Matyo 20

Nklama timi mbɔʼ bɔ afwɛʼ efwɔ ǹtsà enta azɔd mɔm

1“Ebwa m̀fɔ̀ ekere ne mwɔ na gho deʼ wɛ à me le ǹtsà enta azɔd mɔ nɔ. À na anji deʼ, egho wɛ gli ngɔɔ ese enchwenchwe é zɛʼ bɔ é fwɛʼ efwɔ aŋu. 2Engɔ zɔʼ bɔ deʼ è bɛ̀rɛ é nɛ̀rɛ̀ angɔ ekɛb ene afwɛʼ efwɔ anji bibi wɛ a mwɔ atɔrɔ asere ŋwaʼ ngɛ, éngɛ engɔ saa angɔ kpe e ngɔɔ fwɛʼ efwɔ ǹtsà enta azɔd. 3À sa bwɛn enyɔ̀m kɔɔ nɔ, engɔ wu ngɔɔ afwɔ zhii gɛ̀rɛ̀ wu zɔ abɔ tsɛrɛ me tamma ne ma fwɛʼ ala deʼ bo. 4Engɔ gâ ebe angɔ kpe ‘Mbɔn gɛrɛ ngɔɔ fwɛʼ efwɔ ǹtsà enta azɔd ndza, mmɛ wa ngo nɛ̀rɛ̀ angɔn ala a me koʼro ngɛ.’ 5Éngɛ angɔ ngɔɔ. Engɔ wu ngɔɔ ese ene enyɔ̀m wum ǹchwɔ̀ fyee mane enyɔ̀m tɛd gɛ̀rɛ̀ fwɛʼ nkirinkin. 6À sa bwɛrɛ enyɔ̀m tan etiʼdi nɔ, engɔ ngɔɔ afwɔ zhii gɛrɛ wu zɔ abɔ tsɛrɛ me tamma ne ma fwɛʼ ala deʼ bo, engɔ biiri ebe angɔ kpe, “Mbɔn ne tsɔmɔ anji bibi ne ma fwɛʼ ala deʼ bo kpe ayɛ?” 7Angɔ gii kpe, “Mbɔʼnga gho deʼ a ke nu angbɛɛ é fwɛʼ bo.” Engɔ ga ebe angɔ kpe, “Mbɔn gɛrɛ ngɔɔ fwɛʼ efwɔ ǹtsà enta azɔd ndza.” 8Èndzobo chɛ etiʼi à di ngɛ, egho wɛ à me le ǹtsà enta azɔd zɔnɔ ngɛ gâ ebe ato ebe abɔ afwɛʼ byɛ kpe engɔ zɔʼɔ bɔ afwɛʼ nɛ̀rɛ̀ angɔ, klada ene abɔ byɛ â ngudu zeʼe ngɛ ngɔɔ ngùdù ene angɔ byɛ â zeʼ enchwenchwe ngɛ. 9Abɔ afwɛʼ byɛ â nu angɔ ene enyɔ̀m tan ngɛ zeʼ é nu ekɛb, e nɛrɛ angɔ ene atɔrɔ asere ŋwaʼ. 10Enyɛrɛ zeʼ ngɛ abɔ byɛ â dye zeʼ ngɛ sa zhuŋu kpe aŋu mbɔɔ a dye zeʼ enchwenchwe ngɛ e ba ngo nɛ̀rɛ̀ angɔɔ ghɛʼ. Bɛʼngɛ â gɛrɛ nɛ̀rɛ̀ gho ŋwàʼaŋwàʼ abwaʼ angɔ ene atɔrɔ asere ŋwaʼ 11Aŋu angɔ à nu âmɔ̀ ekɛb ngɛ, e klada sa kumu gho ǹtsà enta azɔd wunɔ sa gà kpe, 12“Abɔ byɛ â ngudu nu angɔ ene afwɛʼ ngɛ shi fwɛʼ tyetye ene enyɔ̀m ŋwaʼ, e nɛ̀rɛ̀ angɔ nkirinkin nè mbyɛɛ byɛ mbyɛɛ a shi fwɛʼ efwɔ anji bibi etaranchwe ma sɔ̀ʼ angbɛɛ ngɛ. 13Bɛʼngɛ gho ǹtsà gíì ebe egho bi kpe esɔrɔ ngu, nɛɛ kpe mmɛ ke le ebwa bɔɔbɔɔ deʼ engɛ̂ bo. Ngwo a ke bɛrɛ kpe mmɛ wa ngo nɛ̀rɛ̀ awɛ atɔrɔ asere ŋwaʼ bo? 14Nu ekɛb afwɛʼ ngwɛ ngɔɔ anjɛ. Ne edoʼ ndza é ndɛʼ ala yɛ mmɛ a ndɛʼ engɛ̂ ngɛ ebe egho wɛ à ngudu zeʼ ngɛ. 15Ke mwɔ afwɔ ndza é le ebwa wɛ mmɛ me doʼo é le ene ekɛb ngu ngɛ bo? Kà ngwo na ku aghɔʼ mbɔʼnga mmɛ me fuʼu ebwo mbu? 16Éngɛ bɔ byɛ e mwɔ ngùdu ngɛ ba ngo mwɔ embè, angɔ byɛ mwɔ embè ngɛ ba ngo ngùdù.”

