Luk 24

Aŋu Yeso à zhwɛm ene ewu ngɛ

(Mat 28:1-10; Mak 16:1-8; Eyɔ 20:1-10)

1À ne enchwenchwe twɛn, anji mbèmbè efwɔ ǹkyɛ̀, âye byɛ â shi ndeere enklila, bwɛ e ngɔɔ atoshe Yeso. 2Aŋu angɔ à bwɛn ngɛ e zɔ kpe â shi goo etye yɛ â me koo enduʼeshe anyi ngɛ chi. 3Éngɛ angɔ nyii ngɔɔ efwɔ shi ne zɔ akudugho Masakɛ Yeso Kristo bo. 4Aŋu angɔ à tamma aŋu sa kaŋa amɔ a kɔn ngɛ, ekyɛ ŋwaʼ ânɔm deʼ èfyee gɛrɛ bwɛn tamma ebara angɔ. Ǹdiri angɔ à na pɛ ma nɛŋɛrɛ. 5Èklɔ̀ à bere aye byɛ, e gunu amɔ a chwâ, ânɔm byɛ biiri ebe angɔ kpe, “Mbɔn na kɔʼrɔ gho kɔʼɔ abwaʼ bɔ kudu kpe ayɛ? 6Engɔ ne tsɛʼ anɔ bo, â shi zhwɛɛmɛ engɔ. Mbɔn zhuŋu ebwa wɛ engɔ à ga endɔn èndzobo chɛ engɔ à mwɔ a Galilii ngɛ. Engɔ à ga kpe; 7‘E yà gè Ŋwɔ Gho eblabwo bɔ abwa bɔɔbɔɔ e kɔmɔ engɔ, enji gɛrɛ sa fɔɔ tɛd engɔ wu zhwɛm ene ewu.’ ” 8Éngɛ, aye byɛ â zhuŋu abwa yɛ Yeso à ga ebe angɔ ngɛ. 9Angɔ à ghɛɛbɛ atoshe aŋu sɛ̀ɛrɛ̀ abwa zɔnɔ gimkpaʼ ebe bɔ bɛɛrɛ abwa wum ǹchwɔ̀ ŋwaʼ mane abɔ tsɛrɛ byɛ â ma aŋu ngɛ. 10Âye bɔnɔ â na Meri, Magdalɛn, Juana mane Meri wɛ à mwɔ áʼɔ̧̀ Jems ngɛ. Âye bɔnɔ mane âye tsɛrɛ â sɛɛrɛ abwa zɔnɔ ebe bèmpwɔnɔntɔm. 11Bɛʼngɛ bèmpwɔnɔntɔm byɛ â bwaʼ kpe âye bɔnɔ na gà ma atii, engɛ̂, angɔ ne le ebɛrɛ ene angɔ bo. 12Bɛʼngɛ Petoro à tam ekere gɛ̀rɛ̀ dɔrɔ ngɔɔ enduʼeshe aŋu. Engɔ dù gunu amɔ a chwâ è kɔʼ ne zɔ ala deʼ bo, a tye me eparandi. Éngɛ, engɔ wu ngɔɔ achim abɛ me kɔrɔ ene ebwa wɛ à shi gli ngɛ.

Aŋu Yeso à ma zhiri ngɔɔ anji Emaus ngɛ

(Mak 16:12, 13)

