Eyɔɔ 2

Antara nu-aye abɛɛ abɛ Kana

1Enji à sa fɔɔ fyee nɔ, â ne le antara nu-aye deʼ abɛɛ abɛ Kana efwɔ abɛ Galilii. Áʼɔ̧̀ Yeso à gɛrɛ na aŋu. 2Yeso mane bɔ bɛɛrɛ abwa mɔ à gɛrɛ ne ene antara nu-aye wunɔ. 3Èndzobo chɛ amɔm myɛ angɔ à ma ŋwɔ à myɛ ngɛ, áʼɔ̧̀ Yeso ngɔɔ gà ebe Yeso kpe, “Mɔm shi myɛ anɔ.” 4Yeso gíì ebe engɔ kpe, “Aye, ngwo ke ma ngo tòʼrò ebwa wɛ mmɛ ma ngo fwɛʼ ngɛ ena bo. Endzobo ndza ke shi koʼo bo.” 5Éngɛ áʼɔ̧̀ ngɔ ngɔ̀ɔ gà ebe bɔ afwɛʼ kpe, “Mbɔn le aŋu engɔ ma ngo gà ngɛ.” 6Èngwara akɔ kɛkɛ mfo chɛ â me ndeere ene chwâ ngɛ à ne ebara aŋu, m̀pèrè chɛ bɔ Juu à ma gli ma sò akwa amɔ é me pɛ efàarà Ngwe ngɛ. Ekɔ ŋwaʼ à na nu ne egla mɔm tan nɔ. 7Éngɛ Yeso gà ebe bɔ afwɛʼ kpe, “Mbɔn shweere akɔ zɔnɔ ene ndim.” Éngɛ angɔ shweere akɔ yɛ gimkpaʼ ene ndim. 8Èndzobo chɛ angɔ à le éngɛ ngɛ, ato gà ebe angɔ kpe, “Mbɔn dɔɔrɔ adeʼ ngɔɔ ndɛ̀ʼ ebe egho wɛ è me tam ato ene antara wunɔ ngɛ.” Angɔ le engɛ̂. 9Egho kɛ̀ wɛ zhweʼre ndim, e shi firi shi mɔm. Engɔ à ke nɛɛ afwɔ yɛ a nu mɔm zeʼe ngɛ bo, bɛʼngɛ abɔ afwɛʼ byɛ à ne nɛɛ. Éngɛ engɔ zɔʼ anɔmaye wunɔ ebara mɔ 10gà ebe ngɔ kpe, “Bɔ gimkpaʼ na dye à ndɛ̀ʼ ma mɔm myɛ è me nara ngɛ ebe bɔ é ŋwɔ. Endzobo bɔ shi ŋwɔ mɔm myɛ ngɛ, è shi sa ndɛʼ atwa mɔm. Ngwo shi ngùdu ene angɔ myɛ è me nara ngɛ? Ayɛ me le kpe ngwo sa zeʼe nè amɔm mɔnɔ me enjitsɔ?” 11Ewunɔ ne ebwa zodo zodo mbèmbè wɛ Yeso à le abɛ Kanan efwɔ abɛɛ abɛ Galilii é tee ekama mɔ. Éngɛ bɔ bɛɛrɛ abwa ngɔ à bɛrɛ kpe na Ǹtɔmzhwaʼa. 12Aŋu ebwa wunɔ à fɔɔ ngɛ, Yeso, áʼɔ̧̀, bwɔngwa mane bɔ bɛɛrɛ abwa mɔ à kla ngɔɔ a Kapɛnaum. Angɔ à tsɔmɔ aŋu efwɔ enji deʼ.

Yeso chwee bɔ a ndɔngwe kɛ̀

13Aŋu endzobo à sa koʼo ene antara fɔɔ ekere bɔ Juu ngɛ, Yeso ngɔɔ a Jerusalɛm. 14Engɔ à kla bɔ e ma fɛ̀nnɛ m̀pwɔ̀rɔ̀, ǹglɔ̀rɔ̀, mane mblɔ̂m efwɔ ndɔngwe kɛ̀. Adeʼ à ne tsɔmɔ edɔm echud ma kobo akɛb. 15Yeso ke akanda sa chwee à wuru bɔ gimkpaʼ, ǹglɔ̀rɔ̀ mane m̀pwɔ̀rɔ̀ efwɔ ndɔ aŋu, è sàama abɔ byɛ â ma kobo akɛb ngɛ, è ghɛ̀ɛbɛ achud ekara kubu a chwâ. 16Engɔ gà ebe abɔ byɛ â ma fɛ̀nnɛ mblɔ̂m ngɛ kpe, “Mbɔn bwɛ ela bɔnɔ ngɔɔ ese, mbɔn ke le ndɔ àtɛ ngu firi shi ewu̧ bo” 17Bɔ bɛɛrɛ abwa ngɔ zhuŋu ebwa wɛ e me ŋwɛʼrɛ efwɔ aŋwɛʼrɛ Ngwe kpe, “Andɔŋɔ ndza mbɔʼ ndɔngwe njɛ ya zhu angu.” 18Éngɛ bɔ Juu biiri ebe Yeso kpe, “Anɛ̂ ebwa ze a me né tee kpe ngwo we le akama é fwɛʼ ebwa wunɔ?” 19Yeso gíì ebe angɔ kpe, “Mbɔn sɛʼɛ ndɔngwe kɛ̀ zɔnɔ sàa a chwâ, enji tɛd mmɛ wa wu byɛ e saa ekere.” 20Angɔ gii kpe, “Â nu enɔ̂m èsama fyee tɛʼ mfo é byɛ e ndɔngwe kɛ̀ zɔnɔ. Éngɛ ngwo ga kpe ngwo we né byɛ efwɔ enji tɛd?” 21Bɛʼngɛ e ndɔngwe kɛ̀ yɛ engɔ à ma gà ngɛ à ne ekwa mɔ. 22Èndzobo chɛ engɔ à zhwɛm ene ewu ngɛ, bɔ bɛɛrɛ abwa ngɔ zhuŋu ebwa wɛ engɔ à shi ga ngɛ. Éngɛ angɔ à bɛrɛ etɛʼɛ Ngwe mane aga yɛ Yeso à ma gà ngɛ. 23Aŋu Yeso à mwɔ a Jerusalɛm endzobo antara fɔɔ ekere ngɛ, bɔ akɛkɛ à zɔ anɛ̂ abwa yɛ engɔ à ma le ngɛ, gɛ̀rɛ̀ bɛ̀rɛ ene ekumu ngɔ kpe engɔ na Ǹtɔmzhwaʼa. 24Bɛʼngɛ Yeso à ke shi etaa mɔ ene angɔ bo, mbɔʼnga engɔ à ne nɛɛ ńtara bɔ gimkpaʼ. 25Engɔ à ke ke antsɛ deʼ kpe è ga ebwa deʼ mbɔʼ bɔ bo. Engɔ à ne nɛɛ ebwa wɛ à me mwɔ efwɔ etaa gho ŋwàʼaŋwàʼ ngɛ.

Currently Selected:

Eyɔɔ 2: nbt

Highlight

Copy