Matyo 21

Yeso nyii abɛ Jerusalɛm na m̀fɔ̀ nɔ

(Mak 11:1-11; Luk 19:28-40; Eyɔ 12:12-19)

1Aŋu Yeso mane bɔ bɛɛrɛ abwa mɔ à sa zamma bwɛn a Jerusalɛm, ebɛ Bɛtfagɛ edɔm egu Olifs ngɛ, engɔ tɔm bɔ bɛɛrɛ abwa mɔ fyee embè àmɔ̀, 2gɛ̀rɛ̀ gà ebe angɔ kpe, “Mbɔn ngɔɔ efwɔ abɛ yɛ embè awaʼa ngɛ, aŋu mbɔn ma sa nyii ngɛ, mbɔn ba zɔ akɔb m̀pwɔ̀ bèʼebɔ e me tyɛ mane ŋwɔ mɔ ebara. Mbɔn zɛɛ zeʼe ndɛʼ ena. 3Ma gho deʼ biiri ebwa deʼ endɔn, mbɔn gii ebe engɔ kpe, ‘Masakɛ wa ke angɔ,’ e wa ngo sàa angɔ ekyɛ ŋwaʼ.” 4Â gli énde mbɔʼtye abwa yɛ àmɛnɛkɔn Ngwe à ga ngɛ gli éŋwaʼa kpe,

51 “Mbɔn ga ebe bɔ abɛ Zayɔ̀n kpe

kɔʼɔ, m̀fɔ̀ ndzɔn ya zeʼ endɔn.

È ye bwadabwadà me kwaʼa edɔm akɔb m̀pwɔ̀ bèʼebɔ

nè ŋwɔ mɔ.”

6Bɔ bɛɛrɛ abwa byɛ à ngɔɔ le aŋu Yeso à ga ebe angɔ ngɛ. 7Angɔ à nu akɔb m̀pwɔ̀ bèʼebɔ yɛ nè ŋwɔ mɔ, zèe ǹdiri àmɔ̀ edɔm angɔ, Yeso kwaʼ edɔm. 8Enɔrɔ bɔ à zee ǹdiri àmɔ̀ a njikɛ̀, adeʼ gɔbbɔ atɔ azɔd zèe a chwâ. 9Enɔrɔ bɔ embè mane achim Yeso ngɛ sa zhiri à flaba akwâ kpe, “Ezodo kɛ ebe ŋwɔ ekla Devid, m̀bwarambwad ye ebe egho wɛ è me zeʼe ene ekumu Masakɛ ngɛ. Hosana ebe Ngwe ekere àkɛ.” 10Èndzobo chɛ Yeso à nyii abɛ Jerusalɛm ngɛ, antiri abɛ njiʼri, bɔ gimkpaʼ biiri kpe, “Ewu na awɛ?” 11Enɔrɔ bɔ wɛ gii kpe, “Na Yeso Àmɛnɛkɔn Ngwe wɛ me zeʼe a Nazarɛd abɛ Galilii ngɛ.”

Yeso fli bàfɛnɛ ela efwɔ ndɔngwe kɛ̀

(Mak 11:15-19; Luk 19:45-48; Eyɔ 2:13-22)

12Yeso à nyii efwɔ ndɔngwe kɛ̀ è fli bɔ gimkpaʼ byɛ â ma fɛ̀nnɛ gɛ̀rɛ̀ ma zɔnɔ ela efwɔ ngɛ sàa ese, gɛ̀rɛ̀ bɛ̀ʼrɛ̀ achud ekara mane etan byɛ bàkobo akɛb mane àfɛnɛ mblɔ̂m â ma gli ngɛ. 13Yeso gâ ebe angɔ kpe, “Aŋwɛʼrɛ Ngwe ne ga kpe e ba sa zɔʼrɔ ndɔngwe kɛ ndza kpe ndɔ tsaʼra Ngwe, ebyɛ mbɔn shi le e shi ma afwɔ namma ebe àjii.” 14Bàfò aghɔɔ mane eglaba bɔ zeʼ kla engɔ efwɔ ndɔngwe kɛ̀ aŋu, engɔ glì angɔ. 15Bɛʼngɛ aŋu m̀fɔ̀rɔ̀ zhiri mane bàtee atsɛrɛ à zɔ abwa zodo zodo yɛ Yeso à le ngɛ mane aŋu adɔ̀ à ma flaba akwâ abɛɛ ndɔngwe kɛ̀ angɔ yɛ kpe, “Hosana ebe ŋwɔ ekla Devid” ngɛ, angɔ bɔɔ etaa. 16Éngɛ angɔ zeʼ biiri ebe Yeso kpe, “Ngwo wa zo abwa yɛ àbwɔ bɔnɔ ma ga ngɛ?” Yeso gíì kpe, “Ɔ̧̀ɔɔ mmɛ wa zo! Mbɔn ke shi zɔʼrɔ ebwa wɛ aŋwɛʼrɛ Ngwe me ga kpe, ‘Ngwo Masakɛ shi le adɔ̀ mane bwɔ bwad sa ghɔ awɛ ene aghɛʼ ǹchwɔ̀’ ” ngɛ bo. 17Yeso à saara angɔ è gli efwɔ antiri abɛ yɛ ngɔ̀ɔ ko amɔ a Bɛtani.

