Makòrzì 8
8
Yerzù à lìrzɛyi hwèkòlì hwenì hwe hwatò
(Mat 15.32-39)
1Ò ìtììtènì ja mèŋge mèènyà, è hvɛhvɛ ŋgìndì ema jèeyà Yerzù. Kanatɛ hwa rza òhvɛ tɔ̀ yòma ya lì làa, Yerzù rzìi a hwɛlɛ hwà-òkòwèlì hwa eni, rzìi a hwa òhweyà nanù ema, 2“Nà òkeya hwanù hwatò ììlì. Èhwanja hwà mà hwɛ anù na imba mèènyà meyawò, hwa rzi lelì tɔ̀ yòma. 3Nà hwa òhwèlì tɛ ema hwa ɛ̀ndɛ ò màandà mà awu nà e njàwò, lòŋgò la awu hwa tànɛ̀yi lì rzòòwà ò njiya èhwanja lòŋgò la awu hwa uhwɛlɛlɛ hwèki hwe rzɔlɛnɛyi.” 4Hwà-òkòwèlì hwa eni rzìi hwa mò alàhwɛ̀ nanù ema, “One ì tanɛ̀yi lì lùwa mòlelì anù mòrzanjɛ̀ ema mò tanɛ̀ hwanù hwatò hwa arzɛ e?” 5Yerzù rzìi a ijòwa nanù ema, “Hwehvòòtò hweti inyɔ e òhvi e?” Hwà-òkòwèlì hwa eni rzìi hwa mò alàhwɛ̀ nanù ema, “Lìrzàmbà la hwèhvòòtò.” 6À òhweyà è ŋgìndì nanù ema, hwa lìya ò rze a wòwa lìŋgi lìrzàmbà la hwèhvòòtò, rzìi a ŋgba Lohwɛ̀ jeka. A hwe kɛrzɛ, rzìi a ŋgba hwà-òkòwèlì hwa eni ò lì kahweyà hwatò, rzìi hwa gbeyà nanù. 7Hwà mà òhva ŋgurzu ja nyàmà rzàlì ja malìhwa. Yerzù a ŋgba hvɛ Lohwɛ̀ jeka ò iŋgi nyàmà, rzìi a òhweyà hwà-òkòwèlì hwa eni ama hwa kahweyà èŋge ŋgìndì. 8Hwatò hwà mà làa, natɛ̀ɛ hwà mà uja. Hwà-òkòwèlì hwa eni rzìi hwa rzaŋga lìrzàmbà la ŋgata ja mbumbu ja hwehvetelɛ. 9Ò ma tɛ̀mɛ̀ eyà ya hwèkòlì hweni hwe hwatò hwa mà hwɛ aŋga. Yerzù à mà hwa òhweyà ama hwa ɛ̀ndɛ. 10Rzìi hwa ɛ̀ndɛ hwa kpèya ò wɔ̀lɔ̀ wò ndɛnɛ na hwà-òkòwèlì hwa eni rzi hwa ɛ̀ndɛ ò erzòòkà ya Dalmanùta.
Ihvàlìrzàyì ja arza embànèlì
(Mat 12.38-42; 16.1-4)
11Ihvàlìrzàyì hwà mà jà ò ma Yerzù rzi hwa wòteya e hvènda na mɔ̀, hwà mà mò arzana embànelì e uhwɛlɛlɛ ò ŋmanyu yà lohwà. Hwà mà gbeyà ndi nanù ò lì mò kèkirzɛ. 12A ma rzìyòwa hvɔ̀ɔ̀ rzìi a òhwa nanù ema, “Mamɛ ndèŋgàtɛ̀ ene nyɔ̀ŋgɔ̀nì ya arza embànèlì e? Nà e òhweyà e jɔ̀kɛ̀, nà rza e uŋmɛ̀lɛ̀ tɔ̀ embànèlì.” 13Rzìi à hwa lìya aŋga a tìmba ò tenì ya wɔ̀lɔ̀ wò ndɛ̀nɛ rzi a aka a ɛ̀ndɛ ò ɛnɛyi èhvarzù ya yùlu.
