Matyo 15

Abwa yɛ ètɛ sam à tee ngɛ

(Mak 7:1-13)

1Bɔ Farisii mane bàtee atsɛrɛ à nyɛrɛ a Jerusalɛm zeʼe biiri ebe Yeso kpe, 2“Enji yɛ bɔ bɛɛrɛ abwa mbyɛ ne ma shi etsɛrɛ ètɛ sam bɔ bo ngɛ ne ga kpe ayɛ? E ke ma sò ebwo àmɔ̀ ene aghɛʼnji yɛ e me koʼro é sò dye sa nde ngɛ bo.” 3Yeso gíì ebe angɔ kpe, “Mbɔn gɛrɛ ke ma shi etsɛrɛ Ngwe bo shi ma shi ma abwa abɛ ndzɔn ngɛ kpe ayɛ? 4Ngwe ye ga kpe ‘Ghɔ àtɛ ngwɛ mane áʼɔ̧̀ ngwɛ, gɛ̀rɛ̀ ga kpe egho wɛ e ma ndwàʼ àtɛ mɔ kà áʼɔ̧̀ mɔ ngɛ, e ba zhudu engɔ. 5Bɛʼngɛ mbɔn na tee kpe mala gho deʼ me le ala deʼ yɛ è me né kpede àtɛ mɔ kà áʼɔ̧̀ mɔ anyi ngɛ, endzobo ngwo aye kpede angɔ nɔ, ngwo shi ga kpe na ala Ngwe.’ 6E me tee kpe ngwo ke ndɛʼ eghɔ ebe àtɛ ngwɛ bo. Éngɛ mbɔn ma sèrè etsɛrɛ Ngwe ma kìrì ma andzɔn atsɛrɛ. 7Mbɔn bɔ ndooro aghɔɔ, Àmɛnɛkɔn Ngwe Azaya à sɛɛrɛ ega Ngwe mbɔʼ mbɔn kpe, 8‘Abɔ bɔnɔ na ghɔ angu ene aghoboklo bɛʼngɛ ńtara angɔ mwɔ akwâ tsɛrɛ. 9Ne tsɛʼ ǹji deʼ ebe angɔ é ghɔ angu bo mbɔʼnga angɔ na ndooro à tee atsɛrɛ bɔ, na a mwɔ atsɛrɛ ndza nɔ.’ ”

Yeso tee mbɔʼ Abwa yɛ à ma le gho ne me pɛ bo ngɛ

(Mak 7:14-23)

10Éngɛ Yeso zɔʼ ebaŋabɔ ebara mɔ ga ebe angɔ kpe, “Mbɔn zhuru gɛ̀rɛ̀ nɛɛ ǹji ene ebwa wɛ mmɛ ma ga ngɛ. 11Ke mwɔ ala yɛ gho ma nde gɛ̀rɛ̀ ŋwɔ ngɛ a ma le gho di efàarà Ngwe bo. Ala yɛ a ma le gho ne me pɛ efàarà Ngwe bo ngɛ na angɔ yɛ a ma gli à zeʼe eklo gho ngɛ.” 12Bɔ bɛɛrɛ abwa ngɔ zeʼ ga ebe engɔ kpe, “Ngwo we nɛɛ kpe bɔ Farisii ba bɔɔ etaa mbɔʼ aga yɛ ngwo ma ga ngɛ?” 13Yeso gíì ebe angɔ ga kpe, “E yà wùu ela gimkpaʼ byɛ àtɛ ngu ekere ne me kɔrɔ bo ngɛ. 14Ke tsɔmɔ à nyìi awɛ nè angɔ bo, angɔ ne eto byɛ e me fo aghɔɔ ngɛ. Mala àfò aghɔɔ ma gbee àfò aghɔɔ tsɛrɛ, angɔ bɔ gimkpaʼ ba turu efwɔ ebla.” 15Petoro ga kpe, “Ngà toʼro ǹji ene nklama timi fɔnɔ endyɛɛ.” 16Yeso biiri ebe angɔ kpe, “Mbɔn gɛrɛ ke shi nɛɛ mbɔn bo? 17Mbɔn ke nɛɛ kpe ala yɛ a ma nyii efwɔ eklo gho ngɛ ya ngɔɔ efwɔ ebûm ngɔ, shi gli ekwa engɔ ngɔɔ efwɔ akwad bo? 18Bɛʼngɛ ala yɛ a ma gli à zeʼ efwɔ eklo gho ngɛ na zeʼ efwɔ etaa ngɔ. Na ala yɛ a ma le gho me di efàarà Ngwe ngɛ. 19Azhuŋu bɔɔbɔɔ na é zhudu gho, andɔb, é nde ese, é gà andɔɔ, é ejii, é tsɔŋɔ ekumu abɔ tsɛrɛ nɔ, na gli à zeʼe efwɔ etaa. 20Ne ela bɔnɔ a ma le gho me di efàarà Ngwe. Bɛʼngɛ, é nde tɔrɔ ebwo ke sò ke ma le gho di efàarà Ngwe bo.”

