Matyo 12

Efɛɛrɛ mbɔʼ anji ku̧ru bɔ Juu

(Mak 2:23-28; Luk 6:1-5)

1Afwɔ à ndada mpiʼ, Yeso mane bɔ bɛɛrɛ abwa mɔ ma zhiri efwɔ esɔmɔ ǹkù deʼ anji ku̧ru bɔ Juu. Bɔ bɛɛrɛ abwa ngɔ â na gwɔrɔ chwɔ. Angɔ klada sa pɛ̀dɛ̀ ǹkùru gɛ̀rɛ̀ sa ŋwɛ̀ʼrɛ̀ à nde. 2Èndzobo chɛ bɔ Farisii à zɔ ebwa wunɔ ngɛ, angɔ gâ ebe Yeso kpe, “Kɔʼɔ, bɔ bɛɛrɛ abwa mbyɛ ba lè ebwa wɛ etsɛrɛ ne me tee kpe e le anji ku̧ru bɔ Juu ngɛ bo.” 3Yeso gíì kpe, “Mbɔn ke shi zɔʼrɔ efwɔ aŋwɛʼrɛ Ngwe ebwa wɛ Devid à fwɛʼ èndzobo chɛ engɔ mane bɔ mɔ â ma gwɔn nchwɔrɔ ngɛ bo? 4Engɔ à ngɔɔ efwɔ ndɔngwe nè bɔ mɔ, angɔ nde ǹgoŋ ekara yɛ â ndɛʼ ene etɔ̧ɔrɔ ebe Ngwe ngɛ, wɛ etsɛrɛ à ne me tee kpe angɔ nde bo ngɛ. Atye me ètɛ zhiri à me koʼro é nde ǹgoŋ zɔnɔ. 5Kà mbɔn ke shi zɔʼrɔ efwɔ etsɛrɛ Mose kpe, efwɔ enji ku̧ru bɔ Juu gimkpaʼ, ètɛ zhiri à na chɔɔbɔ etsɛrɛ anji ku̧ru bɔ Juu efwɔ ndɔngwe kɛ̀, a da ne go ebwa bo? 6Mmɛ toʼro endɔn kpe egho wɛ mwɔ anɔ ngɛ we fɔɔ ndɔngwe kɛ̀. 7Aŋwɛʼrɛ Ngwe ga kpe ‘Mmɛ na ke me etaa fyɛ e me le eklasɔn ngɛ, ke me é ndɛʼ etɔ̧ɔrɔ bo.’ Mala mbɔn à shi nɛɛ ǹji ene ebwa wunɔ éŋwaʼa, shi mbɔn a ke ma kwɔ̀nɔ̀ abɔ byɛ e ne me go ebwa ngɛ bo. 8Éngɛ nɛɛ kpe Ŋwɔ Gho na Masakɛ, ka de mwɔ ebe anji ku̧ru bɔ Juu.”

Yeso glî gho nè àku-abwo

(Mak 3:1-6; Luk 6:6-11)

9Yeso nyɛrɛ afwɔ yɛ gɛ̀rɛ̀ ngɔɔ a ndɔ bɛ̀ɛrɛ atsɛrɛ. 10Gho deʼ mwɔ aŋu wɛ abwo bi à shi ku ngɛ. Bɔ à gɛrɛ na aŋu ma zɛʼ aghɛʼ é ge ebwa enji Yeso. Éngɛ angɔ biiri ebe Yeso kpe, “Etsɛrɛ bɔ ye tee kpe e gli gho anji ku̧ru bɔ Juu?” 11Yeso gíì ebe angɔ kpe, “Mala gho deʼ abwaʼ ndzɔn me le ǹglɔ̀ mɔ, ǹglɔ̀ yɛ turu efwɔ ebla anji ku̧ru bɔ Juu nyɛ? Mbɔn ke ma ngo chi e saa ewee bo? 12Mala gho shi me fɔɔ ǹglɔ̀, e shi le ekwa gho ngɔɔ bwɛn awe? Éngɛ etsɛrɛ bɔ ye tee kpe ntsɔ kpede gho anji ku̧ru bɔ Juu.” 13Éngɛ Yeso gâ ebe àku-abwo wɛ kpe, “Ndɛrɛ abwo njɛ.” Engɔ ndɛrɛ abwo mɔ, a gɛrɛ bwada, mwɔ nkirinkin na abwo azê nɔ. 14Éngɛ bɔ Farisii nyɛnnɛ ngɔɔ sa ndèerè aghɛʼ é zhudu engɔ.

