Eyɔɔ 11

Ewu Natsoro

1Gho deʼ wɛ ekumu ngɔ à mwɔ Natsoro ngɛ à na gwɔ̀n. Natsoro mane bwɔngwaaye mɔ fyee, Mata mane Meri â na tsɔmɔ a Bɛtani. 2E Meri wunɔ wɛ ghongwaanɔm mɔ Natsoro à ma gwɔ̀n ngɛ na e Meri ŋwaʼ wɛ à dɔɔrɔ ngud mbì elo Yeso gɛrɛ fla ene nyɔrɔ ato mɔ ngɛ. 3Éngɛ à bwɔngwaaye byɛ tɔm ekɔn ebe Yeso kpe, “Masakɛ, esɔrɔ etaa ngwɛ wa gwɔ̀n.” 4Èndzobo chɛ Yeso à zo éngɛ ngɛ, è ga kpe, “Aŋwan zɔnɔ ke ngo ngùdù ene ewu bo. Ebwa wunɔ ne gli énde é ndɛʼ eghɔ ebe Ngwe mbɔʼtye e ma ngo ghɔ Ŋwɔ gho nyɛ̀rɛ̀ zèʼe anyi.” 5Yeso à ne doʼo Mata, ghongwaaye ngɔ Meri mane ghongwaanɔm angɔ Natsoro. 6Bɛʼngɛ èndzobo chɛ engɔ à zo kpe Natsoro wa gwɔ̀n ngɛ, a da wu tsɔmɔ enji fyee afwɔ yɛ engɔ à mwɔ ngɛ. 7Éngɛ engɔ ga ebe bɔ bɛɛrɛ abwa mɔ kpe, “Ntsɔ wu ngɔɔ achim a Judeya.” 8Bɔ bɛɛrɛ abwa ngɔ ga kpe, “Àtee abwa, à ne êwɛwɛ̀ anɔ, bɔ Juu kpe é timi awɛ ene atye è zhudu, ebyɛ ngwo kpe ntsɔ wu ngɔɔ aŋu?” 9Yeso gíì kpe, “Enyɔ̀m ne tsɛʼ wum ǹchwɔ̀ fyee e nyɛrɛ etiʼdi é bwɛ̀n enchwenchwe? Egho ma zhiri nchi ngɛ ke ma tsànà e gò bo mbɔʼnga engɔ wa zɔ akwâ aŋu ese ma pɛ̀ ngɛ. 10E na tsànà gò me èndzobo chɛ e ma zhiri ǹklì ngɛ mbɔʼnga akwâ ke ma pɛ̀ bo.” 11Èndzobo chɛ engɔ à shi ga énde ngɛ, engɔ fɔɔ embè ga ebe angɔ kpe, “Esɔrɔ bɔ Natsoro shi fuumu m̀bwɛrɛ, bɛʼngɛ mmɛ na ngɔ̀ɔ aŋu é zɛ̀ɛmɛ̀ engɔ ambwɛrɛ.” 12Bɔ bɛɛrɛ abwa ngɔ gii ebe engɔ kpe, “Masakɛ, mala engɔ ma bwɛrɛ shi è wa bwada.” 13Yeso à na ga mwɔ aŋu Natsoro à shi ku ngɛ, bɛʼngɛ bɔ bɛɛrɛ abwa ngɔ ma zhuŋu ma m̀bwɛrɛ mɔmbwo. 14Éngɛ Yeso toʼro ebe angɔ apɛpɛ kpe, “Natsoro shi ku. 15Bɛʼngɛ ene egha ndzɔn mmɛ we gɛnɛ angu kpe mmɛ ne tsɛʼ aŋu bo, mbɔʼtye mbɔn le ebɛrɛ. Ntsɔ ngɔɔ aŋu enjitsɔ.” 16Engɔ Tɔmas, wɛ â gɛrɛ ma zɔʼrɔ kpe Dedymos wɛ a mwɔ ŋwɔ Ngwe ngɛ ga ebe abɔ bɛɛrɛ abwa abê kpe, “Ntsɔ gɛrɛ ngɔɔ mbɔʼtye mwɔ ewu ntsɔ ku ne àtee abwa.”