Èhwindi ya Ihvàlìrzàyì
(Mat 16.5-12)
14Nà òmà Hwà-òkòwèlì hwa ama Yerzù hwà mà ɛ̀ndɛ ò lì kpèeyà ò wɔ̀lɔ̀, hwà mà hvòŋga lì òhva hwèhvòòtò. Hwà mà òhva ndi ehvòòtò yɔ̀kɔ mɛnɛ. 15Yerzù rzìi a hwa kòkòwɛ̀lɛ̀ nanù ema, “È àŋgòhweyà ehwìndi yà Ihvalìrzàyì nà è yà ama Hɛ̀rɔ̀dì.” 16Rzìi hwa àwòhwànɛ̀lɛ̀ mɔ̀kɔ nà ɔ̀nɛyi nanù ema, “À òhwa ndi nanù èhwanja ì rza òhvi tɔ̀ èhvòòtò.” 17À ma hwiyà mamɛ hwà mà hwɛ lì òhwa, rzìi a hwa ijòwa nanù ema, “Mamɛ ndèŋgàtɛ̀ e òhwa lì hvòmɛ̀nɛ̀ ema è rza òhvi tɔ̀ hwèhvòòtò e? Nàtɛ̀ɛ na nàŋgɛ è rza hwi tɔ̀ lì rzɔ̀ŋgìtɛ̀nɛ̀ e? Mamɛ ndèŋgàtɛ̀ mèèmà me anyu me eti e? 18È òhvi mirzɔ̀, è rza ɛnɛ e? È òhvi matò, è rza hvɔ̀ŋgɛ̀ e? Nàtɛ̀ɛ na nàŋgɛ è rza tanɛ lì ɔ̀ŋgɛ̀lɛ̀ e? 19È hvònda ema nà ma kahweyà hwekòlì hweta hwe hwatò hwèhvòòtò hweta, ŋgata itì ja mbùmbu ja hwehvetɛlɛ ja hwèhvòòtò ema e ma rzàŋge e?” Rzi hwa òhwa nanù ema, “Lìyòmɛ̀ là ŋgata na ihwàkɛ.” 20Rzìi à hwi ijòwa hvɛ nanù ema, è hvònda ema, “Nà ma kahweyà hwekòlì hweni hwe hwatò lìrzàmbà la hwèhvòòtò, ŋgata itì ja mbùmbu ja hwehvetɛlɛ ja hwèhvòòtò ema e ma rzàŋge e?” Rzìi hwa mò alàhwɛ̀ nanù ema, “Lìrzàmbà la ŋgata.” 21A hwa ijòwa hvɛ nanù ema, “Nàtɛ̀ɛ na nàŋgɛ e rza òhvi lì rzɔ̀ŋgìtɛ̀nɛ̀ e?”
Yerzù a wɔ̀wìrzɛ̀yi e ndima mòtò
22Yerzù nà hwà-òkòwèlì hwa eni hwa mà jà ò Bɛ̀trzàyìdà. Àŋga ndi lòŋgò la hwatò hwà mà jàne mòtò mɔ̀kɔ wa ndima rzìi hwa rzòrzòmeya Yerzù hwa ama a mò hwàkɛ lìya la eni. 23Rzìi à lɛ̀mbɛ eŋge ndima ya mòtò ò lìya la eni rzìi a mò tìmba à mò anjiyana èŋge mbòwà rzàlì. À rzɔ̀yeya èŋge ndima hweyɔ̀lì ò mirzɔ̀, Yerzù rzìi a mò hwàkɛ màà mà eni ò nyò ya eni, rzìi a mò ijòwa nanù ema, “Ò ɛni yòma e?” 24Oŋgò mòtò wa ndima à ɔŋgɔ̀ ò ŋmanyu rzìi à òhwa nanù ema, “Nà ɛnɛ hwatò, hwa ɛnɛya ndi nàa màyì ema mà ɛ̀ndɛ.” 25Yerzù rzìi a hwàkɛ màà mà eni ò mirzɔ̀ ma ama òŋgò mòtò hvɛ̀. Òŋgò mòtò à mà wòwa hvònda ò lì ɔŋgɔ̀, rzìi mìirzɔ̀ ma eni ma lìhvòhweyà, a wòteya lì ɛnɛ. 26Yerzù rzìi a mò timbirzɛ ò ndawò ya eni rzìi a mò òhweyà nanù ema, “Ò rzi keka lì timbeya ò èŋge mbòwà.”