Ebɛrɛtaa aye Kanan

(Mak 7:24-30)

21Yeso nyɛrɛ afwɔ yɛ ngɔɔ efwɔ antiri afwɔ deʼ ebara ebɛ Taya mane Sidɔn. 22Aye kannan deʼ wɛ à ma tsɔmɔ aŋu ngɛ zeʼ sa ku̧u ebe Yeso gâ kpe, “Masakɛ, Ŋwɔ Devid klasɔn ene mmɛ. Ŋwɔaye ngu we le azhwɛɛrɛ bɔɔbɔɔ ma zɔ ǹgoʼ ghɛʼ.” 23Bɛʼngɛ Yeso ne gii ega deʼ ebe engɔ bo. Éngɛ bɔ bɛɛrɛ abwa ngɔ zeʼ buʼ ebwo ebe engɔ kpe, “Fli engɔ shi è ngɔɔ, è wa yɛrɛ ku̧u à koo akwâ.” 24Éngɛ Yeso gíì kpe, “Ngwe à saa angu tye ebe bɔ Israel byɛ â mwɔ na ǹglɔ̀rɔ̀ chɛ â shi nyimi ngɛ.” 25Aye wɛ zeʼ chwɔ̀n etongu mɔ a chwâ efàarà Yeso gâ kpe, “Masakɛ, kpede angu.” 26Yeso gíì ebe engɔ kpe, “E ke me koʼro é nu ende adɔ̀kpara é ndwa ebe boro bo.” 27Aye wɛ gii kpe, “Ne éŋwaʼa, bɛʼngɛ Masakɛ, ka de mwɔ boro, e tsa nde ntsɔbɔ ǹgoŋ yɛ ma turu à zeʼe edɔm echud masa ngɛ.” 28Éngɛ Yeso gâ ebe engɔ kpe, “Aye, ngwo we le ebɛrɛtaa kamakam, ebwa wɛ ngwo ma ke ngɛ wa ngo gli.” Èndzobo chɛ ŋwɔ ngɔ bwada.

Yeso gli bɔ akɛkɛ

29Yeso à nyɛrɛ aŋu fɔɔ eba angli Galilii, kwaʼ ngɔɔ edɔm egu, tsɔmɔ a chwâ. 30Ebaŋabɔ à kiri engɔ, me zeʼ mane abɔ byɛ elo angɔ à me tanna ngɛ, ebuʼru bɔ, bàfò aghɔɔ, bèganyi mane bɔ aŋwan tsɛrɛ akɛkɛ è naa angɔ efàarà Yeso, Yeso gɛrɛ gli angɔ. 31Ebaŋabɔ wɛ à gɛnɛ amɔ aŋu à zo eganyì ma ga, abɔ byɛ â me buʼru ngɛ bwada, abɔ byɛ elo angɔ à me tanna ngɛ e sa zhiri anchwɔnchwɔ, bàfò aghɔɔ sa zɔ akwâ ngɛ gɛ̀rɛ̀ klada sa ndɛʼ eghɔ ebe Ngwe bɔ Israel.

Yeso ndee bɔ ètɔɔshin kwɛ̀

(Mak 8:1-10)

32Yeso zɔʼ bɔ bɛɛrɛ abwa mɔ ga ebe angɔ kpe, “Mmɛ wa klasɔn ene abɔ bɔnɔ mbɔʼnga angɔ shi tsɔmɔ nè mmɛ efwɔ enji tɛd gɛ̀rɛ̀ ne wu le ala deʼ é nde bo. Mmɛ ke doʼo é sàa angɔ achim nè nchwɔrɔ bo mbɔʼnga angɔ be né la gɛ̀rɛ̀ fum anji.” 33Bɔ bɛɛrɛ abwa ngɔ biiri ebe engɔ kpe, “Ntsɔ shi nu ende akɛkɛ awe efwɔ antuʼru akwâ zɔnɔ é ndee ebaŋabɔ wunɔ anyi?” 34Yeso biiri ebe angɔ kpe, “Mbɔn ne le ebɔʼ ǹgoŋ mò?” Bɔ bɛɛrɛ abwa ngɔ gíì kpe, “Esàambyɛ mane bwo shuuru deʼ.” 35Yeso gâ ebe ebaŋabɔ wɛ kpe e pla akirinji a chwâ. 36Éngɛ engɔ nu ebɔʼ ǹgoŋ sàambyɛ byɛ mane shuuru chɛ, ndɛʼ ebɛrɛ ebe Ngwe, bɔʼrɔ ndɛ̀ʼ ebe bɔ bɛɛrɛ abwa mɔ e gɛbbɛ ebe ebaŋabɔ wɛ. 37Angɔ bɔ gimkpaʼ â nde zo, bɔ bɛɛrɛ abwa Yeso we bwɛ ntsɔbɔ myɛ à me tye ngɛ efwɔ ènkàm sàambyɛ. 38Nuru bɔ wɛ â nde ngɛ a na anɔm ètɔɔshin kwɛ̀, â dye nɛŋɛ aye mane adɔ̀kpara. 39Èndzobo chɛ Yeso à shi saa ebaŋabɔ wunɔ e ngɔɔ ngɛ, è nyii efwɔ ekpe ngɔɔ abɛɛ abɛ Magadan.

Currently Selected:

Matyo 15: nbt

Highlight

Copy