13Enjitsɔ, anji aŋwaʼ yɛ bɔ fyee abwaʼ angɔ à na ngɔ̀ɔ efwɔ eshimabɛ deʼ wɛ ekumu à mwɔ Emaus ngɛ. É nyɛrɛ aŋu ngɔ̀ɔ abɛ Jerusalɛm a ne mwɔ na emayl sàambyɛ nɔ. 14Angɔ à na gà àmɔ̀ àmɔ̀ mbɔʼ abwa gimkpaʼ yɛ à shi gli ngɛ. 15Aŋu angɔ à ma zhìn à sɛ̀ɛrɛ̀ abwa zɔnɔ àmɔ̀ àmɔ̀ ngɛ, Yeso mɔmbwo zeʼ sa zhiri ne angɔ. 16Bɛʼngɛ engɔ à ke le kpe angɔ nɛɛ engɔ bo. 17Engɔ à biiri ebe angɔ kpe, “Ne ebwa yɛ mbɔn ma zhìn à sɛ̀ɛrɛ̀ mbɔrɔmbɔn nɔ?” Angɔ à ke gii ega bo, afaara angɔ kwaʼ di. 18Gho bi abwaʼ angɔ wɛ ekumu ngɔ à ma Kleyopas ngɛ biiri ebe engɔ kpe, “À tye ngwo mwɔ ègɔ̀n efwɔ abɛ Jerusalɛm wɛ è ne nɛɛ abwa yɛ à gli aŋu efwɔ enji bɔnɔ ngɛ bo?” 19Engɔ biiri kpe, “Abwa yɛ?” Angɔ gii kpe, “Abwa mbɔʼ Yeso gho Nazarɛd.” Engɔ à na àmɛnɛkɔn Ngwe kamakam ene ega mane eleabwa efàarà Ngwe mane bɔ gimkpaʼ. 20M̀fɔ̀rɔ̀ zhiri mane eto efwɔ abɛ njɛɛ â ndɛʼ engɔ tsɛrɛ kpe e zhudu, e gɛ̀rɛ̀ kɔmɔ engɔ. 21Mbyɛɛ à na zhùŋù à kɔ̀ʼ kpe engɔ ne egho wɛ è ma yà pwèerè bɔ Israel ngɛ. É zhiiri, ne enji tɛd ànchwɔ̀ wɛ abwa zɔnɔ â gli ngɛ. 22E zhiiri, âye byɛ adeʼ à le mbyɛɛ kɔ̀n. Angɔ à ngɔ̀ɔ enchwenchwe ànchwɔ̀, afwɔ yɛ â me kpa engɔ ngɛ. 23Bɛʼngɛ angɔ à ke zɔ akudugho bo. Angɔ à zeʼ gà endyɛɛ kpe mbɔɔ shi zɔ engere ene nklama nchi e ga endyɛɛ kpe engɔ we ekɔʼɔ. 24Éngɛ asɔrɔ njɛɛ adeʼ à ngɔɔ eshe aŋu gɛ̀rɛ̀ zɔ na aŋu âye byɛ à ga ngɛ, bɛʼngɛ à ke zɔ engɔ bo. 25Engɔ à ga ebe angɔ kpe, “Mbɔn ne ntwɔɔ ene, ńtara ntsɔn gɛrɛ me ntiiri é bɛrɛ abwa yɛ bàmɛnɛkɔn Ngwe â ga ngɛ ene? 26Kristo wɛ à ke me koʼro é zɔ ǹgoʼ ene abwa zɔnɔ shi nyii efwɔ eghɔ kɛ́ mɔ bo?” 27È klada ene Mose mane bàmɛnɛkɔn gimkpaʼ, engɔ à toʼro abwa gimkpaʼ yɛ à shi ga efwɔ aŋwɛʼrɛ Ngwe mbɔʼ engɔ ngɛ ebe angɔ. 28Aŋu angɔ à sa zamma é bwɛn efwɔ eshimabɛ wɛ â ma ngɔ̀ɔ ngɛ, Yeso à le na gho à ma ke fɔɔ ngɔ̀ɔ embè nɔ. 29Bɛʼngɛ angɔ bii engɔ ekamakama kpe, “Tsɔmɔ nè mbyɛɛ, endzobo shi fɔɔ ǹtɛ̀ɛrɛ̀afùb gɛrɛ shi ese.” Éngɛ engɔ gɛrɛ ngɔ̀ɔ tsɔmɔ nè angɔ. 30Èndzobo chɛ engɔ à shi tsɔmɔ edɔm echud ende nè angɔ ngɛ, engɔ à nu ǹgoŋ ndɛʼ ebɛrɛ ebe Ngwe, bɔʼrɔ ndɛʼ ebe angɔ. 31Éngɛ aghɔɔ angɔ pɛ̀ è gɛrɛ sòdò efàarà angɔ. 32Angɔ biiri àmɔ̀ àmɔ̀ kpe, “Aŋu engɔ à ga ebe bɔ anjì gɛ̀rɛ̀ fùʼ afwɔ aŋwɛʼrɛ Ngwe ebe bɔ ngɛ ńtara bɔ à ke fe bo?” 33Angɔ à tama ekere ghɛ̀ɛbɛ ngɔɔ achim a Jerusalɛm. Aŋu angɔ à zɔ abɔ bɛɛrɛ abwa wum ǹchwɔ̀ ŋwaʼ byɛ mane abɔ â mwɔ nè angɔ ngɛ e me tsɔmɔ afwɔbi. 34Angɔ gɛrɛ ma gà kpe, “Ne éŋwaʼa Masakɛ a shi zhwɛm ene ewu gɛ̀rɛ̀ shi tee amɔ ebe Shimun Petoro.” 35Éngɛ abɔ fyee byɛ toʼro ebwa wɛ â gli ekwa angɔ anjì ngɛ, mane aŋu angɔ à nɛɛ Yeso èndzobo chɛ engɔ à bɔʼ ǹgoŋ ngɛ.