Yeso gâ mbɔʼ ewu mɔ e bwɛrɛ ene akyɛ tɛd

(Mak 10:32-34; Luk 18:31-34)

17Aŋu Yeso à ma ngɔɔ a Jerusalɛm mane bɔ bɛɛrɛ abwa wum ǹchwɔ̀ fyee mɔ ngɛ, engɔ bwɛn anji, e nu bɔ bɛɛrɛ abwa mɔ tini ngɔɔ embè mpiʼ gâ ebe angɔ ene egeʼ kpe 18“Mbɔn kɔʼɔ anɔ, aŋu ntsɔ ma ngɔ̀ɔ a Jerusalɛm nɔ, e ba ngo ndɛ̀ʼ Ŋwɔ Gho ebe m̀fɔ̀rɔ̀ zhiri mane bàtee atsɛrɛ. Angɔ ba ngo sɛʼ engɔ gɛrɛ tsɛrɛ kpe e zhudu engɔ. 19E gɛrɛ nu engɔ ndɛ̀ʼ ebe ebɛbɔ byɛ e ma ngo sèrè, wuru gɛ̀rɛ̀ kɔmmɔ engɔ ngɛ. Bɛʼngɛ a sa bwɛrɛ enji tɛd e ba ngo zhwɛɛmɛ engɔ ene ewu.”

Ebwa wɛ eye Zebedii à biiri mbɔʼ bwɔ mɔ ngɛ

(Mak 10:35-45)

20Éngɛ áʼɔ̧̀ Jems mane Eyɔɔ eye Zɛbɛdii zeʼ ebe Yeso nè bwɔanɔm mɔ fyee, chwɔ̀n etongu mɔ efàarà ngɔ ene eghɔ bii kpe engɔ le ebwa deʼ énde. 21Yeso biiri kpe, “Na ayɛ ngwo ma ke?” Engɔ gii kpe, “Ngwo le kpe ŋwɔanɔm ngu ebi tsɔmɔ abɛɛ abwo anɔm njɛ, êwè tsɔmɔ abwo mɔ̀ njɛ endzobo ngwo ma ngo mwɔ m̀fɔ̀ efwɔ ebwa M̀fɔ̀ Ngwe ngwɛ ngɛ.” 22Bɛʼngɛ Yeso gíì ebe bwɔanɔm byɛ kpe, “Mbɔn de ke nɛɛ ala yɛ mbɔn ma biiri ngɛ bo! Mbɔn be né fɔɔ efwɔ enyii yɛ mmɛ ma ngo fɔɔ ngɛ ngà?” Angɔ gii kpe, “Mbyɛɛ be né ngɔ̀ɔ aŋu.” 23Yeso gâ ebe angɔ kpe, “Éŋwaʼa mbɔn be né fɔɔ efwɔ enyii zɔnɔ, bɛʼngɛ é tsɔmɔ abwo nde kà abwo mɔ̀ ndza ke ma afwɔ ndza é tsɛrɛ bo. Akwa yɛ ne ebe abɔ byɛ àtɛ ngu à shi ndeere shi ebe angɔ ngɛ.” 24Èndzobo chɛ abɔ bɛɛrɛ abwa abê wum â zo ebwa wɛ àbwɔngwaanɔm fyee bɔnɔ à ma biiri ebe Yeso ngɛ, angɔ bɔɔ etaa akwâ angɔ. 25Yeso zɔʼ angɔ bɔ gimkpaʼ afwɔbi è ga kpe, “Mbɔn be nɛɛ kpe eto ebe bɔ kè nɛɛ Ngwe be le akama edɔm abɔ byɛ e mwɔ enji angɔ ngɛ. Bɔ kɛ́ angɔ ma kɔʼɔ angɔ ene ekama. 26Ewunɔ ke mwɔ éngɛ nè mbɔn bo. Bɛʼngɛ egho wɛ e ma ke mwɔ gho kɛ abwaʼ ndzɔn ngɛ, engɔ firi shi na gho afwɛʼ ebe abɔ abê nɔ. 27Egho wɛ ma ke mwɔ ato ngɛ firi shi èdzob ebe abɔ abê. 28Ka de ma Ŋwɔ Gho, à ke me zeʼe kpe e fwɛʼ énde bo, bɛʼngɛ engɔ à zeʼe é fwɛʼ ebe bɔ gɛ̀rɛ̀ ndɛʼ ato mɔ ene egha bɔ akɛkɛ é pwèerè angɔ.”

Yeso gli bàfò aghɔɔ fyee

(Mak 10:46-52; Luk 18:35-43)

29Aŋu Yeso mane bɔ bɛɛrɛ abwa mɔ â sa nyɛ̀rɛ̀ a Jeriko ngɛ, ebaŋagho kiri angɔ. 30Bàfò aghɔɔ deʼ èfyee à ne tsɔmɔ eba ǹjìkɛ̀, aŋu angɔ à zo kpe Yeso à na fɔɔ aŋu ngɛ, angɔ sa flaba akwâ eghɛʼ sa ga kpe, “Masakɛ ŋwɔanɔm Devid, le eklasɔn ene mbyɛɛ!” 31Ebaŋagho wɛ bwe ebe angɔ kpe e ba, bɛʼngɛ angɔ fɔɔ embè sa flaba akwâ eghɛʼghɛʼ ma ga kpe, “Masakɛ ŋwɔ Devid le eklasɔn ene mbyɛɛ!” 32Yeso tam, è zɔʼ angɔ biiri kpe, “Mbɔn na ke kpe mmɛ le ene endɔn?” Angɔ gii kpe 33“Masakɛ mbyɛɛ ba ke é zɔ akwâ!” 34Yeso à le eklasɔn ene angɔ gɛ̀rɛ̀ mɔmɔ aghɔɔ angɔ. Egha ŋwaʼ angɔ klada sa zɔ akwâ, gɛ̀rɛ̀ kìrì engɔ.

Currently Selected:

Matyo 20: nbt

Highlight

Copy