Yerzù ndi à hwèlì e Mɔ̀ ema à Ɔ̀kirzɛ̀hwɛ̀yi
(Mat 16.13-20; Luk 9.18-21)
27Yerzù na hwà-òkòwèlì hwe eni hwà mà hwɛ lì ɛ̀ndɛ ò maŋga mambòwà lì kòmbɛ̀nɛ̀ erzòòkà ya Kàyìrzèrìyà Hvìlìpì. Nà òmà hwà mà hwɛ ò yɔ̀ndɔ yà awu Yerzù rzìi a hwa ijòwa nanù ema, “Njɛnɛ hwatò hwa òhwa nanù ema na hwèlì e?” 28Rzìi hwa mò alàhwɛ̀ nanù ema, “Lòŋgò hwa òhwa nanù ema ò hwèlì ndi Yòwanìrzɛ̀ è Mòlùhwìrzèlì, hwahvɛhvɛ hwa òhwa nanù ema ò hwèlì ndi Èlàyijà, hwanɛ̀yi hwa òhwa nanù ema ò hwèlì ndi Mòòhwèlì mɔ̀kɔ wà Èlìŋgɛ̀.” 29Yerzù rzìi a hwa ijòwa hvɛ nanù ema, “Njɛnɛ inyɔ hwìti e òhwa nanù ema na hwèlì e?” Pètrò rzìi a alàhwɛ̀ Yerzù nanù ema, “O wa ndi ò hwèlì e Mɔ̀ ema à Ɔ̀kirzɛ̀hwɛ̀yi.” 30Yerzù rzìi a hwa kòkòwɛ̀lɛ̀ ama, hwa rzi keka lì òhweyà tɔ̀ mòtò njɛnɛ mɔ̀ à hwèlì.
Yerzù a òhwi lì hvòmɛ̀nɛ̀ mètàkà nà è kpelì yà eni
(Mat 16.21-28; Luk 9.22-27)
31Yerzù rzìi a wòteya lì òkòlɛ̀ hwà-òkòwèlì hwa eni nanù ema, “È Ŋmanà wà è Mòtò wà Hwènàmà à hwɛnì lì taka ò nyayi na nyayi ja hweyà. Hwàmbaki hwa hwatò, ipìlìrzì ndɛnɛ, na hwà-òkòlèlì hwa mbenda hwa hwɛnì lì mò ndinda. À hwɛnì lì òŋwàhwà, ndi ò mburzà ya menya meyàwò à ò hvùmùwà.” 32Yerzù à mà hwa òhweyà hwenè hweyà tòlòlò. Pètrò à mà mò wòwa rzìi a mò ɛ̀ndɛnɛ ò tòŋgòŋgò, rzìi à mò kanja. 33Yerzù rzìi ayèŋgòwɛ̀ lì ɔ̀ŋgɔ hwà-òkòwèlì hwa eni, rzìi a lòmeyà Pètrò nànù ema, “Mòkarzɛ̀ ò nò anjiya ò wòrzò! Mèèmà mò aŋgɔ̀ mò rza enje ò hweyà hwe ama Lohwɛ̀, mò hwèlì ndi ò hweyà hwe hwatò.” 34Yerzù rzìi a hwɛlɛ èŋge ŋgìndì na hwà-òkòwèlì hwa eni, a hwa òhweyà nanù ema, “Tɔ̀ ima mɔ̀ ema a hwɛnì lì nò nɔ̀ŋgɔ a hwɛnì lì rzɔ̀rzɔ̀ hweyà hwe arzɛ rzìi a anjilɛ e mbarzà ya eni rzìi à nò nɔ̀ŋgɔ. 35Èhwanja tɔ̀ njɛnɛ ema à arzùŋgɛ̀ lòŋgɛ là eni à lì wɔ̀lɛnɛ. Ndi tɔ̀ njɛnɛ ema à wɔ̀lɛ̀nɛ̀yì lòŋgɛ là eni ò nyòla ami nà ò gbàmu wò mònò Ŋmɛ̀ndì mò Gbamù, à lùwa lòŋgɛ là gbìndèyà. 36Ima mɔ̀rzɛ̀ŋgì ema mòtò à lùwà à yàlɛ̀ tɛ è rze yà arzɛ, rzìi à wɔ̀lɛ̀nɛ̀ lòŋgɛ là eni e? 37È rza tànɛ̀ lì hwɛ nanù! Mamɛ mòtò à tànɛyi lì ŋgbà ò lì tikòwàna lòŋgɛ là eni e? 38È mɔ̀ ema à nò òkana imba nà Eyà yà Lohwà irzɔ̀ni, ò ene nyɔ̀ŋgɔ̀nì yà yàwònò ema è òŋgamà Lohwɛ̀ nà mèèmà mè hwàkɛ ema è hwèlì hvɛ ndi è nyɔ̀ŋgɔ̀nì yà wòhwe, è Ŋmanà wà è Mòtò wà Hwènàmà mɔ̀ hvɛ à mò òkana irzɔ̀ni è hvònda ema à jà nà i aŋgèlì jè eni jà wòtani nà èluhwe yà ama Tatɛ̀ wà eni.”
Currently Selected:
Makòrzì 8: bri
Highlight
Share
Copy
Want to have your highlights saved across all your devices? Sign up or sign in
© 2022, CABTAL