Ngwe chi gho afwɛʼ mɔ

15Èndzobo chɛ Yeso à nɛɛ mbɔʼ akɔɔ yɛ â ma nde ato ngɔ ngɛ, engɔ nyɛrɛ afwɔ yɛ. Ebaŋabɔ kiri engɔ. Engɔ gli bɔ gimkpaʼ byɛ â ma gwɔn ngɛ. 16Bɛʼngɛ Yeso ndɛʼ etsɛrɛ ebe angɔ kpe, e ke ga mbɔʼ engɔ ebe gho deʼ bo. 17Engɔ à le énde mbɔʼtye ebwa wɛ Ngwe à ga nyɛ̀rɛ̀ zèʼe ebe Àmɛnɛkɔn Ngwe Azaya ngɛ gli éŋwaʼa kpe, 18“Ewùnɔ na gho afwɛʼ ngu wɛ mmɛ à shi chi ngɛ, engɔ wɛ mmɛ me doʼo gɛ̀rɛ̀ me gɛnɛ angu ene engɔ ngɛ. Mmɛ wa sàa Azhwɛɛrɛ ndza é mwɔ nè engɔ, engɔ gɛrɛ wa mɛ̀nɛ̀ ekɔn wɛ e me koʼro ngɛ ebe ebɛbɔ kpe endzobo tsɛrɛ esɛʼ shi koʼo. 19Engɔ ke ma ngo ma fɛ̀ɛrɛ nè bɔ kà flaba akwâ kà zhiri à gamma anjirikɛ bo. 20Engɔ ke ma ngo tsɛd ago ye a shi guru ngɛ bo. Engɔ ke ma ngo mɛ̀ɛrɛ̀ nyiimi anâm yɛ enduʼ mɔ a sa myɛ̀myɛ ngɛ bo. Engɔ wa ka bwad bwɛn èndzobo chɛ éŋwaʼa ma ngo gli ngɛ. 21Ebɛbɔ akɛkɛ efwɔ ese ba ngo shi ezhuŋu kɔʼɔ àmɔ̀ ene engɔ.”

E kpe Yeso na fwɛʼ ene ekama Bɛlzɛbul

(Mak 3:20-30; Luk 11:14-23)

22Bɔ deʼ â nu gho wɛ aghɔɔ à shi fo, engɔ gɛrɛ ne ma ga bo mbɔʼnga azhwɛɛrɛ bɔɔbɔɔ à mwɔ efwɔ ekwa ngɔ ngɛ zeʼe ebe Yeso. Yeso à gli egho wunɔ è sa ga gɛ̀rɛ̀ sa zɔ akwâ. 23Ebaŋabɔ à kɔ̂n ene ebwa wɛ Yeso à fwɛʼ ngɛ. Angɔ biiri kpe. “Ewùnɔ we né mwɔ gho ekla M̀fɔ̀ Devid?” 24Bɛʼngɛ èndzobo chɛ bɔ Farisii à zo ebwa wunɔ ngɛ, angɔ gii kpe, “Engɔ na fli ezhwɛɛrɛ bɔɔbɔɔ mbɔʼnga ato ebe Bɛlzɛbul ma ndɛʼ ekama ebe engɔ é fwɛʼ engɛ̂.” 25Yeso à ne nɛɛ ebwa wɛ angɔ à ma zhuŋu ngɛ shi ga ebe angɔ kpe, “Abɛ deʼ yɛ a ma gɛ̀bbɛ amɔ ene ǹtìmìri sa wa ngwe àmɔ̀ àmɔ̀ ngɛ ke ma ngo tsɔmɔ efwɔ endzobo dɔɔdɔɔ bo. Antiri abɛ kà ekla deʼ wɛ e me gɛ̀bbɛ amɔ ene ǹtìmìri sa wa ngwe àmɔ̀ àmɔ̀ ngɛ ba ngo sɛʼ. 26Shi éngɛ mala ǹtìmi zɔ ma ngwe nè ǹtìmi ze efwɔ ebwa m̀fɔ̀ asatan, éngɛ ga kpe egɛbɛ shi nyii efwɔ ebwa m̀fɔ̀ ngɔ, afwɔ sa ndada e wa sɛʼ. 27Mbɔn ga kpe mmɛ na fli ezhwɛɛrɛ bɔɔbɔɔ mbɔʼnga Bɛlzɛbul ma ndɛ̀ʼ ekama ena é fwɛʼ engɛ̂. Awɛ à ndɛʼ ekama ebe abɔ byɛ e ma kìrì angɔn ngɛ é fli ezhwɛɛrɛ bɔɔbɔɔ ngà? Éngɛ ga kpe abɔ byɛ e ma kìrì angɔn ngɛ ba le mbɔn go esɛʼ. 28Mala mmɛ ma fli ezhwɛɛrɛ bɔɔbɔɔ bɔnɔ ene azhwɛɛrɛ Ngwe, éngɛ ga kpe ebwa m̀fɔ̀ Ngwe a shi abwaʼ ndzɔn. 29Tsɛ̀ʼ gho deʼ me né nyii a ndɔ gho kamakam deʼ bwɛ ela ngɔ bo. È sa ke é le ngɛ, è dye koro egho kamakam wɛ de sa bwɛ ela ngɔ. 30Gho deʼ wɛ ne mwɔ nè mmɛ bo ngɛ, na gho m̀pɛ̀ʼ ngu, gho deʼ wɛ gɛrɛ ne ma shùnu nè mmɛ bo ngɛ na sɛ̀ʼ sɛʼɛ. 31Enyɛrɛ éngɛ, mmɛ ga endɔn kpe Ngwe yà dzɛ̀d abwa bɔɔbɔɔ gimkpaʼ mane andwaʼa bɔ me ga mbɔʼ engɔ ngɛ, bɛʼngɛ egho wɛ ga ebwa bɔɔbɔɔ mbɔʼ azhwɛɛrɛ pɛ ngɛ, e yà na abwa bɔɔbɔɔ ngɔ dzɛd. 32Ngwe yà dzɛ̀d anyimabwa gho deʼ wɛ ma ga ebwa bɔɔbɔɔ mbɔʼ Ŋwɔ Gho ngɛ, bɛʼngɛ è ke ma ngo dzɛ̀d anyimabwa egho wɛ ga ebwa bɔɔbɔɔ mbɔʼ azhwɛɛrɛ Ngwe enjitsɔ kà ene endzobo yɛ e ma zeʼ ngɛ bo.”

