàkìrzɛ̀ ò mbɔti e? È ɔ̀ŋgɔ tɛ nà òma i mbònji ja waŋga jò òŋga. I mbònji jɔ̀ i rza gbeyà èwòlò tɔ̀ lì àkɔ̀lìrzɛ̀ hvɛ mààtù mè awu. 29Ndi nà è òhweyà nà è jɔ̀kɛ̀ nanù ema, tɔ̀ Kìŋgɛ Rzòlòmɔ̀nì ò tenì yà mònàmɛ̀ mò eni, à rzi wɔ̀tè tɔ̀ lìwɔtì tɔ̀ lɔ̀kɔ ema lì mà lɔ̀ɔwu, lì uka tɔ̀ lìnyèŋge tɔ̀ lɔ̀kɔ là mbònji. 30Lohwɛ̀ à wɔ̀tìrzɛ̀ tɛ hwèwùle hwe lìkòmbà là wàŋgà ema hwe hwèlì anù yàwònò rzìi ŋmɛ̀lɛ̀ hwe àŋgbahwa ò mùnya. Mɔ̀ à rza tànɛyi lì è wɔ̀tìrzɛ̀ lì akà hwèwùle e? Mamɛ ndeŋgàtɛ màlòkɛ̀ mà anyù mà utu e?” 31“O èŋgànɛ̀lɛ̀ rzɔ è rza atàkìrzɛ̀ lì hvòmɛ̀nɛ̀ hweyà ò lì òhwa nanù ema, ‘Mamɛ jò ò lɛɛ e? Mamɛ jò ò nyɔ e? Tɔ̀ mamɛ jò ò wɔtɔ̀ e?’ 32Èhwanja hwaŋga ema hwa rza hwiyɛ̀ Lohwɛ̀ wɔ̀ hwa eyàa rzayi-rzayi ò lì lùwà hwene hwèmà hwe arzɛ. Ndi Tatɛ̀ wà anyu wà ŋmanyu, à hwi ema è endèli hwenè hwèmà hwe arzɛ. 33Ndi è lòmè lì arza hweyà hwe lìkànèyà là ama Lohwɛ̀ lì aka hweyà hwe arzɛ. Ndèŋgana è gbèèyè hvɛ mamɛ ema Lohwɛ̀ à arza nanù ema è gbèèyè. È gbèyi tɛ nanù, Lohwɛ̀ à è ŋgbà hwenɛyi hwèmà hwe arzɛ. 34O èŋgànɛ̀lɛ̀ rzɔ, e rza ahvahvɛ lì hvòmɛ̀nɛ̀ è ŋmɛ̀lɛ̀. È ŋmɛ̀lɛ̀ yɔ̀ yiti yò ò òhva è mà eni mètàkà ema mè ò mò tanɛ̀. Wùnyà tɛ wò hwɛnì è jà eni ndùtù.”

Currently Selected:

Matiyò 6: bri

Highlight

Copy