Yeso ne ezhwɛm, nè ewu mane etyê

17Aŋu Yeso à bwɛn a Bɛtani ngɛ, engɔ zɔ kpe â shi kpa Natsoro, è shi tsɔmɔ efwɔ eshe efwɔ enji kwɛ̀. 18É nyɛrɛ a Bɛtani é ngɔ̀ɔ a Jerusalɛm â ke bwɛrɛ ebla fyee bo. 19Bɔ Juu akɛkɛ â shi zeʼe é gamma ebe Mata mane Meri gɛrɛ ma bwaara ńtara angɔ ene eku ghongwaanɔm amɔ. 20Èndzobo chɛ Mata à zo kpe Yeso a sa zeʼe ngɛ, è gli ngɔɔ kla engɔ ese, bɛʼngɛ Meri me nɔ mɔ a ndɔ. 21Mata ga ebe Yeso kpe, “Masakɛ, mala ngwo à mwɔ anɔ, shi ghongwaanɔm ngbɛɛ ke ku bo. 22Bɛʼngɛ mmɛ we nɛɛ kpe ka de mwɔ enjitsɔ Ngwe ya ndɛʼ ala yɛ ngwo ma biiri ebe engɔ ngɛ engɛ̂.” 23Yeso gâ ebe engɔ kpe, “Ghongwaanɔm ngwɛ wa wu zhwɛm.” 24Mata gii kpe, “Mmɛ we nɛɛ kpe engɔ yà zhwɛm ene ewu anji zhwɛɛmɛ bɔ yɛ mwɔ anji ngùdu ngɛ.” 25Yeso gâ ebe engɔ kpe, “Mmɛ ne zhwɛm gɛ̀rɛ̀ mwɔ etyê, egho wɛ è me bɛrɛ ene mmɛ ngɛ wa tyè ke è de kuku. 26Egho wɛ me tye ekɔʼɔ me bɛrɛ ene mmɛ ngɛ yaa ne ku. Ngwo we bɛrɛ engɛ̂?” 27Mata gii kpe, “Ɔ̧̀ɔɔ Masakɛ mmɛ we bɛrɛ kpe ngwo na Kristo ŋwɔ Ngwe wɛ Ngwe à ga kpe è wa zeʼe efwɔ ese ngɛ.”

Yeso ku̧u

28Aŋu Mata à mɛɛrɛ è ga ngɛ, è ghɛɛbɛ ngɔɔ zɔʼ ghongwaaye mɔ Meri, è ga ebe engɔ antsebe kpe, “Àtee abwa wa anɔ ma biiri awɛ.” 29Aŋu Meri à zɔ énde nɔ, è kumu tam ngɔɔ é zɔ engɔ. 30À de ne éngɛ nɔ, Yeso ne shi nyii efwɔ abɛ yɛ bo, è ma bli afwɔ yɛ Mata à kla engɔ ngɛ. 31Aŋu bɔ Juu byɛ â mwɔ efwɔ ndɔ nè Meri ma gamma ebe engɔ ene eku ngɛ, â zɔ aŋu engɔ à kumu tam gli ngɛ, angɔ kiri ma bwaʼ kpe engɔ ngɔɔ atoshe é kù̧u. 32Èndzobo chɛ Meri à bwɛn afwɔ yɛ Yeso à mwɔ è zɔ engɔ ngɛ, è ndwa amɔ elo ngɔ ga kpe, “Masakɛ kɛ̀ Mala ngwo à mwɔ anɔ shi ghongwaanɔm ngu ke ku bo.” 33Èndzobo chɛ Yeso à zɔ aŋu engɔ mane abɔ Juu byɛ â zeʼe nè ngɔ â ma bɔʼ à ku̧u ngɛ, ebwa wɛ mɔmɔ engɔ bwɛrɛ efwɔ azhwɛɛrɛ, nyii engɔ ghɛʼ. 34Yeso biiri kpe, “Mbɔn ne kpa engɔ awe?” Angɔ gii kpe, “Zeʼe zɔ Masakɛ.” 35Yeso kuu. 36À bɔ Juu byɛ ga kpe, “À ne doʼo engɔ ngwo nɛɛ!” 37Bɛʼngɛ adeʼ ga kpe, “Egho wɛ à me né fuʼ aghɔɔ àfò aghɔɔ ngɛ à ke né le kpe egho wunɔ ka ku bo?”

Yeso zhwɛɛmɛ Natsoro ene ewu

38Aŋu ewu yɛ à me mɔmɔ Yeso ghɛʼ ngɛ, engɔ bwɛn atoshe. À ne eláʼ deʼ e me tɛʼɛ etye deʼ anyi. 39Yeso gâ ebe abɔ byɛ â mwɔ aŋu ngɛ kpe, “Mbɔn chi etye.” Mata ghongwaaye egho ku wɛ ga kpe, “Masakɛ, esɛɛ bɔɔbɔɔ ye nɛɛ tye e sa gli mbɔʼnga engɔ shi tsɔmɔ efwɔ eshe efwɔ enji kwɛ̀.” 40Éngɛ Yeso ga ebe angɔ kpe, “Mmɛ à ke ga endɔn kpe mala mbɔn me le ebɛrɛ shi mbɔn ba zɔ enɛŋɛrɛkɛ Ngwe bo?” 41Éngɛ angɔ à chi etye yɛ. Yeso kɔʼɔ ekere ga kpe, “Àtɛ, mmɛ è bɛ̀rɛ awɛ kpe ngwo à shi zo atsaʼra ndza. 42Mmɛ we nɛɛ kpe ngwo wa doʼo à zhuru angu akyɛ gimkpaʼ, bɛʼngɛ mmɛ na ga énde mbɔʼ abɔ byɛ e me tamma anɔ ngɛ, mbɔʼtye e bɛrɛ kpe ngwo à saa angu.” 43Èndzobo chɛ engɔ à shi ga énde ngɛ, è ga ene go kamakam kpe, “Natsoro, gli ese!” 44Akudugho yɛ gli ese, e me koro ebwo mane elo ngɔ ene enkandi, nè aparandi efàarà ngɔ. Yeso gâ ebe angɔ kpe, “Mbɔn chidi ǹdiri ekwa ngɔ shi engɔ ngɔɔ.”