Azɔd mane enta mɔ

(Luk 6:43-45)

33É le enta ǹchwɔ̀, ngwo wara le azɔd ǹchwɔ̀, mala ngwo me le azɔd bɔɔbɔɔ, shi ngwo wa le enta bɔɔbɔɔ. E na nɛɛ azɔd ene enta byɛ a ma kla ngɛ. 34Mbɔn, jwere bɔɔbɔɔ tsɔnɔ! Mbɔn ba da sa ga abwa ǹchwɔ̀ ene gho deʼ ene, wɛ ńtara ntsɔn shi me shwe ene abwa bɔɔbɔɔ ngɛ? Éngɛ eklo na ga me ebwa wɛ e me shwe efwɔ etaa ngɛ. 35Gho nchwɔnchwɔ na ga ma abwa ǹchwɔ̀ yɛ à ma gli à zeʼe efwɔ atim abwa ǹchwɔ̀ yɛ a mwɔ efwɔ etaa ngɔ ngɛ. Gho bɔɔbɔɔ na le ma abwa bɔɔbɔɔ yɛ a ma gli à zeʼ efwɔ atim abwa bɔɔbɔɔ yɛ a mwɔ efwɔ etaa ngɔ ngɛ. 36“Mbɔn nɛɛ anchwɔnchwɔ kpe anji tsɛrɛ esɛʼ, gho ŋwàʼaŋwàʼ yà tòʼrò ala a le engɔ ga abwa atiiti anji deʼ ngɛ. 37Éngɛ, e yà nu ega ngwɛ è sɛ̀ʼ awɛ anyi, abwa yɛ ngwo à ga ngɛ yà tee kpe ngwo we go kà ngwo we fɔɔ esɛʼ.”

E biiri anɛ̂ ebwa ebe Yeso

(Mak 8:11-12; Luk 11:29-32)

