Matyo 1

Ètɛ sam Yeso Kristo

(Luk 3:23-38)

1Ebɔnɔ ne ètɛ sam Yeso Kristo. Yeso Kristo à na gho ekla Devid, wɛ à ma gho ekla Abraham ngɛ. 2Abraham à na àtɛ ebe Ayzik, Ayzik ma àtɛ ebe Yakɔb, Yakɔb ma àtɛ ebe Juda mane bwɔngwa mɔ. 3Juda ma àtɛ ebe Pɛrɛz mane Zɛra wɛ áʼɔ̧̀ angɔ à mwɔ Tama ngɛ, Pɛrɛz ma àtɛ ebe Hɛzrɔn, Hɛzrɔn ma àtɛ ebe Ram. 4Ram ma àtɛ ebe Aminadab, Aminadab ma àtɛ ebe Nashɔn, Nashɔn ma àtɛ ebe Salmɔn. 5Salmɔn à na àtɛ ebe Boaz, áʼɔ̧̀ Boaz gɛrɛ ma Rahab, Boaz à na àtɛ ebe Obɛd, áʼɔ̧̀ Obɛd gɛrɛ ma Ruth. Obɛd ma àtɛ ebe Jese. 6Jese ma àtɛ ebe M̀fɔ̀ Devid. Devid à na àtɛ ebe Saramu wɛ áʼɔ̧̀ mɔ à shi dye mwɔ eye Urya ngɛ, 7Saramu ma àtɛ ebe Rehoboam, Rehoboam ma àtɛ ebe Abija, Abija ma àtɛ ebe Asa. 8Asa ma àtɛ ebe Jehoshafad, Jehoshafad ma àtɛ ebe Jehoram, Jehoram ma àtɛ ebe Uzya. 9Uzya ma àtɛ ebe Jotam, Jotam ma àtɛ ebe Ahaz, Ahaz ma àtɛ ebe Hezekya. 10Hezekya à na àtɛ ebe Manasɛ, Manasɛ ma àtɛ ebe Amɔn, Amɔn ma àtɛ ebe Josaya. 11Josaya ma àtɛ ebe Jekonya mane bwɔngwaanɔm mɔ. Josaya à be àbwɔ bɔnɔ efwɔ èndzobo chɛ bɔ Babilɔn à beʼ angɔ ngɔ̀ɔ abɛ àmɔ̀ ngɛ. 12Ebɔnɔ ne ètɛ sam Yeso, nyɛrɛ èndzobo chɛ bɔ Israel â mwɔ a Babilɔn ngɔ̀ɔ bwɛn èndzobo chɛ â bê Yeso ngɛ. Jekonya à na àtɛ ebe shɛltyɛl, Shɛltyɛl ma àtɛ ebe Zerubabɛl. 13Zerubabɛl ma àtɛ ebe Abiyud, Abiyud ma àtɛ ebe Elyakim, Elyakim ma àtɛ ebe Azɔɔ. 14Azɔɔ ma àtɛ ebe Zadɔk, Zadɔk ma àtɛ ebe Akim, Akim ma àtɛ ebe Elyud. 15Elyud ma àtɛ ebe Eleaza, Eleaza ma àtɛ ebe Matan, Matan ma àtɛ ebe Yakɔb. 16Yakɔb ma àtɛ ebe Yɔsɛf wɛ à me nu Meri áʼɔ̧̀ Yeso Ǹtɔmzhwaʼa Ngwe ngɛ. 17Ewunɔ ne tee kpe à na akyɛ bɔ wum ǹchwɔ̀ kwɛ̀ e nyɛrɛ ebe Abraham é ngo bwɛn ebe Devid. Akyɛ bɔ wum ǹchwɔ̀ kwɛ̀ gɛrɛ nyɛ̀rɛ̀ ebe Devid é ngo bwɛn efwɔ èndzobo chɛ bɔ Babilɔn à beʼ bɔ Israel ngɔ̀ɔ abɛ àmɔ̀ ngɛ. Gɛ̀rɛ̀ wu mwɔ akyɛ bɔ tsɛrɛ wum ǹchwɔ̀ kwɛ̀ nyɛrɛ èndzobo chɛ bɔ Babilɔn à beʼ bɔ Israel ngɔ̀ɔ bwɛn efwɔ èndzobo chɛ â bê Ǹtɔmzhwaʼa Ngwe ngɛ.

Aŋu â be Yeso Kristo ngɛ

(Luk 2:1-7)

18Ne énde â bê Yeso Kristo Ǹtɔmzhwaʼa Ngwe. Â ne biiri áʼɔ̧̀ mɔ Meri é ndɛ̀ʼ ebe Yɔsɛf, bɛʼngɛ, angɔ sa zeʼe tsɔmɔ afwɔbi na aye mane anɔm nɔ, e zɔ kpe Meri à shi nè ebûm nyɛ̀rɛ̀ zèʼe ene azhwɛɛrɛ pɛ. 19Yɔsɛf à na anɔm deʼ wɛ à ma le abwa ene aghɛʼnji yɛ à me koʼro ngɛ. Engɔ à ke me doʼo é ndɛʼ eju ebe Meri aghɛɛghɛɛ bɔ bo. Éngɛ engɔ shi shi é tsɔŋɔ ebwa elô wɛ achimchim. 20Aŋu engɔ à sa zhuŋu mbɔʼ ebwa wunɔ ngɛ, Angere Masakɛ deʼ bum ebe engɔ ene nklama gɛ̀rɛ̀ ga ebe engɔ kpe, “Yɔsɛf gho ekla Devid, ngà ke sa bumu é nu Meri ene eye ngwɛ bo. Ne nyɛrɛ zeʼe ene Azhwɛɛrɛ Pɛ wɛ engɔ me le ebûm ngɛ. 21Engɔ wa ngo bê ŋwɔanɔm, éngɛ ngwo ma ngo chimmi ekumu ngɔ kpe Yeso, mbɔʼnga engɔ wa ngo pwèerè bɔ mɔ efwɔ abwa bɔɔbɔɔ àmɔ̀.” 22Abwa zɔnɔ gimkpaʼ à gli, é le kpe abwa yɛ Masakɛ à shi ga ebe àmɛnɛkɔn mɔ ngɛ gli éŋwaʼa kpe. 23“Mbɔn zhuru! M̀fòrò ŋwɔaye wa ngo le ebûm gɛ̀rɛ̀ bê ŋwɔanɔm, éngɛ e ba ngo sa zɔʼrɔ engɔ kpe Emanwɛl!” Ǹji me ga kpe, “Ngwe ye mwɔ nè ntsɔ.” 24Èndzobo chɛ Yɔsɛf à tam etan ngɛ, engɔ fwɛʼ na aŋu Angere Masakɛ à ga ngɛ, è nu Meri ngɔɔ a ndɔ mɔ ne eye mɔ nɔ. 25Bɛʼngɛ Yɔsɛf à ke ma afwɔ nè Meri bo bwɛn èndzobo chɛ engɔ à bê ŋwɔanɔm mɔ ngɛ. Yɔsɛf gɛrɛ chìmmì ekumu kpe Yeso.

Currently Selected:

Matyo 1: nbt

Highlight

Copy