Bɔ nde akɔɔ é zhudu Yeso

45Éngɛ nɔ, bɔ Juu deʼ byɛ â me zeʼe é gamma ebe Meri ngɛ zɔ ebwa wɛ Yeso à le ngɛ, gɛ̀rɛ̀ le ebɛrɛ ene engɔ. 46Bɛʼngɛ abɔ deʼ â nyɛnnɛ ngɔɔ ebe bɔ Farisii é tòʼrò ebwa wɛ Yeso à le ngɛ. 47Éngɛ m̀fɔ̀rɔ̀ zhiri mane bɔ Farisii byɛ zɔʼ bɔ m̀pàrà amɔ yɛ â ma zɔʼrɔ kpe Sanhɛdrin ngɛ. Abɔ byɛ sa biiri kpe, “Ntsɔ le ene? Ntsɔ le ebwa deʼ. Egho wunɔ wa le anɛ̂ abwa akɛkɛ. 48Mala ntsɔ shi engɔ fɔɔ embè, shi bɔ gimkpaʼ ba ngo bɛrɛ ene engɔ. Mala bɔ gimkpaʼ bɛrɛ ene engɔ shi bɔ Rom ba ngo nu ndɔngwe kɛ̀ mane abɛ bɔ.” 49Éngɛ Kayfas, egho bi abwaʼ angɔ wɛ à mwɔ angwa zhiri efwɔ anɔ̂m yɛ ngɛ, tam ga ebe angɔ kpe, “Mbɔn ke nɛɛ ebwa deʼ bo ka mpiʼ. 50Mbɔn ke nɛɛ kpe e we nara endɔn kpe gho ŋwaʼ kú ato bɔ fɔɔ na aŋu e me né nyiimi abɛ gimkpaʼ ngɛ bo?” 51Engɔ à ke ga éngɛ ene egha mɔ bo. Na angwa zhiri efwɔ anɔ̂m yɛ nɔ, engɔ à na mɛ̀nɛ̀ ekɔn Ngwe kpe Yeso wa ngo ku ato bɔ Juu. 52À ke tye ma ato abɛ yɛ bo, gɛrɛ nè bwɔ Ngwe byɛ e me saama ese ngɛ, é buumu angɔ afwɔbi é shi bɔ ŋwaʼ. 53Enyɛrɛ anji yɛ angɔ sa ke ma ato Yeso. 54Éngɛ nɔ, Yeso ne wu ma zhiri apɛpɛ abwaʼ bɔ Juu bo. Bɛʼngɛ engɔ nyɛn ngɔɔ efwɔ antiri abɛ deʼ ebara ebɔrɔńked â ma zɔʼrɔ kpe Efrɛm, tsɔmɔ amɔ aŋu nè bɔ bɛɛrɛ abwa mɔ. 55Èndzobo chɛ antara fɔɔ ekere bɔ Juu à sa zamma koʼo. Bɔ nyɛnnɛ abɛ kwaʼ ngɔɔ a Jerusalɛm é sò amɔ aŋu etsɛrɛ Mose à me tee ngɛ sa kɔʼ antara fɔɔ ekere wɛ. 56Bɔ Juu â na bli à zɛʼ Yeso, aŋu angɔ à me tamma emwɔ ndɔngwe kɛ̀ ngɛ, sa biiri àmɔ̀ àmɔ̀ kpe, “Mbɔn ne zhuŋu kpe ayɛ? Engɔ wa ke ene antara fɔɔ ekere zeʼe ba ngà?” 57Bɛʼngɛ m̀fɔ̀rɔ̀ zhiri mane bɔ Farisii â shi ge bɔ kpe mala gho deʼ zɔ afwɔ yɛ engɔ mwɔ ngɛ, e zeʼe sɛ̀ɛrɛ̀ mbɔʼtye mbɔɔ bere engɔ.

Currently Selected:

Eyɔɔ 11: nbt

Highlight

Copy