38Éngɛ bàtee atsɛrɛ deʼ mane bɔ Farisii deʼ ga ebe Yeso kpe, “Àtee abwa, mbyɛɛ ba ke é zɔ awɛ ngwo le anɛ̂ ebwa deʼ” 39Yeso gíì kpe, “Ekyɛ bɔ bɔɔbɔɔ kenɛɛ Ngwe zɔnɔ! Mbɔn na biiri anɛ̂ ebwa ena? Keʼ! Anɛ̂ ebwa chwɛ̀ʼ yɛ e ma ngo ndɛ̀ʼ endɔn ngɛ tye anɛ̂ ebwa Yɔɔna, àmɛnɛkɔn Ngwe. 40Ene aghɛʼ ŋwaʼ yɛ Yɔɔna à tsɔmɔ efwɔ ebûm angwa shuu efwɔ enji tɛd mane ǹklì tɛd ngɛ, Ŋwɔ Gho gɛrɛ wa ngo tsɔmɔ efwɔ chwâ efwɔ enji tɛd mane ǹklì tɛd. 41Anji tsɛrɛ esɛʼ bɔ Ninivɛh ba ngo kwɔ̀nɔ̀ angɔn. E ba ngo kwɔ̀nɔ̀ angɔn mbɔn ekyɛ zɔnɔ mbɔʼnga angɔ à waʼ abwa bɔɔbɔɔ àmɔ̀ èndzobo chɛ Yɔɔna à sɛɛrɛ ega Ngwe ebe angɔ ngɛ. Mmɛ gɛrɛ tòʼrò endɔn kpe gho wa anɔ me fɔɔ Yɔɔna. 42Anji tsɛrɛ esɛʼ, eye m̀fɔ̀ Shɛba wa ngo tam ekere è kwɔ̀nɔ̀ angɔn mbɔʼnga engɔ à nyɛrɛ zeʼe ezhin dɔɔdɔɔ efwɔ abɛ mɔ, é zhuru aga azɔm yɛ M̀fɔ̀ Saramu à ma tee ngɛ, mmɛ gɛrɛ wu tòʼrò endɔn kpe gho deʼ wa anɔ me fɔɔ Saramu.”

Aŋu azhwɛɛrɛ bɔɔbɔɔ ma wɛ zeʼ ekwa gho ngɛ

(Luk 11:24-26)

43“Azhwɛɛrɛ bɔɔbɔɔ na de gli efwɔ ekwa gho, a zhiri edɔm akwânked yɛrɛ zɛʼ afwɔ é kuru, mala a ne zɔ adeʼ bo, 44a ga egha mɔ kpe ‘Mmɛ wa ngɔɔ achim efwɔ ndɔ yɛ mmɛ à gli efwɔ ngɛ.’ Éngɛ a ngɔɔ achim, gɛ̀rɛ̀ dù zɔ ndɔ me ekɛɛ, me pɛ e gɛrɛ shi ndeere. 45Éngɛ a ngɔɔ ese gɛ̀rɛ̀ bwɛ ezhwɛɛrɛ bɔɔbɔɔ tsɛrɛ sàambyɛ byɛ e me ngoʼo fɔɔ engɔ ngɛ, angɔ zeʼ gɛ̀rɛ̀ tsɔmɔ efwɔ aŋu. Éngɛ èndzobo chɛ abwa zɔnɔ gimkpaʼ gli ngɛ, egho wɛ shi we mɛ̀ɛ bɔɔ ǹgoʼ fɔɔ aŋu à me dye mwɔ ngɛ. E wa ngo gli énde ebe abɔ bɔɔbɔɔ byɛ efwɔ endzobo zɔnɔ ngɛ.”

ÁʼƆ̧̀ Yeso mane bwɔngwaanɔm ngɔ

(Mak 3:31-35; Luk 8:19-21)

46Aŋu Yeso à ma bli à ga ebe ebaŋabɔ ngɛ, áʼɔ̧̀ ngɔ mane bwɔngwaanɔm ngɔ bwɛn. Angɔ tamma ese ma ke é ga nè engɔ. 47Éngɛ gho bi efwɔ ebaŋabɔ ga ebe Yeso kpe, “Kɔʼɔ, áʼɔ̧̀ ngwɛ mane bwɔngwaanɔm mbyɛ be tamma ese ma ke é ga nè engwo.” 48Yeso gíì kpe, “Áʼɔ̧̀ ngu mane bwɔngwaanɔm mbu ne ewɛ?” 49Éngɛ engɔ tam è tee abwo ene bɔ bɛɛrɛ abwa mɔ gɛ̀rɛ̀ ga kpe, “Kede! Áʼɔ̧̀ ngu mane bwɔngwaanɔm mbu bɔ! 50Éngɛ egho wɛ ma fwɛʼ ebwa wɛ Àtɛ ngu ekere ma ke kpe engɔ fwɛʼ ngɛ na ghongwaanɔm ngu, ghongwaaye ngu mane áʼɔ̧̀ ngu.”

Currently Selected:

Matyo 12: nbt

Highlight

Copy

Want to have your highlights saved across all your devices? Sign up or sign in

Learn More About Aŋwɛʼrɛ Ebuumu Fe Nè Ngwe