Yeso ndwaʼ azɔd akla

(Mak 11:12-14, 20-24)

18Yeso gli enchwenchwe ntwɛn sa ghɛɛbɛ à ngɔ̀ɔ a Jerusalɛm nchwɔrɔ ngɔ sa gwɔn. 19Aŋu Yeso à ma ngɔ̀ɔ ngɛ, è zɔ azɔd akla deʼ eba ǹjìkɛ̀, è ngɔɔ aŋu kɔʼ ne zɔ anta akla deʼ ekere bo à tye afu. Éngɛ è ga ebe azɔd yɛ kpe, “Ngwo yà ne wu kla anta azɔd deʼ bo!” Azɔd yɛ à ku a da mwɔ èndzobo chɛ. 20Èndzobo chɛ bɔ bɛɛrɛ abwa ngɔ à zɔ ebwa wunɔ ngɛ, angɔ kɔ̂n, sa biiri kpe, “Azɔd akla gɛ zamma ku nɔ ene?” 21Yeso gíì kpe, “Mmɛ ga éŋwaʼa endɔn kpe mala mbɔn me le ebɛrɛtaa ene Ngwe ne ma di angɔn bo, shi mbɔn gɛrɛ be né le aŋu mmɛ à le ebe azɔd akla zɔnɔ ngɛ. Bɛʼngɛ gɛrɛ ke tye ma ewunɔ bo, mbɔn be né ga ka de mwɔ ebe egu wunɔ kpe, ‘Nyɛrɛ anɔ ngɔɔ turu efwɔ ebɔrɔndim,’ e wa le engɛ̂. 22Mala mbɔn me le ebɛrɛ, ka mbɔn biiri ma ayɛ ene atsaʼra ebe Ngwe ndzɔn, mbɔn ba le.”

Ebiiri mbɔʼ ekama Yeso

(Mak 11:27-33; Luk 20:1-8)

23Yeso à wu zeʼe a ndɔngwe kɛ̀, aŋu engɔ à sa tee abwa ngɛ, m̀fɔ̀rɔ̀ zhiri mane eto zeʼ biiri ebe engɔ kpe, “Ngwo ne nu ekama zeʼe awe é le abwa zɔnɔ? Awɛ me ndɛʼ ekama zɔnɔ engɛ̂?” 24Yeso gíì kpe, “Mmɛ wa biiri ebwa ŋwaʼ endɔn, mala mbɔn gii ega, mmɛ toʼro afwɔ yɛ mmɛ ma nu ekama aŋu é le abwa zɔnɔ anyi ngɛ. 25Ekama Eyɔɔ à zeʼe awe é ndɛʼ ndim ebe bɔ? Na Ngwe kà na bɔ?” Angɔ klada sa kàŋà àmɔ̀ kpe, “Ntsɔ gii kpe ayɛ ngà? Mala ntsɔ gii kpe na Ngwe à ndɛʼɛ, engɔ wa ngo biiri kpe ebe bɔ ayɛ à gɛ le mbɔn ne bɛrɛ ene Eyɔɔ bo? 26Bɛʼngɛ mala ntsɔ gɛrɛ gii kpe na bɔ â ndɛʼ, ntsɔ ba bumu kpe bɔ be né le ebwa bɔɔbɔɔ deʼ mbɔʼnga angɔ be bɛrɛ kpe Eyɔɔ à na àmɛnɛkɔn Ngwe” 27Éngɛ angɔ gii ebe Yeso kpe, “Mbyɛɛ ke nɛɛ afwɔ Eyɔɔ à nu ekama mɔ aŋu ngɛ bo.” Yeso gɛrɛ gii ebe angɔ kpe, “Mmɛ gɛrɛ ke ma tòʼrò afwɔ yɛ ekama ndza me zeʼe é fwɛʼ abwa zɔnɔ ngɛ bo.”

Nklama timi ene bwɔanɔm fyee

28Yeso biiri kpe, “Enjitsɔ ngwo ne zhuŋu kpe ayɛ mbɔʼ nklama fɔnɔ? Gho deʼ à na aŋu me le bwɔanɔm mɔ fyee, è ngɔɔ ebe etɛbɛ ngɛ ga kpe ‘Ŋwɔ, ngɔ̀ɔ fwɛʼ efwɔ esɔmɔ ànchwɔ̀.’ 29Eŋwɔ wɛ gii kpe ‘Mmɛ wa ka ngɔɔ.’ Bɛʼngɛ afwɔ sa ndada è kobo etaa mɔ ngɔ̀ɔ fwɛʼ efwɔ esɔmɔ wɛ. 30Éngɛ àtɛ wɛ ga ebwa ŋwaʼ wɛ ebe eŋwɔ wè, è gii kpe ‘Baba mmɛ wa ngɔ̀ɔ’ bɛʼngɛ shi ne ngɔɔ fwɛʼ efwɔ esɔmɔ bo. 31Ne êwè abwaʼ àbwɔ fyee bɔnɔ à le ebwa wɛ àtɛ mɔ à ma ke ngɛ?” Angɔ gii kpe, “Etɛbɛ ngɛ.” Yeso gâ ebe angɔ kpe, “Mmɛ ga éŋwaʼa endɔn kpe bàshuru aŋwɛ mane àndese ba nyii efwɔ ebwa m̀fɔ̀ Ngwe mbɔn tɔn é nyii. 32Mmɛ na ga énde mbɔʼnga Eyɔɔ Andɛʼndim à zeʼ tee aghɛʼnji ǹchwɔ̀ endɔn é tsɔmɔ na bɔ Ngwe nɔ, mbɔn ne le ebɛrɛ ene ebwa wɛ engɔ à ma ga ngɛ bo, bɛʼngɛ bàshuru aŋwɛ mane àndese â bɛrɛ ene ekɔn engɔ. Ka de mwɔ èndzobo chɛ mbɔn à zɔ angɔ le éngɛ ngɛ, mbɔn a da ke bɛrɛ é kobo ńtara ntsɔn gɛ̀rɛ̀ bɛ̀rɛ bo.”