Yeso tee amɔ ebe bɔ bɛɛrɛ abwa mɔ

(Mat 28:16-20; Mak 16:14-18; Eyɔ 20:19-23; Ele 1:6-8)

36Aŋu abɔ fyee bɔnɔ â ma gà abwa zɔnɔ ebe angɔ ngɛ, e sa zɔzɔ Masakɛ mɔmbwo tee amɔ apɛpɛ ebe angɔ gà kpe, “M̀bwarambwad mwɔ nè mbɔn.” 37Angɔ à na bumu ma zhuŋu kpe angɔ shi zɔ azhi deʼ. 38Bɛʼngɛ Yeso gà ebe angɔ kpe, “Mbɔn na bumu ayɛ? Mbɔn di ayɛ efwɔ ńtara ntsɔn? 39Mbɔn kede ebwo mane elo mbu, mbɔn ba ngo nɛɛ kpe na mmɛ mɔmbwo. Mbɔn mɔmɔ angu mbɔn ba nɛ̀ɛ. Azhi ke le ekwa mane ewuu bo, bɛʼngɛ mmɛ we le.” 40Aŋu Yeso à ga ebe angɔ ngɛ, è tee ebwo mane elo mɔ ebe angɔ. 41Â da ke bɛrɛ bo. Angɔ me shwe ene egɛnɛ me kɔrɔ. Éngɛ Yeso biiri ebe angɔ kpe, “Ala deʼ ya aŋu é nde?” 42E ndɛʼ antiri shuu fuʼ deʼ ebe engɔ. 43Engɔ à nde efàarà angɔ. 44Éngɛ engɔ ga ebe angɔ kpe, “Abwa zɔnɔ ne abwa yɛ mmɛ à ga endɔn èndzobo chɛ mmɛ à mwɔ nè mbɔn ngɛ. Abwa gimkpaʼ yɛ â gà mbɔʼ mmɛ efwɔ etsɛrɛ Mose nè abwa yɛ bàmɛnɛkɔn Ngwe â gà mane efwɔ Mban Yawe ngɛ shi gli éŋwaʼa.” 45Éngɛ engɔ fuʼ ńtara angɔ é nɛɛ abwa yɛ aŋwɛʼrɛ Ngwe ma ga ngɛ. 46È ga ebe angɔ kpe, “Ewunɔ ne ebwa wɛ e me ŋwɛʼrɛ ngɛ kpe ‘Ǹtɔmzhwaʼa ya ngo zɔ ǹgoʼ gɛ̀rɛ̀ ma ngo zhwɛm ene ewu efwɔ enji tɛd. 47Ene ekumu ngɔ e ba ya sɛ̀ɛrɛ̀ ekɔn ǹchwɔ̀ mbɔʼ é kobo ńtara mane é dzɛrɛ abwa bɔɔbɔɔ bɔ efwɔ ebɛ gimkpaʼ, e klada a Jerusalɛm.’ 48Mbɔn ne entsɛ ene abwa zɔnɔ. 49Mmɛ wa ngo ndɛʼ ala yɛ àtɛ ngu me tɔ̧ɔrɔ é ndɛʼ endɔn ngɛ, bɛʼngɛ mbɔn tsɔmɔ a Jerusalɛm sa kɔʼɔ bwɛn èndzobo chɛ ekama ma ngo nyii akwâ ndzɔn nyɛ̀rɛ̀ zèʼe ekere ngɛ.”

E nu Yeso ngɔɔ ekere

(Mak 16:19, 20; Ele 1:9-11)

50Yeso à gbee angɔ ngɔɔ abɛ Bɛtani, beʼ ebwo mɔ ekere ndɛʼ m̀bɔ̀nɔ ebe angɔ. 51Aŋu engɔ à ma ndɛʼ m̀bɔ̀nɔ ebe angɔ ngɛ e nu engɔ ngɔɔ ekere. 52Éngɛ angɔ ndɛʼ eghɔ ebe engɔ nyɛ̀rɛ̀ ngɔ̀ɔ a Jerusalɛm me shwe ene egɛnɛ. 53Angɔ sa tsɔmɔ efwɔ ndɔngwe kɛ̀ sa ndɛʼ ebɛrɛ ebe Ngwe.

Currently Selected:

Luk 24: nbt

Highlight

Copy