Nklama timi mbɔʼ bɔ afwɛʼ efwɔ ǹtsà enta azɔd mɔm

(Mak 12:1-12; Luk 20:9-19)

33Yeso gâ kpe, “Mbɔn zhuru nklama timi tsɛrɛ. Gho deʼ à ne le afwɔ chwâ mɔ, è kɔn ezɔd enta azɔd ndeere mɔm efwɔ, ndò ǹkɛmɛ è kɛɛrɛ, le afwɔ e ma to mɔm, gɛ̀rɛ̀ byɛ atɛʼ ǹkɔʼ ekere àkɛ. Engɔ à to esɔmɔ wɛ ebe bɔ afwɛʼ, nyɛrɛ ngɔ̀ɔ eghɛb. 34Endzobo dza ela koʼ, è sàa bɔ afwɛʼ mɔ ebe abɔ afwɛʼ byɛ kpe e ndɛʼɛ àmbe ela. 35Abɔ afwɛʼ byɛ bedde angɔ, sɔm ebi, zhudu ebi, timi ebi ene atye. 36Egho wɛ wu sàa abɔ afwɛʼ tsɛrɛ e me ghɛʼ fɔɔ abê, abɔ byɛ fɔɔ embè é le ekwa angɔ na â le ekwa abɔ abê ngɛ. 37É ngùdù è sàa ŋwɔanɔm mɔ ebe angɔ zhuŋu kpe ‘Ke shi ga, angɔ ba ngo ghɔ ŋwɔ ngu.’ 38Bɛʼngɛ èndzobo chɛ abɔ afwɛʼ byɛ â zɔ eŋwɔ wɛ ngɛ, e ga àmɔ̀ àmɔ̀ kpe, ‘Oyi! Ànde etiʼi è bwɛn, ntsɔ zhudu engɔ è nde etiʼi ngɔ.’ 39Éngɛ e chɛdɛ eŋwɔ wɛ ndwa achim ǹkɛmɛ zhudu engɔ.” 40Yeso biiri ebe angɔ kpe, “Enjitsɔ egho esɔmɔ wɛ zeʼe efwɔ esɔmɔ, è wa ngo lè ene nè abɔ afwɛʼ bɔnɔ ngà?” 41Angɔ gii kpe, “Engɔ wa ngo zhudu abɔ ǹchù bɔnɔ ene ewu bɔɔbɔɔ, nu esɔmɔ mɔ to ebe abɔ afwɛʼ tsɛrɛ byɛ e ma ngo ma ndɛʼ ela endzobo dza ela ngɛ.”

42Yeso gâ ebe angɔ kpe, “Mbɔn ke shi zɔʼrɔ ebwa wɛ aŋwɛʼrɛ Ngwe me ga ngɛ bo? Kpe

‘etye yɛ àbyɛndɔ à bɛʼrɛ ngɛ

shi etyê ndɔʼndɔ.

Na Masakɛ à le énde,

e nara eghɔɔ da dɛʼɛ.’ ”

43Yeso zhiiri kpe, “Enyɛrɛ éngɛ, mmɛ ga endɔn, e ba nu ebwa m̀fɔ̀ Ngwe endɔn è ndɛ̀ʼ ebe abɔ byɛ e ma ngo shi atsɛrɛ Ngwe ngɛ. 44(Gho deʼ go ene etye zɔnɔ è wa tsɛddɛ amɔ ene akloklo, etye zɔnɔ gɛrɛ turu ene gho deʼ, e gwo engɔ è firi shi ebun”). 45Èndzobo chɛ m̀fɔ̀rɔ̀ zhiri mane bɔ Farisii à zo nklama timi fɔnɔ ngɛ, angɔ nɛɛ kpe Yeso a na timi à ndɛʼ endɔɔ. 46Éngɛ angɔ zɛʼ afwɔ é bere engɔ, bɛʼngɛ e shi ma bumu ebaŋabɔ wɛ à ma kede Yeso na Àmɛnɛkɔn Ngwe ngɛ.

Currently Selected:

Matyo 21: nbt

Highlight

Copy